កម្ពុជា​រំពឹង​ថា ភ្ញៀវ​ទេសចរ​បរទេស​នឹង​មក​លេង​នៅ​កម្ពុជា​កាន់​តែ​ច្រើន នៅ​ឆ្នាំ២០២១

ដោយ ម៉ៅ សុធានី
2020-10-20
អ៊ីម៉ែល
មតិ
Share
បោះពុម្ព
ភ្ញៀវទេសចរ​ចូល​ទស្សនា​អង្គរវត្ត កាល​ពី​ថ្ងៃ​ទី១៨ ខែកញ្ញា ឆ្នាំ២០២០។
ភ្ញៀវទេសចរ​ចូល​ទស្សនា​អង្គរវត្ត កាល​ពី​ថ្ងៃ​ទី១៨ ខែកញ្ញា ឆ្នាំ២០២០។
រូប៖ ហ្វេសប៊ុក​ក្រសួង​ទេសចរណ៍

កម្ពុជា​រំពឹង​ថា ចំនួន​ភ្ញៀវ​ទេសចរ​បរទេស នឹង​ចាប់​ផ្ដើម​មក​ទស្សនា​តំបន់​អង្គរ ខេត្ត​សៀមរាប ច្រើន​ឡើង​វិញ នៅ​អំឡុង​ត្រីមាស​ទី១ នៅ​ឆ្នាំ២០២១ ខាង​មុខ ប្រសិន​បើ​មាន​វ៉ាក់សាំង​ការពារ​ជំងឺ​កូវីដ១៩ (Covid-19)។

អ្នក​នាំ​ពាក្យ​ក្រសួង​ទេសចរណ៍ លោកតុប សុភ័ក្ត្រ ឲ្យ​ដឹង​ថា តំបន់​អង្គរ គឺ​ជា​កន្លែង​ទេសចរណ៍​ដ៏​សំខាន់​មួយ​នៅ​ប្រទេស​កម្ពុជា ប៉ុន្តែ​ចំនួន​ភ្ញៀវ​ទេសចរ​បរទេស បាន​ធ្លាក់​ចុះ​យ៉ាង​គំហុក ក្នុង​អំឡុង​ពេល ៩ខែ ដើម​ឆ្នាំ២០២០ នេះ ដោយសារការរាតត្បាតសកលនៃជំងឺកូវិត១៩។ លោក​ថា មុន​ការ​រាតត្បាត​ជំងឺ​កូវីដ១៩ តំបន់​អង្គរ​មាន​ភ្ញៀវ​ទេសចរ​បរទេស​យ៉ាង​តិច ក៏ ៩ពាន់​នាក់ ក្នុង​មួយ​ថ្ងៃ ប៉ុន្តែ​បច្ចុប្បន្ន​នេះ គឺ​មាន​តែ ៧០នាក់​ប៉ុណ្ណោះ ក្នុង​មួយ​ថ្ងៃ ដែល​ជា​ភ្ញៀវ​បរទេស​កំពុង​រស់នៅ និង​ធ្វើ​ការ​នៅ​ក្នុង​ប្រទេស​កម្ពុជា។

អ្នក​នាំ​ពាក្យ​ក្រសួង​ទេសចរណ៍​រូប​នេះ ឲ្យ​ដឹង​ថា ក្នុង​អំឡុង​ពេល ៩ខែ​ដើម​ឆ្នាំ២០២០ នេះ កម្ពុជា​ទទួល​បាន​ប្រាក់ចំណូលជាង១៨លានដុល្លារ ពី​ការ​លក់​ប័ណ្ណ​ចូល​ទស្សនា​រមណីយដ្ឋាន​អង្គរ ពី​ភ្ញៀវ​បរទេស​ចំនួន​ជិត ៤០ម៉ឺន​នាក់ ហើយ​ដែល​ចំនួន​នេះ គឺ​ធ្លាក់​ចុះ​ជាង ៧៦% បើ​ប្រៀបធៀប​រយៈ​ពេល​ដូច​គ្នា កាល​ពី​ឆ្នាំ២០១៩។ លោក តុប សុភ័ក្ត្រ ឲ្យ​ដឹង​ទៀត​ថា អំឡុងខែកញ្ញាឆ្នាំ២០២០នេះ រមណីយដ្ឋាន​អង្គរ​មាន​ភ្ញៀវ​បរទេស​មក​ទស្សនា ចំនួន​ជិត ៣ពាន់នាក់ និង​បាន​ប្រាក់​ចំណូល​ជាង ១២ម៉ឺន​ដុល្លារ​ពី​ការ​លក់​សំបុត្រ ហើយ​បើ​ប្រៀបធៀប​អំឡុង​ខែ​កញ្ញា ឆ្នាំ២០១៩ គឺ​ធ្លាក់​ចុះ​ជាង ៩៧%

ទោះ​ជា​យ៉ាង​នេះ​ក៏​ដោយ ក្រសួង​ទេសចរណ៍​សង្ឃឹម​ថា ចំនួន​ភ្ញៀវ​ទេសចរ​ចិន កាន់តែ​ច្រើន​នឹង​មក​ទស្សនា​កម្ពុជា​ឡើង​វិញ ដោយសារ​ទំនាក់ទំនង​ជិតស្និទ្ធ​រវាង​កម្ពុជា និង​ចិន និង​ក្រោយ​ពី​មាន​វ៉ាក់សាំង​ការពារ​ជំងឺ​កូវីដ១៩។

លោក ថោង ខុន រដ្ឋមន្ត្រី​ក្រសួង​ទេសចរណ៍ អះអាង​កាល​ពី​ខែ​កក្កដា​ថា កម្ពុជា​អាច​បាត់បង់​ប្រាក់​ចំណូល​ពី​វិស័យ​ទេសចរណ៍ ចំនួន​ប្រមាណ ៣ពាន់​លាន​ដុល្លារ​អាមេរិក ក្នុង​ឆ្នាំ ២០២០នេះ។ វិស័យ​ទេសចរណ៍ ជា​វិស័យ​ចម្បង​មួយ ដែល​គាំទ្រ​សេដ្ឋកិច្ច​កម្ពុជា ដោយ​រក​បាន​ប្រាក់​ចំណូល​ប្រមាណ​ជិត ៥ពាន់​លាន​ដុល្លារ (.Billion) ពី​ភ្ញៀវ​ទេសចរ​បរទេស​ចំនួន ៦លាន ៦សែន​នាក់ កាល​ពី​អំឡុង​ឆ្នាំ២០១៩៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល