ពលរដ្ឋ​ទូទៅ និង​មន្ត្រី​រាជការ សោក​ស្តាយ​ការបាត់បង់ EBA ចំនួន២០​%

ដោយ សេក បណ្ឌិត
2020-08-12
Share
EU_EBA EU EBA
Photo: RFA

ប្រជាពលរដ្ឋ​ទូទៅ និង​មន្ត្រី​រាជការ​មួយ​ចំនួន សោក​ស្ដាយ​ដែល​រដ្ឋាភិបាល​ដឹកនាំ ដោយ​គណបក្សប្រជាជន​កម្ពុជា មិនព្រម​កែ​លម្អ​ស្ថានការណ៍​សិទ្ធិមនុស្ស និង​លទ្ធិប្រជាធិបតេយ្យ ហើយ​បណ្ដោយ​ឲ្យ​បាត់បង់​ប្រព័ន្ធ​អនុគ្រោះ​ពាណិជ្ជកម្មEBA ២០ភាគ​រយ។ ពួក​គេ ព្រួយបារម្ភ​ថា ប្រទេស​កម្ពុជា នឹង​ទទួលរង​វិបត្តិសេដ្ឋកិច្ច និង​វិបត្តិ​សង្គម​ធ្ងន់ធ្ងរ ដោយសារតែ​គំនិត​អាត្មានិយម​របស់​រដ្ឋាភិបាល​លោក ហ៊ុន សែន។

ប្រជាពលរដ្ឋ និង​មន្ត្រី​រាជការ​សាធារណៈ​មួយ​ចំនួន យល់ឃើញ​ថា ការបាត់បង់​ប្រព័ន្ធ​អនុគ្រោះ​ពាណិជ្ជកម្ម EBAចំនួន ២០ភាគ​រយ នឹង​ក្លាយ​ជា​ឫស​គល់​នៃ​បញ្ហា​ប្រទាក់​ក្រឡា​គ្នា​ជាច្រើន​ដែល​ពិបាក​ដោះស្រាយ​សម្រាប់​ប្រទេស​កម្ពុជា​ក្នុង​ពេល​ដ៏​ខ្លី​ខាងមុខ។

អាជីវករ​លក់ដូរ​ម្ហូបអាហារ​នៅមុខ​រោងចក្រ​ស្ថិត​ក្នុង​ខេត្ត​កណ្ដាល លោក បាន សុខ ថ្លែង​ថា គ្រាន់តែ​រឿង​ជំងឺ​កូវីដ​មួយ​មុខ បាន​ធ្វើមុខ​របរ​លក់ដូរ​របស់​លោក ធ្លាក់​ចុះ​យ៉ាង​ខ្លាំង រហូត​លោក​គ្មាន​លទ្ធភាព​សងបំណុល​ធនាគារ ហើយ​ខាង​ធនាគារ បាន​ប្ដឹង​លោក​ទៅ​តុលាការ​ទៀត​ផង។ អាជីវករ​រូប​នេះ ជឿជាក់​ថា ការបាត់បង់ EBA ២០% នឹង​ធ្វើឲ្យ​កម្មករ​បាត់បង់​ការងារ គ្មាន​ប្រាក់ចំណូល ដូច្នេះ​លោក ក៏​នឹង​ទទួល​រង​ផល​ប៉ះពាល់​បន្ថែម​ទៀត​ដោយ​ស្វ័យប្រវត្តិ​ពី​បញ្ហា​នេះ​ផង​ដែរ៖ «ខ្ញុំយល់ថា​បាត់បង់ទាំងអស់ ទាំងអាជីវករ ទាំងបងប្អូនប្រជាពលរដ្ឋ ជាពិសេសកម្មកររោងចក្រយើង ប៉ះពាល់ខ្លាំងដែលរោងចក្រគេបិទទ្វារ ។ខ្ញុំសោកស្តាយ ណាស់ដែលរដ្ឋាភិបាលមិនអើពើរឿងខាងវិស័យកាត់ដេរ ដល់ចឹងទៅគេកាត់ប្រព័ន្ធEBA។ ដឹងថា ប៉ះពាល់ធ្ងន់ហ្មង»។

