អ្នក​ជំនាញ​លើកឡើង​ថា អត្រា​ភាព​ក្រីក្រ​ពិតប្រាកដ​នៅ​កម្ពុជា​អាច​នឹង​កើន​ឡើង​ខ្ពស់​ជាង​ការវាយតម្លៃ​របស់ UNDP ត្រឹម ១៧,៦%

ដោយ មាន ឫទ្ធិ
2020-10-21
អ៊ីម៉ែល
មតិ
Share
បោះពុម្ព
សកម្មភាព​អ្នក​រើស​សំរាម​នៅ​សង្កាត់​ជើងឯក រាជធានី​ភ្នំពេញ នៅ​ថ្ងៃ​ទី​១៨ ខែ​មករា ឆ្នាំ​២០១៦។
សកម្មភាព​អ្នក​រើស​សំរាម​នៅ​សង្កាត់​ជើងឯក រាជធានី​ភ្នំពេញ នៅ​ថ្ងៃ​ទី​១៨ ខែ​មករា ឆ្នាំ​២០១៦។
Photo: RFA

អ្នក​ជំនាញ​លើក​ឡើង​ថា អត្រា​ភាព​ក្រីក្រ​នៅ​កម្ពុជា​អាច​នឹង​កើន​ឡើង​ខ្ពស់​ជាង​ការវាយតម្លៃ​ចុងក្រោយ​របស់​អង្គការ​កម្មវិធី​អភិវឌ្ឍន៍​សហប្រជាជាតិ UNDP ដែល​ថា មាន​ត្រឹម​ជាង ១៧ភាគរយ។ ការ​លើក​ឡើង​យ៉ាង​ដូច្នេះ ដោយសារ​តែ​កម្ពុជា​កំពុង​ជួប​វិបត្តិ​ធំៗ ផ្ទួនៗ ជាបន្តបន្ទាប់​នៅ​ក្នុង​ឆ្នាំ២០២០​នេះ ក្នុង​នោះ​មាន​ដូចជា វិបត្តិ​ជំងឺរាតត្បាត​កូវីដ១៩ វិបត្តិ​ទឹកជំនន់ ការ​ដាក់​បញ្ចូល​ក្នុង​បញ្ជី​នៃ​ក្រុម​ប្រទេស​លាង​លុយ​កខ្វក់​របស់​សហភាព​អឺរ៉ុប និង​ការបាត់បង់​ប្រព័ន្ធ​អនុគ្រោះ​ពន្ធ EBA ២០% ជាដើម។

អ្នកវិភាគ​គោលនយោបាយ សាស្ត្រាចារ្យ អៀ សុផល លើក​ឡើង​ថា អត្រា​ពលរដ្ឋ​រស់​នៅ​ក្រោម​បន្ទាត់​ភាព​ក្រីក្រ​នៅ​កម្ពុជា នឹង​មាន​ការ​កើន​ឡើង​ដោយ​មិន​អាច​ប្រកែក​បាន​នៅ​ក្នុង​ឆ្នាំ២០២០ នេះ។ លោក​ពន្យល់​ប្រាប់​អាស៊ី​សេរី​តាម​សារ​អេឡិចត្រូនិក​ថា កំណើន​នៃ​ពលរដ្ឋ​រស់​នៅ​ក្រោម​បន្ទាត់​ភាព​ក្រីក្រ​នេះ គឺ​ដោយសារតែ​ស្ថានភាព​លំបាក​ផ្នែក​សេដ្ឋកិច្ច​ដែល​កម្ពុជា​កំពុង​ជួបប្រទះ​នា​ពេល​បច្ចុប្បន្ន​នេះ។ យ៉ាង​ណា​លោក​ថា ការវាយតម្លៃ​ចុងក្រោយ​របស់​អង្គការ UNDP ដែល​ថា អត្រា​ភាព​ក្រីក្រ​នៅ​កម្ពុជា​មាន​ការ​កើន​ឡើង​ទ្វេដង ពោល​គឺ​ពី ៩,% រហូតដល់ ១៧,% នេះ នៅ​មាន​កម្រិតទាប​នៅ​ឡើយ ព្រោះ​ការ​វាយ​តម្លៃ​នេះ​ធ្វើឡើង​ដោយ​​ផ្អែក​តាម​ទិន្នន័យ​នៃ​អត្រា​ភាព​ក្រីក្រ​ដែល​រដ្ឋាភិបាល​បាន​កំណត់​ពី​មុន​មក។ លោក​បន្ត​ថា ផ្អែក​តាម​ការវិនិច្ឆ័យ​ទូទៅ​ក៏​គេ​អាច​ដឹង​បាន​ដែរ​ថា អត្រា​ភាព​ក្រីក្រ​អាច​នឹង​ខ្ពស់​ជាង​ការ​វាយ​តម្លៃ​នេះ ដោយសារតែ​ពលរដ្ឋ​ភាគច្រើន​បាន​បាត់បង់​ចំណូល ខណៈ​កំណើន​សេដ្ឋកិច្ច​នៅ​កម្ពុជា​កាន់តែ​បន្ត​រួម​តូច។

កាលពី​ថ្ងៃ​ទី៨ តុលា អង្គការ UNDP បាន​បញ្ចេញ​របាយការណ៍​ចុងក្រោយ​មួយ​ស្ដីពី​ការវាយតម្លៃ​ផល​ប៉ះពាល់​សេដ្ឋកិច្ច និង​សង្គម​ដោយសារតែ​ផល​ប៉ះពាល់​នៃ​ជំងឺកូវីដ១៩។ របាយការណ៍​រក​ឃើញ​ថា អត្រា​ពលរដ្ឋ​រស់​នៅ​ក្រោម​បន្ទាត់​ភាព​ក្រីក្រ ឬ​ចំណាយ​តិច​ជាង ២ដុល្លារ​ក្នុង​មួយ​ថ្ងៃ អាច​នឹង​កើន​ឡើង​រហូត​ដល់ ១៧,% ឬ​ស្មើ​នឹង​ចំនួន​ពលរដ្ឋ​ប្រមាណ​ជិត ៣លាន​នាក់។

ការ​ចេញ​របាយការណ៍​វាយតម្លៃ​នេះ ធ្វើ​ឡើង​នៅ​មុន​ពេល​កម្ពុជា​ប្រឈម​នឹង​វិបត្តិ​ធម្មជាតិ​គ្រោះ​ទឹក​ជំនន់ ដែល​កំពុង​បង្ក​ការខូចខាត​ខ្លាំង​ដល់​សេដ្ឋកិច្ច​ជាតិ។ ជុំវិញ​ការ​រក​ឃើញ​នេះ មន្ត្រី​ជាន់ខ្ពស់​នៃ​ក្រសួង​ផែនការ ធ្លាប់​ប្រាប់​អាស៊ី​សេរី​ថា ក្រសួង​នៅ​មិនទាន់​គណនា​ឡើងវិញ​ឲ្យ​បាន​ជាក់លាក់​អំពី​អត្រា​ភាព​ក្រីក្រ​នេះ​នៅឡើយ​ទេ ព្រោះ​ខាង​វិទ្យាស្ថាន​ជាតិ​ស្ថិតិ​មិន​ទាន់​បិទ​បញ្ចប់​ការ​ប្រមូល​ទិន្នន័យ​នៅឡើយ។

អ្នក​ជំនាញ​សិទ្ធិ​ការងារ និង​ជា​ប្រធាន​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស សង់ត្រាល់ លោក មឿន តុលា ក៏​យល់​ស្រប​ទៅ​នឹង​អំណះអំណាង​របស់​បណ្ឌិត អៀ សុផល ដែរ ដែល​ថា អត្រា​ភាព​ក្រីក្រ​នៅ​កម្ពុជា​អាច​នឹង​មាន​ខ្ពស់​ជាង​ការវាយតម្លៃ​របស់​អង្គការ UNDP នេះ៖ «ខ្ញុំ​គិត​ថា អត្រា​ភាព​ក្រីក្រ​អាច​ច្រើន​ជាង​ការ​ទស្សន៍ទាយ​របស់​អង្គការ UNDP។ ហេតុ​អី​បាន​ជា​ខ្ញុំ​ថា ដូច្នេះ? ទី​មួយ យើង​ឃើញ​ថា​ចំនួន​រោងចក្រ​ចេះតែ​បិទ ចេះតែ​ព្យួរ​បន្តបន្ទាប់។ មិនមែន​តែ​រោងចក្រ​ទេ ទាំង​វិស័យ​ផ្សេងៗ ក៏​ពុំ​ទាន់​ដំណើរការ​ស្រួលបួល​ដែរ ដូចជា​ខាង​សេវា​កម្សាន្ត ខាង​កាស៊ីណូ​អី​ជាដើម ក៏​ពុំ​ទាន់​បាន​ដំណើរ​ការ​ស្រួល​បួល​ដែរ។ រីឯ វិស័យ​ទេសចរណ៍​វិញ នៅ​អត់​ទាន់​បាន​ប្រសើរ​ទេ នៅ​អត់​ទាន់​មាន​ភ្ញៀវ​បរទេស​មាន​ទេ គឺ​ពឹងផ្អែក​ទាំងស្រុង​ទៅលើ​ភ្ញៀវ​ខាងក្នុង»

