រូបត្លុកនយោបាយ៖ ឈប់ខ្ចីដង្ហើមវៀតណាមដក?
2024.08.04
រូបត្លុកនយោបាយ៖ ឈប់ខ្ចីដង្ហើមវៀតណាមដក?
Photo: RFA
កម្ពុជាក្រោមការគ្រប់គ្រងរបស់ត្រកូល «ហ៊ុន» ប្រកាសបើកការដ្ឋានសាងសង់ព្រែកជីកហ្វូណនតេជោដ៏ចម្រូងចម្រាសនៅព្រឹកថ្ងៃទី០៥ ខែសីហា ចំថ្ងៃខួបកំណើតកែប្រែរបស់ប្រធានព្រឹទ្ធសភា លោក ហ៊ុន សែន។ ពិធីបើកការដ្ឋានជីកព្រែកជាប្រវត្តិសាស្ត្រនេះ ត្រូវគេធ្វើឡើងយ៉ាងអធិកអធមដោយមានការវាយគង ជួង រគាំង ទូងស្គរ ទះប៉ោត និងគោះត្រដោកនៅតាមទីកន្លែងសាធារណៈសំខាន់ៗរាប់ចាប់តាំងពីស្ថាប័នរដ្ឋរហូតដល់វត្តអារាម និងសាលារៀន ខណៈរដ្ឋាភិបាលអនុញ្ញាតឱ្យមន្ត្រីរាជការ កម្មករ និយោជិត និងសិស្សនិស្សិត ឈប់សម្រាក១ថ្ងៃដើម្បីចូលរួមអបអរពិធីនេះ។
អតីតនាយករដ្ឋមន្ត្រី ហ៊ុន សែន គឺជាអ្នកផ្ដួចផ្ដើមឱ្យជីកព្រែកហ្វូណននេះឡើង ដោយអះអាងថាជា«គម្រោងរបស់ខ្មែរទាំងអស់គ្នា ដោយខ្មែរ និងដើម្បីខ្មែរគ្រប់រូប»។ លោកបញ្ជាឱ្យសាងសង់ព្រែកជីកនេះយ៉ាងតក់ក្រហល់ «ទោះក្នុងតម្លៃណាក៏ដោយ» ក្រោមហេតុផលថាព្រែកជីកនេះ «ផ្តល់ផលប្រយោជន៍ដ៏មហាសាល» ដល់សង្គម-សេដ្ឋកិច្ចកម្ពុជាតាមរយៈការពង្រឹងនូវ «ឯករាជ្យខាងនយោបាយលើការដឹកជញ្ជូនតាមផ្លូវទឹក» ឈប់ពឹងផ្អែកដង្ហើមវៀតណាមដកតទៅទៀត។ ក៏ប៉ុន្តែ នៅទន្ទឹមនឹងការសាងសង់ព្រែកជីកហ្វូណននេះ លោក ហ៊ុន សែន ដដែលក៏បានចេញមុខអះអាងថាលោកក៏គឺជាអ្នកផ្ដួចផ្ដើមពឹងដង្ហើមវៀតណាមដកដោយយកខេត្តខ្មែរចំនួន៤ខេត្តគឺខេត្តមណ្ឌលគិរី រតនគិរី ក្រចេះ និងខេត្តស្ទឹងត្រែង ទៅបង្កើតជាតំបន់អភិវឌ្ឍន៍ត្រីកោណ CLV រួមគ្នាជាមួយ វៀតណាម និងឡាវ កាលពី២៥ឆ្នាំមុន។ សេចក្តីរាយការណ៍នានាឱ្យដឹងថា កន្លងទៅកាលពីឆ្នាំ២០១៨ មេដឹកនាំវៀតណាម ធ្លាប់បានស្នើឱ្យពង្រីកកិច្ចសហប្រតិបត្តិការ CLV នេះ ឆ្ពោះទៅគ្របដណ្ដប់ទឹកដីទាំងមូលនៃប្រទេសទាំង៣តែម្តង។
បើទោះបីជាមានការបញ្ជាក់ពីសំណាក់រដ្ឋាភិបាលកូនរបស់លោកថា តំបន់អភិវឌ្ឍន៍ត្រីកោណ CLV នេះ គ្មានប្រទេសណាមួយ «បាត់បង់អធិបតេយ្យ» ហើយ «គ្មានឡើយ» ការយកខេត្តទាំង៤របស់កម្ពុជា «ទៅដាក់ហ៊ុន» ជាមួយប្រទេសជិតខាងដើម្បី «រួមបញ្ចូលគ្នាជាដីតែមួយ» ដូចការរិះគន់ក៏ដោយ ក៏ពលរដ្ឋខ្មែរ និងក្រុមអ្នកឃ្លាំមើលមួយចំនួន បារម្ភខ្លាច «បាត់បង់» ទឹកដី និងអធិបតេយ្យកម្ពុជាទៅប្រទេសវៀតណាមដូចករណីទឹកដីកម្ពុជាក្រោមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា