លោក ផៃ ស៊ីផាន រដ្ឋលេខាធិការទីស្តីការគណៈរដ្ឋមន្រ្តីនិងជាអ្នកនាំពាក្យផងនោះ បានមានប្រសាសន៍ប្រាប់វិទ្យុអាស៊ីសេរីថា គម្រោងនៃដំណើរទស្សនកិច្ចរបស់នាយករដ្ឋមន្រ្តីថៃ នាថ្ងៃទី១៣ តុលាខាងមុខ និងការចរចាដោយសន្តិវិធីដើម្បីដោះស្រាយបញ្ហាព្រំដែននោះមិនទាន់មានការប្រែប្រួលឡើយ ទោះបីជាមានការផ្ទុះអាវុធដែលធ្វើឲ្យមានរបួសដល់កងទ័ពនោះក៏ដោយ។
លោក ផៃ ស៊ីផាន មានប្រសាសន៍យ៉ាងដូច្នេះថា ៖ «រហូតមកដល់ពេលនេះ នៅទីស្ដីការគណៈរដ្ឋមន្ត្រីមិនទាន់មានព័ត៌មានជាផ្លូវការណាមួយ ឬក្រដាសស្នាមជាផ្លូវការណាមួយដែលបង្ហាញប្រាប់ថា មានការផ្លាស់ប្ដូរទេ គឺមានតែបន្តទៅមុខទៀត ហើយយើងឃើញថា មានការសម្របសម្រួលដើម្បីកុំឲ្យមានការផ្ទុះអាវុធសាជាថ្មីម្ដងទៀតដែលមិនអាចទទួលយកបានពីភាគីកម្ពុជា»។
គួរបញ្ជាក់ថា កាលពីវេលាម៉ោង ៣:៣០នាទីរសៀលថ្ងៃសុក្រកន្លងទៅនេះ កងទាហានខ្មែរនិងថៃបានប៉ះទង្គិចគ្នាដោយអាវុធប្រមាណ១០នាទី ឯតំបន់ព្រលានឥន្ទ្រី លើភ្នំទ្រព្យ ចម្ងាយប្រមាណ ៣គីឡូម៉ែត្រពីតំបន់ប្រាសាទព្រះវិហារដែលបណ្ដាលឲ្យទាហានខ្មែរម្នាក់និងទាហានថៃពីរនាក់រងរបួស។
មន្រ្តីរដ្ឋាភិបាលខ្មែរបានសម្តែងការសោកស្ដាយចំពោះការផ្ទុះអាវុធដែលបង្កឡើងដោយក្រុមទាហានថៃនោះ ប៉ុន្តែភាគីថៃបាននិយាយថា ក្រុមយោធាកម្ពុជាទៅវិញទេ ដែលជាអ្នកផ្ទុះអាវុធមុន ដែលនាំឲ្យយោធាថៃបាញ់តប។
ទាក់ទងនឹងការចោទប្រកាន់គ្នានេះ លោក ផៃ ស៊ីផាន បានមានប្រសាសន៍ថា ៖ «យើងឃើញថា មានការផ្ទុះអាវុធនៅក្នុងដីខ្មែរ មិនមែនការផ្ទុះអាវុធនៅក្នុងដីថៃទេ ទីមួយ។ ហើយយើងដឹងថា នៅក្នុងស្មារតីនៃការព្រមព្រៀងរវាងថ្នាក់រដ្ឋមន្ត្រីការបរទេសបាននិយាយយ៉ាងច្បាស់ថា ត្រូវតែប្រាប់រៀងៗខ្លួននៅក្នុងការចល័តទ័ព នៅក្នុងការបោះទីតាំងទ័ព គឺថា អត់ឲ្យមានដំណើរការហ្នឹងទេ»។
ទោះជាយ៉ាងណាក៏ដោយ មន្រ្តីកម្ពុជានិងថៃបានព្រមព្រៀងគ្នារួចហើយដែរដើម្បីបើកការស៊ើបអង្កេតក្នុងរឿងនេះ។
ជម្លោះព្រំដែនរវាងថៃនិងកម្ពុជាបានចាប់ផ្តើមឡើង បន្ទាប់ពីការចូលលុកលុយរបស់ទាហានថៃក្នុងវត្តខ្មែរកែវសិក្ខាគិរីស្វរៈ នៅតំបន់ប្រាសាទព្រះវិហារចាប់តាំងពីថ្ងៃទី១៥ ខែកក្កដា ឆ្នាំ២០០៨។ បន្ទាប់មក ទាហានថៃក៏បានចូលមកកាន់កាប់កន្លែងជាច្រើនទៀត។
លោកនាយករដ្ឋមន្ត្រី ហ៊ុន សែន ដែលទើបប្រកាសរដ្ឋាភិបាលថ្មីកាលពីចុងខែកន្លងទៅនេះ បានអំពាវនាវឲ្យប្រជាពលរដ្ឋខ្មែរមានការអត់ធ្មត់ចំពោះជម្លោះព្រំដែនខ្មែរ-ថៃនោះ ដោយរង់ចាំដំណោះស្រាយកិច្ចចរចាទ្វេភាគី ហើយថា រដ្ឋាភិបាលខ្មែរនឹងដាក់ពាក្យបណ្ដឹងទៅតុលាការអន្តរជាតិ ប្រសិនណាបើការចរចាទ្វេភាគីទទួលបរាជ័យនោះ ហើយថានឹងប្ដឹងទៅក្រុមប្រឹក្សាសន្តិសុខនៃអង្គការសហប្រជាជាតិ បើសិនជាមានការផ្ទុះអាវុធកើតឡើង៕