សហជីព​ថា រោងចក្រ​ខ្លះ​បន្ត​លិច ឯ​រោងចក្រ​ខ្លះ​ទឹក​ស្រក​វិញ និង​អាច​ចូល​ធ្វើការ​បាន

ដោយ ​​ម៉ៅ សុធានី
2020-10-25
អ៊ីម៉ែល
មតិ
Share
បោះពុម្ព
សកម្មភាព​ប្រជាពលរដ្ឋ​នៅ​ខណ្ឌ​ដង្កោ កំណាត់​ផ្លូវ​ពី​រង្វង់​មូល​កួរ​ស្រូវ មក​ផ្សារ​ព្រែកជ្រៃ កំពុង​ជម្លៀស​ខ្លួន​ចេញ​ពី​កន្លែង​ទឹក​ជំនន់ នៅ​ថ្ងៃ​ទី១៥ ខែ​តុលា ឆ្នាំ២០២០។
សកម្មភាព​ប្រជាពលរដ្ឋ​នៅ​ខណ្ឌ​ដង្កោ កំណាត់​ផ្លូវ​ពី​រង្វង់​មូល​កួរ​ស្រូវ មក​ផ្សារ​ព្រែកជ្រៃ កំពុង​ជម្លៀស​ខ្លួន​ចេញ​ពី​កន្លែង​ទឹក​ជំនន់ នៅ​ថ្ងៃ​ទី១៥ ខែ​តុលា ឆ្នាំ២០២០។
រូប៖ ពលរដ្ឋ

សហជីព​ឲ្យ​ដឹង​ថា រោងចក្រ​ខ្លះ នៅ​ក្រុងភ្នំពេញ ខេត្ត​កណ្ដាល និង​កំពង់ស្ពឺ​នៅ​បន្ត​លិច ឯ​រោងចក្រ​ខ្លះ ទឹក​ចាប់ផ្ដើម​ស្រក​វិញ​ខ្លះ​ហើយ និង​មាន​កម្មករ​អាច​ចូល​ធ្វើ​ការ​បាន​មួយ​ចំនួន​។​សមាគម​ថៅកែ​ថា ម្ចាស់​រោងចក្រ​ដែល​រង​ផល​ប៉ះពាល់​ធ្ងន់ធ្ងរ​នឹង​ដាក់​ពាក្យសុំ​ព្យួរ​ការងារ​កម្មករ​រយៈពេល​ខ្លី។

ប្រធាន​សហភាព​ការងារ​កម្ពុជា លោក អាត់ ធន់ ឲ្យ​ដឹង​ថា រោងចក្រ​ខ្លះ បាន​ចូល​ធ្វើការ​វិញ​ហើយ ក្រោយ​ទឹក​ស្រក​ទៅវិញ នៅ​ប៉ុន្មាន​ថ្ងៃនេះ​។ ប៉ុន្តែ​រោងចក្រ​ខ្លះ​ទៀត​អាច​ប្រឈម​ផល​ប៉ះពាល់​ខ្លាំង​ព្រោះ​តម្រូវ​ឲ្យ​មានការ​គាស់​រំលើង​ការ៉ូ ឬ​ស៊ីម៉ង់​នៃ​ផ្នែក​ខ្លះ ក្នុង​អគារ ដើម្បី​ផ្ដាច់​ចរន្តអគ្គិសនី។ ឯ​រោងចក្រ​ខ្លះ ត្រូវ​ដាក់​ម៉ាស៊ីន​បូមទឹក​ចេញ និង​រើ​អីវ៉ាន់​ចេញ ពី​រោងចក្រ​ភ្លាមៗ។