លោក មឿន តុលា បន្ត​ថា ផ្អែក​តាម​ការសិក្សា​ស្រាវជ្រាវ​កន្លងទៅ​តាមរយៈ​ការ​ជួប​សម្ភាសន៍​ផ្ទាល់​ជាមួយ​កម្មករ​រោងចក្រ​ជាង ​៥៥០នាក់ អង្គការ​របស់​លោក​រក​ឃើញ​ថា មានតែ​កម្មករ ១២% ទេ​ ដែល​ឆ្លើយ​ថា ពួកគេ​ពុំ​ជំពាក់​បំណុល​មីក្រូហិរញ្ញវត្ថុ។ រីឯ កម្មករ ៨០% ទៀត សុទ្ធតែ​ឆ្លើយ​ថា ពួកគាត់​ជំពាក់​បំណុល​គេ ដែល​អ្នកខ្លះ​ជំពាក់​ពី​ស្ថាប័ន​តែ​មួយ ឬ​ពី​ស្ថាប័ន​ពីរ ឬ​បី​ផ្សេងគ្នា​ក៏​មាន។ ក្រៅពី​ជំពាក់​បំណុល​ស្ថាប័ន​មីក្រូហិរញ្ញវត្ថុ ពលរដ្ឋ​ទាំងនោះ​ក៏​ជំពាក់​បំណុល​ឯកជន​ផង​ដែរ៖ «អ៊ីចឹង បើ​យើង​មើល​ទៅ​លើ​ចំនួន​ហ្នុង អ្នក​ដែល​ ឬ​យើង​ដឹង​ហើយ​ថា ប្រជាពលរដ្ឋ​យើង​កន្លង​មក ថ្វីដ្បិត​តែ​អត្រា​នៃ​ភាព​ក្រីក្រ វា​មាន​កម្រិត​រាង​ទាប​ជាង​នេះ​មែន ក៏​ប៉ុន្តែ​អ្នក​ដែល​រស់នៅ​កៀកៗ បន្ទាត់​ភាព​ក្រីក្រ​ហ្នុង គឺ​វា​កៀក​ច្រើន​មែនទែន។ អ៊ីចឹង នៅ​ពេល​ដែល​បាត់បង់​ការងារ នៅ​ពេល​ដែល​មាន​វិបត្តិ​កូវីដ១៩ គឺ​ធ្វើ​ឲ្យ​អ្នក​ដែល​កៀក​នេះ គឺ​ធ្លាក់​មុនគេ​ហើយ»

នៅមុន​ពេល​មាន​វិបត្តិ​ជំងឺ​កូវីដ១៩ នេះ ចំនួន​ពលរដ្ឋ​ដែល​រស់នៅ​កៀក​នឹង​បន្ទាត់​ភាព​ក្រីក្រ ឬ​ដែល​ងាយ​នឹង​ធ្លាក់ខ្លួន​ក្រីក្រ​ឡើង​វិញ​នេះ បើ​ផ្អែក​តាម​ធនាគារ​ពិភពលោក គឺ​មាន​រហូតដល់​ទៅ​ប្រមាណ​​ជាង ៤,៥លាននាក់។ ទន្ទឹម​គ្នា​នេះ ធនាគារ​ដដែល​នេះ ក៏បាន​ព្យាករណ៍​កាលពី​ពាក់​កណ្ដាល​ឆ្នាំនេះ ថា មនុស្ស​យ៉ាង​ហោច​ណាស់​ជាង ១លាន ៧សែននាក់ ពិសេស​ក្នុងចំណោម​គ្រួសារ​ដែល​ធ្វើការ​ក្នុង​វិស័យ​ទេសចរណ៍ ទិញ​លក់​ដុំ និង​រាយ វិស័យ​កាត់ដេរ វិស័យ​សំណង់ ពាណិជ្ជកម្ម និង​ឧស្សាហកម្ម​ផលិតកម្ម កំពុង​ប្រឈម​នឹង​ការបាត់បង់​ការងារ​ធ្វើ។

