អ្នក​លក់​សាច់ជ្រូក​នៅភ្នំពេញ​តវ៉ា​កុំ​ឲ្យ​មាន​ក្រុមហ៊ុន​ផ្តាច់​មុខ

អាជីវករ​លក់​សាច់​ជ្រូក ៤០​នាក់​ដាក់​ពាក្យ​តវ៉ា​ទៅ​ក្រសួង​កសិកម្ម​ឲ្យ​ពិនិត្យ​មើល​ឡើង​វិញ​អំពី​ក្រុមហ៊ុន​រកស៊ី​សាច់​ជ្រូក​រួម​គ្នា​បួន​ម្ចាស់​ដែល​បណ្តាល​ឲ្យ​តម្លៃ​សាច់​ជ្រូក​ឡើង​ចុះ​តាម​តែ​ចិត្ត ហើយ​មក​ទល់​ពេល​នេះ​មិន​ទាន់​មាន​ដំណោះ​ស្រាយ​នៅ​ឡើយ​ទេ។
ដោយ សេក បណ្ឌិត
2010-01-30
អ៊ីម៉ែល
មតិ
Share
បោះពុម្ព
សាច់​ជ្រូក​ដែល​គេ​ដាក់​លក់​ក្នុង​ផ្សារ​មួយ ក្នុង​រាជធានី​ភ្នំពេញ
សាច់​ជ្រូក​ដែល​គេ​ដាក់​លក់​ក្នុង​ផ្សារ​មួយ ក្នុង​រាជធានី​ភ្នំពេញ
RFA Photo

លោក សាន់ ចាន់ថេត អាជីវករ​លក់​សាច់​ជ្រូក​នៅ​ភ្នំពេញ​បាន​ឲ្យ​ដឹង​ថា បញ្ហា​ក្រុមហ៊ុន​៤​ដែល​បាន​ច្របាច់​ចូល​គ្នា​តែ​មួយ​រកស៊ី​ផ្តាច់​មុខ​លើ​ទីផ្សារ​ជ្រូក​នេះ​អាច​ធ្វើ​ឲ្យ​ពួក​គេ​​ដំឡើង​​ថ្លៃ​ស្រេច​តែ​ចិត្ត​បាន។

លោក សាន់ ចាន់ថេត បញ្ជាក់​ថា ៖ «ពី​មុន​វា​មាន​​៦​ក្រុម​ហ៊ុន​ដែល​ទទួល​បាន​អាជ្ញាប័ណ្ណ​ពី​ក្រសួង​កសិកម្ម ក៏​ប៉ុន្តែ​កាល​ដើម​ឡើយ​ដែល​មិន​ទាន់​មាន​បាតុភាព​ ដោយសារ​តែ​គេ​លក់​តាម​ទី​តាំង​រៀងៗ​ខ្លួន​​ អាហ្នឹង​យើង​គិត​ថា វា​ជា​ទីផ្សារ​សេរី ​ហើយ​​ដល់​ពេល​ក្រោយ​មក​បួន​ក្រុមហ៊ុន​ហ្នឹង​គេ​សហការគ្នា​ គេ​ទិញ​អាជ្ញាប័ណ្ណ​ដូច​​ជា​​ទិញ​សិទ្ធិ​ពី​​រក្រុមហ៊ុន​ទៀត​អត់​ឲ្យ​ធ្វើ​ចរាចរណ៍​ ​គេ​សហការ​​គ្នា​​គេ ​សហការ​ប្រមូល​ផ្តុំ​គ្នា​ គឺ​គេ​យក​មក​លក់​តែ​ទី​តាំង​តែ​មួយ​ទេ​​»

លោក​បន្ត​ថា មក​ដល់​ពេល​នេះ​ពុំ​ទាន់​មាន​ការ​ឆ្លើយ​តម​យ៉ាង​ណា​ឡើយ​​ពី​មន្ទីរ​កសិកម្ម​រាជធានី ឬ​ក៏​នាយកដ្ឋាន​បសុព្យាបាល​រាជធានី​ភ្នំពេញ​នោះ​ទេ។

អាជីវករ សាន់ ចាន់ថេត បន្ថែម​ទៀត​ថា ៖ «បាទ! ខ្ញុំ​នៅ​រង់​ចាំ​ប្រហែល​ថ្ងៃ​ច័ន្ទ ថ្ងៃ​អង្គារ​ បើ​សិន​គេ​មិន​ដោះ​ស្រាយ​ខ្ញុំ​និង​អាជីវករ​ទាំងអស់​នឹង​ប្រហែល​ជា​ទៅ​សំណូមពរ​ដល់​ក្រសួង​កសិកម្ម​​ទៀត»

​មន្រ្តី​គម្រោង USAID MSME កម្ពុជា លោក ធឿន ថន ដែល​​ធ្វើការ​ពង្រឹង​សហ​គ្រាស​ខ្នាត​តូច​និង​​មធ្យម​កម្ពុជា​ផ្នែក​លើក​កម្ពស់​អាជីវកម្ម​ជ្រូក​នៅ​តាម​សហគមន៍​ បាន​សម្តែង​នូវ​ក្តី​ព្រួយ​បារម្ភ​ចំពោះ​ធ្វើ​អាជីវកម្ម​ផ្តាច់​មុខ​នេះ​ថា វា​មិន​ត្រឹម​តែ​បង្ក​ឲ្យ​​មាន​ផល​ប៉ះពាល់​យ៉ាង​ធ្ងន់ធ្ងរ​ដល់​អាជីវករ​ប៉ុណ្ណោះ​ទេ​ វា​ថែម​ទាំង​ប៉ះពាល់​ដល់​អាជីវកម្ម​ចិញ្ចឹម​ជ្រូក​កម្ពុជា​នៅ​តាម​សហគមន៍​ដែល​រដ្ឋាភិបាល​កំពុង​តែ​ពង្រឹង​នោះផង។

