អាជ្ញាធរខេត្តបន្ទាយមានជ័យ អនុញ្ញាតឲ្យព្រះសង្ឃបិទរូបព្រះពុទ្ធសាសនានៅលើផ្ទាំងប៉ាណូតាមដងផ្លូវក្នុងក្រុងសិរីសោភ័ណ ដើម្បីប្រារព្ធបុណ្យវិសាខបូជា។ បុណ្យវិសាខបូជាឆ្នាំនេះ ប្រារព្ធនៅថ្ងៃទី១០ ឧសភា។ ព្រះសង្ឃ និងពលរដ្ឋដែលមានជំនឿខាងព្រះពុទ្ធសាសនាក្នុងខេត្តនេះ យល់ឃើញថា ការបិទរូបព្រះពុទ្ធសាសនាតាមដងផ្លូវ គឺជាការទាក់ទាញទឹកចិត្តរបស់ពលរដ្ឋ ដែលធ្វើដំណើរតាមដងផ្លូវងាកមកគោរពសាសនា និងរួមគ្នាធ្វើតែអំពើល្អនៅក្នុងសង្គមជាតិ។
ព្រះសង្ឃ និងប្រជាពលរដ្ឋដែលមានជំនឿលើព្រះពុទ្ធសាសនានៅខេត្តបន្ទាយមានជ័យ បង្ហាញអារម្មណ៍សាទរអាជ្ញាធរខេត្តនេះ ថាជាការយល់ឃើញត្រឹមត្រូវដែលបានអនុញ្ញាតឲ្យមានការបិទរូបព្រះពុទ្ធសាសនា ផ្សព្វផ្សាយក្នុងថ្ងៃបុណ្យវិសាខបូជា ដើម្បីឲ្យពលរដ្ឋយល់ដឹង និងចាប់អារម្មណ៍ព្រះពុទ្ធសាសនាកាន់តែច្រើន។
ព្រះចៅអធិការវត្តប្រាសាទស្រះកណ្ដាល ស្រុកព្រះនេត្រព្រះ ខេត្តបន្ទាយមានជ័យ ព្រះតេជព្រះគុណ ចាន់ សុជន មានថេរដីកាថា នេះជាលើកទីមួយហើយដែលអាជ្ញាធរខេត្តនេះ អនុញ្ញាតឲ្យព្រះអង្គ និងពុទ្ធបរិស័ទបានបិទរូបភាពព្រះពុទ្ធសាសនានៅលើផ្ទាំងប៉ាណូធំៗកាត់ទទឹងផ្លូវទ្រង់ទ្រាយធំ ក្នុងក្រុងសិរីសោភ័ណ។ ព្រះតេជព្រះគុណមានថេរដីកាបន្ថែមថា ផ្ទាំងប៉ាណូដែលបានបិទទាំងអស់ចំនួន ១០ផ្ទាំងធំៗ រួមមាននៅច្រកចេញពីក្រុងសិរីសោភ័ណ ផ្លូវជាតិលេខ៥ ផ្លូវជាតិលេខ៦ និងមួយកន្លែងនៅក្បែររង្វង់មូលស្រីគ្រប់លក្ខណ៍។
ព្រះអង្គមានថេរដីកាបន្តទៀតថា រូបភាពព្រះពុទ្ធសាសនានៅលើផ្ទាំងប៉ាណូមានសារប្រយោជន៍ជួយជំរុញឲ្យប្រជាពលរដ្ឋធ្វើអំពើល្អ ហើយលះបង់អំពើអាក្រក់ និងងាកមកចាប់អារម្មណ៍ខាងព្រះពុទ្ធសាសនាកាន់តែច្រើន៖ « អាត្មាតស៊ូមតិច្រើនឆ្នាំហើយ ម្យ៉ាងអាត្មាក៏ធ្លាប់ផ្ដល់យោបល់ដល់ព្រះមន្ត្រីសង្ឃជាច្រើនឆ្នាំមកហើយដែរ ប៉ុន្តែមិនមានការចាប់អារម្មណ៍ចំពោះបញ្ហានេះ។ នៅពេលទេសនានៅតាមរោងបុណ្យអី អាត្មាតែងតែលើកថា ពេលបុណ្យជាតិធំៗ គួរតែយើងប្ដូរផ្ទាំងប៉ាណូ ដើម្បីបង្ហាញដល់យុវជន និងប្រជាពលរដ្ឋទូទៅថា បុណ្យវិសាខបូជាជាថ្ងៃពិសេសសម្រាប់ព្រះពុទ្ធសាសនា »។
