បទ​វិភាគ៖ តើ​បក្ស​សង្គ្រោះ​ជាតិ​អាច​ធ្វើ​អ្វី​បាន​ជូន​ម្ចាស់​ឆ្នោត​បន្ទាប់​ចូល​សភា?

ដោយ ទីន ហ្សាការីយ៉ា
2014-08-05
អ៊ីម៉ែល
មតិ
Share
បោះពុម្ព
លោក សម រង្ស៊ី និង​លោក កឹម សុខា មេដឹកនាំ​គណបក្ស​សង្គ្រោះ​ជាតិ ជួប​ជាមួយ​អ្នក​គាំទ្រ​ប្រមាណ ២​ម៉ឺន​នាក់ នៅ​ទីលាន​ប្រជាធិបតេយ្យ រាជធានី​ភ្នំពេញ កាល​ពី​រសៀល​ថ្ងៃ​ទី​២៦ ខែ​សីហា ឆ្នាំ​២០១៣។
លោក សម រង្ស៊ី និង​លោក កឹម សុខា មេដឹកនាំ​គណបក្ស​សង្គ្រោះ​ជាតិ ជួប​ជាមួយ​អ្នក​គាំទ្រ​ប្រមាណ ២​ម៉ឺន​នាក់ នៅ​ទីលាន​ប្រជាធិបតេយ្យ រាជធានី​ភ្នំពេញ កាល​ពី​រសៀល​ថ្ងៃ​ទី​២៦ ខែ​សីហា ឆ្នាំ​២០១៣។
Photo: RFA

គណបក្ស​សង្គ្រោះ​ជាតិ បាន​សម្រេច​ចិត្ត​ចូល​សភា ដើម្បី​បញ្ចប់​ជម្លោះ​នយោបាយ​ជាប់​គាំង​ជិត ១​ឆ្នាំ​មក​នេះ ត្រូវ​បាន​ប្រជាពលរដ្ឋ​គាំទ្រ​គណបក្ស​នេះ​មួយ​ចំនួន​រិះគន់​ថា គណបក្ស​សង្គ្រោះ​ជាតិ មាន​គោល​ជំហរ​មិន​រឹងមាំ ហាក់​បី​ដូច​ជា​ចាញ់​ប្រៀប​គណបក្ស​ប្រជាជន​កម្ពុជា ខ្លះ​ទៀត​ថា គណបក្ស​សង្គ្រោះ​ជាតិ នឹង​មាន​វាសនា​ដូច​គណបក្ស​ហ៊្វុនស៊ិនប៉ិច ជាដើម។

ទោះ​ជា​យ៉ាង​ណា​នេះ​ក្ដី មន្ត្រី​ជាន់​ខ្ពស់​គណបក្ស​សង្គ្រោះ​ជាតិ ឆ្លើយ​តប​ថា គណបក្ស​សង្គ្រោះ​ជាតិ នឹង​ធ្វើ​កិច្ចការ​ជាច្រើន​ជូន​ប្រជាពលរដ្ឋ បន្ទាប់​ពី​សមាជិក​របស់​ខ្លួន​ចូល​ប្រជុំ​សភា ហើយ​សុំ​ឲ្យ​ប្រជាពលរដ្ឋ​អ្នក​គាំទ្រ​របស់​ខ្លួន​អត់ធ្មត់​បន្តិច​សិន។

តើ​គណបក្ស​សង្គ្រោះ​ជាតិ នឹង​អាច​ធ្វើ​អ្វីៗ​បាន​ជូន​ប្រជាពលរដ្ឋ​ជា​ម្ចាស់​ឆ្នោត ដូច​ដែល​ខ្លួន​បាន​សន្យា​បន្ទាប់​ពី​ចូល​សភា ឬ​ក៏​គណបក្ស​ប្រជាជន​កម្ពុជា នឹង​គាប​គណបក្ស​សង្គ្រោះ​ជាតិ មិន​អាច​ឲ្យ​ធ្វើ​អ្វី​កើត ឬ​យ៉ាង​ណា?

គណបក្ស​សង្គ្រោះ​ជាតិ នៅ​ទីបំផុត​សម្រេច​ចូល​ធ្វើ​សច្ចាប្រណិធាន​នៅ​ក្នុង​ព្រះបរមរាជវាំង នៅ​ក្រោយ​ពេល​ចរចា​ជាមួយ​ថ្នាក់​ដឹក​នាំ​កំពូល​គណបក្ស​ប្រជាជន​កម្ពុជា កាល​ពី​ថ្ងៃ​ទី​១២ កក្កដា។ ការ​សម្រេច​ចិត្ត​ទម្លុះ​ភាព​ទាល់ច្រក​នយោបាយ​នៅ​ពេល​នេះ គណបក្ស​សង្គ្រោះ​ជាតិ រំពឹង​ថា ខ្លួន​នឹង​អាច​កែប្រែ​ការ​ដឹក​នាំ​របស់​រដ្ឋាភិបាល សភា ពិសេស គឺ​ស្ថាប័ន​បោះ​ឆ្នោត​បាន។

នៅ​គ្រា​ដែល​អ្នក​គាំទ្រ​របស់​ខ្លួន​បាន​ស្ដី​បន្ទោស​ទៅ​លើ​ការ​សម្រេច​ចិត្ត​ចូល​ប្រជុំ​សភា​នេះ មេ​ដឹក​នាំ​គណបក្ស​សង្គ្រោះ​ជាតិ បាន​បង្ហាញ​ពី​ឯករាជ្យ​ភាព​របស់​ខ្លួន និង​ខំ​ទាញ​យក​ការ​ជឿ​ទុក​ចិត្ត​ពី​អ្នក​គាំទ្រ​របស់​ខ្លួន​មក​វិញ ដោយ​អំពាវនាវ​ឲ្យ​អ្នក​គាំទ្រ​ទាំង​នោះ កុំ​អាល​វាយ​តម្លៃ​ទៅ​លើ​ថ្នាក់​ដឹក​នាំ​គណបក្ស​សង្គ្រោះ​ជាតិ ថា​ផ្លាស់​ប្ដូរ​ជំហរ ដោយ​ទាមទារ​ពេល​វេលា​ឲ្យ​ប្រជាពលរដ្ឋ​រង់ចាំ​មើល​លទ្ធផល​នៅ​ពេល​ខាង​មុខ។

ទន្ទឹម​នឹង​នេះ ទោះ​បី​ជា​គណបក្ស​សង្គ្រោះ​ជាតិ ទាមទារ​ឲ្យ​គណបក្ស​ប្រជាជន​កម្ពុជា ធ្វើ​កំណែ​ទម្រង់​ស្ថាប័ន​គណៈកម្មាធិការ​ជាតិ​រៀបចំ​ការ​បោះ​ឆ្នោត ដោយ​បញ្ចូល​ទាំង​មន្ត្រី​អង្គការ​សង្គម​ស៊ីវិល​បាន​ក្ដី ក៏ប៉ុន្តែ​មិន​ប្រាកដ​ថា ស្ថាប័ន គ.ជ.ប ថ្មី​នេះ អាច​ធ្វើ​ឲ្យ​ការ​បោះ​ឆ្នោត​នៅ​អាណត្តិ​ក្រោយ​ទៀត ប្រកប​ដោយ​ឯករាជ្យ តម្លាភាព និង​ត្រឹមត្រូវ​បាន​នោះ​ឡើយ។

គណបក្ស​សង្គ្រោះ​ជាតិ ហាក់​ដូច​ជា​ភ្លេច​គិត​ថា គណបក្ស​ប្រជាជន​កម្ពុជា មិន​ខ្វះ​យុត្តិសាស្ត្រ​ដើម្បី​ទប់ទល់​ជាមួយ​ខ្លួន​វិញ ពីព្រោះ​ថា គណបក្ស​ប្រជាជន​កម្ពុជា ធ្លាប់​ធ្វើ​បាន​ជោគជ័យ​ទៅ​លើ​គណបក្ស​ហ៊្វុនស៊ិនប៉ិច ម្ដង​រួច​ទៅ​ហើយ រហូត​ដល់​ធ្វើ​ឲ្យ​គណបក្ស​ដែល​ធ្លាប់​បាន​ដឹក​នាំ​រដ្ឋាភិបាល​មួយ​នេះ រលាយ​អាសនៈ​នៅ​ក្នុង​រដ្ឋសភា​ក្នុង​ការ​បោះ​ឆ្នោត​ជាតិ​នីតិកាល​ទី​៥​នេះ ហើយ​ស្ទើរ​តែ​បាត់​ឈ្មោះ​នៅ​លើ​ឆាក​នយោបាយ​ទៀត​ផង។

