វិទ្យុ FM របស់ថៃប្រចាំខេត្តស៊ីសាកេត បានសម្ភាសន៍ផ្សាយជាមួយតំណាងក្រុមបាតុករមួយរូបកាលពីម៉ោងជាងមួយរសៀលថ្ងៃអាទិត្យ បានឲ្យដឹងថា ក្រុមបាតុករចំនួន៣០នាក់បានចូលមកចរចាជាមួយកងទាហានថៃនៅបន្ទាយក្រហមទល់មុខប្រាសាទព្រះវិហារដើម្បីសុំចូលមកមុខប្រាសាទព្រះវិហាររបស់ខ្មែរ ប៉ុន្តែមិនមានការយល់ព្រមហើយពួកគេបានដកថយទៅវិញ។
តំណាងក្រុមបាតុករថៃបានចោទប្រកាន់ក្រុមតម្រួតថៃថា មិនបានធ្វើតាមតួនាទីត្រឹមត្រូវក្នុងការការពារ ប៉ុន្តែការប៉ះទង្គិចរវាងបាតុករនិងក្រុមផ្សេងទៀតបានចប់ហើយ ៖ "គ្រប់យ៉ាងគឺបានចប់ហើយ ចំណែកឯការប៉ះទង្គិចគ្នាបណ្ដាលឲ្យរងរបួសនិងខូចខាតនោះ ខ្ញុំនឹងដាក់ពាក្យប្ដឹង"។
កងយោធាខ្មែរដែលការពារប្រាសាទព្រះវិហារបានទាក់ទងគ្នាតាមវិទ្យុទាក់ទងឲ្យដឹងថា ក្រុមបាតុករថៃដែលព្យាយាមចូលមកប្រាសាទព្រះវិហារបានដកថយកាលពីវេលាម៉ោង១១ព្រឹកថ្ងៃអាទិត្យ។
មេបញ្ជាការកងយោធពលខេមរភូមិន្ទនៃកងពលធំអន្តរាគមន៍លេខ៣ដែលគ្រប់គ្រងយោធាខ្មែរជុំវិញប្រាសាទព្រះវិហារ លោកឧត្តមសេនីយ៍ទោ ស្រី ឌឹក បានមានប្រសាសន៍ថា ទោះយ៉ាងណានៅថ្ងៃអាទិត្យនេះកងយោធាខ្មែរនៅតែបញ្ជាឲ្យប្រុងប្រយ័ត្នដដែល។
លោក ស្រី ឌឹក បានមានប្រសាសន៍ថា លោកដឹងព័ត៌មានអំពីការដកថយរបស់ក្រុមបាតុករថៃនោះមិនច្បាស់ទេ ប៉ុន្តែតាមប្រជាពលរដ្ឋថៃបានប្រាប់ថា ក្រុមបាតុករបានដកថយនៅត្រឹមស្រុកកាន់ថារ៉ាឡាក់នៃខេត្តស៊ីសាកេតចម្ងាយប្រមាណ៣០គីឡូម៉ែត្រពីប្រាសាទព្រះវិហារ។
លោក ស្រី ឌឹក បានមានប្រសាសន៍ថា ៖ «ការប្រុងប្រៀបរបស់យើងនៅដដែលទេ ព្រោះបញ្ហាទឹកចិត្តគេយ៉ាងម៉េចគឺយើងប៉ាន់ស្មានមិនបានដែរ គ្រាន់តែឮប្រជាជនថៃប្រាប់។ ឥឡូវនៅជួបជុំនៅកាន់ថារ៉ាឡាក់នៅឡើយ»។
លោកឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិនៃប្រទេសកម្ពុជាដែលកំពុងមានវត្តមាននៅប្រាសាទព្រះវិហារ បានមានប្រសាសន៍ថា ស្ថានភាពបានវិលទៅប្រសើរវិញហើយ ហើយលោកមានមោទនភាពចំពោះការខិតខំប្រឹងប្រែងរបស់ប្រមុខរដ្ឋាភិបាលខ្មែរដែលមានបទបញ្ជាម៉ឺងមាត់ក្នុងការការពារទឹកដី។
លោកឧត្តមសេនីយ៍ឯក ឈុំ សុជាតិ បានបញ្ជាក់ថា ៖ «សភាពការណ៍នេះវាល្អប្រសើរ ហើយយើងមានមោនទភាពចំពោះការខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានសម្ដេចមហាសេនាបតីតេជោ ហ៊ុន សែន លោកមានបទបញ្ជាម៉ឺងមាត់ហើយត្រឹមត្រូវ»។
សូមបញ្ជាក់ថា កាលពីថ្ងៃសុក្រ ក្រុមបាតុករអាវលឿងថៃរាប់ពាន់នាក់បានមកដល់ភូមិស្រល់ចម្ងាយប្រមាណ៧គីឡូម៉ែត្រប៉ុនប៉ងចូលមកមុខប្រាសាទព្រះវិហារខ្មែរ ប៉ុន្តែមិនអាចចូលមកបានដោយសារមានការប៉ះទង្គិចគ្នាយ៉ាងខ្លាំងជាមួយប្រជាពលរដ្ឋថៃតាមជាយដែននិងក្រុមតម្រួតបណ្តាលឲ្យរងរបួសមួយចំនួន៕