ក្រោយពេលបើកការប្រជុំសវនាការបានបន្តិចមក លោក នួន ជា បានសុំចាកចេញពីសាលសវនាការទៅបន្ទប់ឃុំឃាំងវិញដូចរយៈពេល ២ថ្ងៃកន្លងទៅដែរ ក្រោមហេតុផលថា ដោយសារការពិភាក្សាដេញដោលនៅថ្ងៃទី៣ នេះ មិនមានការទាក់ទងជាមួយករណីរបស់គាត់នៅឡើយ។ លោក នួន ជា បានទុកឲ្យមេធាវីបន្តស្តាប់ និងការពារក្នុងសាលសវនាការ។
ក្រោយការចាប់ផ្ដើមពិភាក្សាបានជាងមួយម៉ោង គឺនៅវេលាម៉ោង ១០ និង ២០នាទីព្រឹក លោក អៀង សារី តាមរយៈមេធាវីរបស់គាត់ បានសុំចាកចេញពីសាលសវនាការ ដោយសារមូលហេតុសុខភាពទន់ខ្សោយ គឺគាត់ឈឺចង្កេះមិនអាចអង្គុយយូរបាន។
លោក និល ណុន ប្រធានចៅក្រមវនាការ បានអនុញ្ញាតឲ្យលោក អៀង សារី ចាកចេញពីសាលសវនាការ ដោយបង្គាប់ឱ្យតាមដានកិច្ចប្រជុំនៅបន្ទប់សោតទស្សន៍នៅខាងក្រោមសាលសវនាការ តាមរយៈទូរទស្សន៍ពីអង្គសវនាការ។
សវនាការបឋមលើករណី ០០២ ក្នុងថ្ងៃទី៣ មានការពិភាក្សាដេញដោលសំខាន់ទៅលើអញ្ញត្រកម្ម ឬវិធានមិនដែលមានពីមុនមក ទាក់ទងនឹងការបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ និង អញ្ញត្រកម្មអំពីអាជ្ញាយុកាលនៃបទល្មើស និងបទល្មើសដែលមានចែងនៅក្នុងក្រមព្រហ្មទណ្ឌនៃប្រទេសកម្ពុជា កាលពីឆ្នាំ១៩៥៦។
លោក ឌឹម សុវណ្ណារុំ មន្រ្តីកិច្ចការសាធារណៈរបស់សាលាក្ដីខ្មែរក្រហម មានប្រសាសន៍ពន្យល់ថា សវនាការបឋម ដែលពិភាក្សាលើអញ្ញត្រកម្មនានាមួយចំនួននោះ គឺដើម្បីមានការជជែកគ្នាឲ្យបានច្បាស់លាស់ និងសម្រេចជាមុន អំពីការទាមទារនានា និងដោះស្រាយឲ្យហើយ រវាងភាគី ដូចជា មេធាវីការពារជនជាប់ចោទ មេធាវីការពារជនរងគ្រោះ ព្រះរាជអាជ្ញា និងចៅក្រមជាដើម។ ក្នុងពេលនេះដែរ សវនាការបឋម គឺដើម្បីកំណត់នីតិវិធីឲ្យបានច្បាស់លាស់ ថាតើគេអាចអនុញ្ញាតឲ្យសាក្សីប៉ុន្មាននាក់ អ្នកជំនាញប៉ុន្មាននាក់ និងដើមបណ្តឹងរដ្ឋប្បវេណីប៉ុន្មាននាក់ អាចចូលរួមក្នុងសវនាការលើអង្គសេចក្តី ដែលជាសវនាការកាត់សេចក្ដី នៅពេលខាងមុខ។
នៅក្នុងថ្ងៃទី៣ នៃសវនាការសំណុំរឿងលេខ ០០២ នេះដែរ មេធាវីបរទេសមួយរូប បានស្នើសុំឲ្យប្រធានចៅក្រមសវនាការលើកយកករណីសម្រេចអំពីចំនួនសាក្សី អ្នកជំនាញ និងចំនួនដើមបណ្តឹងរដ្ឋប្បវេណីមកពិភាក្សា ដើម្បីសម្រេចនៅថ្ងៃទី៤ ផង៕