ពលរដ្ឋ និង​មន្ត្រីរាជការ​ស្នើ​ឱ្យ​រដ្ឋាភិបាល​ប្រញាប់​ស្តារ​ស្ថានការណ៍​សិទ្ធិមនុស្ស ដើម្បី​រក្សា EBA

ដោយ យន់ សាមៀន
2020-02-15
អ៊ីម៉ែល
មតិ
Share
បោះពុម្ព
លោក ហ៊ុន សែន ចូលរួម​កិច្ចប្រជុំ​អាស៊ាន​លើក​ទី៣៤ នៅ​ប្រទេស​ថៃ កាល​ពី​ថ្ងៃ​ទី២២ មិថុនា ២០១៩។
លោក ហ៊ុន សែន ចូលរួម​កិច្ចប្រជុំ​អាស៊ាន​លើក​ទី៣៤ នៅ​ប្រទេស​ថៃ កាល​ពី​ថ្ងៃ​ទី២២ មិថុនា ២០១៩។
រូប​ពី​ហ្វេសប៊ុក លោក ហ៊ុន សែន

ប្រជាពលរដ្ឋ និង​មន្ត្រីរាជការ​មួយ​ចំនួន ទទូច​ដល់​រដ្ឋាភិបាល លោក ហ៊ុន សែន ឱ្យ​ប្រញាប់​ស្តារ​ស្ថានការណ៍​ធ្លាក់​ចុះ​ការ​គោរព​សិទ្ធិមនុស្ស​នៅ​កម្ពុជា ដើម្បី​រក្សា​ការ​អនុគ្រោះ​ពន្ធ EBA​។ ការ​អំពាវនាវ​នេះ ធ្វើឡើង​ក្រោយពេល​គណៈកម្មការ​អឺរ៉ុប​បានសម្រេច​ដក​ការ​អនុគ្រោះ​ពន្ធ ២០% ពី​កម្ពុជា និង​ទុក​ពេល​ឱ្យ​រដ្ឋាភិបាល​ក្រុងភ្នំពេញ​កែប្រែ​ខ្លួន​ឡើងវិញ មុន​សេចក្តី​សម្រេច​នេះ​ចូល​ជា​ធរមាននៅ​ថ្ងៃទី​១២ ខែ​សីហា ខាងមុខ។

ក្រុម​ពលរដ្ឋ និង​មន្ត្រីរាជការ លើកឡើង​ថា ប្រសិនបើ​រដ្ឋាភិបាល​សព្វ​ថ្ងៃ គិត​ពី​ប្រយោជន៍​ជាតិ​មែន នោះ​រដ្ឋាភិបាល​ត្រូវតែ​បំពេញ​ទៅតាម​លក្ខខណ្ឌ​របស់​ស​ហ​ភាព​អឺរ៉ុប ដែល​ស្នើ​ឱ្យ​មានការ​កែ​លម្អ​ស្ថានភាព​សិទ្ធិមនុស្ស និង​សិទ្ធិ​ការងារ​នៅ​កម្ពុជា។

