ប្រជាសហគមន៍ យុវជន និងព្រះសង្ឃ ដែលជាសកម្មជនការពារបរិស្ថានតំបន់អារ៉ែង ព្រមានធ្វើបាតុកម្ម បើសិនជាគ្មានដំណោះស្រាយពិតប្រាកដណាមួយ ក្នុងការការពារតំបន់ធម្មជាតិចុងក្រោយនេះទេនោះ។
ការព្រមាននេះ ធ្វើឡើងក្នុងសន្និសីទសារព័ត៌មានមួយនារាជធានីភ្នំពេញ នៅព្រឹកថ្ងៃទី៣១ ធ្នូ ស្ដីពីស្ថានការណ៍កាន់តែតានតឹងនៅក្នុងតំបន់អារ៉ែង និងគោលជំហររបស់សហគមន៍ ព្រមទាំងសកម្មជនព្រៃឈើក្នុងការការពារតំបន់នេះ។
សមាជិកនៃអង្គការមាតាធម្មជាតិ លោក ឌឹម គុណឌី រំឭកនូវសម្ដីរបស់មេបក្សប្រឆាំង លោក សម រង្ស៊ី ដែលបានដកស្រង់ប្រសាសន៍លោកនាយករដ្ឋមន្ត្រី ហ៊ុន សែន ថានឹងមិនមានការសាងសង់ទំនប់វារីអគ្គិសនីឆាយអារ៉ែង ក្នុងអាណត្តិនេះទេ គឺទុកឲ្យមនុស្សជំនាន់ក្រោយជាអ្នកសម្រេច៖ «អ៊ីចឹងយើងចង់ឲ្យគាត់បំភ្លឺ មានទឡ្ហីករណ៍ច្បាស់លាស់ មានលាយលក្ខណ៍អក្សរពីសម្ដេចនាយក ថាទំនប់នេះ គឺគេមិនធ្វើក្នុងអាណត្តិនេះផងដែរ»។
នៅថ្ងៃទី៣១ ធ្នូ ដែរ ប្រជាសហគមន៍ និងសកម្មជនប្រមាណ ៥០នាក់ បានចាប់ផ្ដើមប្រមូលផ្ដុំនៅតំបន់អារ៉ែង ដើម្បីរារាំង និងបណ្ដេញក្រុមហ៊ុន សាវ៉ាក់ (SAWAC) រួមទាំងកងកម្លាំងប្រដាប់អាវុធមួយចំនួនផងចេញពីតំបន់នោះ ព្រោះពួកគេយល់ថា ក្រុមហ៊ុន សាវ៉ាក់ ដែលវាយតម្លៃហេតុប៉ះពាល់បរិស្ថានដោយគម្រោងស្ថាបនាទំនប់វារីអគ្គិសនីឆាយអារ៉ែង មិនឯករាជ្យ និងគ្មានតម្លាភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។