លោកឯកអគ្គរាជទូត ហែម ហេង នៃព្រះរាជាណាចក្រកម្ពុជា ប្រចាំរដ្ឋធានីវ៉ាស៊ីនតោន មានប្រសាសន៍កាលពីព្រឹកមិញនេះ ក្រោយបានចេញសេចក្តីថ្លែងការណ៍១០ចំណុចបំភ្លឺសាធារណជនអំពីស្ថានភាពបច្ចុប្បន្ននៅកម្ពុជា។
លោក ហែម ហេង បានឲ្យដឹងថា ៖ «គណៈកម្មការនេះបានអញ្ជើញតែគណបក្សប្រឆាំង ហើយនិងអង្គការក្រៅរដ្ឋាភិបាលចូលរួមធ្វើជាសាក្សីទេ គេមិនបានអញ្ជើញតំណាងរាជរដ្ឋាភិបាលកម្ពុជាចូលរួមទេ។ ដូច្នេះបញ្ជាក់ថា គណៈកម្មការនេះលម្អៀងទៅហើយ គ្មានតម្លាភាពទេ។ ដូច្នេះអ្នករៀបចំគណៈកម្មការនេះរៀបចំលម្អៀង គាំទ្រគណបក្សប្រឆាំងស្រេចទៅហើយ ដូច្នេះហើយបានជាស្ថានទូតចេញនូវសេចក្ដីថ្លែងការណ៍មួយដើម្បីជម្រាបសាធារណជនទាំងអស់ឲ្យជ្រាបអំពីការអនុវត្តលទ្ធិប្រជាធិបតេយ្យ ក៏ដូចជាការគោរពសិទ្ធិមនុស្សនីតិរដ្ឋនៅកម្ពុជា សេរីភាពខាងសារព័ត៌មាន ឯករាជភាពរបស់តុលាការ និងអំពីបញ្ហាដីធ្លី ដើម្បីបញ្ជាក់សាធារណជនឲ្យបានជ្រាប»។
សេចក្តីថ្លែងការណ៍បានរៀបរាប់អំពីភាពជឿនលឿននៃការពង្រឹងនិងពង្រីកសេរីភាពនិងសិទ្ធិមនុស្សក្នុងប្រទេស ដោយបានបង្ហាញថា សព្វថ្ងៃកម្ពុជាមានអង្គការសង្គមស៊ីវិលរាប់ពាន់ ក្នុងនោះគ្រាន់តែអង្គការសិទ្ធិមនុស្សអន្តរជាតិក៏មានមិនតិចជាង១១អង្គការដែរ ដូចជា NDI និង IRI ជាដើម រួមទាំងការិយាល័យអគ្គស្នងការសិទ្ធិមនុស្សរបស់អ.ស.ប.ផង។
ស្តីពីសេរីភាពខាងផ្នែកព័ត៌មាន កម្ពុជាមានកាសែតនិងទស្សនាវដ្តីជិត៦០០ស្ថានីយ វិទ្យុ៤០ និងទូរទស្សន៍ដល់ទៅ៧ប៉ុស្តិ៍។ ក្នុងចំណោមប្រព័ន្ធផ្សព្វផ្សាយព័ត៌មានបរទេសដែលកំពុងប្រតិបត្តិការនៅកម្ពុជា គេសង្កេតឃើញថា មានវិទ្យុសំឡេងអាមេរិក VOA វិទ្យុអាស៊ីសេរី RFA និង ទូរទស្សន៍ CNN ជាដើម ហើយបានចោទគណបក្សប្រឆាំងថាជាអ្នកបំភ្លៃការពិត។
លោក ហែម ហេង បានបញ្ជាក់ថា ៖ «ដឹងស្រាប់ហើយថា នៅកម្ពុជាសព្វថ្ងៃនេះ សិទ្ធិមនុស្សក្ដី ទាំងប្រជាធិបតេយ្យក្ដី ទាំងនីតិរដ្ឋក្ដី គឺតាំងពីឆ្នាំ១៩៩៣ ដែលយើងចាប់ផ្ដើមទទួលលទ្ធិប្រជាធិបតេយ្យមក រាជរដ្ឋាភិបាលក៏ដូចជាប្រជាជនទាំងអស់គឺគោរពណាស់ ហើយរដ្ឋធម្មនុញ្ញរបស់យើងក៏បានបញ្ជាក់យ៉ាងច្បាស់ថា ប្រទេសកម្ពុជាជាប្រទេសប្រជាធិបតេយ្យពហុបក្ស ដែលទទួលស្គាល់សេរីភាពក្នុងការបញ្ចេញមតិ សិទ្ធិចាំបាច់ដទៃៗទៀត។ តាំងពីនោះមកលទ្ធិប្រជាធិបេតយ្យហ្នឹងបានរីកចម្រើន ហើយការអនុវត្តសិទ្ធិមនុស្សនៅកម្ពុជាហ្នឹងក៏វិវត្តន៍យ៉ាងខ្លាំងដែរ ប៉ុន្តែគណបក្សប្រឆាំងនៅតែចោទប្រកាន់រាជរដ្ឋាភិបាលបានរំលោភសិទ្ធិមនុស្ស នេះគឺជាការបង្កាច់បង្ខូចការអនុវត្តប្រជាធិបេតយ្យ អនុវត្តសិទ្ធិមនុស្សនៅកម្ពុជា»។
សូមរំឭកថា នៅមិនប៉ុន្មានម៉ោងខាងមុខទៀតនេះ គណៈកម្មការសិទ្ធិមនុស្ស Tom Lantos នៃរដ្ឋសភាសហរដ្ឋអាមេរិក នឹងបើកសវនាការផ្តោតការយកចិត្តទុកដាក់លើវិធានការរបស់រដ្ឋាភិបាលខ្មែរ ដែលត្រូវរាយការណ៍ថាបានបង្រ្កាបសកម្មជន ដោយរួមទាំងអ្នកនយោបាយក្នុងគណបក្សប្រឆាំងដែលបានបញ្ចេញមតិកន្លងមក និងបញ្ហារឹបអូសដីធ្លីរបស់ប្រជាពលរដ្ឋផង។
សាក្សីដែលបានត្រូវអញ្ជើញឲ្យផ្តល់កសិណ ក្នុងពេលសវនាការនេះ មានរួមទាំងអ្នកតំណាងរាស្រ្តមណ្ឌលកំពត គឺលោកស្រី មូរ សុខហួរ, ប្រធានអង្គការសិទ្ធិមនុស្សលីកាដូ គឺលោកស្រីវេជ្ជបណ្ឌិត ពុង ឈីវហ្កេក និងលោក មឿន តុលា ប្រធានកម្មវិធីពលកម្មនៃមជ្ឈមណ្ឌលអប់រំច្បាប់សហគមន៍ផង៕