កម្មករអូសរទេះនៅក្រុងប៉ោយប៉ែត ចោទមន្ត្រីគយថា មិនឲ្យពួកគេរកស៊ីឈ្នួល ដឹកទំនិញនៅតំបន់ព្រំដែន ខេត្តបន្ទាយមានជ័យ។ ការលើកឡើងរបស់ពលរដ្ឋនេះ ដោយសារតែមន្ត្រីគយច្រកទ្វារព្រំដែនក្រុងប៉ោយប៉ែត ហាមឃាត់ពលរដ្ឋមិនឱ្យអូសរទេះដឹកទំនិញ ដោយតម្រូវឱ្យពួកគេដឹកទំនិញតាមរថយន្តជំនួសវិញ និងចាប់ទំនិញរបស់ជនពិការម្នាក់។ មន្ត្រីសង្គមស៊ីវិល យល់ឃើញថា មន្ត្រីគយច្រកទ្វារព្រំដែន និងអាជ្ញាធរពាក់ព័ន្ធគួរតែបន្ធូរបន្ថយដល់ពលរដ្ឋក្រីក្រ ដើម្បីឱ្យពួកគាត់មានការងារធ្វើ និងរកប្រាក់ចំណូលដោះស្រាយជីវភាព។
កម្មករអូសរទេះដឹកទំនិញ នៅច្រកទ្វារព្រំដែនអន្តរជាតិប៉ោយប៉ែតស្នើឱ្យអាជ្ញាធរពាក់ព័ន្ធអនុញ្ញាតឱ្យពួកគេអូសរទេះដឹកទំនិញដូចដើមឡើងវិញ ដើម្បីរកប្រាក់ចំណូលដោះស្រាយជីវភាពគ្រួសារ។ ពួកគាត់លើកឡើងថា មន្ត្រីគយនៅច្រកព្រំដែនហាមឃាត់មិនឱ្យអូសរទេះដឹកទំនិញ ធ្វើឱ្យពួកគាត់បាត់បង់ប្រភពចំណូល និងជួបទុក្ខលំបាកក្នុងជីវភាព ។
កម្មករអូសរទេះ ដឹកជញ្ជូនទំនិញដែលជាជនពិការជើងឆ្វេងម្នាក់នៅក្រុងប៉ោយប៉ែត លោក ពៅ ចន ប្រាប់វិទ្យុអាស៊ីសេរីនៅថ្ងៃទី២៦ កញ្ញា ថា គ្រួសារលោកមានជីវភាពខ្វះខាត ហើយប្រកបរបរលក់ដក់ដឿ និងចង្រិតលក់ឱ្យអ្នកបំពងលក់គ្រាន់បានប្រាក់ ដើម្បីដោះស្រាយជីវភាពគ្រួសារជាប្រចាំ។ លោកបន្តថា មន្ត្រីគយប្រចាំការនៅច្រកទ្វារព្រំដែន បានចាប់ចង្រិត និងដក់ដឿរបស់លោក ដែលដឹកចេញតាមច្រក និងបាននាំខ្លួនលោកទៅធ្វើកិច្ចសន្យាមិនឱ្យដឹកជញ្ជូនទៀតឡើយ ដែលធ្វើឱ្យចង្រិត និងដក់ដឿរបស់លោកខូចអស់។ លោក ពៅ ចន បន្ថែមថា ច្រកប៉ោយប៉ែត តាំងពីបើកច្រកមក គឺពិបាកធ្វើការងាររកប្រាក់ចំណូលដោះស្រាយជីវភាព ដោយសារតែអាជ្ញាធរនៅតំបន់ព្រំដែនគាបសង្កត់ពលរដ្ឋក្រីក្រដឹកទំនិញបន្តិចបន្តួច៖ «គាត់ចាប់ដក់ដឿខ្ញុំ ចាប់ចង្រិតខ្ញុំ ដឹក១ ជើង២ ជើងគាត់ឱ្យមែន ដល់ពេលចុងក្រោយគាត់លែងឱ្យ លែងឱ្យយើងដឹក លែងឱ្យយើងរកស៊ី។ ម៉្លោះហើយខ្ញុំថា បើអត់ឱ្យខ្ញុំរកស៊ីមានពីណាចិញ្ចឹមប្រពន្ធកូនខ្ញុំ ហើយខ្ញុំពិការជរា រកស៊ីបន្តិចបន្តួច លោកឯងបិទសិទ្ធិមិនឱ្យខ្ញុំរកស៊ី។ ដល់ពេលដឹកមកជើងទី២គេចាប់ខ្ញុំបណ្ដោយ ជើងទី១គេអោយទៅ ចាប់មិនឱ្យយើងដឹកតែម្ដង បិទមិនឱ្យយើងរកស៊ីតែម្ដងផ្លូវហ្នឹង។ អារឿងល្ពៅចេះតែខុសហើយ ដក់ដឿចង្រិតសោះ គេថា គេអត់ខុស ស្អីក៏ខុសៗ ស្អីក៏ចាប់ៗ ពិបាកណាស់បងអើយ អាកន្លែងហ្នឹង ស្រេចតែគេថា បើគេអ្នកខាងជំនាញហ្នឹងហើយ»។
វិទ្យុអាស៊ីសេរីមិនអាចទាក់ទង ប្រធានការិយាល័យគយ និងរដ្ឋាករច្រកប៉ោយប៉ែត លោក ងួន កុសល និងអភិបាលក្រុងប៉ោយប៉ែត លោក គាត់ ហ៊ុល ដើម្បីអត្ថាធិប្បាយជុំវិញរឿងនេះបានទេ ថ្ងៃទី២៦ កញ្ញា ដោយទូរស័ព្ទចូលគ្មានអ្នកទទួល។ ប៉ុន្តែមន្ត្រីគយ ធ្លាប់ប្រាប់សារព័ត៌មានក្នុងស្រុកចោទប្រជាពលរដ្ឋថា មូលហេតុដែលហាមឃាត់ពលរដ្ឋស៊ីឈ្នួលដឹកទំនិញ ដោយសារពួកគេលួចបង្កប់ទំនិញហាមឃាត់។
ទោះបីជាយ៉ាងនេះក្ដី លោក ពៅ ចន បានបដិសេធថា លោក និងកម្មករអូសរទេះផ្សេងទៀត មិនបានបង្កប់ទំនិញហាមឃាត់ដូចការចោទប្រកាន់របស់អាជ្ញាធរឡើយ។ លោកបញ្ជាក់ថា ពួកលោក គ្រាន់តែដឹកចង្រិត និងដក់ដឿ ដើម្បីលក់រកប្រាក់ចំណូលដោះស្រាយជីវភាពតែប៉ុណ្ណោះ។
ជុំវិញរឿងនេះ ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ លោក វ៉ន ពៅ យល់ឃើញថា អាជ្ញាធរនៅតាមច្រកព្រំដែន និងអភិបាលខេត្តទទួលបន្ទុក គួរតែសម្រួលដល់ពលរដ្ឋក្រីក្រ ដែលប្រកបរបរអូសរទេះ និងដឹកឥវ៉ាន់បន្តិចបន្តួច ដើម្បីឱ្យពួកគាត់អាចរកប្រាក់ ដោះស្រាយជីវភាពប្រចាំថ្ងៃ។ លោកបន្តថា ពលរដ្ឋក្រីក្រគ្មានលទ្ធភាពទិញឡាន ឬដឹកជញ្ជូនតាមឡានឡើយ ហើយមន្ត្រីគយ មិនគួរផ្ដាច់សេដ្ឋកិច្ចពលរដ្ឋ ដោយមិនខ្វល់ពីទុក្ខលំបាកពលរដ្ឋ និងអត្ថប្រយោជន៍ជីវភាពកម្មករនោះឡើយ។ លោកបន្ថែមថា ការដែលឈ្មួញយកឡានធំៗ ដឹកទំនិញជាការ មិនបានផ្ដល់ឱកាសដល់ពលរដ្ឋ ហើយស្នើលោកឱ្យអាជ្ញាធរពិនិត្យឡើងវិញពីការដឹកទំនិញរបស់រថយន្តថៃ ដោយដាក់ទំនិញ ត្រឹមព្រំដែន ដើម្បីពលរដ្ឋក្រីក្រមានឱកាសដឹកទំនិញរកប្រាក់ចំណូលបាន៖ «ទី១ គឺរដ្ឋត្រូវតែពិនិត្យមើលសម្រាប់ឱកាសមន្ត្រីពុករលួយមួយចំនួននៅតាមច្រកបណ្ដោយទ្វារព្រំដែនហ្នឹង ដែលយកឱកាសនៃការបើកទ្វារឡើងវិញ គឺប្រព្រឹត្តអំពើពុករលួយ។ ទី២ គឺ រឿងរ៉ាវនៅតាមព្រំដែនជាច្រើន ត្រូវពិនិត្យឡើងវិញ ត្រូវផ្តល់ឱកាសឱ្យព័ត៌មានទាំងអស់ បើកទូលាយក្នុងការយកព័ត៌មាន ហើយមួយទៀត ទាក់ទងទៅនឹងបណ្ដាញព័ត៌មាននៅតាមព្រំដែន ក៏មួយចំនួន ត្រូវបានបិទព័ត៌មានដែរ។ ទី៣ គឺរដ្ឋត្រូវពិនិត្យមើលថា តើស្ថានភាពនៅតាមព្រំដែន ការឃុបឃិតរបស់មន្ត្រីពុករលួយហ្នឹងយ៉ាងណា ហើយត្រូវពិនិត្យមើលមន្ត្រីទាំងអស់ហ្នឹង ថាតើ កម្រិតនៃការធ្វើការហ្នឹង មន្ត្រីហ្នឹងបានយកចិត្តទុកដាក់ទៅលើប្រជាពលរដ្ឋ ជាពិសេស ទាក់ទងទៅនឹងអំពើពុករលួយនៅតាមច្រកទ្វារហ្នឹងផងដែរ បើសិនជានៅតែបណ្ដែតបណ្ដោយទេ អារឿងដដែល គឺនៅតែជាដដែល»។
កាលពីថ្ងៃទី២១កញ្ញា កម្មករអូសរទេះនៅច្រកទ្វារអន្តរជាតិប៉ោយប៉ែត បាននាំគ្នាតវ៉ាជាមួយក្រុមសមត្ថកិច្ចគយ ដែលឈរនៅប្រចាំការទីនោះ ដោយ ពួកគេចោទមន្ត្រីគយថា ចាប់ពួកគេមិនឱ្យអូសរទេះដឹកឥវ៉ាន់នោះទេ កម្មករអូសរទេះលើកឡើងថា ខាងមន្ត្រីគយតម្រូវឲ្យឈ្មួញកណ្ដាលដឹកទំនិញតាមរថយន្តវិញ ដែលមានការបង់លុយដល់មន្ត្រីគយ ប៉ុន្តែពួកគេមិនព្រម ព្រោះធ្វើឱ្យបាត់បង់មុខរបរអូសរទេះចិញ្ចឹមជីវិតរបស់កម្មករ។
អាជ្ញាធរកម្ពុជា និងថៃបានឯកភាពគ្នាបើកច្រកទ្វារព្រំដែនប្រទេសទាំងពីរឡើងវិញ កាលពីថ្ងៃទី១ ឧសភាកន្លងទៅ ប៉ុន្តែការបើកច្រកនេះ ដោយច្រកទ្វារព្រំដែនស្ទើរតែគ្រប់កន្លែងអាជ្ញាធរថៃបានហាមឃាត់ពលរដ្ឋខ្មែរមិនឱ្យចូលទៅអូសរទេះឆ្លងកាត់ព្រំដែន ឬទៅប្រកបរបរនៅខាងទឹកដីថៃបានដូចពេលមុនឡើយ។
ប្រជាពលរដ្ឋ និងមន្ត្រីសង្គមស៊ីវិល អំពាវនាវដល់រដ្ឋាភិបាល និងក្រសួងស្ថាប័នពាក់ព័ន្ធថា គួរពិនិត្យ បើកទូលាយព័ត៌មាននៅតាមព្រំដែន ដើម្បីសិក្សារកយន្តការដោះស្រាយបញ្ហានេះជូនពលរដ្ឋ ហើយចៀសវាងនាំឱ្យមានពលរដ្ឋចំណាកស្រុក និងវិបត្តិពលរដ្ឋគ្មានការងារធ្វើនៅតាមព្រំដែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។