តំណាង​សហគមន៍​សាមគ្គី​ចេកមាស និង​ជា​កសិករ​មួយ​រូប​នៅ​ខេត្ត​ស្វាយរៀង អ្នកស្រី យស់ សោភ័ណ្ឌ ថ្លែង​ថា នៅ​ពេល​អឺរ៉ុប​សម្រេច​យកពន្ធ​លើ​ទំនិញ​កម្ពុជា មិនមែន​ប៉ះពាល់​វិស័យ​កាត់ដេរ​តែមួយ​នោះ​ទេ ប៉ុន្តែ​វា​ក៏​ប៉ះពាល់​វិស័យ​ស្រូវ​អង្ករ​ដែរ។ អ្នកស្រី​បន្ត​ថា ករណី EBA នេះ ជា​បញ្ហា​ធំ ដែល​រដ្ឋាភិបាល​ត្រូវ​ដោះស្រាយ​ដោយ​យកចិត្តទុកដាក់ មិនមែន​ត្រឹម​ប្រាប់​ប្រជាពលរដ្ឋ​កុំ​ឱ្យ​ភ័យ​នោះ​ទេ៖ «កសិករ​ដែល​គាត់​នៅ​តាម​ជនបទ ភាគច្រើន​គឺ​គាត់​រំពឹង​លើ​បងប្អូន​ដែល​ធ្វើការ​នៅ​រោងចក្រ ហើយ​ម្នាក់ៗ​ជំពាក់​លុយ​ធនាគារ ហើយ​ចុះបើ​គាត់​គ្មាន​ការងារ​ធ្វើ សួរថា​គាត់​បាន​លុយ​ពី​ណា​ទៅ​បង់​ធនាគារ​។ ខ្ញុំ​គិត​ថា បើ​ផ្តាច់ EBA ហ្នឹង បញ្ហា​សំខាន់​តែ​លើ​កសិករ និង​កម្មករ​រោងចក្រ​ទេ​។ ចំពោះ​គេ​អ្នកមាន​ធំៗ គេ​អត់​ខ្វល់​។ ខ្ញុំ​គិត​ថា គេ​អត់​ខ្វល់ វា​ត្រូវ​ហើយ ព្រោះ​លុយ​គេ​ចាយ​មិន​អស់​ផង​។ លុយ​គេ​មាន​វាល់​លាន លុយ​គេ​នៅ​ប្រទេស​នេះ ប្រទេស​នោះ​មួយ​គំនរ​គរ​ដី​។ អ្នក​ដែល​វេទនា វេទនា​តែ​យើង​រាស្ត្រ​ទេតើ»

ចំណែក មន្ត្រីរាជការ​មួយ​រូប​នៅ​ខេត្ត​ព្រៃវែង​ដែល​ថ្លែង​សុំ​មិន​បញ្ចេញ​ឈ្មោះ ឱ្យដឹង​ថា លោក​មាន​សាច់ញាតិ​ជាច្រើន​នាក់​ធ្វើការ​រោងចក្រ​ហើយ​ពួកគេ​កំពុងតែ​ភ័យ​ព្រួយ​ខ្លាច​បាត់បង់​ការងារ​ធ្វើ នៅ​ពេល​លឺ​ដំណឹង​ថា អឺរ៉ុប​ដក​ការ​អនុគ្រោះ​ពន្ធ​មួយ​ផ្នែក​ពី​កម្ពុជា​។ លោក​ទទួលស្គាល់​ថា ការបាត់បង់ EBA អាច​មិនសូវ​ប៉ះពាល់​ដល់​រូបលោក​ជា​មន្ត្រីរាជការ​ទេ ក៏ប៉ុន្តែ​លោក​ថា ទាំង​សាច់ញាតិ​របស់​លោក និង​ពលរដ្ឋ​ខ្មែរ​ជាច្រើន​នាក់​ទៀត កំពុង​ស្ថិត​ក្នុង​ហានិភ័យ​ខ្ពស់ ព្រោះ​ពួកគេ​ជំពាក់​បំណុល​ធនាគារ ហើយ​បើ​គ្មាន​ការងារ​ធ្វើ​ទេ នោះ​ពួកគេ​នឹង​ជួប​ការ​លំបាក​កាន់តែ​ខ្លាំង​៖ «សំណូមពរ​ដល់​ថ្នាក់ដឹកនាំ រាជរដ្ឋាភិបាល កុំ​និយាយ​អ្វី​រកតែ​ដោះ​ខ្លួន​។ ត្រូវ​គិត​ប្រយោជន៍​ជាតិ​ជាធំ ប្រយោជន៍​ប្រជាពលរដ្ឋ​ជាធំ ព្រោះ​អស់លោក​បាន​ធ្វើ​ការ​រាល់​ថ្ងៃ​នេះ មិនមែន​បាន​ដោយ​គ្រួសារ​លោក​ដំឡើង​នោះ​ទេ ដោយសារ​ប្រជាពលរដ្ឋ​ទេ​ដែល​បោះឆ្នោត​ឱ្យ​ដឹកនាំ​រាល់ថ្ងៃ​នេះ។កុំ​ឱ្យ​ប្រជាពលរដ្ឋ​រង​ទុក្ខ​តទៅទៀត សុំ​ថា​មិនបាច់​ចែក​អំណោយ​ឱ្យ​ប្រជាពលរដ្ឋ​ទេ សុំ​តែ​ឱ្យ​មាន​ការងារ​ធ្វើ​ទៅ​បាន​ហើយ»

