ពាក្យបណ្តឹងរបស់លោក ម៉េត ហ្វា នៅថ្ងៃទី៨ ខែសីហា ឆ្នាំ២០០៨ ដាក់ជូនលោក អ៊ុយ សំភារ ព្រះរាជអាជ្ញាររងតុលាការខេត្តបាត់ដំបង បានបញ្ជាក់កម្មវត្ថុប្តឹងបុរស ឈ្មោះ ប៊ុន លី អាយុ ៥៣ឆ្នាំ ឈ្មោះ យិន ហ៊ត អាយុ ៥៧ឆ្នាំ នៅឃុំអូរចារ និងឈ្មោះ តូច សារ៉ន ហៅ ធំ នៅឃុំចម្ការសំរោង ស្រុកបាត់ដំបង ខេត្តបាត់ដំបង។
លោក ម៉េត ហ្វា បានចោទថា ឈ្មោះ តូច សារ៉ន ហៅ ធំ កាលពីថ្ងៃទី២៥ ខែកក្កដា ឆ្នាំ២០០៨ បានប្រើល្បិចនាំកូនស្រីរបស់លោក ឈ្មោះ ហ្វា រ៉ហ្វ៊ី អាយុ ១៦ឆ្នាំ ទៅស៊ីផឹកជាមួយឈ្មោះ ប៊ុន លី និងឈ្មោះ យិន ហ៊ួត នៅក្នុងហាងជ្រៃកោង ខេត្តបាត់ដំបង។ ផឹកស៊ីរួច ពួកគេបាននាំ ហ្វា រ៉ហ្វ៊ី ទៅចូលខារ៉ាអូខេនៅហាងប៉ាស៊ីហ្វិកណៃ ហើយបានធ្វើសកម្មភាពដាក់ថ្នាំញៀននិងប្រព្រឹត្តអំពើអនាចារលើរូបនាង។
លោក ម៉េត ហ្វា មានប្រសាសន៍ដូច្នេះថា ៖ «ខ្ញុំកើតទុក្ខមិនសុខចិត្ត ព្រោះធ្វើមកលើកូនខ្ញុំវាហួសហេតុពេក បានជាខ្ញុំចេញប្តឹង ឲ្យច្បាប់រកយុត្តិធម៌កុំឲ្យជនល្មើសហ្នឹងប្រព្រឹត្តអំពើអ៊ីចឹងតទៅទៀត»។
លោក ធាន ស៊ុនហេង ត្រូវជាពូជនរងគ្រោះ ហ្វា រ៉ហ្វ៊ី ដែលបានឃើញក្មួយស្រី នៅក្រោយត្រូវគេប្រព្រឹត្តអំពើអនាចារទៅលើ ហើយត្រូវបានឈ្មោះ តូច សារ៉ន ហៅ ធំ ដឹកតាមម៉ូតូនោះ បានរៀបរាប់ថា ៖ «អាធំបានជិះម៉ូតូដៃម្ខាង ហើយដៃម្ខាងបានឱប ហើយនាងខ្លួនទន់ទៅលើម៉ូតូអស់ហើយ តាមសម្ដីអាធំថា ស្រវឹងប៊ីយ៊ែរ ប៉ុន្តែទៅមន្ទីរពេទ្យព្យាបាល ពេទ្យថា ត្រូវថ្នាំពុល ជាតិថ្នាំងងុយដេកអីអ៊ីចឹង»។
ហ្វា រ៉ហ្វ៊ី អាយុ ១៦ឆ្នាំ ក្រោយពីសម្រាកព្យាបាលនៅមន្ទីរពេទ្យដឹងខ្លួនឡើងវិញ បានរៀបរាប់ពីសកម្មភាពបុរសវ័យចំណាស់ទាំងពីរនាក់ដែលបានប្រព្រឹត្តអំពើអនាចារលើរូបនាងក្នុងហាងខារ៉ាអូខេ ថា ៖ «គេយកខ្ញុំទៅ លូកលាន់លិចកើត គេច្របាច់ ហើយគេលូកក្នុងប្រដាប់ភេទ»។
លោកស្រី សៅ រៀម ម្តាយ ហ្វា រ៉ហ្វ៊ី បានរៀបរាប់ពីហេតុការណ៍ដែលកូនរបស់លោកស្រីបានប្រាប់ទាំងក្តីអស់សង្ឃឹមថា ៖ «និយាយពីកូនខ្ញុំ និយាយឲ្យចំទៅ វាអស់ភាពបរិសុទ្ធហើយ មិនដឹងថា វាធ្វើយ៉ាងម៉េចពេលដែលវាមិនដឹងខ្លួននោះ វាសន្លប់ ដល់ពេលដឹងខ្លួនមែនទេន វានិយាយថា វាដោះអាវទ្រនាប់អីកូនខ្ញុំ ហើយកាលពីមកដំបូង គឺដោះអីហ្នឹង ជាំទាំងអស់»។
ជាមួយគ្នានេះ ក្រុមគ្រួសារជនរងគ្រោះ កាលពីថ្ងៃទី២៦ ខែកក្កដា ឆ្នាំ២០០៨ បានប្តឹងទៅស្នងការនគរបាលខេត្តបាត់ដំបង ប៉ុន្តែនៅថ្ងៃទី១ ខែសីហា ឆ្នាំ២០០៨ ត្រូវបាននគរបាលនៃការិយាល័យប្រឆាំងការជួញដូរមនុស្សកោះហៅសាកសួរនិងសម្របសម្រួលប្រគល់ប្រាក់ចំនួន ២០០០ដុល្លារ ប៉ុន្តែលោកស្រី សៅ រៀម ម្តាយជនរងគ្រោះបញ្ជាក់ថា លោកស្រីទទួលបានតែ ១៦០០ដុល្លារ ចំណែក ៤០០ទៀត ត្រូវបាននគរបាលដកយក។
អ្នកស្រី សៅ រៀម មានប្រសាសន៍ថា ៖ «ដកអស់ ៤០០ ហ្នឹងទៅ គេឲ្យខ្ញុំដកពាក្យបណ្តឹងថា ថ្ងៃក្រោយគ្មានពាក្យប្តឹងគេតទៅទៀត គេឲ្យខ្ញុំធ្វើកិច្ចសន្យាផ្តិតមេដៃ ហើយរបាយការណ៍សរសេរកាលពីថ្ងៃមុន ដែលថា រំលោភ ចាប់ដោះ កូនខ្ញុំវាលាត់ដោះកូនខ្ញុំបៅអីហ្នឹង គេអត់និយាយទេ គេលប់អស់ហើយគេដាក់ពាក្យសាថ្មី»។
ទោះបីមានការអះអាងបញ្ជាក់យ៉ាងនេះក៏ដោយ លោក ប៊ុន វណ្ណារ៉ា អនុប្រធាននៃការិយាល័យជួញដូរមនុស្សនិងការពារអនីតិជននៃស្នងការនគរបាលខេត្តបាត់ដំបងបានបដិសេធថា មិនមានការសម្របសម្រួលនិងការយកលុយ ៤០០ដុល្លារពីជនរងគ្រោះនោះទេ ៖ «ខាងយើងខ្ញុំអត់បានធ្វើការសម្របសម្រួលទេ ហើយក៏មិនបានដកលុយគាត់ពីការបង់អីហ្នឹងដែរ គឺខាងយើងខ្ញុំអត់បានដឹងទេ»។
លោក ធាន ស៊ុនហេង ជាពូរបស់ ហ្វា រ៉ហ្វ៊ី បានថ្លែងអះអាងថា ក្រៅពីការសម្របសម្រួលគ្នានៅការិយាល័យប្រឆាំងការជួញដូរមនុស្ស ជនល្មើសទាំងបីនាក់ ក៏បានពឹងពាក់មន្ត្រីនៃការិយាល័យនោះទូរស័ព្ទមកចរចាជាមួយរូបលោកថែមទៀត ៖ «ប៉ូលិសបានទូរស័ព្ទចូលខ្ញុំ ហើយគេគ្រាន់តែថា ខាងជនល្មើស ឈ្មោះ ហ៊ួត ឈ្មោះ លី និង ឈ្មោះ ធំ បានមកនិយាយជាមួយប៉ូលិស ឲ្យបញ្ចប់រឿង ហ្នឹងគេសុំជាសំណងអីណា»។
ការិយាល័យអង្គការលីកាដូ និងសមាគមការពារសិទ្ធិមនុស្ស អាដហុក ប្រចាំខេត្តបាត់ដំបង បានបើកការស៊ើបអង្កេតយ៉ាងម៉ត់ចត់លើករណីនេះ ហើយបានបង្ហាញថា ការសម្រុះសម្រួលជាប្រាក់ដល់ក្រុមគ្រួសារជនរងគ្រោះ ក្នុងករណីនេះ មិនអាចរំលត់បណ្តឹងអាជ្ញាបានទេ ហើយបានធ្វើលិខិតអន្តរាគមន៍រួមគ្នាមួយបន្ថែមទៀត ទៅលោក អ៊ុយ សំភារ ព្រះរាជអាជ្ញាឲ្យចាត់ការរឿងនេះ។
លោក យិន ម៉េងលី មន្ត្រីអង្គការអាដហុកបានថ្លែងថា៖ «យើងមានចម្ងល់ថា តើរបាយការណ៍នោះ ពាក់ព័ន្ធនឹការអសមត្ថភាពរបស់ប៉ូលិស ឬក៏ការមិនមានចេតនាក្នុងការរៀបចំសំណុំរឿង ពីព្រោះរបាយការណ៍វាមានភាពផ្ទុយគ្នាទាំងស្រុង ទៅលើអ្វីដែលជនរងគ្រោះនិងក្រុមគ្រួសារជនរងគ្រោះ កំពុងរៀបរាប់នៅពេលបច្ចុប្បន្ននេះ ហើយក៏ផ្ទុយគ្នានឹងរបាយការណ៍របស់អង្គការទាំងពីរ អ៊ីចឹង ខ្ញុំសូមឲ្យមានការបង្កើតនូវគណៈកម្មការមួយ អង្កេតឡើងវិញឲ្យបានម៉ត់ចត់លើបញ្ហានេះ យើងមិនអាចយករបាយការណ៍របស់ប៉ូលិស ដែលខ្ញុំអាចនិយាយពាក្យសាមញ្ញថា ដូចជាការសរសេរលេងរបស់កូនក្មេងនោះ»។
លោក អ៊ុយ សំភារ ព្រះរាជអាជ្ញារងតុលាការខេត្តបាត់ដំបង បានបញ្ជាក់ថា លោកបានទទួលពាក្យបណ្តឹងភាគីជនរងគ្រោះនិងលិខិតអន្តរគមន៍របស់អង្គការក្រៅរដ្ឋាភិបាលទំាងពីរ កាលពីថ្ងៃសុក្រហើយ ប៉ុន្តែមិនទាន់បានចាត់ការទេ រង់ចាំធ្វើការស៊ើបអង្កេតជាបឋមជាមុនសិន ៖ «បញ្ចូលបណ្ដឹងថ្មីនេះ ចូលទៅក្នុងសំណុំរឿងចាស់ អ៊ីចឹងខ្ញុំនឹងហៅគាត់មកឆ្លើយបំភ្លឺ តើយកចម្លើយមួយណាជាចម្លើយពិតប្រាកដ និងធ្វើការសន្និដ្ឋាន»។
លោក យ៉ាត គឹមសាន មន្ត្រីការពារសិទ្ធិកុមារនៃអង្គការលីកាដូ បានជំរុញឲ្យអាជ្ញាធរមានសមត្ថកិច្ចអនុវត្តច្បាប់ឲ្យបានត្រឹមត្រូវ ៖ «ខ្ញុំសំណូមពរដែរ ដល់អាជ្ញាធរមានសមត្ថកិច្ច គួរតែយើងទាំងអស់គ្នាមានការយកចិត្តទុកដាក់ក្នុងការអនុវត្តច្បាប់ឲ្យបានប្រសើរ»។
លោក សៀង សុតថង អភិបាលរងខេត្តបាត់ដំបង និងជាប្រធានគណៈកម្មការប្រឆាំងការជួញដូរមនុស្សនិងការពារអនីតិជន បានមានប្រសាសន៍ថា ការប្រព្រឹត្តរបស់អង្គភាពនគរបាល គឺត្រូវតែអនុវត្តទៅតាមច្បាប់។
លោក សៀង សុថង បានមានប្រសាសន៍យ៉ាងដូច្នេះ ៖ «ព្រោះខ្ញុំអត់គាំទ្រសកម្មភាពរបៀបហ្នឹងទេ ចុះបើករណីអីក៏សម្រួលៗ ជនល្មើសវានៅពាសពេញដីហ្នឹង ប៉ុន្តែខ្ញុំថ្កោលទោសចំពោះអាណាមួយដែលធ្វើមិនល្អ។ ហើយទី២ទៀត ច្បាប់មើលឃើញថា ពិសេស ទៅដល់ដៃព្រះរាជអាជ្ញាហើយ បើព្រះរាជអាជ្ញាធ្វើត្រឹមត្រូវ ចៅក្រមកាត់ក្តីធ្វើត្រឹមត្រូវ វាដោយអាប៉ូលិសហ្នឹងដែរ ដោយហើយមិនអ៊ីចឹង រឿងអីថាមិនដោយ»៕