អ្នក​ទីរួមខេត្ត​កោះកុង​កំពុង​ប្រឈម​ការ​ខ្វះ​ខាត​ទឹក​ប្រើប្រាស់​ធ្ងន់ធ្ងរ​នៅ​រដូវ​ប្រាំង​ឆ្នាំ​នេះ

ដោយ សេក បណ្ឌិត
2019-04-01
អ៊ីម៉ែល
មតិ
Share
បោះពុម្ព
ស្ពាន​ខេត្ត​កោះកុង។
ស្ពាន​ខេត្ត​កោះកុង។
RFA

ពលរដ្ឋ រស់​នៅ​ក្រុង​ខេមរភូមិន្ទ ​​ខេត្ត​កោះកុង ប្រឈម​នឹង​បញ្ហា​ទឹក​ប្រើប្រាស់​ធ្ងន់ធ្ងរ​នៅ​ក្នុង​រដូវ​ប្រាំង​ឆ្នាំ​នេះ ខណៈ​អាជ្ញាធរ ខេត្ត​កំពុង​ចរចា​ទិញ​ទឹក​ពី​ប្រទេស​ថៃ ដើម្បី​ផ្គត់ផ្គង់​បន្ថែម។

ព្រះ​សង្ឃ​មាន​ថេរៈដីកា​ឱ្យ​ដឹង​ថា នៅ​​តាម​វត្ត​អារាម​ខ្លះ ​​ក៏​កំពុង​ខ្វះ​ខាត​ទឹក​ប្រើប្រាស់​ដែរ ប៉ុន្តែ​នៅ​មាន​ទឹក​ស្រះ​ខ្លះ​​មិន​ទាន់​រីង​ហួត​អស់ អាច​សន្សំ​ប្រើ​បាន​តិចតួច​ប៉ុណ្ណោះ។ អាជ្ញាធរ​ខេត្ត​កោះកុង ​​ឱ្យ​ពលរដ្ឋ​រាយការណ៍ ​ជូន​អាជ្ញាធរ​មូលដ្ឋាន​ផ្ទាល់​ ដើម្បី​​ឱ្យ​ដឹង​ពី​​ទីតាំង​ខ្វះខាត​ពិត​ប្រាកដ ងាយស្រួល​អាជ្ញាធរ​ ដឹក​ទឹក​យក​ទៅ​ចែក​ជូន​ពលរដ្ឋ។

អាជីវករ​លក់​បាយ និង​ម្ហូប ​​នៅ​សង្កាត់​ស្ទឹងវែង ក្រុង​ខេមរភូមិន្ទ លោក ស្រី ស៊ាវ ម៉ី រៀប​រាប់​ថា រូប​គាត់​​មាន​ឱកាស​​ទទួល​បាន​ទឹក​ប្រើប្រាស់​តាម​ប្រព័ន្ធ​ទុយយោ​​រដ្ឋ​ បាន​ប្រហែល ៣​ទៅ​៥ម៉ោង​ប៉ុណ្ណោះ ក្នុង​មួយ​សប្ដាហ៍  ក៏​ប៉ុន្តែ​ទឹក​នោះ​ហូរ​មក​តិចៗ ដោយ​អាច​ត្រង​សន្សំ​បាន​ត្រឹម​តែ ៣​ធុង​ធំ​ សម្រាប់​ប្រើ​បាន​មួយ​សប្ដាហ៍។

អ្នកស្រី​ថា ដោយសារ​ខ្វះទឹក​ប្រើប្រាស់ អាជីវករ ត្រូវ​បង្ខំ​ ទិញ​ទឹក​សុទ្ធ​ធុង​ធំ ចំណុះ​២០​លីត្រ ​យក​មក​​ប្រើប្រាស់​បន្ថែម៖ «និយាយ​ទៅ ពិបាក​តែ​ម្ដង​រឿង​ទឹក ហើយ​ខ្ញុំ​អត់​សូវ​ហ៊ាន​ប្រើ​ទឹក​បឹង។ និយាយ​ទៅ​មិន​ដែល​ប្រើ​តែ​ម្ដង ទិញ​តែ​ទឹក​កាដុង (ទឹក​សុទ្ធ) មក​ចម្អិន​អាហារ»ក្រសួង​ធនធាន​ទឹក និង​ឧតុនិយម​ បាន​​ជូន​ដំណឹង​ថា ខេត្ត​​ស្ទើរ​ទូទាំង​ប្រទេស​ នឹង​ប្រឈម​​បញ្ហា​​ខ្វះ​ខាត​ទឹក​ប្រើប្រាស់​ខ្លាំង នៅ​ក្នុង​រដូវប្រាំង ​ឆ្នាំ​២០១៩ ដោយសារ​បាតុភូត​អាកាសធាតុ(El Nino)​​ ឡើង​កម្ដៅ។ តំបន់​ខ្លះ​នៃ​ខេត្ត​ប្រមាណ៩ ដែល​កំពុង​ខ្វះខាត​ទឹក​ប្រើប្រាស់​ខ្លាំង​ជាង​គេ​នោះ គឺ​ខេត្ត​បាត់ដំបង បន្ទាយមានជ័យ ឧត្តរមានជ័យ កំពង់ធំ ព្រៃវែង ព្រះវិហារ ប៉ៃលិន មណ្ឌលគិរី និង​ខេត្ត​កោះកុង។ អាជ្ញាធរ​តាម​ខេត្ត​ទាំង​នោះ បាន​ដឹក​ទឹក​តាម​រថយន្ត​បំពាក់​ស៊ីទែន​ធំៗ ផ្គត់ផ្គង់​ឱ្យ​ពលរដ្ឋ​ នៅ​​តាម​មូលដ្ឋាន​ តាំង​ពី​ដើម​ខែ​មករា ឆ្នាំ​២០១៩។

ព្រះសង្ឃ នៅ​ខេត្ត​កោះកុង​មួយ​អង្គ​ មាន​ថេរៈដីកា​ថា វត្ត​​ជាច្រើន​ទូទាំង​ខេត្ត​ កោះកុង ក៏​​​កំពុង​ប្រឈម​បញ្ហា​ទឹក​ប្រើ​ប្រាស់​ដែរ​។ ចំណែក​ស្ថានភាព​វត្ត​ ក្នុង​ក្រុង​ខេមរភូមិន្ទ​​ខ្លះ​ អាច​ដោះស្រាយ​ទឹក​ប្រើប្រាស់​បាន​ខ្លះ តាម​រយៈ​ទឹក​ស្រះ ក្នុង​វត្ត​ដែល​មិន​ទាន់​រីង​ស្ងួត និង​មាន​ពុទ្ធបរិស័ទ និង​អាជ្ញាធរ​ប្រគេន​ខ្លះ៖ «ក្រៅ​ពី​ហ្នឹង មាន​អាជ្ញាធរ​គាត់​បាន​ជួយ​សម្រួល​បាន​ខ្លះៗ​ដែរ។ អាជ្ញាធរ​គាត់​បាន​យក​មក​ប្រគេន​ដែរ»

​​ក្រសួង​ធនធាន​ទឹក បង្ហាញ​ព័ត៌មាន​លើ​គេហទំព័រ​ហ្វេសប៊ុក (Facebook) របស់​ខ្លួន​នៅ​អំឡុង​ចុង​ខែ​មីនា​ ថា តំបន់​មួយ​ចំនួន​ ក្នុង​ខេត្ត​ជា​ច្រើន ដែល​ធ្លាប់​ខ្វះ​ខាត​ទឹក​ប្រើប្រាស់​កន្លង​មក​នោះ​ មាន​ភ្លៀង​ធ្លាក់​ខ្លះ​ហើយ ថែម​ទាំង​មាន​ខ្យល់​កន្ត្រាក់​មក​ជាមួយ វាយ​រំលំ​ផ្ទះ​ពលរដ្ឋ​ថែម​​ទៀត  ប៉ុន្តែ​នៅ​ខេត្ត​កោះកុង មិន​ទាន់​​មាន​ភ្លៀង​ធ្លាក់​នៅ​ឡើយ​ទេ។

អ្នក​ដឹក​ទឹក​លក់ នៅ​ខេត្ត​កោះកុង លោក កែត ចាន់ឌី ប្រាប់​ថា អ្នក​ដែល​មាន​ឡាន​ដឹក​ទឹក ​នាំគ្នា ដឹក​ទឹក​លក់​តាម​ភូមិ ទូទាំង​ខេត្ត​កោះកុង ដោយ​កន្លែង​ខ្លះ​រក​ទឹក​ផ្គត់ផ្គង់​ស្ទើរ​មិន​គ្រប់​តាម​តម្រូវ​ការ​នោះ​ឡើយ។

លោក​ថា ​រដូវ​ប្រាំង​រៀង​រាល់​ឆ្នាំ​ ពួកគាត់​ ក៏​បាន​ដឹក​ទឹក​លក់​​​តាម​តំបន់​ខ្លះ​ដែរ តែ​សម្រាប់​ឆ្នាំ​នេះ ពលរដ្ឋ​ត្រូវ​ការ​ទឹក​ទូទាំង​ខេត្ត​កោះកុង​តែម្តង។

អ្នក​ដឹក​ទឹក​លក់​រូប​នេះ រៀបរាប់​ថា ក្នុង​មួយ​ថ្ងៃ លោក​មាន​លទ្ធភាព​ដឹក​ទឹក​បាន​៥ឡាន បូម​ចេញ​ពី​​អណ្ដូង យក​ទៅ​លក់​ឱ្យ​ពលរដ្ឋ​ក្នុង​តម្លៃ ៦ម៉ឺន ទៅ​៨​ម៉ឺន​រៀល ក្នុង​មួយ​ឡាន ដែល​មាន​ទឹក​ប្រហែល​៥​ពាន់​គីប។ លោក​​បន្ត​ថា ពលរដ្ឋ​ខ្លះ ទិញ​ម្ដង​មួយ​ឡាន សម្រាប់​ប្រើប្រាស់​ពីរ​ ទៅ​បី គ្រួសារ និង​ពេល​ខ្លះ មាន​ពលរដ្ឋ ​ទិញ​ទឹក ដើម្បី​ប្រគេន​ព្រះសង្ឃ​តាម​វត្ត។ លោក បន្ត​ទៀត​ថា ទឹក​ដែល​ដឹក​លក់​ឱ្យ​ពលរដ្ឋ មិន​មាន​​ការ​បម្លែង បង់​ថ្នាំ​ ឬ​កូរ​សាច់ជូរ​ធ្វើ​ឱ្យ​ទឹកថ្លា ​អ្វី​ទាំង​អស់ តែ​ជា​ទឹក​ស្អាត ​ដែល​បូម​ចេញ​ពី​​ក្នុង​អណ្ដូង។ ចំណែក​ស្ថាប័ន​រដ្ឋ​ខ្លះ​ ក៏​ទិញ​ទឹក​ ដើម្បី​ឱ្យ​ដឹក​យក​ទៅ​ចែក​ជូន​ពលរដ្ឋ​តាម​មូលដ្ឋាន​ដែរ៖ «កន្លែង​ទុយយោ​អត់​ដល់ ជាក់​ស្ដែង​វា​ផ្គត់​ផ្គង​អត់​គ្រាន់​ អ៊ីចឹង​ណា​បង។ អ៊ីចឹង គាត់​ហៅ​ឡាន​ទឹក​ទៅ​ផ្គត់ផ្គង់​ឱ្យ​គាត់»