ស្រដៀង​គ្នា​នេះ មន្ត្រីរាជការ​មួយ​រូប​ទៀត​នៅ​ខេត្ត​តាកែវ មានប្រសាសន៍ថា ប្រសិនបើ​កម្ពុជា​បាត់បង់​ការ​អនុគ្រោះ​ពន្ធ EBA ហើយ​វិបត្តិ​នេះ​បង្ក​ជា​ផល​ប៉ះពាល់​ធំធេង​ដល់​ប្រជាជាតិ​ខ្មែរ នោះ​គឺជា​កំហុស​របស់​រដ្ឋាភិបាល​កម្ពុជា ក្រោម​ការដឹកនាំ​របស់​លោក ហ៊ុន សែន​។ លោក​ថា ក្នុង​រយៈពេល​ប៉ុន្មាន​ខែ​ទៅ​មុខ​ទៀត លោកនាយក​រដ្ឋមន្ត្រី​ត្រូវតែ​ប្រឹងប្រែង​ស្តារ​ស្ថានការណ៍​ស្រុកទេស​ឡើងវិញ​តាម​លក្ខខណ្ឌ​របស់​គណៈ​កម្ម​ការ​អឺរ៉ុប ប្រសិនបើ​មិន​ចង់​ជាប់​ឈ្មោះ​អាក្រក់​ក្នុង​ប្រវត្តិសាស្ត្រ​កម្ពុជា៖ «ប្រសិនបើ​ទៅ​ថ្ងៃ​អនាគត វា​អាច​រីក​រាលដាល​ធំ​ជាង​នេះ អ្នក​ដែល​ត្រូវ​ទទួលខុសត្រូវ​ធ្ងន់​ជាងគេ គឺ​លោកនាយក​រដ្ឋមន្ត្រី ហ៊ុន សែន​។ គាត់​នឹង​ទទួលខុសត្រូវ​ចំពោះ​មុខ​ប្រវត្តិសាស្ត្រ ហើយ​ចំពោះ​មុខ​ប្រជាជាតិ​ខ្មែរ​ទាំងមូល​។ គាត់​មិន​អាច​ទម្លាក់​ទៅលើ​អ្នកណា ឬក៏​បក្ស​ប្រឆាំង ឬក៏​ជន​ណាមួយ​ក្រៅពី​គាត់​បានទេ ព្រោះ​ប្រទេស​ខ្មែរ​ស្ថិត​នៅ​លើ​កណ្ដាប់​ដៃ​របស់​គាត់​។ បើ​និយាយ​ឱ្យ​ចំ​កូន​សោរ​ស្ថិត​នៅ​លើ​កណ្ដាប់​ដៃ​របស់​គាត់​ហើយ»

ដោយឡែក យុវជន​មួយ​រូប កញ្ញា យាន ស្រីយ៉ាន ថ្លែង​ថា សាច់ញាតិ​របស់​កញ្ញា​ជាច្រើន​នាក់​ដែល​ជា​កម្មករ​រោងចក្រ​កំពុង​ព្រួយបារម្ភ​អំពី​ការបាត់បង់​ការងារ និង​ប្រាក់ចំណូល បន្ទាប់ពី​គណៈកម្មការ​អឺរ៉ុប​សម្រេច​យកពន្ធ​២០% ពី​កម្ពុជា​។ កញ្ញា​ស្នើ​ឱ្យ​រដ្ឋាភិបាល​ពិចារណា​អនុវត្ត​តាម​លក្ខខណ្ឌ​របស់​សហភាព​អឺរ៉ុប ដើម្បី​រក្សា​ការ​អនុគ្រោះ​ពន្ធ EBA ដែល​នឹង​ជួយ​ឱ្យ​កម្មករ​មានការ​ងារ​ធ្វើ​បន្ត​ទៅ​ទៀត៖ «បើ​រដ្ឋាភិបាល​របស់​យើង​នៅតែ​ធ្វើ​អ៊ីចឹង​ទៀត គឺ​មានន័យថា រំលោភ​សិទ្ធិ​មនុស្ស​កាន់​តែ​ខ្លាំងៗ​ទៅ ហើយ​គឺ​គាត់​ដូច​ថា​អត់​ទុក​ឱ្យ​កាស​ឱ្យ​ប្រជាពលរដ្ឋ​រស់​ស្រួល ហើយ​កាលណា​ប្រព័ន្ធ EBA គេ​ផ្តាច់​ទៅ អ៊ីចឹង​ធ្វើ​ឱ្យ​ប្រជាពលរដ្ឋ​អត់​មានការ​ងារ​ធ្វើ ហើយ​គាត់​ក៏​ចំណាកស្រុក​ទៅ​ប្រទេស​ផ្សេងៗ​ក៏​ច្រើន​នាក់​ដែរ»

