ទស្សនៈ​និង​ឥរិយាបថ​ពលរដ្ឋ​ក្នុង​ការចូលរួម​ចូល​ឆ្នាំ​ថ្មី​សម័យ​កូរ៉ូណា ឬ​កូវីដ​-19

ដោយ សេក បណ្ឌិត
2020-04-09
អ៊ីម៉ែល
មតិ
Share
បោះពុម្ព
មេរោគ​វីរុស កូរ៉ូណា
មេរោគ​វីរុស កូរ៉ូណា
ក្រសួងសុខាភិបាល

មន្ត្រី​នៃ​ក្រសួង​មួយ​ចំនួន​អះអាង​ថា ការ​ប្រារព្ធ​ពិធីបុណ្យ​ចូល​ឆ្នាំថ្មី​ប្រពៃណី​ជាតិ​នឹង​ត្រូវ​ធ្វើឡើង​ដោយ​ស្ងៀមស្ងាត់ និង​ដោយ​ឡែកៗ​ពីគ្នា នៅ​តាម​ទីកន្លែង​រស់នៅ​អចិន្ត្រៃយ៍​រៀងៗ​ខ្លួន ដើម្បី​ទប់ស្កាត់​ការ​រីក​រាលដាល​ជំងឺ​កូវីដ​១៩។

ចំណែក​ក្រុម​ប្រជាពលរដ្ឋ ថា ពួកគេ​នឹង​គោរព​តាម​ការណែនាំ​របស់​រដ្ឋាភិបាល ម្យ៉ាង​ពួកគាត់​គ្មាន​លុយ​សម្រាប់​ចូល​ឆ្នាំថ្មី​នេះ​ទៀត​ផង​ព្រោះ​គ្មាន​ការងារ​ធ្វើ រក​ប្រាក់​មិន​បាន។

ពិធីបុណ្យ​ចូល​ឆ្នាំថ្មី ប្រពៃណី​ជាតិ ឆ្នាំជូត ឬ​ឆ្នាំ​កណ្តុរ នៅ​ឆ្នាំ​២០២០​នេះ​ធ្វើឡើង​ក្នុង​ភាព​សោះកក្រោះ និង​មាន​ភាព​កណ្ដោចកណ្ដែង​ជាង​ពេល​ណាៗ​ទាំងអស់​ក្នុង​រយៈពេល​ប្រមាណ​៤០​ឆ្នាំ​កន្លង​មក​នេះ។

ពលរដ្ឋ​ដែល​កើត​ទាន់សម័យ ប៉ុល ពត ឬ​សម័យ​ខ្មែរក្រហម​បាន​ឱ្យ​ដឹង​ថា ភាព​សោះកក្រោះ​ក្នុង​ពេល​ចូលឆ្នាំ​ខ្មែរ​បែបនេះ ធ្លាប់​មានតែ​ក្នុង​សម័យ​អាវ​ខ្មៅ ក្នុង​គុក​អត់​ជញ្ជាំង​នោះ​ទេ។

ចំណែក​មន្ត្រី​រដ្ឋាភិបាល​ថា​៖ ពិធី​ទាំងឡាយ​ដែល​ជា​ទំនៀមទម្លាប់ ហើយ​ធ្លាប់​ប្រារព្ធ​ឡើង​ក្នុង​ថ្ងៃ​ចូលឆ្នាំ​ដូច​ពេល​កន្លង​មក​នោះ​ត្រូវ​ផ្អាក​បណ្ដោះអាសន្ន​នៅ​ឆ្នាំនេះ​។​

ចំណែក​ពិធី​មួយ​ចំនួន​នៅ​អាច​ធ្វើ​បាន ប៉ុន្តែ​ត្រូវ​ផ្លាស់ប្ដូរ​របៀប​ខ្លះ​ស្របតាម​សម័យ​កូរ៉ូណា ឬ​កូវីដ​១៩ និង​ត្រូវ​គោរព​តាម​បម្រាម​របស់​រដ្ឋាភិបាល និង​អ្នក​ជំនាញ​សុខភាព។

អ្នកនាំពាក្យ​ក្រសួង​ធម្មការ និង​សាសនា លោក ស៊ិន សុមនី មាន​ប្រសាសន៍ថា ក្រសួង​បាន​ចេញ​សារាចរ​ណែនាំ​ដល់​គណៈ​គ្រប់គ្រង​វត្ត​ទាំងឡាយ​ទូទាំង​ប្រទេស​ឱ្យ​អនុវត្ត​តាម​បម្រាម​រដ្ឋាភិបាល ដោយ​ចាត់​ឱ្យ​មាន​អ្នក​រៀបចំ​ពិធី​សាសនា​នានា​ត្រូវ​ធ្វើ​ដាច់ដោយឡែក​ពី​គ្នា ជា​ក្រុម​តូចៗ​ទាំង​ពុទ្ធ​បរិស័ទ និង​ព្រះសង្ឃ ព្រមទាំង​របៀប​ប្រគេន​ចង្ហាន់​ព្រះសង្ឃ​ដែល​សុវត្ថិភាព អាច​បង្ការ និង​ការពារ​ការ​ឆ្លង​រោគ​កូរ​ណា ឬ​ជំងឺ​កូ​វីដ​១៩​៖ «យាយ​តា​ដែល​មក​សុំ​សីល​ក៏​អាច​នៅ​តែ​មក​បាន​អ៊ីចឹង​ដោយ​ក្រាលកន្ទេល​នៅ​ខាងក្រៅ​ព្រះវិហារ ឬក៏​នៅ​ក្នុង​សាលា ប៉ុន្តែ​អង្គុយ​ឆ្ងាយ​ពី​គ្នា គេ​ណែនាំ​ថា​ចម្ងាយ​២​ម៉ែត្រ លោក​ដាក់​ឱ្យ​នៅ ៣​ម៉ែត្រ​ឯណោះ​ដើម្បី​កុំ​ឱ្យ​ប៉ះពាល់​គ្នា»

ទាក់ទង​ការ​ប្រារព្ធ​ពិធី​ចូលឆ្នាំ និង​ពិធី​សាសនា​ផ្សេងៗ នៅ​តាម​ទី​អារាម​នេះ​ដែរ លោក ហ៊ុន សែន បញ្ជាក់​ថា នឹង​គ្មាន​ការ​បិទទ្វារ​វត្ត ឬ​ហាមឃាត់​មិន​ឱ្យ​ធ្វើ​ពិធី​សាសនា​ណាមួយ​នោះ​ឡើយ ប៉ុន្តែ​គ្រប់គ្នា​ត្រូវ​មាន​ការប្រុងប្រយ័ត្ន ដោយ​ធ្វើ​យ៉ាងណា​កុំ​មានការ​ជួបជុំ​ផ្តុំ​គ្នា​ច្រើន និង​ត្រូវ​ស្ថិតនៅ​ឱ្យ​មាន​គម្លាត​ឆ្ងាយ​ពី​គ្នា​តាម​ដែល​អាច​ធ្វើ​ទៅ​បាន៖ «ប៉ុន្តែ​រដ្ឋាភិបាល​អំពាវ​ឱ្យ​ព្រះសង្ឃ សាសនិក​ឥស្លាម​ថ្វាយ​បង្ខំ​តាម​ផ្ទះ ឬ​នៅ​តា​មកុដិ​រៀងៗ​ខ្លួន ហើយ​បើ​ថា ឆាន់​ឱ្យ​ស្ថិតនៅ​ឆ្ងាយ​ពី​គ្នា​បន្តិច​ទៅ​...​ព្រោះ​អាហ្នឹង​គេ​ចាត់ទុកថា មាន​សុវត្ថិភាព​បំផុត​ហើយ»

អ្នក​ជំនាញ​សុខាភិបាល​ណែនាំ​មិន​ឱ្យ​មានការ​ជួបជុំ​ឬ​នៅ​ផ្តុំ​គ្នា​លើស​ពី​១០​នាក់ និង​ត្រូវ​ស្ថិតនៅ​ឆ្ងាយ​ពី​គ្នា​ចាប់ពី​១​ម៉ែត្រ​កន្លះ ទៅ​២​ម៉ែត្រ។

រដ្ឋមន្ត្រី នៃ​ក្រសួង​វប្បធម៌ និង​វិចិត្រសិល្បៈ អ្នក ស្រី ភឿង សកុណា មានប្រសាសន៍​ថា ឆ្នាំនេះ​មិន​មាន​ការ​បង្កើត​កម្មវិធី​សង្ក្រាន្ត​ដើម្បី​ទទួល​ទេវតា​ឆ្នាំ​ថ្មី​នៅ​តាម​បណ្តា​ខេត្ត ក្រុង ឬ​នៅ​តាម​ទី​សាធារណៈ​ទូទាំង​ប្រទេស​ដូច​ឆ្នាំមុនៗ​ឡើយ​។​

ជាមួយ​គ្នា​នេះ ការ​ប្រគុំ​តន្ត្រី និង​ល្បែង​របាំ​ប្រជាប្រិយ ដូចជា​របាំ​ត្រុដ ទាញ​ព្រាត់ និង​លាក់កន្សែង​ជាដើម​នោះ​គ្មាន​ទៀត​ឡើយ​នៅ​ឆ្នាំនេះ៖ «ការ​ប្រមូល​ផ្តុំ​គ្នា​សម្ដែង​សិល្បៈ​ដូចជា​របាំ​ត្រុដ​ជាដើម​នោះ គឺ​នៅ​ក្នុង​កាលៈទេសៈ​នេះ​មិន​គួរ​ទេ ក៏ប៉ុន្តែ​បើ​នៅ​តាម​ផ្ទះ​រៀបចំ​ទទួល​ទេវតា​រៀងខ្លួន​នោះ គឺជា​អ្វី​ដែល​យើង​ត្រូវ​ធ្វើ ចំណែក​ការ​ប្រមូល​ផ្តុំ​គ្នា​គួរ​ត្រូវ​ជៀសវាង ដើម្បី​ការពារ​ជំងឺ​នេះ​កុំ​វា​រីក​រាលដាល ព្រោះ​យើង​អត់​ដឹង​ថា វា​នៅ​ទីណា​ខ្លះ​នោះ​ទេ»

ការ​បង្ហាញ​ពី​ផែនការ​សកម្មភាព អំពី​ការ​ប្រារព្ធ​ពី​ធី​ចូល​ឆ្នាំថ្មី របស់​ក្រសួង​ពាក់ព័ន្ធ​នេះ ក្រោយពី លោក ហ៊ុន សែន បាន​ប្រកាស​ឱ្យ​ផ្អាក​ប្រារព្ធ ពិធីបុណ្យ​ចូល​ឆ្នាំថ្មី​ប្រពៃណី​ជាតិ​បណ្ដោះអាសន្ន និង​ពន្យារពេល​ថ្ងៃ​ឈប់សម្រាក​ក្នុង​ឱកាស​ពិធីបុណ្យ ដើម្បី​ទប់ស្កាត់​ការ​រីក​រាលដាល​ជំងឺ​កូវីដ១៩៖ «ស្ថាប័នរដ្ឋ និង​ក្រុមហ៊ុន​ឯកជន​ត្រូវ​បន្ត​ធ្វើ​ការ​ធម្មតា ហើយ​រដ្ឋ​នឹង​សង​វិញ​នៅ​ពេល​សមស្រប​ចំនួន​៥​ថ្ងៃ នៃ​ថ្ងៃ​ធ្វើការ​...​អញ្ចឹង​កន្លែង​សុវត្ថិភាព​បំផុត​គឺ​កន្លែង​ធ្វើការ តាម​រោងចក្រ ក្រុមហ៊ុន និង​តាម​ស្ថាប័ន​នានា​...​បើ​ទុក​បណ្ដោយ​ឱ្យ​ដើរលេង សភាពការណ៍​ក្រោយ​ចូលឆ្នាំ អាច​មាន​ហានិភ័យ​ខ្ពស់»

ការ​ថ្លែង​បែបនេះ​ធ្វើឡើង​ក្នុង​សន្និសីទ​ព័ត៌មាន​ពាក់ព័ន្ធ​នឹង​បច្ចុប្បន្នភាព​នៃ​ជំងឺ​កូវីដ​១៩ នៅ​ថ្ងៃ​ទី​០៧ ខែ​មេសា ឆ្នាំ​២០២០ នៅ​វិមាន​សន្តិភាព។

ដោយឡែក​ពាក់ព័ន្ធ​នឹង​វិស័យ​សិល្បៈ និង​សេវា​កម្សាន្ត​នានា​វិញ លោក ហ៊ុន សែន បាន​ប្រកាស​ជា​ថ្មី​ទៀត គឺ​បញ្ឈប់ ឬ​បិទ​មិន​ឱ្យ​មាន​សេវាកម្ម​ក្លឹប​កម្សាន្ត ខារាអូខេ (Karaoke) និង​ការ​ប្រគុំ​តន្ត្រី ឬ Concert សាធារណៈ​ជា​បណ្ដោះអាសន្ន​។ ប៉ុន្តែ​លោក​លើកទឹកចិត្ត​ឱ្យ​មានការ​ប្រគំ​តន្ត្រី និង​កីឡា​ប្រដាល់ ជា​អសាធារណៈ ឬ​បិទទ្វារ ហើយ​ផ្សាយ​បន្ត​ផ្ទាល់​តាម​បណ្ដាញ​ផ្សព្វផ្សាយ​នានា​តាម​ដែល​អាច​ធ្វើ​បាន​ដើម្បី​ឱ្យ​ប្រជាពលរដ្ឋ​បាន​ទស្សនា​កម្សាន្ត ឬ​កុំ​ឱ្យ​ពួកគាត់​អផ្សុក​ពេក៖ «កុំ​ឱ្យ​ប្រទេស​យើង​ស្ងាត់​ពេក ដួច​គេ​ថា ស្ងាត់​ដូច​ចោរលួច​សេះ យើង​មិនទាន់​ដល់​កម្រិត​ប៉ុណ្ណឹង​ទេ តែ​យើង​ក៏​មិន​បណ្ដែតបណ្ដោយ​ឱ្យ​មានការ​ប្រមូល​ផ្តុំ​ទៅ​មើល​Concert ..​ទៅ​មើល​ការ​វ៉ៃ​ប៉ុក ផ្ទាល់​ជា​សាធារណៈ​នោះ​ដែរ នៅ​ប្រទេស​ថៃ​គេ​រក​ឃើញ​កន្លែង​ឆ្លង​មេរោគ​ច្រើន​ជាងគេ​គឺ​នៅ​កន្លែង​វាយ​ប្រដាល់​ហ្នឹងឯង យើង​អាច​រៀន​សូត្រ​នូវ​អ្វី​ដែល​បាន​កើត​មក​នេះ»

ជាមួយគ្នា​នោះ​ដែរ លោក ហ៊ុន សែន ក៏បាន​សំណូមពរ​ដល់​ប្រជាជន​កាត់បន្ថយ​ការ​ធ្វើ​ដំណើរ​ទៅ​ស្រុក​កំណើត និង​ទៅ​ដើរលេង​កម្សាន្ត​នៅ​តាម​រមណីយដ្ឋាន ឬ​តំបន់​ទេសចរណ៍​នានា​ផង​ដែរ។

ចំណែក​ទស្សនៈ និង​ឥរិយាបថ​ពលរដ្ឋ​ក្នុង​ការ​ចូលរួម​ប្រារព្ធ​ពិធី​ចូល​ឆ្នាំថ្មី​សម័យ​កូរ៉ូណា ឬ​កូវីដ​-១៩​នេះ ពួកគាត់​ខ្លះ​គាំទ្រ​ចំពោះ​បម្រាម​របស់​អាជ្ញាធរ​រដ្ឋាភិបាល ដោយ​ហេតុផល ដើម្បី​សុខភាព ចំណែក​ពួកគាត់​ខ្លះ​ទៀត​ហាក់​នៅ​រារែក​ព្រោះ​គាត់​ថា​ពិបាក​ចោល​នូវ​អ្វី​ដែល​ធ្លាប់​បាន​ប្រារព្ធ​រាប់​ឆ្នាំ​មកហើយ​នោះ។

ពលរដ្ឋ​រស់នៅ​ភូមិ​ចេក ឃុំ​ឈើទាល ស្រុក ស្វាយជ្រុំ ខេត្ត​ស្វាយរៀង លោកស្រី យស សោភ័ណ្ឌ បាន​ឱ្យ​ដឹង​ថា ភ័យ​ចេះតែ​ភ័យ​ហើយ​...!! ភ័យ​នឹង​បម្រាម​របស់​អាជ្ញាធរ​ផង ភ័យ​នឹង​ជំងឺឆ្លង​ផង ប៉ុន្តែ​ទម្លាប់​ចាស់ទុំ​ពី​បុរាណ​មួយ​ឆ្នាំ​ម្តង ពិបាក​នឹង​បោះបង់ចោល​ណាស់ ដូចជា​បុណ្យ​ភូមិ ពិធី​បង្សុកូល​ឧទ្ទិស​កុសល​ជូន​ដូនតា ម្ចាស់​ទឹក​ម្ចាស់​ដី ថែរក្សា​ទី​ព្រះ​ភូមិ​ជាដើម៖ «ខ្លាច​ជំងឺ តែ​ម៉ែឪ ចាស់ៗ​បែប​គាត់​មិន​ព្រម​ទេ ព្រោះ​មួយ​ឆ្នាំ​បាន បង្សុកូល​ម្ដង បើ​យើង​មិនបាន​ធ្វើ​ទៀត​គាត់​ដូច​មិន​អស់ចិត្ត ដូច្នេះ​វា​ជា​ប្រពៃណី​ជា​ទំនៀមទម្លាប់​មក​ហើយ​គាត់​នៅតែ​ធ្វើ​អ៊ីចឹង..!!»

ចំណែក​ពលរដ្ឋ​នៅ​ខេត្ត​ផ្សេងទៀត ដូចជា​នៅ​ខេត្ត សៀមរាប បាត់ដំបង និង​ខេត្ត​ភាគ​ឦសាន​ជាដើម​នោះ ពួកគាត់​ថា​គ្មាន​ជម្រើស​អ្វី​ក្រៅពី​គោរព​តាម​បម្រាម​របស់​អាជ្ញាធរ​រដ្ឋាភិបាល​នោះ​ឡើយ ដើម្បី​សុវត្ថិភាព​ទាំងអស់​គ្នា​ជៀស​ផុត​ពី​ជំងឺ​កូវីដ១៩៖ «ដូច​ថា អ្នក​មកពី​ថៃ​ពី​ល្ងាច​អញ្ចេះ​គេ​លែង​ពិនិត្យ​មីង​ឱ្យ​ទៅ​វត្ត​យក​ចង្ហាន់​ប្រគេន​លោក​មួយ​ភ្លែត​មក​វិញ​ប្រុយ​....! បើ​យើង​នាំគ្នា​ទៅ​បង្សុកូល​អីចេះ​តែ​បាន​ហើយ​ចេះតែ​បាន​តែ​បើ​យើង​គិត​ថា មិន​ចាំបាច់ ទេ បើ​ខ្ញុំ​សម្រេច​ចិត្ត​ថា លើក​ពេល​មិន​ធ្វើ​ទេ​មិន​ធ្វើ​ការងារ​ហ្នឹង​នាំ​ឱ្យ​មាន​បញ្ហា​ដល់​សង្គម​ច្រើន​នោះ​ទេ​...​ចំណែក​បងប្អូន​ជនជាតិ​ព្នង​ជនជាតិ​ទំពូន​យើង​ឆ្នាំនេះ​យើង​ឆ្នាំនេះ​មិនបាន​ចេញទៅ​ណា​ទេ នៅ​តែ​ផឹកស៊ី​ក្នុង​ផ្ទះ​បើ​ថា ឱ្យ​រាំ​មាន​តន្ត្រី មាន​ភ្លេង​ពិណពាទ្យ ភ្លេង​ទំពូន ភ្លេងខ្មែរ ដូច​ពីមុន​ទៀត​មើល​ទៅ​វា​មិន​អាច​ទេ​..​ម្យ៉ាង​ពួកគាត់​អត់​លុយ​ផង​..​ឥឡូវ​មិន​ថា​គេ មិន​ថា​ខ្ញុំ​ទេ​បញ្ហា​កូវីដ​ដូច​មិនសូវ​ខ្លាច​ទេ តែ​ខ្លាច​ជាងគេ​គឺ​អត់​លុយ​តែម្ដង»

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

cancel all unecessary activity to save lives rather to risking lives at this time and educative to all pple must take awareness at this time

Told u...this deadly invisible enemy of coronavirus,or covid-19 didn't discriminated to what the hell are u?or what are u a king,queen,pm,president,rich or poor,old or young,strong or weak,religion,ethnicity,new year,or ceremony at all.Look at the Wuhan city epicenter of deadly coronavirus breakout that killed 10k of pple+more than 80k deadths worldwide+1.3 million pple infected and this statistic is still counting more to come.See around the world all the cities and streets were so quieted without gather around,or no any activity on the street,because more than 180 countries had been declared states of emergency,no curfew,or canceled activity unnecessary with the words everybody have to stay home,stay safe,save lives in this difficult time,wait until it gets better to normal life.Be patient pple at this time don't try to riskiest you and family lives at this time...it is not funny,or jerking at all,u all have to take this as serious business,stay home and making prays to the God.

Apr 09, 2020 10:57 AM

គេហទំព័រ​ទាំងមូល