ជនជាតិដើមភាគតិចចារ៉ាយជាច្រើនគ្រួសារ រស់នៅកៀកព្រំដែនកម្ពុជា-វៀតណាមក្នុងស្រុកអណ្តូងមាសខេត្តរតនគិរីអះអាងថា ករណីក្រុមហ៊ុន០៧មករាផារី បន្តឈូសឆាយផលដំណាំ និងដីកសិកម្មរបស់ពួកគាត់ជាថ្មីទៀត។ អ្នកភូមិចោទថា កម្មករក្រុមហ៊ុននេះប្រើប្រាស់កាំភ្លើងអាកា (AK ) កាងការពារអាជីវកម្មរបស់ក្រុមហ៊ុន និងបំភិតបំភ័យពលរដ្ឋ។
ជម្លោះដីធ្លីរវាងជនជាតិដើមភាគតិចចារ៉ាយរាប់រយគ្រួសារជាមួយនឹងក្រុមហ៊ុន៧មករាផារី នៅតែបន្តអូសបន្លាយពេលជាង១០ឆ្នាំមកហើយ ហើយមកទល់ពេលនេះ អាជ្ញាធរមិនទាន់ដោះស្រាយឱ្យជ្រះស្រឡះនៅឡើយនោះទេ។
ជនជាតិដើមចារ៉ាយ ស្លូតត្រង់នៅតែរងនូវភាពអយុត្តិធម៌ម្តងហើយម្តងទៀតខណៈដែលសំណុំរឿងចាស់ក្រុមហ៊ុនរំលោភបំពានដីធ្លីអាស្រ័យផលដីចម្ការវិលជុំ និងដីព្រៃអារក្ស អស់រាប់រយហិកតារអាជ្ញាធរនៅមិនទាន់ដោះស្រាយរួចរាល់នៅឡើយទេ ស្រាប់តែបញ្ហាប្រឈមជាថ្មីទៀតបន្តកើតមានឡើង។
តំណាងជនជាតិដើមភាគតិចលោក សេវ ជើង ប្រាប់វិទ្យុអាស៊ីសេរីនៅថ្ងៃទី២៨ មិថុនា ថា ក្នុងរយៈពេល៣ខែកន្លងទៅនេះកម្មករក្រុមហ៊ុន បានប្រើគ្រឿងចក្រ៣គ្រឿងឈូសឆាយផលដំណាំកសិកម្ម និងដីធ្លីអាស្រ័យផល របស់ពលរដ្ឋចំនួន៤គ្រួសារអស់ជាច្រើនហិកតារ និងធ្វើឱ្យពលរដ្ឋខ្វះខាតដីដាំដុះចិញ្ចឹមជីវិតនៅរដូវវស្សាឆ្នាំនេះ ។ លោកបន្ថែមថា ពលរដ្ឋកំពុងទាល់ច្រកមិនដឹងទៅពឹងស្ថាប័នណាមួយឱ្យជួយដោះស្រាយទេ ខណៈដែលអាជ្ញាធរគ្រប់លំដាប់ថ្នាក់មិនអើពើដោះស្រាយពាក្យបណ្តឹងរបស់ពួកគាត់។
លោក សេវ ជើង៖ «អាជ្ញាធរគេថា ដីក្រុមហ៊ុនពលរដ្ឋខ្លះខឹងរឿងដីធ្លី អត់ដោះស្រាយដែរ។ ទៅនិយាយនៅសាលាឃុំមេឃុំតាចាំសិនអស់ដីអស់ព្រៃហើយ គេយកកាយអស់»។
ចាប់តាំងពីមានវត្តមានក្រុមហ៊ុន៧មករាផារី វិនិយោគនៅតំបន់ជនជាតិដើមភាគតិចចារ៉ាយដែលឋិតក្នុងស្រុកអណ្តូងមាស និងស្រុកអូរយ៉ាដាវនៃខេត្តរតនគិរី ជនជាតិដើមភាគតិចរាប់រយគ្រួសារក្នុងភូមិចំនួន៧ បានរងផលប៉ះពាល់ជាបន្តបន្ទាប់។
ជនជាតិដើមភាគតិចដែលរងគ្រោះបញ្ហាដីធ្លីនេះភាគច្រើនមិនហ៊ានតវ៉ាទាមទារដីធ្លីអាស្រ័យផលរបស់ខ្លួនមកវិញនោះទេ ដោយខ្លាចក្រែងក្រុមហ៊ុនធ្វើបាបហើយអ្នកភូមិខ្លះទៀតក៏បោះបង់ដីធ្លីរបស់ខ្លួនឱ្យក្រុមហ៊ុនរំលោភបំពានដោយគ្មានសំណងអ្វីទាំងអស់។ អ្នកភូមិខ្លះក៏មិនហ៊ានទៅដាំដុះលើដីកសិកម្មរបស់ខ្លួននោះឡើយ ព្រោះភ័យខ្លាចសុវត្ថិភាពផ្ទាល់ខ្លួនដោយសារកម្មកររបស់ក្រុមហ៊ុនមានកាំភ្លើងអាការ (AK) យាមការពារ។
វិទ្យុអាស៊ីសេរីមិនទាន់អាចទាក់ទងសុំការបកស្រាយរឿងនេះពីស្នងការខេត្តរតនគិរីលោក អ៊ុង សុភាព បាននៅឡើយទេ ដោយទូរស័ព្ទហៅចូលច្រើនដង តែគ្មានអ្នកលើក។