សហភាព​អឺរ៉ុប​បានសម្រេច​ដកហូត​ការ​អនុគ្រោះ​ពន្ធ​២០% ពី​កម្ពុជា កាលពី​ថ្ងៃ​ទី​១២ កុម្ភៈ កន្លងទៅ បន្ទាប់ពី​រក​ឃើញ​ការរំលោភ​សិទ្ធិមនុស្ស​ធ្ងន់ធ្ងរ និង​ជា​ប្រព័ន្ធ​នៅ​កម្ពុជា ហើយ​កំណត់ត្រា​អាក្រក់​នេះ មិន​ត្រូវ​បាន​រដ្ឋាភិបាល​លោក ហ៊ុន សែន កែ​លម្អ​នោះ​ឡើយ​។ សេចក្តី​សម្រេច​នេះ នឹង​ចូល​ជា​ធរមាននៅ​ថ្ងៃ​ទី​១២ ខែ​សីហា ខាងមុខ ប្រសិនបើ​គ្មាន​ការជំទាស់​ពី​សភា និង​ក្រុមប្រឹក្សា​អឺរ៉ុប​ទេ​នោះ​។ ពេល​នោះ កម្ពុជា​ត្រូវ​ជាប់​កាតព្វកិច្ច​ពន្ធ​ប្រមាណ​ជាជាង​១០០ លាន​ដុល្លារ​អាមេរិក​ចំពោះ​ទំនិញ​នាំទៅ​សហភាព​អឺរ៉ុប ដែល​ពី​មុន​មក កម្ពុជា​បាន​រួច​កាតព្វកិច្ច​ពន្ធ​ទាំងស្រុង​ចំនួន​ជិត ៧០០​លាន​ដុល្លារ។

ជុំវិញ​ការ​លើក​ឡើង​ពី​កង្វល់​ទាំងឡាយ​រឿង EBA និង​ការ​ស្នើ​ឱ្យ​ស្តារ​ស្ថានភាព​សិទ្ធិមនុស្ស​នេះ អ្នកនាំពាក្យ​បក្ស​កាន់អំណាច លោក សុខ ឥសាន ចាត់ទុកថា ជា​មតិ​ធ្វើឡើង​ក្នុង​ទិសដៅ​ប្រស់​ឱ្យ​គណបក្ស​សង្គ្រោះ​ជាតិ​រស់​ឡើងវិញ ដែល​លោក​ថា ផ្ទុយ​នឹង​ច្បាប់​កម្ពុជា​។ លោក​បញ្ជាក់​ថា ការបាត់បង់ EBA ត្រឹម ២០% មិន​ប៉ះពាល់​ធ្ងន់ធ្ងរ​ដល់​សេដ្ឋកិច្ច​កម្ពុជា​ឡើយ ហើយ​រដ្ឋាភិបាល​នៅតែ​អាច​ធានា​បាន​នូវ​អត្ថប្រយោជន៍​សម្រាប់​កម្មករ៖ «ការ​ចង់​បាន​ទាំងអស់​ហ្នឹងហើយ សុទ្ធតែ​ពាក់ព័ន្ធ​នឹង​បញ្ហា​ការ​យក​ច្បាប់​កម្ពុជា​ធ្វើជា​ល្បែង​ប្រជាធិបតេយ្យ យក​ច្បាប់​កម្ពុជា​ធ្វើជា​សិទ្ធិមនុស្ស ហើយ​យើង​យល់ថា បើ​លទ្ធិ​ប្រជាធិបតេយ្យ​នៅ​កម្ពុជា​ធ្លាក់​ចុះ ហើយ​សិទ្ធិមនុស្ស​មានការ​រំលោភ​ធ្ងន់ធ្ងរ កម្ពុជា​ក្លាយទៅជា​អ៊ីរ៉ាក់ អ៊ីរ៉ង់ ហើយ មិនមែន​សុខ​សន្តិភាព​បញ្ហា​ប៉ុណ្ណឹង​ទេ»

ផ្ទុយ​ពី​ការ​អះអាង​នេះ ក្រុម​សហជីព​ឯករាជ្យ​លើកឡើង​ថា កម្ពុជា​អាច​នឹង​បាត់បង់​ការ​អនុគ្រោះ​ពន្ធ​ច្រើនជាង​២០% ទៀត​នៅ​ថ្ងៃ​ខាងមុខ ប្រសិនបើ​រដ្ឋាភិបាល​លោក ហ៊ុន សែន មិន​ព្រម​កែ​លម្អ​ស្ថានភាព​សិទ្ធិមនុស្ស​តាម​ការ​ទាមទារ​របស់​គណៈកម្មការ​អឺរ៉ុប​ទេ​នោះ​។ ជាមួយ​គ្នា​នេះ ពួកគេ​ថា ផល​ប៉ះពាល់​អាច​មាន​ទំហំ​ធំធេង​ជាង​នេះ​ទៅ​ទៀត ប្រសិនបើ​ក្រុមហ៊ុន​របស់​បស្ចិម​លោក​កាត់បន្ថយ ឬ​ផ្អាក​ការ​បញ្ជា​ទិញ​ទំនិញ​ពី​កម្ពុជា ដោយសារតែ​កំណត់ត្រា​អាក្រក់​ផ្នែក​សិទ្ធិមនុស្ស​នេះ។

ក្រោយ​សេចក្តី​សម្រេច​របស់ សហភាព​អឺរ៉ុប​មក ក្រុមហ៊ុន​ម៉ាក​យីហោ​ជាង​៦០ ហើយ​និង​ក្រុមហ៊ុន​សំលៀកបំពាក់​លំដាប់​ពិភពលោក H&M បាន​ចេញ​សេចក្តី​ថ្លែងការណ៍​ជា​បន្តបន្ទាប់ គាំទ្រ​វិធានការ​របស់​សហភាព​អឺរ៉ុប​លើ​កម្ពុជា ដែល​ធ្វើឡើង​ក្នុង​គោលដៅ​ប្រឆាំង​តបត​នឹង​ទង្វើ​រំលោភ​សិទ្ធិ​មនុស្ស​ធ្ងន់ធ្ងរ​។ ក្រុមហ៊ុន​ទាំងនោះ បាន​ជំរុញ​ឱ្យ​រដ្ឋាភិបាល​លោក ហ៊ុន សែន បំពេញ​ទៅតាម​លក្ខខណ្ឌ​របស់​គណៈកម្មការ​អឺរ៉ុប ដើម្បី​ឱ្យ​អឺរ៉ុប​ផ្លាស់ប្ដូរ​ការសម្រេចចិត្ត​របស់​ខ្លួន​វិញ ស្រប​ទៅ​តាម​បទបញ្ញត្តិ​ស្ដីពី​ការ​អនុគ្រោះ​ពន្ធ​ទូទៅ​។ លក្ខខណ្ឌ​ទាំងនោះ រួមមាន ការ​កែ​លម្អ​ទង្វើ​រំលោភបំពាន​ធ្ងន់ធ្ងរ​ផ្ទុយ​ពី​កតិកាសញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​សិទ្ធិ​នយោបាយ ព្រមទាំង​ការ​លើកស្ទួយ​សិទ្ធិ​ការងារ​ឱ្យ​ស្រប​ទៅតាម​បទដ្ឋាន​របស់​អង្គការ​អន្តរជាតិ​ខាង​ការងារ (ILO)​។ ពួកគេ​ព្រមាន​ថា ប្រសិនបើ​ស្ថានភាព​អាក្រក់​នេះ​មិន​ត្រូវ​បាន​កែ​លម្អ​ទេ ហើយ EBA ត្រូវ​បាត់បង់​មែន នោះ​វា​នឹង​ប៉ះពាល់​ធ្ងន់ធ្ងរ​ដល់​សេដ្ឋកិច្ច និង​សង្គម​កម្ពុជា ជាពិសេស​គឺ​ប៉ះពាល់​ដល់​ទំនុក​ចិត្ត​នៃ​ការ​វិនិយោគ​របស់​ពួកគេ​នៅ​ប្រទេស​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល