រដ្ឋាភិបាល​ចាត់​ទុក​វិស័យ​ទេសចរណ៍​ជា​កត្តា​សំខាន់​សម្រាប់​បង្កើន​ថវិកា​ជាតិ

រដ្ឋាភិបាល​ប្រទេស​កម្ពុជា​បាន​ចាត់​ទុក​វិស័យ​ទេសចរណ៍​គឺ​ជា​ឧស្សាហកម្ម​គ្មាន​ផ្សែង និង​ជា​ឧស្សាហកម្ម​មួយ​ប្រភេទ​មាន​លក្ខណៈ​ជា​ប្រព័ន្ធ ដែល​អាច​រក​ចំណូល​ដើម្បី​ទ្រទ្រង់​សេដ្ឋកិច្ច​ជាតិ​និង​គ្រួសារ​ប្រជាពលរដ្ឋ។
ដោយ សេក បណ្ឌិត
2010-01-28
អ៊ីម៉ែល
មតិ
Share
បោះពុម្ព
១០-មករា-២០១០: ទេសចរ​អង្គុយ​កម្សាន្ត​នៅ​ឯ​ឆ្នេរ​សមុទ្រ ក្នុង​ខែត្រ​ព្រះសីហនុ។
១០-មករា-២០១០: ទេសចរ​អង្គុយ​កម្សាន្ត​នៅ​ឯ​ឆ្នេរ​សមុទ្រ ក្នុង​ខែត្រ​ព្រះសីហនុ។
RFA Photo

នៅ​ក្នុង​ឆ្នាំ​ថ្មី​២០១០​នេះ រដ្ឋាភិបាល​នៅ​តែ​ចាត់​ទុក​វិស័យ​ទេសចរណ៍​ជា​មុខ​ព្រួញ​សំខាន់​ក្នុង​ការ​បង្កើន​ថវិកា​ជាតិ បើ​ទោះ​បី​វិស័យ​នេះ​កំពុង​ទទួល​រង​នូវ​ផល​ប៉ះពាល់​ខ្លះ​ពី​វិបត្តិ​សេដ្ឋកិច្ច​ពិភពលោក​ក៏ដោយ។

តើ​រដ្ឋាភិបាល​រំពឹង​លើ​ចំណុច​អ្វី​ខ្លះ​ក្នុង​វិស័យ​ទេសចរណ៍​ដែល​អាច​ចាត់​ទុក​ជា​ចំណុច​វិជ្ជមាន​ក្នុង​ការ​ទាញ​យក​ផល​ពី​វិស័យ​ទេសចរណ៍​នោះ?

ទាក់ទិន​នឹង​បញ្ហា​នេះ លោក​នាយករដ្ឋមន្រ្តី ហ៊ុន សែន បាន​សម្ដែង​នូវ​សុទិដ្ឋិនិយម​ចំពោះ​វិស័យ​នេះ ហើយ​ចាត់​ទុក​ចំណុច​អាទិភាព​ក្នុង​ការ​ស្រូប​យក​ចំណូល​ក្នុង​ថវិកា​ជាតិ។ លោក​នាយករដ្ឋមន្រ្តី​ខ្មែរ​មាន​ជំនឿ​ចិត្ត​បែប​នេះ ដោយសារ​លោក​ពឹង​ផ្អែក​លើ​អត្រា​ភ្ញៀវ​ទេសចរណ៍​អន្តរជាតិ​បាន​មក​ទស្សនា​ប្រទេស​កម្ពុជា​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​មាន​ការ​កើន​ឡើង​ជា​លំដាប់។

លោក ហ៊ុន សែន ថ្លែង​ឲ្យ​ដឹង​នៅ​ក្នុង​ពិធី​សម្ពោធ​មជ្ឈមណ្ឌល​ផ្សព្វផ្សាយ​វប្បធម៌​ទេសចរណ៍​ភ្នំពេញ-​ដេហ្គូឃ្យុងបុក នៅ​សង្កាត់​ទន្លេបាសាក់ រាជធានី​ភ្នំពេញ នៅ​ព្រឹក​ថ្ងៃ​ទី​២៦ មករា​ថា ភ្ញៀវ​ទេសចរ​អន្តរជាតិ​បាន​ចូល​មក​ទស្សនា​កម្ពុជា​ក្នុង​ឆ្នាំ​២០០៨ មាន​២.០២៥.៤៦៤​នាក់ បើ​ប្រៀបធៀប​ទៅ​ឆ្នាំ​២០០៧ គឺ​កើន​ឡើង ៥,៥% ហើយ​ក្នុង​រយៈពេល​១១​ខែ​ក្នុង​ឆ្នាំ​២០០៩ គឺ​មាន​ជាង​១.៩២0.000​នាក់ បើ​ប្រៀបធៀប​ទៅ​នឹង​ឆ្នាំ​២០០៨ គឺ​កើន​ឡើង ១,៦%។

លោក ហ៊ុន សែន បាន​បញ្ជាក់​ទៀត​ថា ការ​កើន​ឡើង​នៃ​ភ្ញៀវ​ទេសចរ​បរទេស​នេះ បាន​ធ្វើ​ឲ្យ​ចំណូល​ថវិកា​ជាតិ​ក៏​មាន​ការ​កើន​ឡើង​ដែរ ៖ «ចំណូល​ពី​វិស័យ​ទេសចរ​កើន​ឡើង​គួរ​ឲ្យ​កត់​សម្គាល់​ផង​ដែរ ដែល​បាន​កើន​ឡើង​ពី ៥៧៨​លាន​ដុល្លារ​នៅ​ឆ្នាំ​២០០៤ ដល់ ១.៥៩៤​លាន​ដុល្លារ​ឆ្នាំ​២០០៨ ផ្ដល់​ការងារ​ប្រមាណ​ជាង​៣០​ម៉ឺន​នាក់ និង​រួម​ចំណែក​ប្រមាណ​ជាង ១២,៥% នៃ​ផលិតផល​សរុប​ក្នុង​ស្រុក»

លោក​បន្ត​ថា ចំណូល​ពី​វិស័យ​ទេសចរណ៍​គឺ​ជា​ការ​ចាក់​បញ្ចូល​ភ្លាមៗ​នូវ​រូបិយប័ណ្ណ​បរទេស​ក្នុង​ចរន្ត​សេដ្ឋកិច្ច​កម្ពុជា ដែល​ជា​ប្រព័ន្ធ​សេដ្ឋកិច្ច​ទីផ្សារ ហើយ​ចំណូល​នេះ​ជ្រាប​ចូល​គ្រប់​សមាសភាព​ស្ថាប័ន​សេដ្ឋកិច្ច។

លោក​នាយករដ្ឋមន្រ្តី ហ៊ុន សែន បាន​បញ្ជាក់​ពី​មូលហេតុ​ដែល​នាំ​ឲ្យ​មាន​កំណើន​ទេសចរណ៍​ជា​បន្ត​បន្ទាប់​នេះ គឺ​ដោយសារ​តែ​ប្រទេស​កម្ពុជា​មាន​ស្ថិរភាព​ល្អ​ប្រសើរ​ខាង​ផ្នែក​នយោបាយ​និង​សន្តិសុខ​សង្គម។

លោក ហ៊ុន សែន បាន​ថ្លែង​យ៉ាង​ដូច្នេះ​ថា ៖ «ដោយ​ហេតុ​ថា ព្រះរាជាណាចក្រ​កម្ពុជា​យើង​មាន​សក្ដានុពល​យ៉ាង​ធំ​ធេង​ស្រាប់​សម្រាប់​ការ​អភិវឌ្ឍ​វិស័យ​ទេសចរណ៍ ដោយ​ឈរ​លើ​មូលដ្ឋាន​នៃ​ធនធាន​វប្បធម៌ ប្រវត្តិសាស្រ្ដ​ធម្មជាតិ​និង​ការ​ខិតខំ​ប្រឹងប្រែង​របស់​បង​ប្អូន​ប្រជាជន រួម​ជាមួយ​នឹង​គ្រប់​ស្ថាប័ន អង្គភាព​ពាក់ព័ន្ធ ដៃគូ​អភិវឌ្ឍន៍​និង​វិស័យ​ឯកជន​ក្រោម​គោល​នយោបាយ​ទេសចរណ៍»

តំណាង​រាស្រ្ត​បក្ស​ប្រឆាំង លោក យឹម សុវណ្ណ បាន​ទទួល​ស្គាស់​ថា វិស័យ​ទេសចរណ៍​ជា​ប្រភព​ចំណូល​មួយ​ដ៏​សំខាន់​សម្រាប់​អភិវឌ្ឍ​សេដ្ឋកិច្ច​ជាតិ​និង​សង្គម​គ្រួសារ​កម្ពុជា។ ប៉ុន្តែ​លោក​បាន​សង្កេត​ឃើញ​ថា កន្លង​មក​ចំណូល​ពី​វិស័យ​ទេសចរណ៍​មិន​បាន​ចូល​ក្នុង​ខ្ទង់​ថវិកា​ជាតិ​ប៉ុន្មាន​ទេ ហើយ​ប្រជាពលរដ្ឋ​គេ​ឃើញ​ថា ពួកគាត់​បាន​ទទួល​ផល​តិច​តួច​បំផុត​ពី​វិស័យ​ទេសចរណ៍។

បញ្ហា​នេះ​លោក យឹម សុវណ្ណ បាន​ពន្យល់​យ៉ាង​ដួច្នេះ​ថា ៖ «សព្វថ្ងៃ​ថវិកា​ចូល​រដ្ឋ​កើន ប៉ុន្តែ​វា​អត់​សមាមាត្រ​ទៅ​នឹង​កំណើន​ទេសចរ​ពិត​ប្រាកដ​ទេ ពីព្រោះ​បើ​យើង​ពិនិត្យ​មើល​ផល​ប្រយោជន៍​ពី​ទេសចរណ៍ គឺ​ថា នរណា​បាន​ផល​ប្រយោជន៍​ពី​ហ្នឹង? គឺ​ប្រជាពលរដ្ឋ​ខ្មែរ​យើង​បាន​តិចតួច​ណាស់។ យើង​ក្រឡេក​មើល​សណ្ឋាគារ ភាគ​ច្រើន​ជា​សណ្ឋាគារ​របស់​ក្រុមហ៊ុន​បរទេស។ យើង​ក្រឡេក​មើល​ក្រុមហ៊ុន​ទេសចរណ៍ ក្រុមហ៊ុន​អ្នក​នាំ​ភ្ញៀវ ភាគ​ច្រើន​ជា​ក្រុមហ៊ុន​របស់​បរទេស។ ការ​ចូល​ទៅ​ទស្សនា​អង្គរវត្ត​ជា​ក្រុមហ៊ុន​របស់​ខ្មែរ ក៏ប៉ុន្តែ​ដោយសារ​តែ​អត់​មាន​ការ​ដាក់​ឲ្យ​ដេញ​ថ្លៃ​ប្រគល់​សិទ្ធិ​ក្នុង​ការ​ធ្វើ​អាជីវកម្ម​ហ្នឹង ធ្វើ​ឲ្យ​ប្រាក់​ចំណូល​ចូល​រដ្ឋ​វា​តិច។ អ៊ីចឹង​យើង​ឃើញ​មាន​ការ​វិវឌ្ឍ​ទៅ ប៉ុន្តែ​ប្រាក់​ចំណូល​ដែល​យើង​ទាញ​បាន​ពី​វិស័យ​ទេសចរណ៍​ហ្នឹង គឺ​ថា តិចតួច​បំផុត​ដែល​ធ្លាក់​ទៅ​ដល់​ដៃ​ប្រជាពលរដ្ឋ​ខ្មែរ​ពិត​ប្រាកដ ហើយ​យើង​មើល​វិស័យ​អាកាសចរណ៍។ វិស័យ​អាកាសចរណ៍​ខ្មែរ​យើង​អត់​មាន​អាកាសចរណ៍​ខ្លួន​ឯង​ទេ ទើប​តែ​បង្កើត​ថ្មីៗ​នេះ មាន​អាកាសចរណ៍​ជាមួយ​នឹង​ក្រុមហ៊ុន​វៀតណាម​ទៀត។ ក្រុមហ៊ុន​វៀតណាម​គេ​ក្ដោបក្ដាប់​ជាង​ពាក់​កណ្ដាល ហើយ​ក្រៅ​ពី​នោះ​ក៏​ក្រុមហ៊ុន​ថៃ​និង​ក្រុមហ៊ុន​បរទេស​ទាំង​អស់»

លោក​បន្ត​ថា បើ​តាម​សក្តានុពល​ធនធាន​ធម្មជាតិ សម្បត្តិ​វប្បធម៌​ខ្មែរ​ដែល​មាន​ស្រាប់​មក​នោះ ប្រទេស​កម្ពុជា​គួរ​តែ​ទទួល​បាន​ការ​គាំទ្រ​ពី​ភ្ញៀវ​ទេសចរ​គ្រប់​ជាតិ​សាសន៍ ក្នុង​មួយ​ឆ្នាំ​យ៉ាង​ហោច​ណាស់​ក៏​ជាង​១​លាន​នាក់​ដែរ។ ប៉ុន្តែ​សព្វថ្ងៃ​នេះ ចំនួន​ភ្ញៀវ​ទេសចរ​មក​កម្ពុជា​មាន​ចំនួន​តិចតួច​ណាស់ បើ​ប្រៀបធៀប​នឹង​ប្រទេស​ជិត​ខាង។

លោក យឹម សុវណ្ណ មាន​ប្រសាសន៍​បន្ត​ថា ៖ «ប្រទេស​ជិត​ខាង​យើង​អត់​សូវ​មាន​ប្រាសាទ អត់​សូវ​មាន​កន្លែង​លំហែ កន្លែង​កម្សាន្ត​អី​ច្រើន​ទេ។ ដូច​នៅ​វៀតណាម​អត់​មាន​ប្រាសាទ​អី​ទាំង​អស់ ឃើញ​មាន​តែ​ធម្មតា មាន​តាម​ទីក្រុង មាន​កែ​លម្អ​ទីក្រុង កែ​លម្អ​អី​ប៉ុណ្ណឹង​ទេ។ ប្រទេស​ថៃ​ប្រាសាទ​ក៏​មិន​មាន​ដូច​ប្រទេស​កម្ពុជា​យើង ប៉ុន្តែ​គេ​ទាក់​ទាញ​ទេសចរ​ក្នុង​មួយ​ឆ្នាំៗ​ជាង​១០​លាន​នាក់ ដោយសារ​គេ​មាន​ហេដ្ឋារចនាសម្ព័ន្ធ ដោយសារ​គេ​មាន​តំបន់​ទេសចរណ៍​ច្រើន ដោយសារ​គេ​មាន​អនាម័យ បរិស្ថាន​ល្អ ដោយសារ​រដ្ឋាភិបាល​និង​ប្រជាពលរដ្ឋ​គេ​មាន​បដិសណ្ឋារកិច្ច​ណាស់ ហើយ​តម្លៃ​គេ​ក៏​ថោក​ទៀត។ អ៊ីចឹង​បើ​ប្រៀបធៀប​ទៅ​នឹង​ប្រទេស​ជិត​ខាង គឺ​យើង​ខ្សោយ​ជាង​គេ យើង​ចាញ់​គេ ហើយ​យើង​អត់​មាន​ខិតខំ​ប្រឹងប្រែង​កែ​លម្អ​ទេ រស់​ទៅ​តាម​សាមាជីវោ បាន​ប៉ុន្មាន​យក​ប៉ុណ្ណឹង​ទៅ បើ​ថា​ធ្វើ​អ្វី​ឲ្យ​ប្លែក​ដើម្បី​ទាក់​ទាញ​ឲ្យ​បាន​ច្រើន គឺ​គ្មាន​ទេ»

សហ​ប្រធាន​វិស័យ​ទេសចរណ៍​ផ្នែក​ឯកជន លោក ហូរ វណ្ឌី បាន​ទទួល​ស្គាល់​ថា ចំនួន​ភ្ញៀវ​ទេសចរណ៍​ពី​បរទេស​ចូល​មក​ទស្សនា​កម្ពុជា កាល​ពី​ឆ្នាំ​២០០៩ គេ​ឃើញ​មាន​កំណើន​កើន​ពិត​មែន ប៉ុន្តែ​កើន​តែ​តួលេខ​នៃ​ចំនួន​ភ្ញៀវ​ទេ រី​ឯ​ការ​ចំណាយ​និង​ការ​ស្នាក់នៅ​របស់​ភ្ញៀវ​ទេសចរ​គឺ​មាន​រយៈពេល​ខ្លី​និង​ពុំ​សូវ​មាន​លុយកាក់​គ្រប់គ្រាន់​ក្នុង​ការ​ចាយ​វាយ​ឡើយ។

លោក យឹម សុវណ្ណ បាន​មាន​ប្រសាសន៍​យល់​ស្រប​ចំពោះ​ការ​លើក​ឡើង​របស់​សហ​ប្រធាន​វិស័យ​ទេសចរណ៍​ផ្នែក​ឯកជន លោក ហូរ វណ្ឌី។

លោក​បន្ត​ថា កម្ពុជា​គួរ​តែ​មាន​ការ​កែ​ទម្រង់​ប្រព័ន្ធ​គ្រប់គ្រង​ទេសចរណ៍ ធ្វើ​យ៉ាង​ឲ្យ​មាន​តម្លាភាព​ក្នុង​វិស័យ​នេះ និង​ត្រូវ​លុប​បំបាត់​អំពើ​ពុករលួយ បញ្ហា​អសន្តិសុខ​សង្គម​ដែល​គំរាម​កំហែង​ដល់​ភ្ញៀវ​ទេសចរណ៍ ព្យាយាម​ធ្វើ​ឲ្យ​ថ្លៃ​ដើម​ផលិតផល​ទាប អភិរក្ស​តំបន់​ទេសចរណ៍​ធម្មជាតិ ឧទ្យាន​ជាតិ បណ្តុះបណ្តាល​ធនធាន​មនុស្ស​និង​ត្រូវ​លើក​ទឹក​ចិត្ត​ឲ្យ​មាន​ក្រុមហ៊ុន​ទេចរណ៍​ក្នុង​ស្រុក​ច្រើន ហើយ​រឹតត្បិត​ចំពោះ​ក្រុមហ៊ុន​បរទេស​ដែល​មក​រក​ស៊ី​បែប​ទុច្ចរិត​នៅ​កម្ពុជា។

នៅ​កម្ពុជា​ក្រៅ​ពី​រាជធានី​ភ្នំពេញ គេ​ឃើញ​មាន​ខេត្ត​ពីរ​ដែល​ជា​តំបន់​ទេសចរណ៍​លេច​ធ្លោ​ជាង​គេ គឺ​ខេត្ត​សៀមរាប​និង​ខេត្ត​ព្រះសីហនុ ដែល​គេ​ចាត់​ទុក​ថា ជា​បេះដូង​នៃ​តំបន់​ទេសចរណ៍​កម្ពុជា៕

ព័ត៌មាន (0)
Share
គេហទំព័រ​ទាំងមូល