លោក ធឿន ថន មាន​ប្រសាសន៍​ថា ៖ «អាហ្នឹង​ហើយ​ដែល​គ្រោះ​ថ្នាក់​បំផុត។ បន្តិច​ទៀត​គឺ​មាន​អ្នក​ចិញ្ចឹម​ជ្រូក​ មាន​អ្នក​តំណាង​សហគមន៍​ក្តី សមាគមក្តី​​គេ​នឹង​តវ៉ា​​ ព្រោះ​អី​ដោយសារ​ជ្រូក​គេ​ប៉ុន្មាន​ថ្ងៃ​ហ្នឹង​លក់​អត់​ចេញ ដោយសារ​ក្រុមហ៊ុន​ហ្នឹង​គេ​បង្ខំ​ឲ្យ​យក​ជ្រូក​ពិក្រុមហ៊ុន​។ ចំពោះ​កសិករ កសិដ្ឋាន​ដែល​លក់​ហ្នឹង​ពួក​ហ្នឹង​គេ​អត់​ហ៊ាន​ទៅ​យក​ទេ ដោយសារ​គេ​ផាក​ពិន័យ​ចាប់​ពី​មួយ​លាន​ដល់​១៥​លាន(រៀល)​»

ប្រធាន​នាយកដ្ឋាន​បសុព្យា​បាល លោក កៅ ផល មិន​ទាន់​អាច​ពន្យល់​អំពី​បញ្ហា​នេះ​បាន​ទេ​​ដោយ​លោក​ជាប់​រវល់។

ប្រធាន​សមាគម​ចិញ្ចឹម​ជ្រូក​កម្ពុជា លោក ស្រុន ពៅ ក៏​មាន​ប្រត្តិកម្ម​ដែរ​ចំពោះ​ការ​នាំ​ជ្រូក​ចូល​ពី​បរទេស​ផ្តាច់​មុខ​នេះ ​ដោយ​លោក​បញ្ជាក់​ថា ជា​ការ​សម្លាប់​មុខ​របរ​ចិញ្ចឹម​ជ្រូក​ក្នុង​ស្រុក​។

លោក ស្រុន ពៅ បន្ត​ថា ៖ «ការ​នាំ​ចូល​នេះ​គឺ​បញ្ហា​ទី​មួយ ​គឺ​ថា ធ្វើ​ឲ្យ​ប៉ះពាល់​ដល់​អ្វី​ដែល​ហៅ​ថា នាំ​ជំងឺ​ខ្លះ​មក តិច​ច្រើន​អី​វា​ត្រូវ​តែ​មាន​ហើយ​ ហើយ​ទី២ កាល​ណា​គាត់​នាំ​មក​ច្រើន​អ៊ីចឹង​ វា​នាំ​ឲ្យ​អ្នក​កាប់​នោះ​ កុងស៊ី​ហ្នឹង​គាត់​អត់​ចាប់​ជ្រូក​កសិករ​ទេ»

ក្រុមហ៊ុន​ដែល​ផ្គត់​ផ្គង់​សាច់​ជ្រូក​នាំ​ចូល​ពី​ប្រទេស​ថៃ​ចំនួន​៤ ដែល​ច្របាច់​ចូល​គ្នា​នោះ​ មាន​ក្រុមហ៊ុន​យុវ​ពាណិជ្ជ​ មេគង្គ​ពាណិជ្ជ ងួន ​សុចិត្រ​អភិវឌ្ឍន៍​និង​ក្រុហ៊ុន​ថូគឹម​ស្រៀង​នោះ ​បាន​ទទួល​អាជ្ញាប័ណ្ណ​ពីរដ្ឋាភិបាល​កាល​ពី​ពេលថ្មីៗ​នេះ។ ក្រុមហ៊ុន​នេះ​បាន​ចាប់​ផ្តើម​ធ្វើការ​ដំឡើង​​ថ្លៃ​សាច់​ជ្រូក​ដែល​លក់​ទៅ​ឲ្យ​អាជីវករ​លក់​បន្ត​ពី​​៨.២០០​ទៅ​៩.៥០០​​រៀល​​ក្នុង​​មួយ​គីឡូ​ក្រាម។

នៅ​ក្រោយ​មាន​ការ​ច្របាច់​ក្រុមហ៊ុន​ចូល​គ្នា​តែ​មួយ​នោះ​ដែរ គេ​ឃើញ​មាន​ការ​រឹតត្បិត​ការ​នាំ​ជ្រូក​​ចូល​ពី​ខេត្ត​ចំនួន​បី​មក​លក់​នៅ​ភ្នំពេញ​។ ខេត្ត​ទាំង​បី​នោះ​មាន​ខេត្ត​ព្រៃវែង តាកែវ និង​ខេត្ត​ស្វាយរៀង​ ដែល​​ជា​ខេត្ត​ជាប់​ព្រំដែន​ប្រទេស​វៀត​ណាម ​​ដែល​ជា​ច្រក​មួយ​ក្នុង​ការ​នាំ​ជ្រូក​ចូល​មក​កម្ពុជា​ដែរ៕

ព័ត៌មាន (0)
Share
គេហទំព័រ​ទាំងមូល