ក្រសួងបរិស្ថានស្នើឱ្យអាជ្ញាធរពាក់ព័ន្ធថ្នាក់មូលដ្ឋាន ចាត់វិធានការទប់ស្កាត់ភ្លើងឆេះព្រៃ ការដុតសំរាម ស្មៅ គល់ជញ្ជ្រាំង និងសំណល់ផ្សេងៗ សំអាតអនាម័យតាមដងផ្លូវ ទប់ស្កាត់ការហុយធូលីដី និងអប់រំពលរដ្ឋកុំឱ្យដុតសំរាម ដើម្បីធានាថា ស្ថានភាពគុណភាពខ្យល់មានគុណភាពប្រសើរឡើងវិញ។ ស្រដៀងគ្នានេះដែរ ពលរដ្ឋរស់នៅតាមដងផ្លូវជាតិលេខ ៣ ត្អូញត្អែរថា ផ្លូវជាតិលេខ៣ ហុយខ្លាំងជាង ២ឆ្នាំមកហើយ ជាផ្នែកមួយប៉ះពាល់ដល់គុណភាពខ្យល់ ជាពិសេស ប៉ះពាល់សុខភាពពលរដ្ឋ និងអ្នកដំណើរ។
ក្រសួងបរិស្ថាន ឱ្យដឹងថា លទ្ធផលនៃការអង្កេតតាមដានគុណភាពខ្យល់ពីស្ថានីយត្រួតពិនិត្យគុណភាពខ្យល់បង្ហាញថា គុណភាពខ្យល់បានវិលមករកភាពប្រសើរឡើងវិញហើយ បន្ទាប់ពីកំហាប់កម្ទេចផង់ធូលី ដែលហៅតាមពាក្យបច្ចេកទេសបរិស្ថានឱ្យឈ្មោះថា ប៉ារ៉ាម៉ែត្រភាគល្អិតនិចល PM 10 និង PM 2.5 បានធ្លាក់ចុះស្ថិតក្នុងរង្វង់ស្តង់ដារ គឺកម្រិត ៥០មីក្រូក្រាម ក្នុងខ្យល់ ១ម៉ែត្រគីប។ ក្រុមមន្ត្រីជំនាញផ្នែកគុណភាពខ្យល់នៃក្រសួងបរិស្ថាននៅបន្តតាមដានយ៉ាងយកចិត្តទុកដាក់បញ្ហានេះ។
អ្នកនាំពាក្យក្រសួងបរិស្ថាន លោក នេត្រ ភត្ត្រា ថ្លែងក្នុងទំព័រហ្វេសប៊ុករបស់ក្រសួងថា ដើម្បីការពារសុខភាព ជៀសផុតពីការដកដង្ហើមចូលខ្យល់ពុលជាយថាហេតុ ពលរដ្ឋដែលធ្វើដំណើរតាមដងផ្លូវ ឬជាអ្នកដែលធ្វើការនៅខាងក្រៅអគាររយៈពេលយូរ គួរតែពាក់ម៉ាស់ការពារ។ លោកថា ក្រសួងបរិស្ថាននឹងជូនដំណឹងការវិវឌ្ឍន៍ថ្មីៗ ទាក់ទងនឹងស្ថានភាពគុណភាពខ្យល់នេះ ដើម្បីឱ្យពលរដ្ឋការពារឱ្យទាន់ពេលវេលា។
លោក នេត្រ ភត្ត្រា បន្ថែមថា ដើម្បីកែលម្អគុណភាពខ្យល់នៅតាមរាជធានី/ខេត្ត ក្រសួងបរិស្ថានបានជូនដំណឹងប្រាប់មន្ទីរបរិស្ថានគ្រប់ខេត្ត/ក្រុង ត្រូវសហការជាមួយរដ្ឋបាលថ្នាក់ក្រោមជាតិ អនុវត្តវិធានការមួយចំនួន មានដូចជា ត្រូវចាត់វិធានការទប់ស្កាត់ភ្លើងឆេះព្រៃ ការដុតសំរាម ត្រូវចាត់វិធានការទប់ស្កាត់ការហុយ ធូលីពីការដ្ឋានសំណង់ ការដ្ឋានកែលម្អហេដ្ឋារចនាសម្ព័ន្ធ និងធូលីហុយនៅតាមដងផ្លូវ។ លើសពីនេះ ត្រូវសម្អាតអនាម័យ នៅតាមដងផ្លូវ និងទីសាធារណៈស្រោចទឹកលើដងផ្លូវកុំឱ្យហុយធូលីហុយ និងចុះអប់រំប្រជាពលរដ្ឋកុំឱ្យដុតសំរាម សំណល់រឹង ការដុតស្មៅ គល់ជញ្ជ្រាំង និងសំណល់កសិកម្មផ្សេងៗទៀត។