តាម​មើល​ទៅ គណបក្ស​សង្គ្រោះ​ជាតិ លំបាក​នឹង​ទប់ទល់​ជាមួយ​គណបក្ស​ប្រជាជន​កម្ពុជា ហើយ​ក៏​លំបាក​ធ្វើ​កិច្ចការ​ក្នុង​រដ្ឋសភា ដើម្បី​បង្ហាញ​ឲ្យ​ប្រជាពលរដ្ឋ​បាន​ឃើញ​នូវ​ស្នាដៃ​របស់​ខ្លួន ពីព្រោះ​ថា គណបក្ស​ប្រជាជន​កម្ពុជា នឹង​ប្រើ​វិធី​ទប់ទល់​គ្រប់​មធ្យោបាយ​ក្នុង​រដ្ឋសភា ដើម្បី​កាត់​ដៃ​ជើង​គណបក្ស​នេះ ដែល​មិន​ឲ្យ​បំពេញ​ការងារ​អ្វី​បាន​ជា​ដុំ​កំភួន​ឡើយ។ ជួន​កាល តំណាង​រាស្ត្រ​គណបក្ស​សង្គ្រោះ​ជាតិ អាច​រត់​ចេញ​ពី​សភា​ដូច​លើក​មុនៗ​ទៀត​ក៏​ថា​បាន ព្រោះ​ថា ជា​បទពិសោធន៍ សម្ដេច​ក្រុម​ព្រះ​នរោត្តម រណឫទ្ធិ រហូត​ដល់​ព្រះអង្គ​ធ្លាប់​ដឹក​នាំ​ជា​ប្រធាន​រដ្ឋសភា​ផង ក៏​មិន​អាច​ទប់ទល់​នឹង​យុទ្ធសាស្ត្រ​របស់​គណបក្ស​ប្រជាជន​កម្ពុជា បាន​ដែរ។ ទីបំផុត ធ្វើ​ឲ្យ​ព្រះអង្គ​សម្រេច​ព្រះទ័យ​យាង​ចេញ​ពី​ព្រះ​ប្រធាន​រដ្ឋសភា។ល។

នរណា​ក៏​ដឹង​ដែរ​ថា គណបក្ស​ប្រជាជន​កម្ពុជា ប្រើ​យុទ្ធសាស្ត្រ​ឈ្នះ​ឈ្នះ​របស់​ខ្លួន ដើម្បី​ទប់ទល់​នឹង​គូបដិបក្ខ​នៅ​លើ​ឆាក​នយោបាយ។ ក្រៅ​ពី​នេះ​ទៀត គណបក្ស​ប្រជាជន​កម្ពុជា មាន​ធនធាន​គ្រប់គ្រាន់​រាប់​ទាំង​ថវិកា ធនធាន​មនុស្ស កង​កម្លាំង​ប្រដាប់​អាវុធ ជាដើម។ និយាយ​ជា​រួម​ទៅ គណបក្ស​ប្រជាជន​កម្ពុជា ហាក់​ដូច​ជា​ចាត់​ទុក​ប្រទេស​កម្ពុជា ជា​កម្មសិទ្ធិ​របស់​ខ្លួន​ម្នាក់​ឯង​ដូច្នោះ​ដែរ។ ទោះ​បី​ជា​គណបក្ស​សង្គ្រោះ​ជាតិ មាន​ក្បាល​ម៉ាស៊ីន​ដឹក​នាំ​ដ៏​រឹងមាំ ដូច​ដែល​មេ​ដឹក​នាំ​គណបក្ស​នេះ​លើក​ទ្រឹស្ដី​ថា ទិញ​ក៏​មិន​លក់ សម្លុត​ក៏​មិន​ខ្លាច​នោះ​ក្ដី ក៏ប៉ុន្តែ​ទ្រឹស្ដី​នេះ​អាច​អនុវត្ត​ទៅ​បាន​តែ​មេ​ដឹក​នាំ​កំពូល​ប៉ុន្មាន​នាក់​នោះ​ទេ តែ​សមាជិក​របស់​ខ្លួន​វិញ មិន​សន្មត​ថា អាច​មិន​លក់​ខ្លួន​ឲ្យ​គណបក្ស​ប្រជាជន​កម្ពុជា ឬ​សម្លុត​មិន​ខ្លាច​នោះ​ឡើយ។

មាន​ទឡ្ហីករណ៍​ជាច្រើន​ដែល​បញ្ជាក់​ឲ្យ​ឃើញ​អំពី​ករណី​នេះ ដូច​ជា បើ​គណបក្ស​សង្គ្រោះ​ជាតិ មិន​ខ្លាច​សមាជិក​របស់​ខ្លួន​ចាញ់​នយោបាយ​គណបក្ស​ប្រជាជន​កម្ពុជា ដោយ​ប្រការ​ណា​មួយ​នោះ មេ​ដឹក​នាំ​គណបក្ស​នេះ​ប្រាកដ​ជា​មិន​កៀរគរ​សមាជិក​របស់​ខ្លួន​ទាំង ៥៥​រូប ទៅ​ស្បថ​នៅ​អង្គរវត្ត នា​ខេត្ត​សៀមរាប កាល​ពី​ខែ​កញ្ញា ឆ្នាំ​២០១៣ នៅ​ស្រប​គ្នា​សភា​ឯក​បក្ស​របស់​គណបក្ស​ប្រជាជន​កម្ពុជា បាន​បើក​កិច្ច​ប្រជុំ​ដំបូង ដែល​ព្រះមហាក្សត្រ​យាង​ចូល​បើក​សម័យ​ប្រជុំ​លើក​ដំបូង​នោះ​ឡើយ។

ម្យ៉ាង​វិញ​ទៀត ប្រវត្តិសាស្ត្រ​ប្រទេស​កម្ពុជា ត្រូវ​បាន​គេ​ចាត់​ទុក​លោក​នាយក​រដ្ឋមន្ត្រី ហ៊ុន សែន ជា​បុរស​ខ្លាំង ហើយ​គណបក្ស​ប្រជាជន​កម្ពុជា ក៏​ពូកែ​ខាង​បំបែក​បំបាក់​ដៃគូ​របស់​ខ្លួន​ដែរ រហូត​ដល់​ទាញ​យក​សមាជិក​គូ​ប្រកួត​របស់​ខ្លួន​ឲ្យ​មក​ចុះ​ចូល​ជាមួយ​ខ្លួន​ទៀត ដូច​ជា សមាជិក​របស់​គណបក្ស​ហ៊្វុនស៊ិនប៉ិច មាន​ទាំង​មន្ត្រី​ជាន់​ខ្ពស់​ទៀត​ផង ដែល​ជា​ឧទាហរណ៍​ស្រាប់។

ផ្ទុយ​ទៅ​វិញ ទោះ​បី​ជា​គណបក្ស​សង្គ្រោះ​ជាតិ មាន​មេ​ដឹក​នាំ​ខុស​ពី​គណបក្ស​ហ៊្វុនស៊ិនប៉ិច ក្ដី ដែល​មេ​ដឹក​នាំ​ទាំង​ពីរ​មាន លោក សម រង្ស៊ី និង​លោក កឹម សុខា អ្នក​ទាំង​ពីរ​មាន​ឆន្ទៈ​មោះមុត និង​ធ្លាប់​មាន​ប្រវត្តិ​ការ​ឈឺ​ចាប់ ដោយសារ​តែ​រដ្ឋាភិបាល​ដឹក​នាំ​ដោយ​គណបក្ស​ប្រជាជន​កម្ពុជា ធ្លាប់​ចាប់​ខ្លួន​អ្នក​ទាំង​ពីរ​ដាក់​ពន្ធនាគារ​ដោយ​រឿង​នយោបាយ ដែល​កត្តា​ទាំង​នេះ ធ្វើ​ឲ្យ​ប្រជាពលរដ្ឋ​មាន​ជំនឿ​ទុក​ចិត្ត​ថា អ្នក​ទាំង​ពីរ​មិន​ងាយ​លក់​ឧត្តម​គតិ​របស់​ខ្លួន​ក្ដី ក៏ប៉ុន្តែ​មេ​ដឹក​នាំ​ទាំង​ពីរ​នាក់​នេះ ហាក់​លំបាក​នឹង​ទប់ទល់​ជាមួយ​គណបក្ស​ប្រជាជន​កម្ពុជា ណាស់។

លំបាក​ទប់ទល់​នៅ​ត្រង់​ថា ទោះ​បី​ជា​អ្នក​ទាំង​ពីរ​បាន​ទាមទារ​ឲ្យ​មាន​ការ​កែ​ទម្រង់​ស្ថាប័ន​បោះ​ឆ្នោត គ.ជ.ប ដែល​ជា​ស្ថាប័ន​ដ៏​ធំ​មួយ​សម្រាប់​កំណត់​វាសនា​ប្រទេស​ជាតិ តាម​រយៈ​រៀបចំ​ឲ្យ​ប្រជាពលរដ្ឋ​បោះ​ឆ្នោត ក៏ប៉ុន្តែ​ការ​ផ្លាស់​ប្ដូរ​មនុស្ស​វា​មិន​សំខាន់​ប៉ុន្មាន​ទេ សំខាន់ គឺ​ការ​ប្ដូរ​ប្រព័ន្ធ​បោះ​ឆ្នោត ហើយ​ការ​ប្ដូរ​ប្រព័ន្ធ​បោះ​ឆ្នោត​ដែល​ធានា​ថា​ឯករាជ្យ អព្យា​ក្រឹត្យ និង​ត្រឹមត្រូវ​នោះ គឺ​សង្ឃឹម​តិចតួច​ណាស់ ពីព្រោះ​គណបក្ស​ប្រជាជន​កម្ពុជា ដឹង​ច្បាស់​ថា បើ​សិន​ជា​ប្ដូរ​ទៅ​តាម​អ្វី​ដែល​គណបក្ស​សង្គ្រោះ​ជាតិ ចង់​បាន​នោះ គឺ​ប្រៀប​ដូច​ជា​ធ្វើ​នយោបាយ​សម្លាប់​ខ្លួន​ឯង ឬ​និយាយ​អោយ​ស្រួល​ស្តាប់ គណបក្ស​ប្រជាជន​កម្ពុជា អាច​នឹង​មិន​ធ្វើ​នយោបាយ​ជីក​រណ្ដៅ​កប់​ខ្លួន​ឯង​នោះ​ទេ។

ក្រៅ​ពី​នេះ​ទៀត ត្បិត​តែ​គណបក្ស​សង្គ្រោះ​ជាតិ ទាមទារ​ឲ្យ​មាន​តុល្យភាព​អំណាច​នៅ​ស្ថាប័ន​នីតិប្បញ្ញត្តិ ដូចជា គណបក្ស​សង្គ្រោះ​ជាតិ នឹង​ធ្វើ​ជា​អនុ​ប្រធាន​សភា និង​មាន​គណៈកម្មការ​ជំនាញ​នៃ​រដ្ឋសភា​ចំនួន ៥​ទៀត ក្នុង​នោះ គណបក្ស​សង្គ្រោះ​ជាតិ នឹង​ដឹក​នាំ​គណៈកម្មការ​ប្រឆាំង​អំពើ​ពុក​រលួយ និង​បោស​សម្អាត ជាដើម។ ទោះ​បី​ជា​គណបក្ស​សង្គ្រោះ​ជាតិ បាន​ដឹក​នាំ​គណៈកម្មការ​ប្រឆាំង​អំពើ​ពុក​រលួយ​នេះ​ក៏ដោយ ក៏ប៉ុន្តែ​មិន​សន្មត​ថា គណបក្ស​សង្គ្រោះ​ជាតិ អាច​បោស​សម្អាត​អំពើ​ពុក​រលួយ​បាន​នោះ​ឡើយ ពីព្រោះ​ថា គណៈកម្មការ​នេះ​មិន​អាច​ដឹង​ច្បាស់​ថា ថវិកា​ជាតិ​ដែល​ត្រូវ​ប្រើប្រាស់ ចំណូល​ចំណាយ និង​ការ​គ្រប់គ្រង​ថវិកា ដូច​គណៈកម្មការ​សេដ្ឋកិច្ច​ហិរញ្ញវត្ថុ និង​សវនកម្ម​នោះ​ឡើយ ព្រោះ​គណៈកម្មការ​នេះ គណបក្ស​ប្រជាជន​កម្ពុជា ជា​អ្នក​គ្រប់គ្រង។

ម្យ៉ាង​វិញ​ទៀត ការ​ពិភាក្សា​គ្នា​ធ្វើ​វិសោធនកម្ម​រដ្ឋធម្មនុញ្ញ ទាក់ទង​នឹង​ការ​បង្កើត​ស្ថាប័ន​រៀបចំ​ការ​បោះ​ឆ្នោត​ថ្មី​នោះ គណបក្ស​សង្គ្រោះ​ជាតិ ហាក់​ដូច​ជា​គ្មាន​ទាមទារ​បាន​អ្វី​ជា​ដុំ​កំភួន​ឡើយ ដូច​ជា ការ​ទាមទារ​សុំ​ឲ្យ​សមាជិក គ.ជ.ប ថ្មី​មាន​អភ័យ​ឯកសិទ្ធិ​ដូច​សមាជិក​រដ្ឋសភា​ដែរ ខាង​គណបក្ស​ប្រជាជន​កម្ពុជា មិន​ព្រម ជាដើម។

នៅ​ទីបំផុត បេក្ខជន​តំណាង​រាស្ត្រ​គណបក្ស​សង្គ្រោះ​ជាតិ ទាំង ៥៥​រូប សម្រេច​ចូល​សច្ចាប្រណិធាន​នៅ​ព្រះបរមរាជវាំង កាល​ពី​រសៀល​ថ្ងៃ​ទី​៥ សីហា នៅ​ក្រោយ​ពេល​សកម្មជន​របស់​ខ្លួន ៣​នាក់ ត្រូវ​បាន​តុលាការ​ចាប់​ដាក់​ពន្ធនាគារ ដែល​គេ​មើល​ឃើញ​ថា គណបក្ស​សង្គ្រោះ​ជាតិ ហាក់​ដូច​ជា​ភ័យ​ខ្លាច​ចំពោះ​ការ​ចាប់​ខ្លួន​សមាជិក​បេក្ខជន​តំណាង​រាស្ត្រ ដែល​កំពុង​ជាប់​បណ្ដឹង​នៅ​តុលាការ ហើយ​នាំ​គ្នា​ចូល​សច្ចាប្រណិធាន ដើម្បី​ទទួល​បាន​ការ​ការពារ​ដ៏​រឹងមាំ​ថែម​ទៀត​ពី​អភ័យ​ឯកសិទ្ធិ ដូច​ដែល​មាន​ចែង​នៅ​ក្នុង​រដ្ឋធម្មនុញ្ញ​មាត្រា​៨០។ ប្រការ​ទាំង​នេះ តាម​មើល​ទៅ​គណបក្ស​សង្គ្រោះ​ជាតិ ហាក់​ដូច​ជា​ធ្វើ​នយោបាយ ដើម្បី​ចាញ់​បោក​នយោបាយ​របស់​គណបក្ស​ប្រជាជន​កម្ពុជា។

ទោះ​បី​ជា​យ៉ាង​នេះ​ក្ដី គណបក្ស​សង្គ្រោះ​ជាតិ នៅ​មិន​ទាន់​ហួស​ពេល​សម្រាប់​រក្សា​ការ​គាំទ្រ​របស់​ខ្លួន​ពី​ប្រជាពលរដ្ឋ​ទេ។ បញ្ហា​ចំពោះ​មុខ​នៅ​ក្រោយ​ពេល​ចូល​សភា​នោះ គឺ​គណបក្ស​សង្គ្រោះ​ជាតិ អាច​ឆក់​ឱកាស​នេះ​ក្នុង​ការ​ស្វែងរក​យុត្តិធម៌​ជូន​អ្នក​ស្លាប់​ក្នុង​ពេល​ធ្វើ​បាតុកម្ម ក្នុង​នោះ​មាន​អ្នក​របួស​ខ្លះ​ពិការ​ដល់​សព្វថ្ងៃ ដែល​មិន​ទាន់​មាន​សំណង និង​យុត្តិធម៌​ពី​តុលាការ​នៅ​ឡើយ។

ក្រៅ​ពី​នេះ ការ​ទាមទារ​ដំឡើង​ប្រាក់​ឈ្នួល​ឲ្យ​បាន ១៦០​ដុល្លារ ដូច​ដែល​កម្មករ​បាន​ទាមទារ និង​បាន​ចូលរួម​ធ្វើ​បាតុកម្ម​ជាមួយ​គណបក្ស​សង្គ្រោះ​ជាតិ កន្លង​មក​នៅ​ទីលាន​ប្រជាធិបតេយ្យ ការ​រៀបចំ​ឡើង​វិញ​នូវ​ការ​ផ្ដល់​ដី​សម្បទាន​សេដ្ឋកិច្ច ដែល​ធ្វើ​ឲ្យ​ប៉ះពាល់​ដល់​ការ​បណ្ដេញ​ប្រជាពលរដ្ឋ និង​ធ្វើ​ឲ្យ​ប្រជាពលរដ្ឋ​បាត់​បង់​ផ្ទះ​សម្បែង​ដីធ្លី បញ្ហា​បំបាត់​អំពើ​ពុក​រលួយ បញ្ហា​អន្តោប្រវេសន៍។ល។ គឺ​សុទ្ធ​តែ​ជា​បញ្ហា​ចម្បងៗ ដែល​គណបក្ស​សង្គ្រោះ​ជាតិ ធ្លាប់​បាន​សន្យា​ជាមួយ​អ្នក​គាំទ្រ​របស់​ខ្លួន។ បញ្ហា​ទាំង​នេះ ប្រជាពលរដ្ឋ​នឹង​រង់ចាំ​អ៊ុត​មើល​បន្ត​ទៀត ថា​តើ​គណបក្ស​សង្គ្រោះ​ជាតិ នឹង​ធ្វើ​បាន​ដូច​ដែល​ខ្លួន​ធ្លាប់​បាន​សន្យា​ដែរ ឬ​យ៉ាង​ណា នៅ​ក្រោយ​ពេល​ចូល​ប្រជុំ​សភា​នោះ?

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (7)
Share

kraingmeas

ពី Alsace

Tov min rouch te

Sep 09, 2014 10:19 AM

អ្នក​អាន​អនាមិក

Time is changing, I believe CNRP Kem Soka have a chance if he play the game quickly. you all know CPP don't know any thing at the beginning they learn learn it from you.Think and think the reason CNRP got alots of support because it was quick change, the CPP don't know how to stop you guy from gaining. the same thing when at freedom park, the longer you play the more time you give them to figure out how to kill you. Look back the past. Remember, CPP and Hun Sen are not smart but they have power. you got to be smarter than them to win.

Aug 08, 2014 01:45 AM

អ្នក​អាន​អនាមិក

What can the CPP learn from CNRP? The CNRP didn't cut down trees, the CNRP didn't steal land from farmers, and the CNRP didn't kill and throw people in jail.

It's downhill from here for the CPP. No amount of good they do will erase their 30 years sin they've committed. The CPP is tainted. It would take their corrupt policy a 180 degrees turn to even to have a chance.

Aug 08, 2014 02:13 PM

អាន បានសុក

ពី តាកែវ

១០០០%គឺសូន្យតាផ្លាក។សូមពិនិត្យសាឡើងវិញអំពីដំណើរនយោ
បាយរបស់សម រង្សីចាប់តាំងពីពេលដកពាក្យបណ្ដឹងហ៊ុន សែនពី
អាយស៊ីស៊ីមក នោះនឹងបានឃើញច្បាស់ថាសម រង្សីជាអ្នកនយោ
បាយបែបណាហើយ។

Aug 07, 2014 04:43 PM

អ្នក​អាន​អនាមិក

Hun Sen was strong because Khmer people made him strong and hated Rotal Family, no doubt about it. If someone hate you, without real justifications, how do you feel about it? From now as long as Khmer people love, respect, recognize, unite with our King faithfully there will be no problems! We had to think of faults too, not just others! We are human being and we all have made mistakes in our life! Who got the Independence of Cambodia?

Aug 06, 2014 03:50 AM

អ្នក​អាន​អនាមិក

I never saw, not once, the royal family or the King himself went to see people at Beung Kak Lake or Borie Kaila. Do you even care if they live or die? No one holds you prisoner in your palace. Get out and talk to your people. Ask them what they need. Take control of your own life, don't let others do it for you. Who are you? Peoples' King or government's King?

Aug 08, 2014 02:22 PM

DEJO PEN

HOPE I AM WRONG.THERE IS NO MAGIC WORDS TO CHANGE HUN SEN IF HE IS STILL BE THE HEAD OF GOVT.SO,CNRP CAN DO NOTHING BESIDES WAITING FOR SOME BONES THROWN BY CPP.

Aug 05, 2014 09:48 AM

មើល​មតិ​ទាំង​អស់.

គេហទំព័រ​ទាំងមូល