អាជ្ញាធរវៀតណាមបង្ខំឲ្យព្រះសង្ឃខ្មែរក្រោមមួយអង្គសឹក
2012.08.01
លិខិតជាផ្លូវការមួយពីក្រុមប្រឹក្សាភិបាលវៀតណាម ផ្នែកប្រតិបត្តិព្រះពុទ្ធសាសនា ប្រចាំខេត្តឃ្លាំង នៅឯដែនដីកម្ពុជាក្រោម ចុះថ្ងៃទី២៨ កក្កដា ដែលវិទ្យុអាស៊ីសេរី ទទួលបានផ្ដល់ឱកាសតែ ៣ថ្ងៃគត់ បង្គាប់ឲ្យព្រះតេជគុណ ថាច់ ធឿន សឹកដោយព្រះអង្គឯង បើពុំនោះទេ អាជ្ញាធរវៀតណាមនឹងចាប់ផ្សឹកលែងឲ្យព្រះអង្គគង់នៅក្នុងវត្តសិរីតាសេក តទៅទៀត។ វត្តសិរីតាសេក ឋិតនៅក្នុងភូមិវិញហាយ (Vinh Hai) ឃុំតាសេក ស្រុកវិញចូវ (Vinh Chau) ខេត្តឃ្លាំង ដែលសព្វថ្ងៃវៀតណាម ហៅថា សុកត្រាំង (Soc Trang)។
ដោយផ្អែកតាមច្បាប់ក្នុងស្រុក អាជ្ញាធរវៀតណាម បញ្ជាផ្សឹកព្រះតេជគុណ ថាច់ ធឿន ដោយចោទថា ព្រះអង្គប្រឆាំងកិច្ចការនៃនាយកដ្ឋានធម្មការសាសនា នៅខេត្តឃ្លាំង និងថា បានបំពានធម៌វិន័យព្រះពុទ្ធសាសនាផ្នែកនិកាយថេរវាទ។
ប៉ុន្តែលោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោមពិភពលោកមានប្រសាសន៍ប្រាប់វិទ្យុអាស៊ីសេរីថា នេះគ្រាន់តែជាលេសរបស់អាជ្ញាធរវៀតណាម ក្នុងការដាក់ទណ្ឌកម្មលើព្រះសង្ឃខ្មែរក្រោម៖ «ចំណុចដែលគេចោទព្រះតេជគុណ ថាច់ ធឿន នោះ គឺទាក់ទងនឹងសហព័ន្ធខ្មែរកម្ពុជាក្រោម គឺថាគេយកច្បាប់ទណ្ឌកម្មតុលាការលេខ ៨៧ ថាធ្វើឲ្យមានបញ្ហាសន្តិសុខដែលទាក់ទងនឹងសន្តិសុខជាតិនោះ។ ទី២ ចោទថា ព្រះអង្គបង្រៀនខុសច្បាប់ តែការពិតទៅព្រះពុទ្ធសាសនាត្រូវគ្រប់គ្រងដោយរដ្ឋាភិបាល តែការបង្រៀនភាសា និងបង្រៀនអ្វីផ្សេង គឺគេមិនដែលបានយកព្រះពុទ្ធសាសនា ដាក់ចូលក្នុងផ្នែកនៃក្រសួងធម្មការរបស់ប្រទេសវៀតណាម នោះទេ»។
លោក ថាច់ ង៉ុកថាច់ មានប្រសាសន៍ឲ្យដឹងបន្ថែមថា តាំងពីឆ្នាំ២០០៧ មក អាជ្ញាធរវៀតណាម បានដាក់សម្ពាធចោទបំផ្លើសការពិតលើព្រះសង្ឃដែលគង់នៅវត្តសិរីតាសេក ព្រោះព្រះសង្ឃខ្មែរក្រោមទាំងនោះ មិនព្រមចូលជាសមាជិកនៃក្រុមព្រះសង្ឃស្នេហាជាតិរបស់អាជ្ញាធរវៀតណាម។
កាលពី ៥ឆ្នាំមុននោះដែរ សមណនិស្សិតខ្មែរក្រោមនៃវត្តសិរីតាសេក បានចេញធ្វើបាតុកម្មអហិង្សា ដើម្បីទាមទារសិទ្ធិសេរីភាពផ្នែកព្រះពុទ្ធសាសនា ដែលកាលណោះអាជ្ញាធរវៀតណាម បានចាប់ឃុំជាច្រើនអង្គ។ ក្នុងនោះព្រះសង្ឃមួយអង្គព្រះនាម គឹម មឿន បានភៀសព្រះកាយចេញមកតាំងលំនៅអចិន្ត្រៃយ៍ជាជនភៀសខ្លួននៅឯប្រទេសស៊ុយអែត។
លោក ថាច់ ង៉ុកថាច់ បញ្ជាក់ថា តែព្រះសង្ឃ ថាច់ ធឿន ដែលគង់នៅវត្តសិរិតាសេក ឯដែនដីកម្ពុជាក្រោម នៅតែបន្តទាក់ទងព្រះតេជគុណ គឹម មឿន បើទោះបីលោកគង់នៅឯបរទេសក្តី៖ «គេចោទថា ព្រះតេជគុណ ថាច់ ធឿន ទាក់ទងព្រះតេជគុណ គឹម មឿន ដែលជាអតីតគ្រូសូត្រនៅវត្តសិរីតាសេកនោះ ដោយលោកត្រូវបានរដ្ឋាភិបាលយួន ចាប់ឃុំឃាំងឆ្នាំ២០០៧ ហើយបានមករស់នៅក្នុងប្រទេសស៊ុយអែត។ តែពេលនេះលោកស្នាក់នៅក្នុងសហរដ្ឋអាមេរិក»។
វិទ្យុអាស៊ីសេរីបានព្យាយាម ប៉ុន្តែមិនអាចទាក់ទងសុំការបញ្ជាក់បំភ្លឺពីព្រះតេជគុណ គឹម មឿន និងអាជ្ញាធរស្រុកឃ្លាំងនៃរដ្ឋាភិបាលវៀតណាម បាននៅឡើយទេ នៅប៉ុន្មានម៉ោងមុនការផ្សាយព្រឹកថ្ងៃទី១ ខែសីហា នេះ។
ទោះជាយ៉ាងណាក៏ដោយ ប្រធានសហព័ន្ធខ្មែរកម្ពុជាក្រោមពិភពលោក មានប្រសាសន៍ថា មកដល់ថ្ងៃអង្គារ ទី៣១ កក្កដា ព្រះតេជគុណ ថាច់ ធឿន បន្តគង់នៅជាបព្វជិតនៅឯវត្តសិរីតាសេក ដដែល គឺលោកមិនព្រមសឹកតាមបទបញ្ជារបស់អាជ្ញាធរវៀតណាម ព្រោះព្រះអង្គប្រកាន់ជំហរថា ព្រះអង្គពុំបានប្រព្រឹត្តអ្វីខុសដូចការចោទប្រកាន់នោះទេ។
លោក ថាច់ ង៉ុកថាច់៖ «សហព័ន្ធខ្មែរកម្ពុជាក្រោមពិភពលោក បានអំពាវនាវដល់សហគមន៍អន្តរជាតិ សូមឲ្យគេជួយ រួមមានចំពោះលោកស្រីអគ្គរដ្ឋទូតគោចរនៃសហរដ្ឋអាមេរិក ស៊ូសាន ខក (Susan Coke) រួមទាំងស្ថានទូតវៀតណាមនៅសហរដ្ឋអាមេរិក និងស្ថានទូតនានានៅក្នុងប្រទេសវៀតណាម និងអង្គការសង្គមស៊ីវិល ដែលរួមមានទាំងអង្គការឃ្លាំមើលសិទ្ធិមនុស្សផងដែរ ដើម្បីឲ្យគេជួយពិនិត្យមើលស្ថានភាពពិតប្រាកដ ដែលរដ្ឋាភិបាលយួនតែងតែធ្វើបន្តបន្ទាប់មកលើបងប្អូនខ្មែរក្រោម ពិសេសព្រះសង្ឃនៅវត្តសិរីតាសេក នៅខេត្តឃ្លាំង នោះតែម្ដង»។
ប្រធានសហព័ន្ធខ្មែរកម្ពុជាក្រោម អះអាងថា តាំងពីឆ្នាំ២០០៧ មក អាជ្ញាធរវៀតណាម បានចាប់ផ្សឹកព្រះសង្ឃខ្មែរក្រោមអស់ជិត ១០អង្គ និងមានព្រះសង្ឃខ្មែរក្រោមជាង ២០០អង្គផ្សេងទៀត ត្រូវនិមន្តភៀសព្រះកាយចេញពីដែនដីកម្ពុជាក្រោម ដើម្បីសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»