លោក សំ ឃីសង្វៀន ស្នងការខេត្តកោះកុង មានប្រសាសន៍នៅថ្ងៃទី៤ ខែតុលា ឆ្នាំ២០១២ ថា លោកទទួលបានរបាយការណ៍មួយច្បាប់ កាលពីថ្ងៃទី៣ ថា មានឧទ្ធម្ភាគចក្ររបស់យោធាថៃ បានព្យាយាមហោះរំលោភចូលទឹកដីកម្ពុជា តែត្រូវបានទាហានខ្មែរឈរជើងប្រចាំនៅតំបន់ភូមិតាំមីន ខេត្តកោះកុង ប្រើប្រាស់កាំភ្លើងអាការបាញ់ក្នុងន័យប្រើសិទ្ធិស្វ័យការពារពីការរំលោភលើអធិបតេយ្យភាពរបស់កម្ពុជា៖ «ខ្ញុំមិនទាន់បានទទួលព័ត៌មានពាក់ព័ន្ធអើអារឿងយន្តហោះហ្នឹងទេ។ ប៉ុន្តែ កាលពីម្សិលមិញខ្ញុំបានទទួលរបាយការណ៍មួយថា មានយន្តហោះវាហោះពីតាមខ្សែបន្ទាត់ព្រំដែន»។
មេបញ្ជាការរងវរៈព្រំដែន៣២៧ ប្រចាំខេត្តកោះកុង ដែលថ្លែងក្នុងលក្ខណសុំមិនបញ្ចេញឈ្មោះ អះអាងថា ពិតជាមានឧទ្ធម្ភាគចក្ររបស់ថៃ ហោះរំលោភចូលមកក្នុងទឹកដីរបស់កម្ពុជា ពិតមែន កាលពីថ្ងៃទី៣ ខែតុលា។ លោកបន្តថា តែការហោះហើរឧទ្ធម្ភាគចក្ររបស់ភាគីថៃ នេះ ពុំមែនស្ថិតនៅចំណុចទីតាំងដែលលោកកំពុងគ្រប់គ្រងនោះទេ៖ «ឮថាមានៗហោះអ៊ីចឹងមែន ក៏ប៉ុន្តែ កៀកទៅខាងព្រំដែនពោធិ៍សាត់ ណោះ»។
គេហទំព័ររបស់កាសែតក្នុងស្រុកដែលចុះផ្សាយនៅថ្ងៃទី៤ តុលា ឲ្យដឹងថា ឧទ្ធម្ភាគចក្រថៃ បានហោះត្រឡប់ទៅវិញភ្លាមៗបន្ទាប់ពីយោធាខ្មែរឈរជើងចំណុចភូមិសាស្ត្រ២២៩ នៅទីតាំងភូមិតាមីន បាញ់ព្រមានដោយកាំភ្លើងអាការប្រហែល ១០គ្រាប់ ខណៈឧទ្ធម្ភាគចក្រនោះព្យាយាមហោះសំកាំងថតយករូបភាពពីលើទីតាំងដែលយោធាកម្ពុជា កំពុងឈរជើង។
រដ្ឋមន្ត្រីក្រសួងការពារជាតិ លោក ទៀ បាញ់ មិនធ្វើអត្ថាធិប្បាយទេជុំវិញការរកឃើញថា ឧទ្ធម្ភាគចក្ររបស់ថៃ ព្យាយាមហោះរំលោភចូលក្នុងអធិបតេយ្យភាពរបស់កម្ពុជា នេះ ដោយលោកអះអាងថា កំពុងជាប់ប្រជុំ។ ពុំមានរបាយការណ៍ណាមួយបង្ហាញថា ការបាញ់គំរាមនេះបណ្ដាលឲ្យឧទ្ធម្ភាគចក្ររបស់ថៃ រងការខូចខាតនោះទេ។
មេបញ្ជាការមួយចំនួនដែលឈរជើងនៅចំណុចកើតហេតុ ក្នុងខេត្តកោះកុង មិនហ៊ានបំភ្លឺទេចំពោះករណីភាគីថៃ នៅតែបន្តប្រើប្រាស់អធិបតេយ្យរបស់កម្ពុជា ក្នុងការហោះហើរដោយពុំមានការអនុញ្ញាតជាបន្តបន្ទាប់មកនេះ ដោយពួកគេបញ្ជាក់ថាជាប់រវល់។
ចំណែកលោក កុយ គង់ រដ្ឋលេខាធិការ និងជាមន្ត្រីនាំពាក្យក្រសួងការបរទេសកម្ពុជា លោកបដិសេធចំពោះបញ្ហានេះ ដោយបញ្ជាក់ថា លោកនៅមិនទាន់ទទួលបានព័ត៌មាននេះនៅឡើយនោះទេ៖ «ខ្ញុំអត់បានទទួលព័ត៌មានផងរឿង អើអាចទាក់ទងទៅក្រសួងការពារជាតិ ក្រែងលោគេច្បាស់រឿងហ្នឹង»។
យ៉ាងនេះក្ដី លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា លោកបញ្ជាក់ថា រដ្ឋាភិបាលគួរបង្ហាញភាពរឹងមាំរបស់ខ្លួន លើបញ្ហាបូរណភាពទឹកដីជាមួយប្រទេសជិតខាងឲ្យបានខ្លាំងក្លាតាមរយៈប្រព័ន្ធច្បាប់បន្ថែមទៀត។ លោកគិតថា នេះជាចេតនាមើលស្រាលរបស់ភាគីថៃ មកលើកម្ពុជា៖ «កងទ័ពសៀម ដែលហោះចូលមកហ្នឹង អើមានចេតនាហើយៗគេនឹងចង់ធ្វើតេស្ដសាកល្បងជាមួយរដ្ឋាភិបាលកម្ពុជាយើង ថាតើយើងមានអើភាពរឹងមាំ មានជំហរយ៉ាងណា ហើយអាការដែលត្បិតត្បៀតព័ត៌មានហ្នឹង ហើយដែលយើងមើលឃើញថា រដ្ឋាភិបាលយើងមិនមានជំហរជាក់លាក់ណាមួយ»។
មន្ត្រីអង្គការសង្គមស៊ីវិល ដែលឃ្លាំមើលការរំលោភសិទ្ធិមនុស្ស បានឲ្យដឹងថា នេះជាលើកទីពីរហើយ សម្រាប់ឧទ្ធម្ភាគចក្ររបស់ថៃ ដែលតែងហោះរំលោភចូលទឹកដីកម្ពុជា ក្នុងនោះដោយរួមទាំងការបាញ់សម្លាប់ពលរដ្ឋខ្មែរ ដែលភាគីថៃ តែងអនុវត្តបែបនេះជាបន្តបន្ទាប់។ បើទោះជាកន្លងទៅនេះ កម្ពុជា ធ្លាប់បានដាក់កំណត់ទូតតវ៉ាតាមផ្លូវច្បាប់ប្រឆាំងទង្វើបែបនេះហើយក្ដី តែគេពុំដែលឃើញរដ្ឋាភិបាលទីក្រុងបាងកក អនុវត្តនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។