ទាក់ទងនឹងគុណភាពខ្យល់នេះ ពលរដ្ឋរស់នៅតាមដងផ្លូវជាតិលេខ៣ ស្រុកទឹកឈូ ខេត្តកំពត ថ្លែងសុំលាក់ឈ្មោះនៅថ្ងៃទី១៨ មករា បានត្អូញថា ធូលីដីហុយខ្លាំង នៅតាមផ្លូវជាតិលេខ៣ រាប់សិបគីឡូម៉ែត្រ ដែលធ្វើឱ្យប៉ះពាល់សុខភាពពលរដ្ឋតាមដងផ្លូវ និងអ្នកដំណើរ ជាពិសេសសិស្សានុសិស្សធ្វើដំណើរទៅសាលារៀន។ លោកស្រីបន្តថា រយៈពេលជាង ២ឆ្នាំមកហើយ ដែលផ្លូវជាតិលេខ៣ រងការខូចខាតទ្រង់ទ្រាយធំហុយខ្លាំង បង្កការលំបាកសព្វបែបយ៉ាង ប៉ះពាល់ ផ្ទះសម្បែង សំលៀកបំពាក់ ម្ហូបអាហារ និងធ្វើឱ្យកុមារកើតជំងឺផ្លូវដង្ហើម។ លោកស្រីចាត់ទុកភាពយឺតយ៉ាវនៃការសាងសង់ផ្លូវនេះថា ជាផ្នែកមួយធ្វើប៉ះពាល់ដល់គុណភាពខ្យល់ដែលក្រសួង មន្ទីរបរិស្ថានគួរពិនិត្យវាយតម្លៃ៖ «មានផលលំបាកច្រើនណាស់ វាហុយច្រើនណាស់ សូម្បីជិះម៉ូតូទៅផ្សារម្តងៗក៏ពាក់អាវភ្លៀងដែរ។ និយាយរួមពាក់ម៉ាស់មួយជាន់មិនកើតទេ ពីរជាន់ពីហុយមែនទែន ហើយក្មេងៗចាប់ផ្ដើមឈឺអត់ឈប់ដែរហ្នឹង កូនខ្ញុំ។ ប្រហែល២ ឆ្នាំជាង។ ហុយមែនទែនហ្មង ក្មេងៗទៅរៀនវាមិនដូចយើងចាស់ទេ វាអស់ចេញពាក់ម៉ាស់អី ទៅរៀនអាវស មកវិញអាវក្រហមអស់អាលីង»។
មន្ត្រីសម្របសម្រួលសមាគមអាដហុក ខេត្តកំពត លោក យន់ ផល្លី ថ្លែងថា គុណវិបត្តិផ្លូវហុយខ្លាំងនេះ ធ្វើឱ្យប៉ះពាល់សុខភាពពលរដ្ឋធ្ងន់ធ្ងរ ជាពិសេស គុណភាពខ្យល់ ព្រោះផ្លូវជាតិលេខ ៣ មានរថយន្តធំៗ ធ្វើដំណើរច្រើន។ លោកថា សិស្សានុសិស្ស និងកុមារ ដែលធ្វើដំណើរដោយម៉ូតូ និងកង់ ងាយនឹងកើតជំងឺផ្សេងៗ បណ្ដាលមកពីធូលីដីហុយខ្លាំងនេះ។ លោកអំពាវនាវឱ្យអាជ្ញាធរ ពន្លឿនការសាងសង់ផ្លូវជាតិលេខ ៣ ឱ្យបានឆាប់ និងស្រោចទឹកលើផ្លូវឱ្យញឹកញាប់ ដើម្បីកាត់បន្ថយការហុយខ្លាំង៖ «ពលរដ្ឋទូទៅធ្វើដំណើរតាមដងផ្លូវហ្នឹងក៏លំបាកដែរ បានន័យថា ដីហ្នឹងហុយប្រឡាក់ជាប់ខោអាវអស់ហើយ។ សិស្សសាលាអីហ្នឹងសិស្សសាលាអីហ្នឹង ដីក្រហមហ្នឹង។ មន្ទីរពាក់ព័ន្ធ និងស្ថាប័នរដ្ឋមេត្តាធ្វើយ៉ាងម៉េច រឹតបណ្ដឹងលើក្រុមហ៊ុន ដែលបានដេញថ្លៃហ្នឹង មានវិធានការទៅ។ អាហ្នឹងវាពាក់ព័ន្ធសុខភាព ដល់ពលរដ្ឋធំណាស់ តាមដងផ្លូវហ្នឹង»។
លោក នេត្រ ភក្ត្រា បន្ថែមថា បញ្ហាកើនឡើងកំហាប់កម្ទេចផង់ធូលី ឬភាគល្អិតនិចល PM2.5 ក្នុងខ្យល់នេះមិនមែនមាននៅតែនៅកម្ពុជាទេ គឺមាននៅក្នុងបណ្ដាប្រទេសផ្សេងទៀតនៅក្នុងតំបន់ ដោយសារតែអាកាសធាតុនៃអនុតំបន់ទន្លេមេគង្គមានភាពស្ងួតហួតហែង។ លោកថា ប្រភពសំខាន់ដែលជាហេតុបង្កឱ្យមានកំហាប់កម្ទេចផង់ធូលី ឬភាគល្អិតនិចល PM2.5 ដោយសារការបញ្ចេញផ្សែងពីរោងចក្រឧស្សាហកម្ម ពីយានយន្ត ភ្លើងឆេះព្រៃ ការដុតរានព្រៃ ការដុតវាលស្មៅ ការដុតគល់ជញ្ជ្រាំង ការដុតសំរាម និងហុយធូលីដីជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។