ពលករខ្មែរធ្វើការនៅក្រៅប្រទេសរាប់រយនាក់រួមគ្នាធ្វើបុណ្យភ្ជុំបិណ្ឌនៅថៃ
2018.09.29
ពលករនៅថៃធ្វើបុណ្យភ្ជុំបិណ្ឌ នៅវត្តសូធននិមិត្ត ខេត្តសាមុតប្រាកាន ជាប់ក្រុងបាងកក ប្រទេសថៃ នៅព្រឹកថ្ងៃទី៣០ ខែកញ្ញា ឆ្នាំ២០១៨។
រូប៖ ពលរដ្ឋ
ពលករខ្មែរធ្វើការនៅប្រទេសថៃរាប់រយនាក់ ដែលមិនបានត្រឡប់ទៅលេងស្រុកកំណើត បានសាមគ្គីគ្នាប្រារព្ធពិធីបុណ្យភ្ជុំបិណ្ឌ នៅវត្តមួយក្នុងខេត្តសាមុទប្រាកាណ ជាប់ទីក្រុងបាងកក ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធបុព្វការីជនដែលបានចែកឋាន ទៅកាន់លោកខាងមុខ។ ពិធីបុណ្យនេះចាប់ផ្ដើមនៅរសៀលថ្ងៃទី២៩ ហើយបញ្ចប់នៅព្រឹកថ្ងៃទី៣០ ខែកញ្ញា។
ក្រុមពលករធ្វើការនៅប្រទេសថៃលើកឡើងថា គោលបំណងសំខាន់ក្នុងការធ្វើបុណ្យនេះ ដើម្បីឧទ្ទិសកុសលបុណ្យដល់ជីដូនជីតាផង ដើម្បីរក្សាទំនៀមទម្លាប់ប្រពៃណីរបស់ខ្មែរផង និងជាឱកាសដើម្បីឲ្យពួកគេបានជួបជុំផ្លាស់ប្ដូរយោបល់គ្នានៅឯក្រៅប្រទេស។
តំណាងពលករខ្មែរនៅប្រទេសថៃម្នាក់លោក សុន សីហា ឲ្យដឹងនៅថ្ងៃទី២៩ កញ្ញាថា ពិធីនេះពួកគេបាននិមន្តព្រះសង្ឃខ្មែរចំនួន១២អង្គ និងព្រះសង្ឃថៃចំនួន ៩អង្គ ហើយក្នុងនោះនៅរសៀលថ្ងៃដំបូងមាននិមន្តព្រះសង្ឃសូត្រមន្ត និងមានពលករខ្មែរចូលរួមប្រមាណ១០០នាក់ ចំណែកនៅព្រឹកថ្ងៃទី៣០ កញ្ញា ជាថ្ងៃជួបជុំគ្នាធំដោយមានការដាក់បាត និងស្ដាប់ព្រះសង្ឃសម្ដែងធម៌ទេសនា។ លោកបន្ថែមទៀតថា ក្រោយពេលចប់កម្មវិធីបុណ្យនៅព្រឹកថ្ងៃទី៣០ កញ្ញា គឺជាពេលដែលពលករជួបជុំផ្លាស់ប្ដូរយោបល់គ្នាទៅវិញទៅមក៖ «ចំពោះពលករនៅខេត្តរ៉ាក់យ៉ង និងនៅខេត្តសាមុតប្រាកាណគាត់បាន វិច នំអន្សមយកមកដែរ ហើយឥឡូវគាត់បានយកមកដល់ហើយ ដើម្បីប្រគេនព្រះសង្ឃ និងសម្រាប់ចែកពលករដែលមកចូលរួមបុណ្យ បានហូបនំអន្សមខ្មែរ ដែលនៅក្នុងប្រទេសគាត់តែងនាំគ្នាវិចនំអន្សមជារៀងរាល់ឆ្នាំនោះ»។
ចំណែកពលករដែលបានចូលរួមក្នុងពិធីបុណ្យនេះលោក សុខ ឃាង ថ្លែងថា នេះជាលើកទីមួយដែលរូបគេបានចូលរួមធ្វើបុណ្យភ្ជុំបិណ្ឌនៅក្រៅប្រទេសនោះ។ លោកអះអាងទៀតថា លោកបានមកធ្វើការនៅប្រទេសថៃជាង៥ឆ្នាំហើយ គឺកម្រមានឱកាសបានទៅធ្វើបុណ្យភ្ជុំបិណ្ឌនៅឯស្រុកកំណើតណាស់ ព្រោះរវល់ធ្វើការងារ ហើយថៅកែជនជាតិថៃមិនអនុញ្ញាតឲ្យខ្លួនឈប់សម្រាកទៅលែងស្រុកខ្មែរក្នុងឱកាសពិធីបុណ្យនេះបានទេ៖ «ខ្ញុំសប្បាយរំភើបរហូតចង់ស្រកទឹកភ្នែក យើងជាពលករធ្វើការនៅស្រុកគេអត់បានទៅបុណ្យនៅស្រុកយើង ប៉ុន្តែក៏មានសំណាងល្អម្យ៉ាងដែរ ដែលខ្មែរយើងមានរៀបចំបុណ្យភ្ជុំនៅទីនេះ ហើយធ្វើយើងបានជួបជុំសំណេះសំណាលគ្នា ដើម្បីងាយស្រួលទំនាក់ទំនងគ្នាទៅថ្ងៃក្រោយ ដើម្បីជួយគ្នានៅគ្រាមានអាសន្នដូចជាថៅកែថៃមិនបើកប្រាក់ខែឬក៏ធ្វើបាបខ្មែរជាដើម អាចជួយគ្នាបាន»។
អ្នកជំនាញខាងព្រះពុទ្ធសាសនាព្រះចៅអធិការវត្តប្រាសាទស្រះកណ្ដាលខ្ចាស់ ព្រះតេជព្រះគុណ ចាន់ សុជន មានថេរដីកាថា ចំពោះពលរដ្ឋដែលមិនមានឱកាសមកធ្វើបុណ្យនៅស្រុកកំណើត នាំគ្នាធ្វើបុណ្យភ្ជុំបិណ្ឌនៅក្រៅប្រទេសបាន ដោយមិនមានការឆ្គងនោះទេ ហើយអ្នកធ្វើបុណ្យនេះបានបុណ្យដូចពលរដ្ឋនៅខាងក្នុងប្រទេសដែរ៖ «នេះជារឿងល្អមែនទែន អាត្មានៅតែកោតសរសើរ ខ្មែរយើងដែលនៅក្រៅប្រទេសស្ទើរគ្រប់ទីកន្លែង ដែលតែងរក្សាប្រពៃណីធ្វើបុណ្យភ្ជុំបិណ្ឌដូចពលរដ្ឋខ្មែរនៅក្នុងស្រុកដែរ ដូច្នេះអាត្មាគិតថាពលរដ្ឋខ្មែរនៅទីណាក៏ដោយ គឺមិនបោះបង់ប្រពៃណីទំនៀមទម្លាប់ខ្មែរដែរ ហើយប្រពៃណីទាំងនេះនឹងធ្វើឲ្យមានបន្តទៅដល់ក្មេងជំនាន់ក្រោយទៀត»។
ក្រុមពលកររំពឹងថា អ្នកដែលចូលរួមក្នុងពិធីបុណ្យនៅព្រឹកថ្ងៃទី៣០ កញ្ញា អាចនឹងមានជាង១ពាន់នាក់ ព្រោះបុណ្យភ្ជុំបិណ្ឌឆ្នាំនេះ ពលករភាគច្រើនមិនបានទៅលេងស្រុកកំណើតនោះទេ ដោយសារថៅកែមិនអនុញ្ញាត ក្នុងនោះពលករមួយចំនួននឹងនាំគ្នាទៅធ្វើបុណ្យជាមួយព្រះសង្ឃខ្មែរ នៅតំបន់ដែលពួកគេរស់នៅក្នុងប្រទេសថៃ ព្រោះមានរៀបចំពិធីបុណ្យភ្ជុំបិណ្ឌជាច្រើនកន្លែង ដូចជានៅខេត្តនគររាជសីមា ទីក្រុងបាងកក និងខេត្តសាមុតខនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»