ចំណែក​និស្សិត​ផ្នែក​ទំនាក់ទំនង​អន្តរជាតិ លោក ចាន់ សាញ់ និយាយ​ថា លោក​សោក​ស្ដាយ​ខ្លាំង ចំពោះ​ការបាត់បង់​ផ្នែក​ខ្លះ​នៃ EBA ដែល​នឹង​ធ្វើឲ្យ​វិស័យ​កាត់ដេរ នៅ​កម្ពុជា ធ្លាក់​ចុះ​កាន់តែ​ធ្ងន់ធ្ងរ មិនធ្លាប់​មាន​ពីមុន​មក៖ «ខ្ញុំមើលឃើញថា វាជាការទទួលខុសត្រូវរបស់រដ្ឋាភិបាលតែម្តង ព្រោះការកាត់អនុគ្រោះពន្ធចំនួន២០ភាគរយចេញពីប្រទេសកម្ពុជានេះ ដោយសារតែ រដ្ឋាភិបាលមិនបានអនុវត្តតាមការស្នើសុំរបស់សហភាពអឺរ៉ុប ពាក់ព័ន្ធនឹងការគោរពសិទ្ធិមនុស្ស វិស័យគោលការណ៍ផ្សេងៗ»។

រីឯ​កសិករ​មួយ​រូប​រស់នៅ​ខេត្ត​ព្រៃវែង លោក វែង វុត្ថា លើក​ឡើង​ថា ការ​ទទួលរង​ទណ្ឌកម្ម​សេដ្ឋកិច្ច​ពី​សហភាព​អឺរ៉ុប​នេះ គឺ​ដោយសារតែ​រដ្ឋាភិបាល​លោក ហ៊ុន សែន គិតតែពី​រក្សា​អំណាច ខ្លួនឯង មិនបាន​គិត​អំពី​ផលប្រយោជន៍​ជាតិ និង​ប្រជាជន។ លោក វែង វុត្ថា យល់ថា វិធី​រក្សា​អំណាច​របស់​លោក ហ៊ុន សែន ដែល​បង្ក​ទុក្ខ​លំបាក​ប្រជាពលរដ្ឋ​បែបនេះ គឺ​មិន​អាច​គង់វង្ស​យូរអង្វែង​ឡើយ ព្រោះ​លោក ជឿ​ថា ទីណា​មានទុក្ខ ទីណា​មានការ​ជិះជាន់ គឺ​ទី​នោះ​នឹង​មានការ​រើ​បម្រាស់។ ពលរដ្ឋ​រូប​នេះ បញ្ចេញ​ទស្សនៈ​ទៀត​ថា ការបាត់បង់ EBA ចំនួន ២០ភាគ​រយ​មិនមែន​ជា​រឿង​តូចតាច​ឡើយ ហើយក៏​មិនមែន​ប៉ះពាល់​តែ​ពលរដ្ឋ​សាមញ្ញ​នោះ​ដែរ ពោល​គឺ​មន្ត្រី​រាជការ ក៏​អាច​ប្រឈម នឹង​ការកាត់បន្ថយ​ប្រាក់ខែ​ផង​ដែរ ដោយសារ​ចំណូល​របស់​រដ្ឋ​ធ្លាក់​ចុះ៖ «យើងខ្ញុំបានត្រឹមតែសោកស្តាយចំពោះជាតិ ប្រជាពលរដ្ឋខ្មែរ និងកម្មករ-កម្មការិនី ដែលបាត់បង់សេដ្ឋកិច្ចនិងឆ្នាំបាយរបស់ពួកគាត់ និងបាត់បង់ឱកាស ការងារហើយនឹងធ្វើឲ្យអ្នកវិនិយោគទុនមកពីបណ្តាប្រទេសសេរីធំៗ បាត់ទំនុកចិត្តមកវិនិយោគរកស៊ីពីនៅកម្ពុជា ដោយសារតែយើងខូចកេរ្តិ៍ឈ្មោះនៅលើឆាកអន្តរជាតិ ។សូម្បីពួកប្រទេស កុម្មុយនីស្តមួយចំនួនក៏លែងចង់ទុកចិត្តដែរ ហើយបើគេមកបណ្តាក់ទុនរកស៊ីជាមួយយើងក៏គេឆកយកឱកាសកេងចំណេញពីសម្បត្តិជាតិយើង កេងប្រវ័ញ្ចកម្លាំងពលកម្ម និងញើសឈាម ពលរដ្ឋខ្មែរយើងដែរ»។

ទន្ទឹមគ្នា​នេះ សកម្មជន​គណបក្ស​សង្គ្រោះ​ជាតិ​ដែល​ភៀសខ្លួន​នៅ​ឯ​ប្រទេស​ថៃ លោក ករុណា ពៅ ចាត់ទុកថា ការដែល​របប​ក្រុងភ្នំពេញ​បោះបង់EBA ចំនួន ២០ភាគ​រយ​ហើយ ទៅ​ស្រវា​ចាប់​យក​ពាណិជ្ជកម្ម​សេរី​ជាមួយ​ប្រទេស​ចិន គឺជា​នយោបាយសេដ្ឋកិច្ច​ដែល​ឆោតល្ងង់៖ «សោកស្តាយដែលរដ្ឋាភិបាលកម្ពុជា មិនយកចិត្តទុកដាក់ធ្វើយ៉ាងណារក្សាEBA ដើម្បីផលប្រយោជន៍កម្មករផលប្រយោជន៍ប្រជាពលរដ្ឋទូទាំងប្រទេស ហើយបើនិយាយទៅគេគិតតែពីអំណាចរបស់គេទេ។នយោបាយនេះមិនមែនជានយោបាយវៃឆ្លាតទេ ​គឺជានយោបាយល្ងង់បំផុត ហើយយើងមើលទៅប្រទេសគេផ្សេងៗវិញ គេឆ្លាតណាស់ គេសុខចិត្តឱនក្បាល ទៅសុំEBA ពីសហភាពអឺរ៉ុប»។

រី​ឯ​មន្ត្រី​រាជការ​មួយ​រូប​នៅ​ខេត្ត​ព្រៃវែង ដែល​សុំ​មិន​បញ្ចេញ​ឈ្មោះ ព្រោះ​បារម្ភ​ពី​សុវត្ថិ ភាព និយាយ​ថា លោក​ស្ដាយ​ការបាត់បង់ EBA មិន​ខុស​ពី​ពលរដ្ឋ​នោះ​ទេ ព្រោះ​មន្ត្រី​រាជការ ក៏​មាន​កូន​ចៅ ឬ​សាច់​ញាតិ​ធ្វើការ​ក្នុង​រោងចក្រ​ដែរ។ លោក បញ្ជាក់​ថា គ្រួសារ​របស់​កម្មករ​ភាគច្រើន ជំពាក់ បំណុល​ធនាគារ​និង​មីក្រូហិរញ្ញវត្ថុ ហើយ​តែង​ពឹងផ្អែក​ប្រាក់ខែ​ពី​ការងារ​រោងចក្រ​ដើម្បី​ដោះ​បំណុល  ដូច្នេះ​ប្រសិនបើ​រោងចក្រ​ជាច្រើន​ត្រូវ​បិទទ្វារ​ដោយសារ​បាត់បង់EBA គឺ​កម្មករ មិន​ដឹង​រំពឹង​អ្វី​ទៀត​នោះ​ទេ ខណៈ សព្វថ្ងៃ​នេះ ការងារ​នៅ​កម្ពុជា​តូច​ចង្អៀត​បំផុត៖ «ខ្ញុំមានតែពាក្យផ្តាំផ្ញើតិចតូចទៅរដ្ឋាភិបាល ឲ្យគិតឡើងវិញគិតដល់ប្រយោជន៍ប្រជាពលរដ្ឋ ។និយាយចំទៅៗ ខ្ញុំដឹងដែររឿងនេះ ហើយពលរដ្ឋក៏ដឹង តែខ្ញុំមិនចង់និយាយច្រើនទេ ព្រោះកាលណានិយាយច្រើនគេធ្វើអញ្ចេះអញ្ចុះដាក់ខ្ញុំ»។

ជាមួយគ្នា​នេះ សមាជិក​ក្រុមប្រឹក្សា​ឃុំ​មួយ​រូប​នៅ​ក្នុង​ខេត្ត​សៀមរាប ដែល​ស្នើសុំ​លាក់​អត្តសញ្ញាណ មានប្រសាសន៍​ថា ការបាត់បង់EBA ចំនួន ២០​% គឺជា​ការបាត់បង់​ផលប្រយោជន៍​រួម​របស់​ជាតិខ្មែរ​ទាំងមូល។ លោក យល់ថា រដ្ឋាភិបាល​កម្ពុជា នៅ​មានឱកាស​ទាមទារ​យក​ប្រព័ន្ធ​អនុគ្រោះ​ពន្ធ EBA ដែល​បាត់បង់ នោះ មកវិញ តាមរយៈ ការ​បន្ទន់​ឥរិយាបថ​សម្របសម្រួល​ជាមួយ​សហភាព​អឺរ៉ុប ប្រសិនបើ​មាន​ឆន្ទៈ​ពិតប្រាកដ​គិតគូរ​អំពី​ផលប្រយោជន៍​ជាតិ​និង​ប្រជាជន៖ «ចំពោះខ្ញុំគឺសោកស្តាយជាទីបំផុត តែមិនដឹងធ្វើយ៉ាងណា ព្រោះថា EBAនេះគឺជាអត្ថប្រយោជន៍របស់ប្រជាពលរដ្ឋខ្មែរមួយចំណកដែរ ទោះបីវាមិន ទាំងស្រុកក្តី ។ ការដក២០ភាគរយនេះ បើយើងមិនសម្របសម្រួលទេ វានឹងអាចបន្តទៀត ដូច្នេះយើងចេះតែបារម្ភ ថា ការធ្វើឲ្យអាជីវកម្ម និងវិនិយោគអីគេចេះតែរារែកចិត្តដែរ»។

គ្រូបង្រៀន​វិទ្យាល័យ​នៅ​ខេត្ត​ត្បូងឃ្មុំ លោក ធី ទេវា បញ្ចេញមតិ​ថា ការបាត់បង់EBA នេះ អាច​នឹង​បណ្ដាល​ឲ្យ​មាន​វិបត្តិសេដ្ឋកិច្ច និង​សង្គម​ធ្ងន់ធ្ងរ ដូចជា៖កម្មករ គ្មាន​ការងារ​ធ្វើ កសិករ​ខ្វះ​ទីផ្សារ​លក់​កសិផល ប្រជាពលរដ្ឋ​កាន់តែ​ធ្លាក់ខ្លួន​ក្រីក្រ និង​ដណ្ដើម​គ្នា​រស់ ហើយ​ការ​សង បំណុល​កាន់តែ​ជួប​ការ​លំបាក ព្រមទាំង​ជំរុញ​ឲ្យ​មាន​ចលនា​ចំណាកស្រុក​ទាំង​ប្រថុយប្រថាន​កើន ឡើងជា​ដើម៖«

EBA គឺជា​កិច្ច​ព្រមព្រៀង​ពាណិជ្ជកម្ម​មួយ​ដែល​បាន​អនុញ្ញាត ឱ្យ​ទំនិញ​ពី​កម្ពុជា និង​ប្រទេស​កំពុង​អភិវឌ្ឍន៍​ផ្សេងទៀត បាន​នាំចូល​ទៅកាន់​ទីផ្សារ​សហភាព​អឺរ៉ុប ដោយ​រួច​ពន្ធ​នាំចូល និង​អា​ករ​ផ្សេងៗ។ លើស​ពី​នេះ ចាប់​តាំង​ពី​ឆ្នាំ២០០១ មក ប្រព័ន្ធ​អនុគ្រោះ​ពន្ធEBA​ មិន​ត្រឹមតែ​បាន​ជួយ​សម្រួល​នូវ​ចរន្ត​ទំនិញ សម្រាប់​កម្ពុជា​ប៉ុណ្ណោះ​ទេ តែ​វា​ក៏បាន​ផ្ដល់​គោលនយោបាយ ធានា​សុវត្ថិភាព​មួយ​លើ​សេដ្ឋកិច្ច​ទាំងមូល ដែល​អាច​ផ្ដល់​លទ្ធភាព​ឱ្យ​មាន​កំណើន​ដ៏​ខ្លាំងក្លា និង​ឧត្ដមភាព​នៃ​កំណើន​តម្រូវការ​ពីទី​ផ្សារ​ពិភពលោក​ផង​ដែរ។

សមាគម​រោងចក្រ​កាត់ដេរ​នៅ​កម្ពុជា ព្យាករណ៍​ថា ការ​ដក​ប្រព័ន្ធ​អនុគ្រោះ​ពន្ធ (EBA) ចំនួន ២០ភាគ​រយ​នេះ អាច​នឹង​បណ្ដាល​ឱ្យ​កម្មករ​រាប់​ម៉ឺន​នាក់​បាត់បង់​ការងារ។ ចំណែក​សហព័ន្ធ​ស្រូវ​អង្ករ​កម្ពុជា ក៏​ធ្លាប់​ចេញ​សេចក្ដីប្រកាស​ថា ការ​ដក​ប្រព័ន្ធ​អនុគ្រោះ​ពន្ធ EBA គឺ​នឹង​ធ្វើ​ឧស្សាហកម្ម​ស្រូវ​អង្ករ ត្រូវ​បំផ្លាញ​ខ្ទេច​ខ្ចី និង​ធ្វើ​ឱ្យ​ប៉ះពាល់​ធ្ងន់ធ្ងរ​ដល់​ប្រជាកសិករ​ខ្មែរ​ជាង​កន្លះ​លាន​គ្រួសារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល