ការឈររាយបណ្ដាក់គ្នា ដោយក្នុងដៃកាន់ទង់ជាតិប្រទេសកម្ពុជា និងចិនផងនោះ គឺដើម្បីចាំទទួលស្វាគមន៍ដំណើរទស្សនកិច្ចរបស់មេដឹកនាំសាធារណរដ្ឋប្រជាមានិតចិន លោក ហ៊ូ ជិនតាវ នៅក្នុងខេត្តនេះ។
អាជ្ញាធររដ្ឋាភិបាលបានហៅដំណើរទស្សនកិច្ចនេះថា ជាការដែលធ្វើឱ្យកាន់តែរីកចំរើនខាងមិត្តភាព និងការជួយអភិវឌ្ឍន៍លើវិស័យផ្សេងៗ សម្រាប់កម្ពុជា។
ប្រធានាធិបតីចិន លោក ហ៊ូ ជិនតាវ (Hu Jintao) និងភរិយា បានមកដល់ខេត្តសៀមរាប តាមយន្តហោះពិសេសរបស់ចិន កាលពីវេលាម៉ោងជាង ១០ ព្រឹក ថ្ងៃអាទិត្យទី ១ ខែមេសា។
ដំណើរមកកាន់ខេត្តសៀមរាបនេះ គឺក្នុងគោលបំណងទស្សនាប្រាសាទបូរាណមួយចំនួនផង និងពិនិត្យមើលប្រាសាទបូរាណខ្លះ ដែលប្រទេសចិនផ្ដល់មូលនិធិជួសជុលផង។
លោកប្រធានាធិបតីចិន បានមកទស្សនកិច្ចខេត្តសៀមរាប បន្ទាប់ពីលោកបានធ្វើទស្សនកិច្ចផ្លូវការ នៅឯរាជធានីភ្នំពេញ និងបានចូលគាល់ព្រះមហាក្សត្រខ្មែរ និងជួបជាមួយឥស្សរជនរដ្ឋាភិបាលសំខាន់ៗ ចំនួន ២ ថ្ងៃរួចមក។
លោក ស៊ូ ភិរិន្ទ ជាអភិបាលខេត្តសៀមរាប។ នៅឯព្រះលានយន្តហោះអន្តរជាតិខេត្តសៀមរាប កាលពីព្រឹកថ្ងៃអាទិត្យ លោកមានប្រសាសន៍ថា ក្នុងនាមមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធទាំងអស់ លោកសូមស្វាគមន៍យ៉ាងកក់ក្ដៅ ចំពោះដំណើរទស្សនកិច្ច របស់លោកប្រធានាធិបតីចិន មកកាន់ខេត្ត ដែលជាតំបន់ទេសចរណ៍របស់កម្ពុជាមួយនេះ។
លោក ស៊ូ ភិរិន្ទ៖ «គឺទាំងអស់គ្នាគេពេញចិត្ត គេពេញថ្លើមណាស់ ដោយសារប្រជាជនចិនចុងក្រោយនេះ គឺបានជួយព្រះរាជាណាចក្រកម្ពុជា សន្ធឹកសន្ធាប់ណាស់ តាំងពីផ្លូវថ្នល់ស្ពាន និងបញ្ហាសំខាន់ៗ ជាច្រើនទៀត។ ជាទំនៀមទម្លាប់របស់ខ្មែរយើង យើងកាន់ព្រះពុទ្ធសាសនា យើងត្រូវមានរត្តញ្ញូកតវេទិតាធម៌ ចំពោះអ្នកដែលបានជួយយើងទាន់យើងគ្រាក្រ។ ហើយនិងចុងក្រោយ គឺសំណូមពរឱ្យចិនមកប្រទេសកម្ពុជា និងខេត្តសៀមរាបឱ្យច្រើន ព្រមទាំងភ្ញៀវទេសចរណ៍ផង ដើម្បីបានចំណូលច្រើនក្នុងប្រទេសយើង ក៏ដូចឱ្យបងប្អូនកូនចៅ មានការងារច្រើន មានចំណូលច្រើនក៏កាត់បន្ថយភាពក្រីក្រតាមវិស័យទេសចរណ៍ដែរ»។
លោក ស៊ូ ភិរិន្ទ មានប្រសាសន៍ទៀតថា ខេត្តសៀមរាប ត្រូវការអ្នកវិនិយោគរបស់ប្រទេសចិន ដើម្បីឱ្យចូលមករកស៊ី នៅក្នុងខេត្តនេះ ដោយសារតែបច្ចុប្បន្ន មានអ្នកទេសចរណ៍ចិនជាច្រើនម៉ឺននាក់ បានមកទស្សនាប្រាសាទបុរាណ។ ក៏ប៉ុន្តែ មិនទាន់មានអ្នកវិនិយោគទុនចិន ចូលមករកស៊ី ឱ្យបានច្រើននៅឡើយទេ។
ចំណែកលោក អ៊ី ឈាង ជាអនុប្រធានសមាគមខ្មែរ-ចិន ប្រចាំខេត្តសៀមរាប។ លោកថ្លែងថា ជាលើកដំបូង ដែលលោកបានទៅចូលរួមទទួលដំណើរទស្សនកិច្ចរបស់មេដឹកនាំចិន។ លោក អ៊ី ឈាង យល់ថា វត្តមានរបស់មេដឹកនាំចិន នៅក្នុងប្រទេសកម្ពុជា គឺនឹងធ្វើឱ្យកម្ពុជាទទួលបានផលប្រយោជន៍ជាច្រើន នៅពេលខាងមុខ។
លោក អ៊ី ឈាង៖ «មានអារម្មណ៍ថា រំភើបណាស់ បានគាត់ (ហ៊ូ ជិនតាវ) មកធ្វើទស្សនកិច្ចនៅប្រទេសកម្ពុជាយើង។ អបអរសាទរ ដែលគាត់បានមកជាន់ទឹកដីខេត្តសៀមរាប នាំផលប្រយោជន៍ល្អសម្រាប់ប្រទេសយើង ធ្វើឱ្យទំនាក់ទំនងល្អរវាងប្រទេសទាំងពីរ។ ខ្ញុំយល់ឃើញថា ជាការមួយល្អបំផុត ព្រោះជាច្រើនឆ្នាំមកហើយ យើងបានរក្សានូវមិត្តភាពគង់វង្សល្អណាស់»។
កម្មវិធីទស្សនកិច្ចរបស់លោក ហ៊ូ ជិនតាវ បានឱ្យដឹងថា ដំណើរមកកាន់ខេត្តសៀមរាប នៅថ្ងៃទី១ ខែមេសា គឺលោក និងភរិយា មានគម្រោងទៅទស្សនាប្រាសាទបូរាណ មានប្រាសាទអង្គរវត្ត ប្រាសាទបាយ័ន ប្រាសាទចៅសាយទេវតា ដែលចិនធ្លាប់បានផ្ដល់មូលនិធិជួសជុល និងប្រាសាទតាព្រហ្មជាដើម៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។