លោក អាត់ ធន់ បន្ត​ថា ក្នុង​កំឡុង​ពេល ទឹក​ជន់​លិច​នេះ ថៅកែ​រោងចក្រ​ខ្លះ បាន​ផ្ដល់​ប្រាក់​ឈ្នួល​ឲ្យ​កម្មករ ៥០​ភាគរយ រោងចក្រ​ខ្លះ តម្រូវ​ឲ្យ​កម្មករ​ឈប់ ដោយ​កាត់​ថ្ងៃ​ឈប់សម្រាក​ប្រចាំថ្ងៃ​សង​វិញ ឯ​រោងចក្រ​ខ្លះ​ទៀត​ឲ្យ​កម្មករ​ឆ្លាស់​វេន​គ្នា មក​ធ្វើការ​នៅ​ផ្នែក​រោងចក្រ​ដែល​មិនទាន់​លិច៖ «ខ្ញុំ​អត់​ទាន់​ឃើញ​ព័ត៌មាន​ផ្លូវការ​អ្វី​ដែរ រឿង​ក្រសួង​ការងារ ឬ​ក្រសួង​ពាក់ព័ន្ធ​ជួយ​អ្វី​ទេ នៅ​ទេ​។ យើង​ឃើញ​តែ​វិធានការ​ភ្លាមៗ​នោះ ក្រុមហ៊ុន​ព្យាយាម​បូម​ទឹក​ចេញ​ខ្លួនឯង អ៊ីចឹង​ទៅ​។ ឲ្យ​កម្មករ ធ្វើការ​ខ្លះ ឬ​អត់​ខ្លះ​អ្វី​អ៊ីចឹង​ទៅ ឬក៏​ឲ្យ​កម្មករ​ធ្វើការ​គិតលុយ​ឲ្យ​ពាក់កណ្ដាល​អ្វី​អ៊ីចឹង​ទៅ​។ ក៏ប៉ុន្តែ​យើង​ឃើញ​ការ​ទប់ស្កាត់​បូម​ជា​លក្ខណៈ​ទ្រង់ទ្រាយ ធំ​ឬក៏​រំដោះ​ទឹក​ចេញ ពី​កន្លែង​មួយ​ទៅ​មួយ​ដើម្បី​កុំ​ឲ្យ​វា​លិច​ក្រុង​ឬ​តំបន់​អ្វី​ហ្នឹង គឺ​វា​មាន​។ តែ​ជួយ​ដោយ​ជាក់លាក់​លើ​ក្រុមហ៊ុន ដូចជា មិន​មាន​ទេ»

លោក អាត់ ធន់ ឲ្យ​ដឹង​ថា មិនទាន់​មាន​តួលេខ​ថ្មី​ពី​ខាង​ក្រសួង​ការងារ​ស្ដីពី​ផល​ប៉ះពាល់​រោងចក្រ និង​កម្មករ បណ្ដាលមកពី​ទឹកជំនន់​នេះ​ទេ។ កាលពី​សប្ដាហ៍​មុន (១៧ តុលា​) ថា រោងចក្រ​ស្ថិត​ក្នុង​រាជធានី​ភ្នំពេញ រង​ផល​ប៉ះពាល់​៦២​ទីតាំង រោងចក្រ​នៅ​ខេត្ត​កណ្ដាល​រង​ផល​ប៉ះពាល់​ចំនួន​១៣​ទីតាំង និង​នៅ​ខេត្ត​កំពង់ស្ពឺ រង​ផល​ប៉ះពាល់​ចំនួន​៤​ទីតាំង ដែល​សរុប​ទាំង​៣​រាជធានី ខេត្ត​មាន​រោងចក្រ​ចំនួន​៧៩ និង​ប៉ះពាល់​ដល់​កម្មករ និង​និយោជិក ជាង​បួន​ម៉ឺន (៤០ ០០០)​នាក់។

 

អគ្គលេខាធិការ​សមាគម​រោងចក្រ​កាត់ដេរ​នៅ​កម្ពុជា លោក ខេន លូ ប្រាប់​អាស៊ីសេរី​ថា ខាង​សមាគម​ថៅកែ ក៏​គ្មាន​តួលេខ​ពិតប្រាកដ​អំពី​ចំនួន​រោងចក្រ​រង​ផល​ប៉ះពាល់​ដែរ គិត​ត្រឹម​ថ្ងៃ​ទី​២៤ តុលា គឺ​មាន​តែ​ខាង​ក្រសួង​ការងារ​ប៉ុណ្ណោះ​។ តែ លោក​ថា ផល​ប៉ះពាល់​នៃ​ទឹកជំនន់​នេះ មិន​បង្ក​ជា​បញ្ហា​ដល់​សង្វាក់​ផលិតកម្ម​ការងារ​ទេ ឯ​រោងចក្រ​ខ្លះ នៅតែ​ដំណើរ​ការ​ធម្មតា។

តែ​យ៉ាងណា លោក ខេន លូ បញ្ជាក់​ថា ថៅកែ​រោងចក្រ​ដែល​ជួប​ផល​លំបាក​ធ្ងន់ធ្ងរ​មិន​អាច​ដំណើរការ​រោងចក្រ​បាន ដោយសារ​ទឹកជំនន់ អាច​ដាក់​ពាក្យ​ស្នើ​សុំ​ព្យួរ​ការងារ​កម្មករ រយៈពេល​ខ្លី​បាន​ទៅ​តាម​ស្ថានភាព​ជាក់ស្ដែង​។ តែ​យ៉ាងណា សមាគម​ថៅកែ​​រោងចក្រ​មិន​ចង់បាន​ការ​ជួយ​គាំទ្រ​បន្ថែម​ពី​រដ្ឋ​ទេ៖ «រឿង​ព្យួរ​ការងារ​ត្រូវតែ​មាន​ហើយ ព្រោះ​រោងចក្រ​ជួប​ផល​ប៉ះពាល់​មានន័យថា គេ​អាច​សុំ​ព្យួរ​ការងារ​រយៈពេល​ខ្លី ហើយ​ចាំ​មើល​ទឹក​ស្រក​ដំណើរការ​ឡើងវិញ​ហើយ»

អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​ខាង​អាជ្ញាធរ​វិស័យ​ការងារ​បានទេ នៅ​ថ្ងៃ​ទី​២៤ តុលា ដោយសារ​អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ លោក ហេង សួរ មិន​ទទួល​ទូរស័ព្ទ។

អនុប្រធាន​សហព័ន្ធ​សហជីព​ឯករាជ្យ​ការពារ​កម្មករ ដែល​មាន​សមាជិក​ច្រើន ធ្វើការ​តាម​រោងចក្រ​នៅ​ម្ដុំ​ខណ្ឌ​ដង្កោ​លោក លឹម បូរី ឲ្យ​ដឹង​ថា បច្ចុប្បន្ន​រោងចក្រ​ដែល​កំពុង​រងគ្រោះ​ធ្ងន់ធ្ងរ​ជាងគេ ហើយ​ទឹក​នៅតែ​កំពុង​លិច គឺ​រោងចក្រ​នៅ​ម្ដុំ​ផ្លូវ ព្រែក​ជ្រៃ ដល់​រង្វង់​មូល​កួរស្រូវ​ដោយសារ​ទឹក​នៅតែ​បន្ត​លិច មិន​ទាន់​ស្រក​ខ្លាំង គួរ​ឲ្យ​កត់សម្គាល់​ទេ។

លោក​ឲ្យ​ដឹង​ថា ទឹក​លិច​ទាំង​រោងចក្រ និង​លិច​ទាំង​បន្ទប់​ជួល​របស់​កម្មករ បណ្ដាល​ឲ្យ​កម្មករ​ខ្លះ​ត្រលប់​ទៅ​ស្រុក​កំណើត​មួយ​រយៈ ឯ​កម្មករ​ខ្លះ បន្ត​រស់នៅ​ទី​ទួល រង់ចាំ​ទឹក​ស្រក ចូល​ធ្វើ​ការ​វិញ​។ លោក លឹម បូរី ឲ្យ​ដឹង​ថា កម្មករ​ភាគច្រើន នៅ​ម្ដុំ​ព្រែក​ជ្រៃ ដល់​រង្វង់​មូល​កួរស្រូវ​ទទួល​បាន​ប្រាក់​ឈ្នួល​៥០​ភាគរយ ក្នុង​កំឡុង​ពេល​រោងចក្រ រងគ្រោះ​ពី​ទឹកជំនន់​នេះ៖ «(រោងចក្រ​) លិច​ចាប់ពី​ព្រែក​ជ្រៃ ទៅដល់​កួរស្រូវ គឺ​ភាគច្រើន លិច​ទាំងស្រុង​។ អ៊ីចឹង ប្រឈមមុខ​នឹង​បញ្ហា​។ ភាគច្រើន​គឺ ប្រឈម​មុខ​នឹង​ការ​បិទ​សិន ទម្រាំ​ដល់​ទឹក​ស្រក​វិញ​។ និយាយ​ឲ្យ​ខ្លី ប៉ះពាល់​សេដ្ឋកិច្ច​របស់​ក្រុម​គ្រួសារ​ដែល​គាត់​មាន​(​ជំពាក់​)​ធនាគារ​អ្វី​ហ្នឹង សុទ្ធតែ​ប៉ះពាល់​ខ្លាំង ប៉ះពាល់​ធ្ងន់»

លោក អាត់ ធន់ យល់ថា រដ្ឋ​គួរ​ជួយ​ពិនិត្យមើល​លទ្ធភាព​រោងចក្រ​ដែល​លិចលង់ និង​ជួយ​អនុគ្រោះ ពន្ធ​មួយ​ចំនួន ដល់​ម្ចាស់​រោងចក្រ ខណៈ​រដ្ឋ​ក៏​ត្រូវ​គិតគូរ​ជួយ​កម្មករ​ឲ្យ​ទទួល​បាន​អំណោយ និង​ការ​អនុគ្រោះ​ផ្សេងៗ ដូចជា ត្រូវ​ពន្យារ​ពេល​សងបំណុល​ធនាគារ បញ្ចុះតម្លៃ​ទឹក​ភ្លើង និង​តម្លៃ​អាហារ ដល់​កម្មករ ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល