តាមការប៉ាន់ស្មានមានចំនួនភោជនីយដ្ឋានប្រមាណជាងមួយពាន់ ទាំងចុះបញ្ជីផ្លូវការ និងមិនផ្លូវមកផ្ដុំគ្នានៅទីក្រុងភ្នំពេញ ។ ទោះជាយ៉ាងណាក៏ដោយ អ្នកធ្វើប្រតិបត្តិការលើផ្នែកនេះ បានអះអាងថា បើទោះជាផ្នែកនេះ មានការរីកចម្រើន ប៉ុន្តែភាពជោគជ័យនោះគឺអាស្រ័យលើសេវាកម្មល្អ។
របាយការណ៍របស់វិទ្យាស្ថានបណ្ដុះបណ្ដាល និងស្រាវជ្រាវដើម្បីអភិវឌ្ឍកម្ពុជា (CDRI) បានបង្ហាញថា នៅត្រឹមខែមេសា ឆ្នាំ២០១២ ចំនួនភ្ញៀវមកធ្វើជំនួញនៅកម្ពុជា កើនឡើង ២០% ដែលមានចំនួនជាង ១ម៉ឺន៥ពាន់នាក់ ហើយចំនួនភ្ញៀវដែលមកកម្ពុជា ក្នុងគោលបំណងផ្សេងមានចំនួនជាង ១ម៉ឺន២ពាន់នាក់ កើនឡើងប្រមាណ ១០%។
ក្រៅពីកំណើនភ្ញៀវទេសចរ ក៏មានកំណើនប្រជាជន ការកើនឡើងនៃចំនួនអ្នកដែលមានចំណូលមធ្យម ជាពិសេសនៅរាជធានីភ្នំពេញ បានទាក់ទាញអ្នកវិនិយោគផ្នែកភោជនីយដ្ឋាន រួមទាំងការវិនិយោគទីកន្លែងសម្រាប់អ្នកធុរកិច្ច បង្កភាពងាយស្រួលក្នុងការពិភាក្សា មានការកើនឡើងគួរឲ្យកត់សំគាល់។
សហស្ថាបនិកនៃសណ្ឋាគារ ហ្វ្រង់ជីផានី វីឡាស (Frangipani Villas) លោក ឌិន សុមេធារិទ្ធិ មានប្រសាសន៍ថា កំណើនភ្ញៀវទេសចរនៅរយៈពេលចុងក្រោយនេះបានកើនឡើង ដែលតាមការប៉ាន់ស្មានមានចំនួនជាង ៣លាននាក់។ កត្តានេះនឹងផ្ដល់ផលប្រយោជន៍នៃការរីកដុះដាលនៃផ្នែកសណ្ឋាគារ និងភោជនីយដ្ឋានជាដើម៖ «ទាក់ទងនឹងភោជនីយដ្ឋាន ជាទូទៅក៏ដូចគ្នាអ៊ីចឹងដែរ ដោយសារតែមនុស្សច្រើន ទេសចរច្រើន តម្រូវការហូបចុកជាធម្មតាវាកើនហើយ»។
យ៉ាងណាក៏ដោយលោក ឌិន សុមេធារិទ្ធិ មានប្រសាសន៍បន្ថែមថា ការកើនឡើងនៃចំនួនប្រជាជន រួមទាំងចំណូលរបស់គាត់មានការរីកចម្រើន ក៏ជំរុញការវិនិយោគផ្នែកភោជនីយដ្ឋានកើនឡើងដែរ ប៉ុន្តែលោកអង្កេតឃើញថា ក្នុងចំណោមអ្នកវិនិយោគចាប់ចំណែកទីផ្សារខុសៗ មានមួយចំនួនចាប់ចំណែកទីផ្សារសម្រាប់អ្នកដែលមានចំណូលមធ្យម ឬសម្រាប់ភ្ញៀវបរទេសជាដើម។
អ្នកធុរកិច្ចមួយចំនួនបានអះអាងថា ការចាប់យកទីផ្សារក្នុងស្រុកជាកត្តាសំខាន់ ហើយមានសក្ដានុពលខ្លាំងនៅប្រទេសកម្ពុជា ជាពិសេសនៅទីប្រជុំជន។
នាយកគ្រប់គ្រងនៃភោជនីយដ្ឋាន និងកាហ្វេ (TNC) លោក គួច សុខលី បានឲ្យដឹងថា ឥរិយាបថរបស់ប្រជាជនបានផ្លាស់ប្ដូរនៅរយៈពេលចុងក្រោយ ជាពិសេសក្រុមយុវជនដែលមានអាយុចន្លោះពី ២០ ទៅជាង ៣៥ឆ្នាំ ដែលការវិនិយោគមានសក្ដានុពលខ្លាំងនៅទីប្រជុំជន ឬនៅបណ្ដាខេត្តដែលមានសក្ដានុពលវិស័យទេសចរណ៍។
លោកមានប្រសាសន៍បន្ថែមថា កត្តាសំខាន់មួយទៀត គឺការកើនឡើងនៃអ្នកវិនិយោគមកប្រទេសកម្ពុជា ដែលក្រុមអតិថិជនទាំងនោះត្រូវការទីកន្លែងសម្រាប់ពិភាក្សាប្រកបដោយស្តង់ដារ និងមានផាសុកភាព៖ «អ្នកដែលជាពាណិជ្ចករ គាត់ត្រូវការការកម្សាន្តច្រើន ដោយសារតែនៅស្រុកខ្មែរជាតំបន់មួយដែលអ្នកវិនិយោគចូលមកច្រើន។ អ៊ីចឹងផ្នែកកម្សាន្តទាំងនោះ ជាផ្នែកមួយដែលការបើកភោជនីយដ្ឋានអាចដំណើរការទៅបានច្រើនដែរ»។
លោកមានប្រសាសន៍បន្តថា តាមការប៉ាន់ស្មានចំនួនអ្នកដែលមានតម្រូវការផ្នែកនេះមានប្រមាណ ២០% ទៅ ៣០% នៃចំនួនប្រជាជនដែលរស់នៅទីក្រុងភ្នំពេញ ប៉ុន្តែតាមការអង្កេតរបស់លោក ការផ្គត់ផ្គង់នៅមិនទាន់ឆ្លើយតបទៅនឹងតម្រូវការនេះនៅឡើយទេ។
បញ្ជាក់បន្ថែមអំពីបញ្ហានេះ នាយកប្រតិបត្តិនៃភោជនីយដ្ឋាន Park Cafe លោក គុយ វ៉ាត បានឲ្យដឹងថា ការវិនិយោគផ្នែកនេះ មានសក្ដានុពលខ្លាំងបន្ថែមទៀត ដោយសារតែនិន្នាការរបស់អតិថិជនភាគច្រើនត្រូវការ ដែលបង្កឲ្យអ្នកធុរកិច្ច ឬអតិថិជន មានភាពងាយស្រួលក្នុងការពិភាក្សាអំពីជំនួញរបស់ពួកកាត់។
លោកបញ្ជាក់ទៀតថា ការរៀបចំ និងសេវាកម្មជាកត្តាសម្រាប់ទាក់ទាញអតិថិជន ប៉ុន្តែលោកបញ្ជាក់ថា នៅប្រទេសកម្ពុជា ខ្វះខាតផ្នែកបម្រើសេវាកម្មអតិថិជននៅឡើយ៖ «សំខាន់យើងឃើញថា ប្រឈមខ្លាំង គឺពាក់ព័ន្ធនឹងធនធានមនុស្ស ដូចនៅស្ថានភាពយើងអត់មានសាលាបណ្ដុះបណ្ដាល ការធ្វើម្ហូប ឬក៏ផ្នែកបម្រើអតិថិជនឲ្យខ្លាំងទៅលើភោជនីយដ្ឋានតែម្ដង យើងអត់ទាន់មាន មានតែតាមរយៈអង្គការ ឬក៏មានក្នុងកម្រិតតិចតួចបំផុត។ អ៊ីចឹងនៅពេលដែលយើងចង់រកអ្នកគ្រប់គ្រងម្នាក់ពីរនាក់អី ខ្ងុំគិតថា ពិបាកទៅរក ព្រោះអត់មានជំនាញអីច្បាស់លាស់»។
ទីប្រឹក្សាអភិវឌ្ឍន៍អាជីវកម្មនៃវិទ្យាស្ថាន វី ឃែភីថល (V CAPITAL Institute) លោក ឌិន វីរៈ មានប្រសាសន៍ថា ការបង្កើតភោជនីយដ្ឋានដែលមានអាហារ ឬកាហ្វេ និងសេវាបច្ចេកវិទ្យាផ្សេងទៀតនោះ ជាប្រភេទអាជីវកម្មមួយថ្មីនៅប្រទេសកម្ពុជា ដែលមានសេវាកម្មគ្រប់គ្រាន់អាចឲ្យអតិថិជន ឬអ្នកធ្វើអាជីវកម្មជួបគ្នា ប្រាស្រ័យទាក់ទងគ្នាជាដើម។
លោក ឌិន វីរៈ៖ «វាជាម៉ូដែលមួយថ្មី។ ឧទាហរណ៍ដូចជា ផាក កាហ្វេ ឬ ធីអិនស៊ី គេមិនមែនលក់តែគុយទាវទេ គេលក់គុយទាវ តាមពិតមិនសូវឆ្ងាញ់ប៉ុន្មានទេ ល្មមហូបបាន កន្លែងខ្លះក៏ទ្រលាន់ ហាងខ្លះ តែវាមិនមែនលក់តែគុយទាវ មានលក់សេវាគួបផ្សំ ដូចជាសេវា internet Networking។ កន្លែងហ្នឹងអាចឲ្យគេជួបគ្នា ជួបអ្នករកស៊ី ដៃគូអាជីវកម្ម ដៃគូរអ្នករកស៊ី ដៃគូផ្ទាល់ខ្លួនអ្វីក៏ដោយ»។
លោក ឌិន វីរៈ បញ្ជាក់ទៀតថា សក្ដានុពលផ្នែកនេះមានតម្រូវការខ្ពស់ និងមានប្រសិទ្ធភាពសម្រាប់អតិថិជនដែលមានកិច្ចការរវល់ច្រើន។
តាមការប៉ាន់ស្មានក្នុងចំណោមអតិថិជនដែលមានតម្រូវទីកន្លែងសម្រាប់ពិភាក្សា រួមទាំងមានសេវាភោជនីយដ្ឋានផងនោះ បានចំណាយលុយប្រមាណ ៥ដុល្លារ ទៅ ៦ដុល្លារសហរដ្ឋអាមេរិក ហើយអតិថិជនភាគច្រើនបានចំណាយពេលវេលាប្រមាណកន្លះម៉ោងទៅ ១ម៉ោងជាមធ្យម។
របាយការណ៍របស់ក្រសួងទេសចរណ៍ធ្លាប់បានប៉ាន់ស្មានថា ចំនួនភោជនីយដ្ឋានមានប្រមាណ ៣២០ រួមទាំងចុះបញ្ចីផ្លូវការ និងមិនផ្លូវការ ដែលកំពុងធ្វើប្រតិបត្តិការនៅរាជធានីភ្នំពេញ ប៉ុន្តែអ្នកជំនាញផ្នែកភោជនីយដ្ឋានដែលធ្វើប្រតិបត្តិការនៅរាជធានីភ្នំពេញ បានឲ្យដឹងថា ចំនួនភោជនីយដ្ឋាននៅភ្នំពេញ មានចំនួនប្រមាណជាង ១ពាន់កន្លែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។