ការប្រយុទ្ធគ្នាលើកនេះ ទាហានទាំងសងខាង បានប្រើអាវុធស្វ័យប្រវត្តិ និងអាវុធធុនធ្ងន់មានកាំភ្លើងផ្លោងទំនើបៗ ដាក់គ្នាទៅវិញទៅមក រយៈពេលប្រមាណជិត ៣ម៉ោង។
ទោះយ៉ាងណា ពុំទាន់មានសេចក្ដីរាយការណ៍ណាមួយដែលបញ្ជាក់ថា ទាហានទាំងសងខាងមានអ្នកស្លាប់ និងរបួសប៉ុន្មាននាក់នៅឡើយទេ។ ប៉ុន្តែភ្លាមៗ អង្គភាពប្រតិកម្មរហ័សរបស់ទីស្ដីការគណៈរដ្ឋមន្ត្រី នៃរាជរដ្ឋាភិបាលកម្ពុជា បានចេញសេចក្ដីថ្លែងការណ៍មួយថា ទាហានថៃបានបាញ់កាំភ្លើងមកចំប្រាសាទព្រះវិហារ បណ្ដាលឲ្យបាក់ថែវប្រាសាទព្រះវិហារមួយកន្លែងយ៉ាងធ្ងន់ធ្ងរ។
សេចក្ដីរាយការណ៍ពីកងទាហានខ្មែរដែលប្រចាំនៅតំបន់ប្រាសាទព្រះវិហារ បានឲ្យដឹងថាការប្រយុទ្ធគ្នាដ៏ធំរវាងទាហានខ្មែរ-ថៃ បានចាប់ផ្ដើមឡើងកាលពីល្ងាចថ្ងៃអាទិត្យ វេលាម៉ោងជិត៦កន្លះល្ងាច នៅតំបន់មួយចំនួនជុំវិញប្រាសាទព្រះវិហារ មានតំបន់តាសឹម វាលឥន្ទ្រី, ភ្នំទ្រព្យ និងតំបន់ជាំតែ។
កងទាហានខ្មែរបានឲ្យដឹងថា ថៃបានបាញ់គ្រាប់កាំភ្លើងបំភ្លឺនៅលើមេឃ គ្រប់ដណ្ដប់នៅលើតំបន់សមរភូមិពេលយប់ ដើម្បីបំភ្លឺដល់ទាហានរបស់គេ ដែលកំពុងតែប្រយុទ្ធគ្នានោះផង។
នៅក្នុងពេលដែលទាហានខ្មែរ-ថៃ កំពុងតែប្រយុទ្ធគ្នានោះ លោក ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា បានសរសេរលិខិតមួយច្បាប់ជូនទៅលោកស្រី ម៉ារៀ ល្វីហ្សារីបប៊ីរ៉ូវ៉ូទី (Maria Luiza ribeiro viotti) ប្រធានក្រុមប្រឹក្សាសន្តិសុខនៃអង្គការសហប្រជាជាតិនៅទីក្រុងញីវយ៉ក (New york) ដោយថា កម្លាំងប្រដាប់អាវុធថៃ បានបើកការឈ្លានពានយ៉ាងពេញទំហឹងប្រឆាំងនិងកម្ពុជា ដោយថៃបានប្រើអាវុធទំនើបៗ រួមទាំងកាំភ្លើងធំធុន១០៥មីលីម៉ែត្រ ធុន១២០ ធុន១៣០ និង១៥៥មីលីម៉ែត្រ ចូលតំបន់ប្រាសាទព្រះវិហារដែលជាបេតិកភណ្ឌពិភពលោក។
លោកនាយករដ្ឋមន្ត្រី ហ៊ុន សែន បានថ្លែងថានេះជាការឈ្លានពានរបស់ថៃយ៉ាងជាក់ស្ដែង ប្រឆាំងនិងកម្ពុជា ដែលរំលោភទៅលើសាលក្រមយុត្តិធម៌របស់តុលាការអន្តរជាតិក្រុងឡាអេ ថ្ងៃទី១៥ ខែមិថុនា ឆ្នាំ១៩៦២ និងរំលោភរដ្ឋធម្មនុញ្ញនៃអង្គការសហប្រជាជាតិ មាត្រា២.៣ ២.៤ និង៩៤.១។
ម្យ៉ាងទៀតបានរំលោភទៅលើសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ មាត្រា២ ដែលភាគីកម្ពុជា-ថៃ បានចែង។
លោកនាយករដ្ឋមន្ត្រី ហ៊ុន សែន បានអំពាវនាវឲ្យប្រធានក្រុមប្រឹក្សាសន្តិសុខអង្គការសហប្រជាជាតិកោះប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់ ដើម្បីបញ្ឈប់ការឈ្លានពានរបស់ថៃ។
ប្រភពព័ត៌មានដែលមិនទាន់ច្បាស់ការណ៍ ធ្លោយចេញពីទឹកដីថៃបានឲ្យដឹងថា មេបញ្ជាការយោធាជាន់ខ្ពស់ថៃបានដាក់បញ្ជាឲ្យកងទ័ពរបស់គេ ត្រូវតែវាយដណ្ដើមយកប្រាសាទព្រះវិហារឲ្យបាន បើទោះបីជាត្រូវប្រើកងទ័ពអស់ប៉ុណ្ណា ឬក៏ត្រូវចំណាយសម្ភារៈអ្វីក៏ដោយ។
ប្រភពព័ត៌មានដែលមិនទាន់ច្បាស់ការណ៍ បាននិយាយថា ថៃបានគំរាមបាញ់អាវុធដែលមានជាតិគីមីពុលដាក់មកលើកងទ័ពកម្ពុជា នៅជុំវិញតំបន់ប្រាសាទព្រះវិហារ និងគំរាមប្រើយន្តហោះចម្បាំងវាយប្រហារពីលើអាកាសផង។
បន្ទាប់ពីការប្រយុទ្ធគ្នាជិត៣ម៉ោង រវាងទាហានខ្មែរ-ថៃ ជាច្រើនកន្លែងជុំវិញប្រាសាទព្រះវិហារ ថៃបានបាញ់កាំភ្លើងធំចំនួន ៤គ្រាប់ ធ្លាក់ចូលជ្រៅមកក្នុងទឹកដីកម្ពុជា ជិតទីប្រជុំជនភូមិស្រអែម ឃុំកន្ទួត ស្រុកជាំខ្សាន្ត៕