អ្នក​ភូមិ​ប្រមាណ​១០០​នាក់​តវ៉ា​ឲ្យ​អាជ្ញាធរ​បញ្ឈប់​ការ​ឈូស​ឆាយ​ដី

ប្រជាពលរដ្ឋ​២​ឃុំ​នៅ​ស្រុក​បន្ទាយស្រី ប្រមាណ​១០០​នាក់ នៅ​ព្រឹក​ថ្ងៃ​១៥ មករា​នេះ បាន​មក​ជួប​ជុំ​គ្នា​នៅ​ទី​ចម្ការ​ក្នុង​ព្រៃ​មួយ​ដើម្បី​​តវ៉ា​មិន​ឲ្យ​អាជ្ញាធរ​ឈូស​ឆាយ​ដី​បោះ​បង្គោល​កំណត់​ព្រំ​ដី​សម្បទាន​សង្គមកិច្ច​ត​ទៅ​ទៀត​ទេ ដោយសារ​ការ​ឈូស​ឆាយ​និង​បោះ​ព្រំ​នោះ​នឹង​អាច​រំលោភ​ចូល​ដី​ចម្ការ​របស់​ពួកគេ​ដែល​កាន់​កាប់​ជា​យូរ​មក​ហើយ។
ដោយ ហង្ស សាវយុត
2010-01-16
អ៊ីម៉ែល
មតិ
Share
បោះពុម្ព
១៥-មករា-១០: ប្រជាពលរដ្ឋ​មក​ពី​២​ឃុំ​នៅ​ក្នុង​ស្រុក​បន្ទាយស្រី ខែត្រ​សៀមរាប នាំ​គ្នា​ឈរ​តវ៉ា​មិន​ឲ្យ​អាជ្ញាធរ​ឈូស​ឆាយ​បោះ​បង្គោល​ព្រំ​ដី​សម្បទាន ដែល​អាច​នឹង​រំលោភ​ចូល​ដល់​ដី​របស់​ពួកគេ។
១៥-មករា-១០: ប្រជាពលរដ្ឋ​មក​ពី​២​ឃុំ​នៅ​ក្នុង​ស្រុក​បន្ទាយស្រី ខែត្រ​សៀមរាប នាំ​គ្នា​ឈរ​តវ៉ា​មិន​ឲ្យ​អាជ្ញាធរ​ឈូស​ឆាយ​បោះ​បង្គោល​ព្រំ​ដី​សម្បទាន ដែល​អាច​នឹង​រំលោភ​ចូល​ដល់​ដី​របស់​ពួកគេ។
RFA/Hang Savyouth

ប្រជាពលរដ្ឋ​ទាំង​នោះ​មក​ពី​ភូមិ​កំព្រំ ភូមិ​បន្ទាយស្រី​និង​ភូមិ​ទួលក្រឡាញ់ ឃុំ​ឃុនរាម​និង​ឃុំ​ខ្នាសណ្តាយ ខ្លះ​ស្រែក​ទ្រហោ​យំ​និង​មួយ​ចំនួន​ទៀត​បាន​ស្រែក​ទាមទារ​ឲ្យ​អាជ្ញាធរ​បញ្ឈប់​ការ​ឈូស​ឆាយ​ដី​សម្បទាន​សង្គម​កិច្ច​​ទី​នោះ​និង​ឲ្យ​អាជ្ញាធរ​គួរ​ជ្រើស​រើស​យក​ដី​កន្លែង​មួយ​ផ្សេង​ទៀត​ដែល​មិន​ប៉ះពាល់​ដល់​ដី​ចម្ការ​របស់​ពួកគេ។

ក្រុម​ប្រជាពលរដ្ឋ​បាន​ឲ្យ​ដឹង​ដូច្នេះ ៖ «ដី​ខ្ញុំ​បាទ​ហ្នឹង​៣​ហិកតា។ ពី​រឿង​ដក​ដី​ដក​ធ្លី ខ្ញុំ​ជា​កម្មករ​ហ្នឹង​សំណូមពរ​ដល់​សម្តេច​ដើម្បី​ឲ្យ​ជួយ​មិន​ឲ្យ​យក​ដី​ហ្នឹង​ទេ ខ្ញុំ​សុំ​យក​វិញ​អ៊ីចេះ។ ខ្ញុំ​បាត់​បង់​ដី​ជាង​២០​ហិកតា។ ៥​គ្រួសារ ជា​កូន​ជា​ចៅ​ជា​ប្អូន​ជា​បង​មក​ជុំ​គ្នា​ទាំង​អស់​តែ​ម្តង។ ខ្ញុំ​ដាំ​ដំឡូង ខ្ញុំ​ដាំ​ឪឡឹក ខ្ញុំ​ដាំ​ចន្ទី​តាំង​ពី​២០០៣​មក​ដល់​សព្វថ្ងៃ​នេះ។ ខ្ញុំ​​សុំ​បញ្ចប់​កុំ​ឲ្យ​មក​ឈូស​ឆាយ​ដក​ហូត​ដី​ប្រជាពលរដ្ឋ​ត​ទៅ​ទៀត»

ទោះ​យ៉ាង​ណា​អាជ្ញាធរ​ស្រុក​បន្ទាយស្រី បាន​ឆ្លើយ​តប​ថា ការ​ពិត​គឺ​​ប្រជាពលរដ្ឋ​ដែល​លើក​គ្នា​តវ៉ា​នោះ​មាន​ការ​យល់​ច្រឡំ​តែប៉ុណ្ណោះ គឺ​អាជ្ញាធរ​មិន​បាន​យក​ដី​កម្មសិទ្ធិ​របស់​ប្រជាពលរដ្ឋ​ណា​ម្នាក់​ទេ។