រូបភាពនៅលើផ្ទាំងប៉ាណូមានបង្ហាញអត្ថន័យ ៣យ៉ាងរបស់ព្រះពុទ្ធ គឺព្រះពុទ្ធទើបប្រសូត រូបព្រះអង្គត្រាស់ដឹង និងរូបបរិនិព្វាន ដែលមានព្រះសង្ឃសាវកជាច្រើនអង្គគង់ហែហមជុំវិញព្រះពុទ្ធ។
ប្រជាពលរដ្ឋមានជំនឿលើព្រះពុទ្ធសាសនានៅខេត្តបន្ទាយមានជ័យ មួយចំនួនលើកឡើងថា ការតាំងរូបភាពព្រះពុទ្ធសាសនាដ៏ច្រើននេះ គឺជារឿងល្អ ដើម្បីទាញអារម្មណ៍អ្នកធ្វើដំណើរតាមផ្លូវ ជាពិសេសក្រុមយុវជនឲ្យគិតដល់ការកើត ចាស់ ឈឺ និងសេចក្ដីស្លាប់ ហើយចេះលះបង់ការលោភលន់ហួសប្រមាណ និងមិនធ្វើឲ្យអ្នកដទៃរងទុក្ខដោយសារខ្លួន ជាដើម៖ « យើងដឹងហើយ សិនជាយើងឃើញរូបព្រះពុទ្ធសាសនា ឬទៅវត្តសូត្រធម៌ នោះអារម្មណ៍យើងស្ងប់ជាងជីវិតដែលរស់នៅប្រចាំថ្ងៃ។ ហើយក៏សង្ឃឹមថា បណ្ដាខេត្តផ្សេងៗនឹងបានទទួលការអនុញ្ញាតពីអាជ្ញាធរដូចគ្នា ហើយធ្វើឲ្យសាសនាយើងកាន់តែទូលំទូលាយ »។
ទាក់ទងនឹងបញ្ហានេះ ប្រធានមន្ទីរធម្មការ និងសាសនាខេត្តបន្ទាយមានជ័យ លោក យិន យឿន មានប្រសាសន៍ថា មូលហេតុដែលអាជ្ញាធរខេត្តអនុញ្ញាតឲ្យព្រះសង្ឃបិទរូបភាពព្រះពុទ្ធសាសនានៅលើផ្ទាំងប៉ាណូយ៉ាងច្រើននេះ ដោយយល់ឃើញថា ថ្ងៃទី១០ ឧសភា គឺជាថ្ងៃបុណ្យវិសាខបូជារបស់ព្រះពុទ្ធសាសនា ដែលបុណ្យនេះជាបុណ្យសំខាន់របស់ជាតិ៖ « ខ្ញុំមានអារម្មណ៍រីករាយយ៉ាងក្រៃលែង អភិបាលលោកបានសហការមានការធ្វើបុណ្យរួមគ្នា និងមានការដង្ហែក្បួននៅក្នុងថ្ងៃបុណ្យវិសាខបូជា។ យើងសង្ឃឹមថានឹងមានប្រជាពលរដ្ឋចូលរួមយ៉ាងច្រើនកុះករ »។
ព្រះតេជព្រះគុណ ចាន់ សុជន មានថេរដីកាថា បុណ្យវិសាខបូជា គឺជាពិធីបុណ្យដែលពុទ្ធសាសនិកចាត់ទុកថា មានសារសំខាន់បំផុតមួយក្នុងចំណោមបុណ្យដទៃទៀតនៃព្រះពុទ្ធសាសនា ពីព្រោះជាការគោរពរំឭកនឹកដល់ព្រឹត្តិការណ៍ធំៗបីនាសម័យកាលរបស់ព្រះសម្មាសម្ពុទ្ធសមណគោតម គឺថ្ងៃដែលព្រះអង្គទ្រង់ប្រសូត បានត្រាស់ដឹង និងបរិនិព្វាន។ ព្រឹត្តិការណ៍ទាំងបីនេះ គឺកើតឡើងនៅចំថ្ងៃ ១៥កើត ពេញបូណ៌មី ដែលមានព្រះចន្ទពេញវង់ ក្នុងខែពិសាខ ដូចគ្នា ខុសតែឆ្នាំប៉ុណ្ណោះ។ ព្រះអង្គមានថេរដីកាបន្ថែមថា នៅថ្ងៃបុណ្យសំខាន់នេះ ពុទ្ធសាសនិកគប្បីរក្សាសីលដោយធ្វើអំពើល្អឲ្យបានច្រើន៖ « ព្រះពុទ្ធសាសនាបានផ្ដល់នូវសារសំខាន់មែនទែន ត្រង់ថាជាមូលដ្ឋាននៃសន្តិភាពសម្រាប់ផ្ដល់ឲ្យពិភពលោក។ កាលណាបើពិភពលោកយកធម៌វិន័យមកគោរពប្រតិបត្តិ ដូចជាឃ្លាថា ធម្មោ អវេហ គតិធម្មចារឹង បុគ្គលណាគោរពច្បាប់ ច្បាប់រមែងរក្សាបុគ្គលនោះ។ បុគ្គលណាគោរពធម៌ ធម៌រក្សាបុគ្គលនោះ។ អព្យាប៉ាច់ជាំង សុខាំង លោកេ កាលណាបើមនុស្សមិនបៀតបៀនគ្នា គឺរមែងនាំមកនូវសេចក្ដីសុខ។ នេះគឺជាមូលដ្ឋានដ៏សំខាន់ដែលធ្វើឲ្យអង្គការសហប្រជាជាតិ ចាត់ទុកថាថ្ងៃវិសាខបូជា ជាថ្ងៃពិសេសមែនទែន »។
បុណ្យវិសាខបូជា ត្រូវបានអង្គការសហប្រជាជាតិ ប្រកាសទទួលស្គាល់ថាជាទិវាបុណ្យអន្តរជាតិក្នុងឆ្នាំ១៩៩៩ ហើយប្រទេសដែលគោរពព្រះពុទ្ធសាសនានៅលើសកលលោក បាននាំគ្នាប្រារព្ធធ្វើពិធីបុណ្យវិសាខបូជាជាសកល ដែលមានឈ្មោះថា «យូ.អ៊ិន-វិសាខ ឬ វិសាខបូជានៃអង្គការសហប្រជាជាតិ» ដោយមានកិច្ចប្រជុំរបស់ក្រុមប្រឹក្សាពុទ្ធសាសនាអន្តរជាតិប្រចាំឆ្នាំនៅរៀងរាល់វិសាខបូជាម្តងៗ។
នៅថ្ងៃបុណ្យវិសាខបូជាទី១០ ឧសភា ឆ្នាំនេះ អាជ្ញាធរខេត្តបន្ទាយមានជ័យ បានជ្រើសយកវត្តប្រាសាទស្រះកណ្ដាល ស្រុកព្រះនេត្រព្រះ ដើម្បីប្រារព្ធពិធីបុណ្យ។
លោក យិន យឿន ឲ្យដឹងថា ពិធីបុណ្យនេះ នឹងមានការដង្ហែក្បួនចាប់ពីមុខសាលាខេត្តបន្ទាយមានជ័យ ឆ្ពោះទៅវត្តប្រាសាទស្រះកណ្ដាល ដោយមានមន្ត្រីរាជការព្រះសង្ឃ និងពុទ្ធបរិស័ទ ប្រមាណ ១ពាន់នាក់ចូលរួម។
លោកបន្ថែមថា អ្នកចូលរួមចាប់ផ្ដើមជួបជុំគ្នានៅម៉ោង ១២កន្លះថ្ងៃត្រង់ រួចដង្ហែជុំវិញក្រុងសិរីសោភ័ណ ឆ្ពោះទៅស្រុកព្រះនេត្រព្រះ ដើម្បីប្រារព្ធពិធីនៅប្រមាណម៉ោង ២រសៀល។ លោកអះអាងថា អភិបាលរងខេត្តស្រះកែវ ប្រទេសថៃ នឹងអញ្ជើញចូលរួមក្នុងពិធីបុណ្យនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។