រីឯ​នាយក​ប្រតិបត្តិ​អង្គការ​តម្លាភាព​កម្ពុជា លោក ប៉ិច ពិសី ពន្យល់​ថា អាច​នឹង​មាន​ភាព​លម្អៀង​នៅ​ក្នុង​ការវាយតម្លៃ​ និង​ការ​រក​ឃើញ​របស់​អង្គការ UNDP នេះ៖ «កម្រិត​លម្អៀង​វា​មាន​ខ្លះ​ហើយ ប៉ុន្តែ​កម្រិត​លម្អៀង​ក្នុង​កម្រិត​ប៉ុន្មាន​ចុច ២ចុច ឬ១ចុច​អ៊ីចឹង។ ដូច្នេះ វា​អាច​ខុស​គ្នា​តិចតួច។ គ្រាន់​តែ​ថា បើ​យើង​មើល​ទៅ​លើ​ផល​ប៉ះពាល់​ដែល​ចេញ​អំពី​ជំងឺ​កូវីដ១៩ ការ​ដក EBA ផង ហើយ​យើង​ក៏​មាន​ផល​ប៉ះពាល់​ផ្ទាល់​ដែល​ចេញ​អំពី​កូវីដ ១៩នេះ ធំធេង​ណាស់។ ទី​មួយ យើង​មាន​អត្រា​នៃ​ការ​អត់​ការងារ​ធ្វើ​ច្រើន។ តាម​ការ​វាយ​តម្លៃ​របស់​ធនាគារ​ពិភពលោក​អាច​មាន​ដល់ ១,៧លាន​នាក់​នៃ​អត្រា​ប្រជាពលរដ្ឋ​អត់​ការងារ​ធ្វើ។ ទីពីរ ចរន្ត​សេដ្ឋកិច្ច​សង្គម​ក៏​ប៉ះពាល់​ហើយ ពីព្រោះ​កូវីដ១៩ វា​អាច​ប៉ះពាល់​ទៅលើ​វិស័យ​ គ្រប់​វិស័យ​ទាំងអស់ ជាពិសេស​វិស័យ​ទេសចរណ៍ វិស័យ​កំសាន្ត សុទ្ធតែ​ប៉ះពាល់​ខ្លាំង»

លោក ប៉ិច ពិសី ព្រមាន​ថា ផល​ប៉ះពាល់​ខ្លាំង​នេះ មិនមែន​មាន​ត្រឹមតែ​ឆ្នាំ២០២០​នេះ​ទេ គឺ​រហូត​ដល់​ឆ្នាំ​បន្ត​បន្ទាប់​ទៀត ព្រោះ​រដ្ឋាភិបាល​គ្រោង​នឹង​កាត់បន្ថយ​ចំណាយ​រហូតដល់៥០ភាគរយ៖ «ចំនួន​អ្នកក្រ​អាច​កើន​ពី​មួយ​ឆ្នាំ​ទៅ​មួយ​ឆ្នាំ បើ​សិន​ជា​យើង​មិន​មាន​យុទ្ធសាស្ត្រ​ ឬក៏​មិន​មាន​ថវិកា​គ្រប់គ្រាន់​ដើម្បី​ទប់ស្កាត់​បញ្ហា​ទាំងអស់​នេះ​ទេ នៅ​ក្នុង​ឆ្នាំ​២០២១ ហើយ​ឆ្នាំ២០២១ ជា​ឆ្នាំ​មួយ​ដែល​លំបាក​បំផុត​ពីព្រោះ​យើង​កំពុង​តែ​មាន​វិបត្តិ​ហើយ​ចរន្ត​សាច់ប្រាក់​ថវិកា​ជាតិ គឺ​ឥឡូវនេះ យើង​ដឹង​ថា មាន​កម្រិត​មែនទែន រហូតដល់​រដ្ឋាភិបាល​កាត់​ថវិកាជាតិ​រហូតដល់ ៥០%។ នេះ​បានន័យ​ថា យើង​មិន​មាន​ថវិកា​ប្រើប្រាស់​ទេ»

ក្រៅពី​ការវាយតម្លៃ​របស់​អង្គការ UNDP នេះ កាល​ពី​ខែ​កញ្ញា ទាំង​ធនាគារ​អភិវឌ្ឍន៍​អាស៊ី (ADB) និង​ធនាគារ​ពិភពលោក (World Bank) បាន​ធ្វើ​ការ​ព្យាករណ៍​ចុងក្រោយ​ថា កំណើន​សេដ្ឋកិច្ច​កម្ពុជា​ក្នុង​ឆ្នាំ២០២០​នេះ គឺ​សុទ្ធតែ​ធ្លាក់​ចុះ​មក​នៅ​ត្រឹម -% -% ដែល​មាន​ន័យ​ថា មាន​កំណើន​ទាប​ជាង​ឆ្នាំ២០១៩ រហូត​ដល់​ទៅ ៤% ឬ ២% ដោយសារតែ​ផល​ប៉ះពាល់​នៃ​ជំងឺ​កូវីដ១៩។ ការ​ព្យាករណ៍​នេះ បង្ហាញ​ឲ្យ​ឃើញ​ថា សេដ្ឋកិច្ច​កម្ពុជា​កំពុង​ធ្លាក់​ចុះ​យ៉ាង​គំហុក​មិន​ធ្លាប់​មាន​ពីមុន​មក ដែល​លោក ហ៊ុន សែន តែង​អះអាង​ថា កម្ពុជា​អាច​រក្សា​កំណើន​សេដ្ឋកិច្ច​ក្នុង​រង្វង់ ៧% ជា​រៀងរាល់​ឆ្នាំ​នោះ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល