មន្ត្រីជាន់ខ្ពស់នៃគណបក្សហ្វ៊ុនស៊ិនប៉ិច បានថ្លែងឲ្យដឹងនៅថ្ងៃទី២ កុម្ភៈ ដោយចោទប្រកាន់លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិចថា បានលក់ទីស្នាក់ការកណ្ដាលរបស់គណបក្សនៅក្នុងទីក្រុងភ្នំពេញ ឲ្យទៅក្រុមហ៊ុនឯកជន និងទីស្នាក់ការនៅតាមបណ្ដាខែត្រមួយចំនួនទៀត មិនប្រកាសឲ្យសមាជិកបក្សដឹងជាចំហទេ។
អតីតអ្នកតំណាងរាស្ត្រគណបក្សហ៊្វុនស៊ិនប៉ិច លោក ផន ចន្ថា ដែលបច្ចុប្បន្នជាសមាជិកគណៈកម្មការនាយកនៃគណបក្សហ៊្វុនស៊ិនប៉ិច បានមានប្រសាសន៍ថា លោក ញឹក ប៊ុនឆៃ បានលក់ស្នាក់ការកណ្ដាលគណបក្សក្នុងតម្លៃជាង ៣លាន ៨សែនដុល្លារអាមេរិក ហើយការលក់ដីទីស្នាក់ការ និងការទិញដីដើម្បីសង់ស្នាក់ការថ្មីវិញនោះ លោក ញឹក ប៊ុនឆៃ ពុំបានរកអ្នកសិក្សាអំពីតម្លៃច្បាស់លាស់ទេ។ លោក ផន ចន្ថា បានអះអាងថា លោក ញឹក ប៊ុនឆៃ ប្រកាសប្រាប់តម្លៃលក់ដំបូងចំនួនទឹកប្រាក់ជាង ៤លាន ២សែនដុល្លារ ប៉ុន្តែពេលលក់ គឺលក់បានតែជាង ៣លានដុល្លារទៅវិញ។
លោក ផន ចន្ថា បានបញ្ជាក់ថា លោក ញឹក ប៊ុនឆៃ ធ្លាប់បានលក់ស្នាក់ការនៅតាមបណ្ដាខែត្រមួយចំនួនទៀត ដូចជាស្នាក់ការនៅខែត្រសៀមរាប ស្នាក់ការបក្សនៅខែត្រកំពង់ចាម នៅខែត្រពោធិ៍សាត់ ដីទូលអំពិល ស្រុកកៀនស្វាយ ខែត្រកណ្ដាល ដីនៅសង្កាត់ព្រៃស ខណ្ឌដង្កោ ហើយការលក់ទាំងនេះ មិនប្រកាសប្រាប់គណៈកម្មការនាយកនោះទេ។ លោក ផន ចន្ថា បានបន្ថែមថា ទោះជាយ៉ាងណាស្នាក់ការកណ្ដាលនៅទីក្រុងភ្នំពេញនេះ លោក និងសមាជិកគណៈកម្មការនាយកមួយចំនួនទៀត មិនចង់ឲ្យលក់ ឬការដោះដូរថ្មីទេ។
អគ្គលេខាធិការគណបក្សហ៊្វុនស៊ិនប៉ិច លោក ញឹក ប៊ុនឆៃ បានបំភ្លឺថា ការលក់ដោះដូរគណបក្សនេះ គឺមានការប្រជុំគណៈកម្មការអចិន្ត្រៃយ៍ចំនួន ១២រួប និងបានពិភាក្សាជាមួយគណៈកម្មការនាយករបស់បក្សចំនួន ៨៧រួប ដែលមានតែ ៣រួបទេ ដែលមិនយល់ព្រមលក់។ លោក ញឹក ប៊ុនឆៃ បានបដិសេធថា ការលក់ស្នាក់ការបក្សនៅតាមបណ្ដាខែត្រ មានតែពីរទេ គឺនៅខែត្រកំពង់ចាម និងខែត្រសៀមរាប ដោយសារតែស្នាក់ការទាំងពីរ មានប្លង់កម្មសិទ្ធិជាឈ្មោះរបស់សមាជិកបក្ស មិនមែនជាឈ្មោះរួមរបស់បក្ស ហើយរាល់ការលក់ដោះដូរទាំងអស់ គឺសុទ្ធតែមានគណៈកម្មការឯកភាព។
លោក ផន ចន្ថាថា បានបញ្ជាក់ថា ការឲ្យគណៈកម្មការនាយកលើកដៃព្រម ឬមិនព្រមនៃការលក់ស្នាក់ការកណ្ដាលគណបក្សនេះ មិនមែនជាប្រព័ន្ធប្រជាធិបតេយ្យទេ ព្រោះថា មិនមែនបោះឆ្នោតជាសម្ងាត់ ហើយសមាជិកគណៈកម្មការនាយកជាច្រើនទៀតជំទាស់មិនចង់លក់ គ្រាន់តែមិនហានជំទាស់បើកជំហរតែប៉ុណ្ណោះ ហើយថា ការធ្វើដូច្នេះជាការគាបសង្កត់។
អនុប្រធានគណបក្សហ៊្វុនស៊ិនប៉ិច លោក លឺ ឡាយស្រេង បានមានប្រសាសន៍ថា លោកបានដឹងអំពីការលក់ស្នាក់គណបក្សនេះ គឺលក់ឲ្យម្ចាស់ធនាគារកាណាឌីយ៉ា ប៉ុន្តែការលក់យ៉ាងណានោះ លោកមិនដឹងច្បាស់នោះទេ។ ប៉ុន្តែយ៉ាងនេះក្តី លោក លឺ ឡាយស្រេង បានគាំទ្រចំពោះការលក់ដោះដូរស្នាក់ការគណបក្សថ្មីនេះ។
ឯកសារខ្ចីប្រាក់ពីធនាគារកាណាឌីយ៉ាបានបង្ហាញថា លោក ញឹក ប៊ុនឆៃ ជំពាក់ប្រាក់ចំនួន ២លានដុល្លារ មានរយៈពេលបីខែ ចាប់ពីថ្ងៃទី៩ កញ្ញា ឆ្នាំ២០១០ ដោយមានឯកសារយោងរបស់លក្ខន្តិកៈ និងបទបញ្ជាផ្ទៃក្នុងរបស់បក្ស និងរបាយការណ៍ប្រជុំរបស់គណៈកម្មការអចិន្ត្រៃយ៍ និងឯកសារពាក់ព័ន្ធជាច្រើនទៀត។
លោក លឺ ឡាយស្រេង បានបញ្ជាក់ថា ប្រាក់កម្ចីទាំងនេះ គេយកទៅសង់ស្នាក់ការថ្មីនៅសង្កាត់បាក់ខែង នៅតាមបណ្ដោយផ្លូវជាតិលេខ៦A។
លោក ញឹក ប៊ុនឆៃ បានបញ្ជាក់ថា ស្នាក់ការថ្មីនេះនឹងសាងសង់រួចនៅចុងខែកុម្ភៈនេះ ដែលមានផ្ទៃដីជាង១ម៉ឺន ១ពាន់ម៉ែត្រក្រឡា ចំណាយទឹកប្រាក់អស់ ១លាន ៥សែនដុល្លារ រីឯស្នាក់ការចាស់មានទំហំជាង ២២០ម៉ែត្រក្រឡាទេ។
ទោះជាយ៉ាងណា លោក ផន ចន្ថា បានបន្ថែមថា ថវិកាដែលបានសាងសង់ស្នាក់ការគណបក្សនៅតាមបណ្ដាខែត្រ និងនៅរាជធានីនោះ គឺជាថវិកាបង់របស់សមាជិក ដែលបង់ចូលបក្ស និងថវិការបស់អ្នកគាំទ្រនៅក្រៅប្រទេស ដែលបានសាងសង់ស្ថិតនៅក្រោមអតីតសម្ដេចក្រុមព្រះ នរោត្តមរណឫទ្ធិ ធ្វើជាព្រះប្រធានគណបក្ស៕