ពលករ​ខ្មែរ​នៅ​ប្រទេស​ជប៉ុន និង​កូរ៉េ​ខាង​ត្បូង​ថា រដ្ឋាភិបាល​ជា​អ្នក​ធ្វើ​ឲ្យ​ខូច​ប្រយោជន៍​ជាតិ ក្រោយ​ត្រូវ​សហភាព​អឺរ៉ុប​ដក​ប្រព័ន្ធ​អនុគ្រោះ​ពន្ធ EBA ២០% ពី​កម្ពុជា

ដោយ អាស៊ីសេរី
2020-02-13
អ៊ីម៉ែល
មតិ
Share
បោះពុម្ព
កម្ពុជា​បាត់បង់ភាព​អនុគ្រោះ​ពន្ធ​ពី​សហភាព​អឺរ៉ុប ២០ភាគរយ។
កម្ពុជា​បាត់បង់ភាព​អនុគ្រោះ​ពន្ធ​ពី​សហភាព​អឺរ៉ុប ២០ភាគរយ។
Photo: RFA

ពលករ​ខ្មែរ​នៅ​ប្រទេស​ជប៉ុន និង​កូរ៉េ​ខាង​ត្បូង​ស្ដី​បន្ទោស​រដ្ឋាភិបាល​របស់​លោក ហ៊ុន សែន ករណី​ទណ្ឌកម្ម​របស់​សហភាព​អឺរ៉ុប។ ពួក​គេ​ជំរុញ​ទៅ​រដ្ឋាភិបាល​ឱ្យ​គិតគូរ​ឡើង​វិញ​តាម​សំណើ​របស់​សហភាព​អឺរុប ក្នុង​រយៈ​ពេល ៦ខែ​ទៀត​មុន​ទណ្ឌកម្ម​នេះ​ចូល​ជា​ធរមាន។

ពលករ​នៅ​ប្រទេស​កូរ៉េ​ខាង​ត្បូង និង​ជា​អ្នក​គាំទ្រ​គណបក្ស​សង្គ្រោះ​ជាតិ​ម្នាក់​លោក ម៉ាត់ វណ្ណនី យល់​ថា ទណ្ឌកម្ម​របស់​សហភាព​អឺរ៉ុប​បែប​នេះ គឺ​ធ្វើ​ឲ្យ​ប៉ះពាល់​ដល់​កម្មករ​ និង​អ្នក​ធ្វើ​ការងារ​ទាក់ទង​វិស័យ​នេះ ព្រម​ទាំង​សាច់​ញាតិ​របស់​កម្មករ​ផង។ លោក​បន្ត​ថា ទោះ​លោក​ជា​ពលករ​នៅ​ក្រៅ​ប្រទេស ដែល​មិន​រង​គ្រោះ ព្រោះ​បញ្ហា​នេះ​ក្តី ប៉ុន្តែ​លោក​ថា លោក​ឈឺ​ចិត្ត​អាណិត​ពលរដ្ឋ​ខ្មែរ​ដូច​គ្នា ដែល​រង​ការ​ប៉ះពាល់​ព្រោះ​បញ្ហា​នេះ៖ «»

ស្រដៀង​គ្នា​នេះ​ដែរ ពលរដ្ឋ​ខ្មែរ​រស់នៅ​ប្រទេស​ជប៉ុន​ម្នាក់​លោកស្រី សៀ ណៃគួយ លោក​ស្រី​យល់​ថា បញ្ហា​របស់​កម្មករ​នេះ គឺ​មក​ពី​រដ្ឋាភិបាល​លោក ហ៊ុន សែន ដែល​មិន​ព្រម​ស្ដាប់​តាម​ការ​ទាមទារ​របស់​សហភាព​អឺរ៉ុប។ លោក​ស្រី​បន្ត​ថា ស្ថានភាព​របស់​កម្មករ​កម្មការិនី​នៅ​កម្ពុជា​សព្វថ្ងៃ​កំពុង​ជួប​ការ​លំបាក​ស្រាប់​ទៅ​ហើយ ដូច្នេះ​បញ្ហា​នេះ​នឹង​ធ្វើ​ឲ្យ​កម្មករ​រឹត​តែ​ក្រ​ថែម​ទៀត៖ «»

ជុំវិញ​កង្វល់ និង​ការ​លើក​ឡើង​របស់​ពលករ​ខ្មែរ​នៅ​ក្រៅ​ប្រទេស​បែប​នេះ អាស៊ី​សេរី​មិន​អាច​សុំការ​ឆ្លើយ​តប​ពី​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន បានទេ នៅថ្ងៃទី១៣ ខែ​កុម្ភៈ ដោយ​ទូរស័ព្ទ​ចូល​គ្មាន​អ្នក​ទទួល។ ប៉ុន្តែ​អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន អះអាង​ថា ការ​សម្រេច​ដក​ប្រព័ន្ធ​អនុគ្រោះ​ពន្ធ​នេះ​មិន​ប៉ះ​ពាល់​សេដ្ឋកិច្ច​កម្ពុជា​ទេ។

ប្រធាន​ចលនា​យុវជន​សង្គ្រោះ​ជាតិ​នៅ​ប្រទេស​ជប៉ុន​ លោក ហៃ វណ្ណា យល់ថា ការ​ដែល​សហភាព​អឺរ៉ុប​ដក​ប្រព័ន្ធ​អនុគ្រោះ​​ពន្ធ​ត្រឹម ២០ភាគ​រយ​ពី​កម្ពុជា​នេះ គឺ​គ្រាន់​តែ​ជា​ការ​ចាប់​ផ្តើម​ប៉ុណ្ណោះ។ លោក​បន្ត​ថា បើ​រដ្ឋាភិបាល​នៅ​តែ​រឹងរូស​មិន​ធ្វើ​តាម​សំណើ​របស់​សហភាព​អឺរ៉ុប គឺ​កម្ពុជា​អាច​នឹង​បាត់បង់​ប្រព័ន្ធ​អនុគ្រោះ​ពន្ធ EBA ពី​អឺរ៉ុប​ទាំង​អស់​តែ​ម្ដង៖ «»

លោក ហៃ វណ្ណា ដែល​តែងតែ​ដឹក​នាំ​ធ្វើ​បាតុកម្ម​នៅ​ក្រៅ​ប្រទេស​ប្រឆាំង​រដ្ឋាភិបាល​ថា ពេល​នេះ​ក្រុម​លោក​កំពុង​ប្រជុំ​ផ្ទៃ​ក្នុង ដើម្បី​រិះរក​មធ្យោបាយ​ទាមទារ​ដាក់​សម្ពាធ​ទៅ​លើ​រដ្ឋាភិបាល​លោក ហ៊ុន សែន ដើម្បី​ឲ្យ​ងាក​មក​ស្ដារ​សិទ្ធិ​មនុស្ស និង​ប្រជាធិបតេយ្យ​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល