លោក Barack Obama ដែលមានអាយុ៤៧ឆ្នាំ គឺជាជនជាតិអាមេរិកាំងដើមកំណើតអាហ្វ្រិកលើកដំបូងបង្អស់ហើយ ដែលបានជាប់ឆ្នោតជាប្រធានាធិបតីអាមេរិកនោះ។
លោក Barack Obama ក្រោយការជាប់ឆ្នោតជាប្រធានាធិបតីអាមេរិកភ្លាមៗ បានសម្តែងការអរគុណចំពោះប្រជាជនអាមេរិកដែលបានបោះឆ្នោតគាំទ្ររូបលោកនិងបានប្រកាសប្រាប់អ្នកគាំទ្ររបស់លោកប្រមាណជាង ២សែននាក់នៅក្នុងក្រុងChicago រដ្ឋ Illinoisកាលពីយប់មិញថា ការផ្លាស់ប្តូរបានឈានមកដល់សហរដ្ឋអាមេរិកនោះហើយ។
លោក Barack Obama មានប្រសាសន៍ដូច្នេះថា ៖ «ផ្លូវនៅចំពោះមុខវែងឆ្ងាយណាស់។ ផ្លូវដែលយើងត្រូវឡើង ក៏មានចំណោតណាស់ដែរ។ យើងមិនអាចធ្វើដំណើរទៅដល់ទីនោះតែរយៈពេលតែមួយឆ្នាំ ឬសូម្បីតែមួយអាណត្តិនោះឡើយ។ ខ្ញុំមិនដែលមានសង្ឃឹមខ្លាំងដូចវេលាយប់នោះទេ។ ខ្ញុំសូមសន្យានៅចំពោះមុខអ្នកទាំងអស់គ្នាថា យើងគង់នឹងធ្វើដំណើរទៅដល់ទីនោះ»។
ជ័យជំនះលើការបោះឆ្នោតកាលពីយប់មិញ បានញ៉ាំងឲ្យបេក្ខជនប្រធានាធិបតីពីគណបក្សសាធារណរដ្ឋលោក John McCain បានសុខចិត្តយល់ព្រមទទួលចាញ់។
លោក Barrack Obama បានថ្លែងថា លោក John McCain បានទូរស័ព្ទមករូបលោក ហើយសន្យាថា នឹងជួយចំពោះរូបលោកផងដែរ ៖ «ខ្ញុំទើបបានទទួលការហៅទូរស័ព្ទពីសមាជិកព្រឹទ្ធសភាលោក John McCain ដែលបានតស៊ូយ៉ាងខ្លាំងក្នុងរយៈពេលយុទ្ធនាការដ៏វែងមកនេះដើម្បីប្រទេសជាតិដែលលោកបានស្រឡាញ់។ ខ្ញុំបានស្វាគមន៍ចំពោះគាត់ និងចំពោះលោកស្រីអភិបាលរដ្ឋ Palin ចំពោះអ្វីដែលគេសម្រេចបាន ហើយខ្ញុំសង្ឈឹមថា នឹងធ្វើការជាមួយអ្នកទាំង២ ដើម្បីការសន្យារបស់ខ្ញុំថា នឹងធ្វើឲ្យប្រទេសជាតិយើងល្អសាឡើងវិញ»។
សេចក្តីរាយការណ៍ពីទូរទស្សន៍ ស៊ី.អិន.អិន. (CNN) អាមេរិក បានឲ្យដឹងផងដែរថា លោកប្រធានាធិបតី ប៊ូស្ហ ក៏បានទូរស័ព្ទទៅលោក Barack Obama ដើម្បីសម្តែងកិច្ចស្វាគមន៍ផងដែរ។ លោកប្រធានាធិបតី ប៊ូស្ហ បានអញ្ជើញលោក អូបាម៉ា ទៅទស្សនកិច្ចនៅសេតវិមានប្រធានាធិបតីនៅគ្រាណាដែលមានការរៀបចំរួចរាល់៕