កម្ពុជា និងចិន ប្ដេជ្ញាបង្កើនពាណិជ្ជកម្មទ្វេភាគី ដល់ចំនួនទឹកប្រាក់ ១០ពាន់លានដុល្លារ មុនឆ្នាំ២០២៣។
ទិន្នន័យក្រសួងពាណិជ្ជកម្មបង្ហាញថា កម្ពុជាបាននាំចេញទំនិញទៅប្រទេសចិន មានតម្លៃជាង ១ពាន់លានដុល្លារ (១,១ប៊ីលលាន) ក្នុងត្រីមាសទី៣ នៅឆ្នាំ២០២១ នេះ ដែលកើនឡើងជាង ៥២% ពីមួយឆ្នាំទៅមួយឆ្នាំ។ កម្ពុជានាំចូលទំនិញពីប្រទេសចិន គិតជាទឹកប្រាក់ មានចំនួន ៦,៨ពាន់លានដុល្លារ ក្នុងត្រីមាសទី៣ ឆ្នាំ២០២១ នេះ គឺកើនឡើងជាង ៣៦% បើធៀបទៅនឹងអំឡុងពេលដូចគ្នា កាលពីឆ្នាំ២០២០ ។
ប្រទេសកម្ពុជា និងចិន បានចុះកិច្ចព្រមព្រៀងពាណិជ្ជកម្មសេរីទ្វេភាគី ដែលរដ្ឋាភិបាលកម្ពុជា បានផ្តល់សច្ចាប័ន នាពេលថ្មីៗ នេះ។ កិច្ចព្រមព្រៀងនេះ បើកចំហទីផ្សារបន្ថែមទៀត សម្រាប់ការនាំចេញផលិតផលកសិកម្ម ទៅប្រទេសចិន។ ផលិតផលសំខាន់ៗ ដែលកម្ពុជា នាំចេញទៅទីផ្សារប្រទេសចិន រួមមាន អង្ករ ដំឡូងមី ផ្លែស្វាយ និងផ្លែចេកស្រស់។
ចំណែកផលិតផល ដែលកម្ពុជានាំចូលពីប្រទេសចិនវិញ គឺវត្ថុធាតុដើម សម្រាប់ផលិតសំលៀកបំពាក់ សម្ភារៈសំណង់ និងយានយន្តជាដើម។
ពាណិជ្ជកម្មទ្វេភាគីរវាងកម្ពុជា និងចិន ក្នុងឆ្នាំ២០២០ មានទឹកប្រាក់ ជាង ៨ពាន់លានដុល្លារ (៨ប៊ីលលានដុល្លារ) ដែលធ្លាក់ចុះជាង ៥% (៥,២) បើធៀបកាលពីឆ្នាំ២០១៩។ កាលពីឆ្នាំមុន ការនាំចូលទំនិញរបស់កម្ពុជាពីប្រទេសចិន បានធ្លាក់ចុះប្រមាណ៧% ដោយសាររោងចក្រកាត់ដេរសំលៀកបំពាក់ត្រូវបានបិទទ្វារ ដើម្បីទប់ស្កាត់ការរាលដាលនៃជំងឺកូវីដ១៩៕