អភិបាល​ស្រុក​បន្ទាយស្រី លោក ម៉ឹង វុទ្ធី បាន​មាន​ប្រសាសន៍​ថា ដី​តំបន់​ដែល​អ្នក​ភូមិ​តវ៉ា​នោះ គឺ​រដ្ឋាភិបាល​បាន​ចេញ​អនុក្រឹត្យ​​លេខ​៣៣ ចុះ​ថ្ងៃ​ទី​១១ ខែ​មេសា ឆ្នាំ​២០០៧ មក​ម្ល៉េះ ដោយ​ចាត់​ទុក​ទី​នោះ​ជា​ដី​ព្រៃ​បម្រុង​ទុក​អចិន្ត្រៃយ៍​លើ​ផ្ទ​ដី​ទំហំ​ជាង​២៥០០​ហិកតា ហើយ​ផ្ទៃ​ដី​ទំហំ​ជាង​១៣០០​ហិកតា​ក្នុង​ចំណោម​នោះ គឺ​រដ្ឋាភិបាល​​បាន​ប្រគល់​ឲ្យ​អាជ្ញាធរ​ខេត្ត​សៀមរាប​ធ្វើ​ជា​ដី​សម្បទាន​សង្គមកិច្ច​ដើម្បី​ចែក​ជូន​ប្រជាពលរដ្ឋ​អ្នក​ខ្វះ​ខាត​ដី។

លោក ម៉ឹង វុទ្ធី បាន​មាន​ប្រសាសន៍​ថា អាជ្ញាធរ​បាន​ចាប់​ផ្តើម​ឈូស​ឆាយ​ដី​នោះ​ដើម្បី​បោះ​បង្គោល​ព្រំ​កំណត់​កាល​ពី​ថ្ងៃ​ទី​១៣ មករា កន្លង​មក ដោយ​បាន​កោះ​ប្រជុំ​​​ពន្យល់​ប្រជាពលរដ្ឋ​ឲ្យ​បាន​ដឹងថា អាជ្ញាធរ​គ្រាន់​តែ​កំណត់​ទីតាំង​ដី​នោះ​ជាមុន ហើយ​បើ​ប្រជាពលរដ្ឋ​មាន​ដី​កម្មសិទ្ធិ​នៅ​ក្នុង​តំបន់​នោះ គឺ​ត្រូវ​យក​ឯកសារ​មក​ជួប​គណៈកម្មការ។

លោក ម៉ឹង វុទ្ធី មាន​ប្រសាសន៍​ដូច្នេះ ៖ «ដី​ដែល​ប្រគល់​ជូន​ខេត្ត​សម្រាប់​ធ្វើ​ដី​សម្បទាន​សង្គមកិច្ច​១.៣១៧​ហិកតា។ រដ្ឋ​ទៅ​បោះ​ឯ​ណា​ដូច​ពាក្យ​ចចាម​អារ៉ាម​ថា យើង​ទៅ​យក​ដី​គាត់​គឺ​អត់​មាន​ទេ គឺ​ដី​នេះ​រដ្ឋ​ធ្វើ​ដើម្បី​ចែក​ជូន​ប្រជាពលរដ្ឋ​ដែល​ខ្វះខាត​ដី​ពិត​ប្រាកដ។ អ៊ីចឹង​បាន​​ថា សំខាន់​ដំបូង​យើង​ត្រូវ​ដឹង​ព្រម​កន្លែង​ណា​សិន ហើយ​លិខិត​ពាក់ព័ន្ធ​ឲ្យ​គាត់​កាន់​នឹង​ដៃ​ទៅ ដើម្បី​យក​មក​ដាក់​ក្នុង​គណៈកម្មការ»

លោក សួស ណារិន អ្នក​ស៊ើប​អង្កេត​សមាគម​ការពារ​សិទ្ធិ​មនុស្ស​អាដហុក ប្រចាំ​ខេត្ត​សៀមរាប ដែល​បាន​ចុះ​ស្រាវជ្រាវ​បញ្ហា​នេះ បាន​មាន​ប្រសាសន៍​ថា នេះ​ជា​ការ​ដោះ​ស្រាយ​បញ្ហា​ទំនាស់​ដី​ធ្លី  ក៏​ដូច​ជា​គោល​នយោបាយ​កាត់​បន្ថយ​ភាព​ក្រីក្រ​របស់​រដ្ឋាភិបាល ប៉ុន្តែ​លោក​បាន​រក​ឃើញ​ថា ក្នុង​ចំណោម​ដី​សម្បទាន​សង្គមកិច្ច​​នោះ គឺ​មាន​ដី​ខ្លះ​ជា​កម្មសិទ្ធិ​របស់​ប្រជាពលរដ្ឋ​ពី​មុន​មក ដូច្នេះ​លោក​​សំណូម​ពរឲ្យ​​ធ្វើ​យ៉ាងណា​កុំ​ឲ្យ​​សម្បទាន​ដី​សង្គមកិច្ច​នោះ​ធ្វើ​ឲ្យ​ប្រជាពលរដ្ឋ​​ដែល​ធ្លាប់​កាន់កាប់​ដី​ពី​មុន​មក​ប្រែ​ក្លាយ​ទៅ​ជា​អ្នក​រង​គ្រោះ​ដោយ​ការ​បាត់បង់​ដី​ទៅ​វិញ​នោះ៕

ព័ត៌មាន (0)
Share
គេហទំព័រ​ទាំងមូល