ខេត្ត​កោះកុង គ្មាន​ទន្លេ​ទេ។ ចំណែក​ស្ទឹង និង​ព្រែក​ទឹក​សាប​ខ្លះ ពលរដ្ឋ​ឱ្យ​ដឹង​ថា បាន​រីង​ស្ងួត​អស់​ទៅ​ហើយ។

អភិបាល​ខេត្ត​កោះកុង អ្នកស្រី មិថុនា ភូថង ស្នើ​សុំ​ពលរដ្ឋ​យោគយល់ ព្រោះ​តែ​ប្រភព​ទឹក​ ក្នុង​ខេត្ត​ ត្រូវ​រីង​ស្ងួត​​ហួត ​ទៅ​តាម​អាកាស​ធាតុ។ អភិបាល​ខេត្ត​រូប​នេះ ប្រាប់​ឱ្យ​ពលរដ្ឋ​ រាយការណ៍​ ទៅ​អាជ្ញាធរ​មូលដ្ឋាន ដើម្បី​ស្នើ​សុំ​ទឹក ហើយ​អាជ្ញាធរ ​នឹង​រៀប​ចំ​ដឹក​ជញ្ជូន​ ទៅ​ចែក​ជូន​ពលរដ្ឋ។

អ្នកស្រី​ប្រាប់​អាស៊ីសេរី ថា អាជ្ញាធរ​ខេត្ត​កំពុង​ចរចា​ ជាមួយ​ក្រុមហ៊ុន​ឯក​ជន​ក្នុង​ស្រុក​ ដើម្បី​ផ្គត់​ផ្គង់​ទឹក​ឱ្យ​ពលរដ្ឋ​បន្ថែម។ ចំណែក​ការ​ទិញ​ទឹក ​ពី​ប្រទេស​ថៃ តាម​អនុសាសន៍​ លោក​នាយក​រដ្ឋ​មន្ត្រី ហ៊ុន សែន អាជ្ញាធរ​ខេត្ត​កោះកុង​ បាន​ផ្ញើ​លិខិត​​ទៅ​អាជ្ញាធរ​ថៃ​​ រួច​រាល់​ហើយ និង​កំពុង​រង់​ចាំ​ចម្លើយ​ពី​​​រដ្ឋាករ​ទឹក​ថៃ៖ «យើង​បាន​ធ្វើ​លិខិត​ទៅ​គាត់​(អាជ្ញាធរ​)​មួយ​សប្ដាហ៍​ជាង​ហើយ​ ចា! ចូល​ពីរ​សប្ដាហ៍។ គាត់​កំពុង​តែ​ធ្វើ​លិខិត​ទៅ​ខាង​រដ្ឋាករ​ទឹក​ថៃ​របស់​គាត់ ដើម្បី​ជំរុញ​ការងារ​នេះ។ (វា)​ស្ថិត​នៅ​ក្នុង​នីតិវិធី​ ដោយសារ​ការ​ឆ្លង​ប្រទេស​ វា​មាន​នីតិវិធី​រាង​យឺត​យ៉ាវ​បន្លិច​។ វា​មាន​នីតិវិធី​ នៅ​ក្នុង​ប្រទេស​របស់​គាត់​ដែរ»

ពលរដ្ឋ​ខេត្ត​កោះកុង ប្រាប់​ថា ពួកគេ​ពេល​ខ្លះ​ត្រូវ​​បង្ខំ​ចិត្ត​ ទិញ​ទឹក​សុទ្ធ​ធុង​ធំ ចំណុះ​២០​លីត្រ​មុជ​ក៏​មាន​ដែរ។ ពួកគេ​បារម្ភ​ថា បញ្ហា​នេះ អាច​កាន់​តែ​លំបាក​ថែម​ទៀត​ នៅ​ខែ​មេសា និង​ខែ​ឧសភា​ខាង​មុខ ព្រោះ​ស្ថានភាព​កម្ដៅ​អាច​នឹង​ឡើង​ដល់​ចន្លោះ ៤០ ទៅ​៥០​អង្សាសេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល