តំណាងសហជីពដែលដឹកនាំការតវ៉ាឲ្យដឹងថា រោងចក្រធ្វើខុសនឹងច្បាប់ការងារ ដោយព្យាយាមកេងប្រវ័ញ្ចលើកម្លាំងកម្មករ ជាហេតុធ្វើឲ្យកម្មករមិនសុខចិត្ត ហើយស្វែងរកការអន្តរាគមន៍។
កម្មករកម្មការិនីរោងចក្រ ខេមបូឌា ស្វាយរៀង ហ្គាមេន ស្វែងរកអន្តរាគមន៍ពីសាលាខេត្តស្វាយរៀង ដើម្បីឲ្យថៅកែរោងចក្រអនុវត្តតាមច្បាប់ការងារ បន្ទាប់ពីក្រុមហ៊ុនកាត់ដេរប្រកាសបិទរោងចក្រ និងមិនបានសងសំណងសមរម្យជូនកម្មករនោះ។
កម្មការិនីរោងចក្រដែលបម្រើការងាររយៈពេលជាង ២ឆ្នាំ កញ្ញា ម៉ៅ វុន្នី ថ្លែងថា កម្មករមិនសុខចិត្តចំពោះការសម្រេចរបស់រោងចក្រ ដែលថារោងចក្រមិនមានប្រាក់ឲ្យកម្មករនោះទេ ព្រោះកន្លងមករោងចក្រដំណើរការល្អណាស់ ដូចនេះមិនមានហេតុផលដែលក្ស័យធនឡើយ។ កញ្ញាបន្តថា ថៅកែព្យាយាមសម្របសម្រួលដើម្បីកេងចំណេញពីការបិទរោងចក្រនេះ តែកម្មករស្នើឲ្យរដ្ឋាភិបាលជួយរកវិធីដោះស្រាយឲ្យសមស្របតាមច្បាប់ការងារ។
កញ្ញា ម៉ៅ វុន្នី បញ្ជាក់ថា បើមិនមានដំណោះស្រាយ កម្មករនឹងបន្តធ្វើបាតុកម្មរហូតដល់មានដំណោះស្រាយ៖ «ខ្ញុំមិនជឿថា ក្ស័យធនទេ ព្រោះរោងចក្រសំបូរការងាររហូត មិនដែលខានមួយថ្ងៃផង បិទរោងចក្រហើយក៏ខោអាវនៅតែសំបូរដែរ។ សំណូមពរឲ្យរាជរដ្ឋាភិបាលជួយរកដំណោះស្រាយឲ្យកម្មករឲ្យបានចំនួន ៥ចំណុច»។
កម្មករទាំងនោះទាមទារ ៥ចំណុច ដូចជា ទី១ សេចក្ដីជូនដំណឹង ចំណុចទី២ ប្រាក់ខែចុងក្រោយ ចំណុចទី៣ ប្រាក់បំណាច់ឆ្នាំ ចំណុចទី៤ ប្រាក់បំណាច់បណ្ដេញចេញ និងចំណុចទី៥ សោហ៊ុយជំងឺចិត្ត។ តែក្រុមហ៊ុនសុំឲ្យ ៣ចំណុច គឺចំណុចទី១ សេចក្តីជូនដំណឹង ចំណុចទី២ ប្រាក់ខែចុងក្រោយ ចំណុចទី៣ ប្រាក់បំណាច់ឆ្នាំ ដោយក្រុមហ៊ុនប្រាប់កម្មករថា រោងចក្រក្ស័យធនរកស៊ីខាតទើបមិនមានប្រាក់ឲ្យកម្មករ។
វិទ្យុអាស៊ីសេរី មិនអាចទាក់ទងថៅកែរោងចក្របានទេ នៅថ្ងៃទី៣១ ខែធ្នូ ឆ្នាំ២០១២។ ប៉ុន្តែមន្ត្រីរដ្ឋបាលរោងចក្រ លោក នូ ចាន់រឿន ឲ្យដឹងថា ការបិទរោងចក្រមកពីក្រុមហ៊ុនមិនមានទំនិញចូល ហើយថៅកែសុំផ្អាកមួយរយៈសិន។
លោកបន្តថា ក៏មានបញ្ហាខ្លះទៀត ប៉ុន្តែលោកមិនហ៊ានបរិយាយច្រើនទេ៖ «ដើមខែ១ ហ្នឹងផ្អាក ដើម្បីរកការងារឲ្យកម្មករធ្វើបន្តទៀត តែគាត់រកអត់បាន ខ្ញុំត្រឹមរដ្ឋបាលអាកិច្ចការងារធំៗ ខ្ញុំមិនអាចឆ្លើយបានទេ»។
ទោះជាយ៉ាងណាក៏ដោយ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា ក្រុមហ៊ុនប្រកាសថា ក្ស័យធន តែក្រុមហ៊ុននោះបានសេងហ៊ុនទៅឲ្យនាយកថ្មីទៅវិញ។
លោកបន្តថា ក្រុមហ៊ុនមិនត្រឹមតែប្រកាសបិទបើកស្រេចតែនឹងចិត្ត ហើយមិនទទួលខុសត្រូវចំពោះកម្មករនោះទេ៖ «អ្វីដែលគាត់និយាយថា ក្ស័យធននោះ គឺជាពាក្យដែលគាត់បំភ័យកម្មករទេ ដោយសារតែកម្មករអត់យល់។ នេះគ្រាន់តែជាចេតនាដែលមិនទទួលខុសត្រូវចំពោះកម្មករ ធាតុពិតយើងមិនបានដឹងច្បាស់ពីផ្ទៃក្នុងក្រុមហ៊ុនទេ តែក្រុមហ៊ុនត្រូវតែមានកាតព្វកិច្ចទទួលខុសត្រូវចំពោះអត្ថប្រយោជន៍កម្មករតាមផ្លូវច្បាប់»។
លោក ប៉ាវ ស៊ីណា បន្តថា សហជីពរួមនឹងកម្មករដាក់ញត្តិជូនទៅអភិបាលខេត្ត ដើម្បីទាមទារឲ្យមានដំណោះស្រាយសមរម្យ ហើយភាគីសាលាខេត្តក៏ចេញមកទទួលញត្តិពីកម្មករ ប៉ុន្តែមិនទាន់មានលទ្ធផលនៅឡើយ។
តាមផ្លូវច្បាប់និយោជិតអាចប្រកាសក្ស័យធនបាន លុះត្រាតែមានការស៊ើបអង្កេតត្រឹមត្រូវពីស្ថាប័នមានសមត្ថកិច្ចរបស់រដ្ឋាភិបាល ដោយផ្អែកលើផលិតភាពការងារ ស្ថានភាពហិរញ្ញវត្ថុ សហគ្រាស ការចរាចរទំនិញរបស់ក្រុមហ៊ុនសហគ្រាសជាដើម។ ប៉ុន្តែបើក្រុមហ៊ុនគ្រាន់តែដូរនាយក ឬលក់ភាគហ៊ុនពួកគេមានកាតព្វកិច្ចពេញលេញក្នុងការទទួលខុសត្រូវចំពោះការបញ្ចប់កិច្ចសន្យាការងារណាមួយជាមួយកម្មករ និយោជិត ដូចជាប្រាក់ខែចុងក្រោយផ្តល់ប្រាក់សំណងបណ្ដេញចេញ ប្រាក់បំណាច់ប្រចាំឆ្នាំ ប្រាក់ជំងឺចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
