អ្នក​ថ្មពួក​ថា ខ្លួន​បារម្ភ​ខ្លាច​គ្មាន​ស្បៀង​ទៅ​ថ្ងៃ​មុខ​ដោយសារ​ដំណាំ​ស្រូវ​ជួប​គ្រោះ​រាំង​ស្ងួត

យន់ សាមៀន
2018-07-15
អ៊ីម៉ែល
មតិ
Share
បោះពុម្ព
ស្ថានភាព​ទឹក​អូរ​មួយ​កន្លែង​នៅ​ក្នុង​ឃុំ​កំពង់ភ្លុក ស្រុក​ប្រាសាទបាគង ខេត្ត​សៀមរាប។ រូបថត​ថ្ងៃ​ទី​១ ខែ​មករា ឆ្នាំ​២០១៦
ស្ថានភាព​ទឹក​អូរ​មួយ​កន្លែង​នៅ​ក្នុង​ឃុំ​កំពង់ភ្លុក ស្រុក​ប្រាសាទបាគង ខេត្ត​សៀមរាប។ រូបថត​ថ្ងៃ​ទី​១ ខែ​មករា ឆ្នាំ​២០១៦
RFA

ប្រជាកសិករ​នៅ​ស្រុក​ថ្មពួក​កំពុង​ព្រួយបារម្ភ​ខ្លាច​គ្មាន​ស្បៀង​ដោះស្រាយ​ជីវភាព ក្នុង​គ្រួសារ​នៅ​ឆ្នាំ​ខាង​មុខ ដោយសារតែ​ដំណាំ​ស្រូវ​របស់​ពួកគាត់​ឆ្នាំនេះ​ជួប​គ្រោះ​រាំងស្ងួត។ អ្នកភូមិ​អះអាង​ថា សព្វថ្ងៃ​ដើម​ស្រូវ​រាប់រយ​ហិកតារ​ចាប់ផ្ដើម​ក្រហម​ក្រៀម​ស្វិត និង​រក​ងាប់​បណ្ដើៗ​ហើយ ដោយ​គ្មាន​អាជ្ញាធរ​ណា​អើពើ​ជួយ​ពួកគាត់​នៅឡើយ​ទេ។

ប្រជាកសិករ​នៅ​ស្រុក​ថ្មពួក​លើកឡើង​ថា យ៉ាង​យូរ​មួយ​ខែ​ទៀត ប្រសិនបើ​គ្មាន​ភ្លៀង​ធ្លាក់​ជោកជាំ​នៅ​តំបន់​ពួកគាត់​ដាំ​ដុះ​ទេ ស្រូវ​របស់​ពួកគាត់​រាប់ពាន់​ហិកតារ​នឹង​ក្រៀម​ស្វិត​ខូច​អស់​ជា​ពុំ​ខាន។

កសិករ​នៅ​ឃុំ​គោក​រមៀត ស្រុក​ថ្មពួក លោក សាន ម៉ាប់ ឲ្យ​ដឹង​នៅ​ថ្ងៃ​ទី​១៤ កក្កដា​ថា ដំណាំ​ស្រូវ​របស់​លោក​ប្រហែល​៣​ហិកតារ ក្រៀម​ស្វិត​រក​ងាប់​បណ្ដើរៗ​ហើយ ដោយសារ​គ្មាន​ទឹក​ស្រោចស្រព។ លោក សាន ម៉ាប់ អះអាង​ទៀត​ថា កសិករ​នៅ​តំបន់​ពួកគាត់​រស់នៅ គឺ​ធ្វើស្រែ​ដោយ​ពឹងផ្អែក​ទាំងស្រុង​ទៅលើ​ទឹកភ្លៀង ព្រោះ​គ្មាន​ប្រព័ន្ធ​ធារាសាស្ត្រ​សម្រាប់​ស្រោចស្រព​នោះ​ទេ។កសិករ​រូប​នេះ​បន្ថែម​ទៀត​ថា ស្រូវ​របស់​ពួកគាត់​មិន​បាន​ទទួល​ទឹកភ្លៀង​ធ្លាក់​ចំ​ជាច្រើន​ខែ​ហើយ។ «»

កសិករ​នៅ​ស្រុក​ថ្មពួក​ម្នាក់ទៀត លោក អ៊ាម អ៊ុល អះអាង​ថា ដំណាំ​ស្រូវ​របស់​លោក​ជាង​៣​ហិកតារ​ត្រូវ​ទឹកជំនន់​ហូរ​មកពី​ប្រទេស​ថៃ​លិច​ខូច​អស់​ម្ដង​រួច​មក​ហើយ ក្រោយ​មក​លោក​ក៏បាន​ព្រួស​ស្រូវ​នៅ​លើ​ដី​នោះ​ជាថ្មី​ម្ដងទៀត។ លោក អ៊ាម អ៊ុល បន្ថែម​ទៀត​ថា ដំណាំ​ស្រូវ​ដែល​លោក​ព្រួស​ថ្មី​នេះ​មាន​អាយុ​ជាង​១​ខែ​ហើយ ក៏​ជួប​គ្រោះ​រាំងស្ងួត​បណ្ដាល​ឲ្យ​ដើម​ស្រូវ​ឡើង​ក្រហម​រក​ងាប់​ជា​ថ្មី​ទៀត។ «»

លោក​បន្ត​ថា កសិករ​នៅ​ស្រុក​ថ្មពួក​សម្ដែង​ការ​ព្រួយ​បារម្ភ​គ្រប់គ្នា ដោយ​ខ្លាច​ដាច់​ពោះ​ស្លាប់​នៅ​ឆ្នាំ​ក្រោយ ព្រោះ​គ្មាន​ប្រាក់ចំណូល​ផ្សេង​ក្រៅពី​របរ​ធ្វើស្រែ​នោះ​ទេ។

អភិបាលស្រុក​ថ្មពួក លោក ឌៀប ឈួន មាន​ប្រសាសន៍​ថា សព្វថ្ងៃ​ដំណាំ​ស្រូវ​របស់​ប្រជាកសិករ​ក្នុង​ស្រុក​ដែល​លោក​គ្រប់គ្រង ដែល​ប្រឈម​នឹង​ការខូចខាត​មាន​ប្រមាណ​៣០០​ហិកតារ​ប៉ុណ្ណោះ ចំណែក​ស្រូវ​របស់​កសិករ​ផ្សេងទៀត លោក​ថា មិន​ទាន់​ដល់​កម្រិត​ប្រកាស​អាសន្ន​នៅឡើយ​ទេ។ «»

របាយការណ៍​អភិបាលស្រុក​ថ្មពួក​ឲ្យ​ដឹង​ថា ដំណាំ​ស្រូវ​របស់​កសិករ​ដែល​ដាំ​ដុះ​ហើយ​នៅ​ក្នុង​ស្រុក​មួយ​នេះ សរុប​ជាង ១៥.០០០ហិកតារ ក្នុង​នោះ​ស្រូវ​មួយ​ចំនួន​ធំ ដី​មាន​សំណើម​មិន​បង្ក​ការ​ខូចខាត​នោះ​ទេ។ ប៉ុន្តែ​កសិករ​មួយ​ចំនួន​អះអាង​ថា ដំណាំ​ស្រូវ​នៅ​ក្នុង​ស្រុក​នេះ ប្រសិនបើ​គ្មាន​ភ្លៀង​ជោកជាំ​រយៈពេល​យូរ​ទៅ​មុខ​ទៀត ប្រឈម​នឹង​ការខូចខាត​ទាំងអស់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល