តុលាការខេត្តកំពង់ចាម បានកោះហៅប្រជាពលរដ្ឋទំាង៩រូបនោះកាលពីថ្ងៃទី២២ ធ្នូ ដែលមានប្រជាពលរដ្ឋជិត២០០នាក់ ប្រមូលផ្តុំគ្នារហូតដល់ថ្ងៃ២៣ នេះ។
បុរសម្នាក់ដែលអះអាងថា ជាតំណាងរបស់ប្រជាពលរដ្ឋ គឺលោក គង់ សិរីបុត្រ បានឲ្យដឹងថា ក្រុមសហគមន៍មកពីឃុំព្រែកកុយ ឃុំស្ដៅ ឃុំកាពក និងឃុំកងតាណឹង បានដាក់របាំងធ្នួសព្រែកអន្លង់គគីរ ស្ថិតនៅឃុំព្រែកកុយ និងឃុំស្ដៅ និងដាក់ធ្នួសចាប់ត្រី ជាហេតុធ្វើឲ្យទឹកមិនស្រកហូរចូលទៅក្នុងទន្លេ ធ្វើឲ្យរាំងស្ទះដល់ការធ្វើស្រែ។
លោក គង់ សិរីបុត្រ បានឲ្យដងថា ក្រុមប្រជាពលរដ្ឋរបស់លោកចំនួន ៧៥០នាក់ បាននាំគ្នាផ្ដិតមេដៃ ហើយក្នុងនោះមានប្រជាពលរដ្ឋជិតពីររយនាក់ បាននាំគ្នាជួបជុំនៅមុខតុលាការខេត្តដើម្បីទាមទារឲ្យមានការដកពាក្យបណ្ដឹងនិងឲ្យក្រុមសហគមន៍ ដែលមានគ្នាចំនួន ១៨នាក់ ឈប់ដាក់របាំងដើម្បីឲ្យទឹកហូរចូលទៅក្នុងទន្លេ។
លោកបានបញ្ជាក់ថា លុះដល់ព្រឹកថ្ងៃទី២៣នេះ ព្រះរាជអាជ្ញាតុលាការខេត្តកំពង់ចាម គឺលោក ហួត វុទ្ធី បានហៅលោកនិងពីរនាក់ផ្សេងទៀត ក្នុងចំណោមទាំង៩នាក់ ដែលគេបានចោទប្រកាន់សាកសួរ ហើយក្រោយពីសាកសួរអស់រយៈពេលកន្លះម៉ោង លោក ហួត វុទ្ធី បានអនុញ្ញាតឲ្យពួកលោកវិលត្រលប់ទៅផ្ទះវិញ ហើយថា បញ្ចប់ការចោទប្រកាន់នោះ។
លោក គង់ សិរីបុត្រ មានប្រសាសន៍ថា ៖ «ខ្ញុំប្រាប់ថា ប្រជាជនមកពីម្សិលមិញសុខចិត្តដេកអត់បាយចិញ្ចើមថ្នល់ ធ្វើម៉េចសម្រួលឲ្យប្រជាជន ព្រោះប្រជាជនក្រីក្រណាស់ ហូតលុយ ១០០ដុល្លារឲ្យប្រជាជនដែលទៅហ្នឹង ឲ្យសោហ៊ុយឡាន ទិញបាយអីស៊ីហ្នឹង»។
ជុំវិញបញ្ហានេះ ទាំងប្រធាននិងអនុប្រធានសហគមន៍មិនអាចទទួលយកបាននូវការច្រានចោលនូវពាក្យបណ្តឹងរបស់ពួកគេនោះទេ។
ប្រធានសហព័ន្ធសហគមន៍បឹងB6 គឺលោក អៀង ណាំ បានមានប្រសាសន៍ថា លោកមិនសុខចិត្តទេ នឹងបន្តប្តឹងប្រជាពលរដ្ឋទាំង៩នាក់នោះទៀត ដោយលោកបានចោទប្រកាន់ថា អ្នកទាំង៩នាក់នោះបានកាប់ធ្នួសរបស់លោកកាលពីថ្ងៃទី២ ខែធ្នូ កន្លងទៅ ដែលមានទំហំនៃការខាតបង់គិតជាទឹកប្រាក់ប្រមាណ ៥លានរៀល ៖ «ខ្ញុំមិនបញ្ចប់ទេ ការបំផ្លិចបំផ្លាញរបស់សហគមន៍ជាចេតនា»។
ព្រះរាជអាជ្ញាតុលាការខេត្តកំពង់ចាម លោក ហួត វុទ្ធី បានបដិសេធមិនធ្វើការអធិប្បាយជុំវិញបញ្ហាខាងលើនេះទេ។ រីឯអភិបាលស្រុកកងមាស លោក អ៊ី សាហាក់ បានប្រាប់ថា លោកជាប់ប្រជុំ។
ទោះជាយ៉ាងណា ប្រជាពលរដ្ឋដែលបានមកតវ៉ាជិត ២០០នាក់ បានឲ្យដឹងថា បឹងនោះជាឡូត៍នេសាទលក្ខណៈគ្រួសារ ហើយថា ត្រូវបានសហគមន៍នោះធ្វើរបាំង ដាក់ធ្នួស និងយ៉ ដើម្បីចាប់ត្រីដែលបណ្ដាលឲ្យទឹកមិនស្រក រាំងស្ទះដល់ការបង្កបង្កើនផលរបស់ប្រជាពលរដ្ឋរហូតដល់ទៅ៦ឃុំ៕