លោក សេវ ជើង ឱ្យដឹងថា ពេលនេះនៅសល់ពលរដ្ឋជាង ១០គ្រួសារតែប៉ុណ្ណោះដែលរស់នៅភូមិតាំងជិ ឃុំញ៉ាងហ៊ាន បន្តទាមទារដីធ្លីអាស្រ័យផលរបស់ខ្លួនមកវិញ។ លោកថា អាជ្ញាធរបន្តពន្យារពេលមិនដោះស្រាយបញ្ហានេះធ្វើឱ្យជនជាតិដើមភាគតិចខ្លះនឿយណាយ នឹងការស្វែងរកយុត្តិធម៌និងអស់ជំនឿនឹងអាជ្ញាធរ។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអភិបាលខេត្តរតនគិរីលោក ញ៉ែម សំអឿន បាននៅឡើយទេ។ រីឯតំណាងក្រុមហ៊ុន៧មករាផារី ក៏មិនទាន់អាចទាក់ទងបានដែរ នៅថ្ងៃដដែលនេះ។
មន្ត្រីសង្គមស៊ីវិលដែលចុះអង្កេតដល់ទីតាំងដីមានជម្លោះឱ្យដឹងថាពេលនេះ ក្រុមហ៊ុនឯកជនដែលទទួលសិទ្ធិវិនិយោគពីរដ្ឋាភិបាលលើផ្ទៃដីជិត៨ពាន់ហិកតារនេះ បានដាំកៅស៊ូ និងដំណាំឧស្សាហកម្មផ្សេងទៀតតិចតួចនៅឡើយទេ ហើយផ្ទៃដីផ្សេងទៀតគឺនៅទំនេរ។ រីឯដីនៅតំបន់ផ្សេងទៀតវាលធំល្វឹងល្វើយឃើញមានការឈូសឆាយព្រៃពង្រីកផ្ទៃដីកសិកម្ម ប៉ះពាល់ដីធ្លីជនជាតិដើមភាគតិចដែលដាំដុះលក្ខណៈគ្រួសារចិញ្ចឹមជីវិត។
កាលពីខែតុលាឆ្នាំ២០១១ រដ្ឋាភិបាលបានធ្វើអនុប្បយោគដីជាងជិត ៧ពាន់ហិកតារ (៦.៨៥៥ហិកតារ) នៅស្រុកអណ្ដូងមាសនិងស្រុកអូរយ៉ាដាវក្នុងខេត្តរតនគិរីប្រែក្លាយដីតំបន់នោះជាដីឯកជនរបស់រដ្ឋតាមសំណើរបស់ក្រសួងកសិកម្ម ដើម្បីវិនិយោគឱ្យក្រុមហ៊ុន៧មករាផារី។
ជុំវិញរឿងនេះមន្ត្រីអង្កេតនៃសមាគមសិទ្ធិមនុស្សអាដហុកប្រចាំខេត្តរតនគិរីលោក ងៀវ សិលា សង្កេតឃើញថា ជនជាតិដើមភាគតិចកាន់កាប់ដីធ្លីលក្ខណៈប្រពៃណីជាច្រើនជំនាន់មកហើយពុំមានប្លង់កម្មសិទ្ធិនោះទេ ក៏ប៉ុន្តែអាជ្ញាធរ និងតំណាងក្រុមហ៊ុនតែងតែយកឯកសារពាក់ព័ន្ធនិងប្លង់កម្មសិទ្ធិ ជាមូលដ្ឋានដើម្បីដាក់សម្ពាធពួកគាត់។
លោកថា ពលរដ្ឋខ្លះបង្ខំចិត្តទទួលសំណងជាថវិកាពីក្រុមហ៊ុនព្រោះតែគ្មានជម្រើស និងមិនចង់មានរឿងវែងឆ្ងាយ។
លោក ងៀវ សិលា៖ «ពលរដ្ឋនៅនេះភាគច្រើនគាត់ប្រើប្រាស់ដីដោយអត់មានប្លង់ ដោយពេលដោះស្រាយតាមច្បាប់គេអត់យកប្រពៃណីមកដោះស្រាយទេ គេនិយាយរឿងឯកសារមួយ»។
ប្រជាសហគមន៍បន្ថែមថា ចាប់តាំងពីមានវត្តមានក្រុមហ៊ុននេះ មេការក្រុមហ៊ុនបានឈូសឆាយដីចម្ការវិលជុំរបស់អ្នកភូមិយ៉ាងហោចណាស់៦០០ហិកតារ និងកាប់បំផ្លាញឈើប្រណិតមានតម្លៃដឹកជញ្ជូនឆ្លងដែនទៅប្រទេសវៀតណាម តាមច្រករបៀងព្រំដែនខុសច្បាប់។ រីឯព្រៃអារក្សអូរធម្មជាតិភ្នំ និងព្រៃអាស្រ័យផលជាច្រើនតំបន់ក៏ត្រូវក្រុមហ៊ុន៧មករាផារី នេះឈូសឆាយកម្ទេចដោយជំនួសមកវិញនូវចម្ការកៅស៊ូ និងវាលធំល្វឹងល្វើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។