បណ្ដាញ​សហគមន៍​ព្រៃ​ឡង់​បន្ត​ទាមទារ​ទៅ​រដ្ឋាភិបាល​ដក​បម្រាម​ហាមឃាត់​ការងារ​ល្បាត​ព្រៃឈើ​

ដោយ សុជីវី
2021-03-21
Share
បណ្ដាញ​សហគមន៍​ព្រៃ​ឡង់​បន្ត​ទាមទារ​ទៅ​រដ្ឋាភិបាល​ដក​បម្រាម​ហាមឃាត់​ការងារ​ល្បាត​ព្រៃឈើ​ បណ្ដាញ​សហគមន៍​ព្រៃ​ឡង់​បន្ត​ទាមទារ​​ទៅ​រដ្ឋាភិបាល​ ​ក្រសួង​បរិស្ថាន​ ​និង​អាជ្ញាធរ​ពាក់ព័ន្ធ​ឱ្យ​ដក​បម្រាម​ហាមឃាត់​ការ​ងារ​ល្បាត​ព្រៃ​របស់​បណ្ដាញ​សហគមន៍​ព្រៃ​ឡង់​។​
រូប៖ គេ​ផ្ដល់​ឱ្យ

បណ្ដាញ​សហគមន៍​ព្រៃ​ឡង់​បន្ត​ទាមទារ​​ទៅ​រដ្ឋាភិបាល​ ​ក្រសួង​បរិស្ថាន​ ​និង​អាជ្ញាធរ​ពាក់ព័ន្ធ​ឱ្យ​ដក​បម្រាម​ហាមឃាត់​ការ​ងារ​ល្បាត​ព្រៃ​របស់​បណ្ដាញ​សហគមន៍​ព្រៃ​ឡង់​។​ ​ការ​ទាមទារ​នេះ​ធ្វើឡើង​ក្នុង​ថ្ងៃ​នៃ​ទិវា​ព្រៃឈើ​អន្តរជាតិ​២​១​ ​ខែ​មីនា​។

បណ្ដាញ​សហគមន៍​ព្រៃ​ឡង់​លើកឡើង​ថា​ ​ដើម្បី​អាច​ទប់​ស្កាត់​ការបំផ្លាញព្រៃឈើ​ និង​ធនធានធម្មជាតិ​មានប្រសិទ្ធភាព ​លុះ​ត្រា​មាន​ការចូលរួម​ពី​ប្រជា​សហគមន៍​​រស់​នៅ​​ផ្ទាល់​ក្នុង​​តំបន់​​ព្រៃ​ឡង់​។​ ​ជាថ្មី​ម្ដងទៀត​ ពួកគាត់​ស្នើ​ទៅ​រដ្ឋាភិបាល​ ​អាជ្ញាធរ​ពាក់ព័ន្ធ​ និង​អង្គការ​ដៃគូ​លើកទឹកចិត្ត​និង​អនុញ្ញាតដល់​ក្រុម​សហគមន៍​ស្ម័គ្រចិត្ត​ចូលរួម​ថែរក្សា​ព្រៃឈើ​ដែល​​ជា​​កេរ​តំ​ណែ​ល​​ដូន​តា​​រាប់ពាន់​ឆ្នាំ​មក​ហើយ​ឱ្យ​បាន​នៅ​គង់​រ​ង្ស​។​

លោក​ ​ស្វាយ​ ​សុង​ ​សមាជិក​បណ្តាញ​សហគមន៍​ព្រៃ​ឡង់​ប្រចាំ​ខេត្ត​ក្រចេះ​ប្រាប់​ថា​ ​ចាប់តាំង​ពី​ក្រសួង​បរិស្ថាន​រឹត​បន្តឹង​ការចូលរួម​ការពារ​ព្រៃ​ឡង់​មក​ ​គឺ​ប្រជា​សហគមន៍​មិនបាន​ប្រារព្ធ​ពិធីបុណ្យ​នៅ​ព្រៃ​ឡង់​អស់​រយៈពេល ​២​ឆ្នាំ​ ហើយ​ គឺ​បាន​ត្រឹម​ចេញ​លិខិត​អំពាវនាវ​ប៉ុណ្ណោះ​។​ ​អ្នកស្ម័គ្រចិត្ត​ការពារ​ព្រៃឈើ​រូប​នេះ​បារម្ភ​ថា​ ​ព្រៃ​ឡង់​ទាំងបួន​អាច​រង​ការ​វិនាស​ព្រោះ​បម្រាម​ក្រសួង​បរិស្ថាន ​ដែល​ជា​ការរារាំង​សហគមន៍​ព្រៃ​ឡង់​មិន​ឱ្យ​ចូល​ការពារ​ព្រៃ​៖ «ពួក​ខ្ញុំ​ជា​អ្នកការពារ​ធនធានធម្មជាតិ​​គ្មាន​​ប្រាក់ខែ​លះបង់​អាយុ​វ​ជីវិត​ លះបង់​កម្លាំង​កាយ​ចិត្ត​ ​ផ្ទុយទៅវិញ​ ទៅជា​ពួក​ខ្ញុំ​ជា​អ្នក​ខុស​ទៅវិញ។ ​អ៊ីចឹង​បាន​ជា​សំណូមពរ​ឱ្យ​ខាង​អង្គការ​ក្រៅ​រដ្ឋាភិបាល​ ​ក៏ដូចជា​រដ្ឋាភិបាល​ជួយ​ធ្វើ​ជួយ​យ៉ាងម៉េច​ឱ្យ​បានការ​ពារ​ព្រៃ​ ព្រោះ​យើងខ្ញុំ​នេះ​ជា​អ្នកស្ម័គ្រចិត្ត​ការពារ​ព្រៃ​ឡង់​»។

ជុំវិញ​បញ្ហា​នេះ​ ​អាស៊ី​សេរី​បាន​ព្យាយាម​សុំ​ការ​បំភ្លឺ​ពី​អ្នកនាំពាក្យ​រដ្ឋាភិបាល​លោក​ ​ផៃ​ ​ស៊ី​ផា​ន​ ​និង​អ្នកនាំ​ក្រសួង​បរិស្ថាន​លោក​ នេ​ត្រ ​ភ​ក្ត្រា ​នៅ​ថ្ងៃ​ទី​២​១​ ​ខែ​មីនា​ ​ប៉ុន្តែ​ទូរស័ព្ទ​ចូល​ជាច្រើន​ដង​គ្មាន​អ្នកទទួល​។​

ទោះ​យ៉ាងណា​លោក​ នេ​ត្រ​ ​ភ​ក្ត្រា ​តែង​ចោទប្រកាន់​លើ​ប្រជា​សហគមន៍​ការពារ​ព្រៃ​ឡង់​ថា​ ​គ្មាន​ភាព​ស្មោះត្រង់​ជាមួយ​ក្រសួង​ក្នុង​កិច្ច​សហការ​​នា​ពេល​កន្លងមក​។​

កាលពី​ពេល​ថ្មីៗ ​នេះ អ្នកនាំពាក្យ​ក្រសួង​បរិស្ថាន​រូប​នេះ​ឱ្យ​អាស៊ី​សេរី​ដឹង​ថា​ ​បើ​បណ្ដា​ញ​សហគមន៍​ព្រៃ​ឡង់​ចង់​ចូល​ការពារ​ព្រៃឈើ​ មុនដំបូង​ត្រូវ​បំពេញ​កាតព្វកិច្ច​គោរព​តាម​ផ្លូវច្បាប់​ជាមុន​សិន​។​ ​លោក​លើកឡើង​ទៀត​ថា​ ​កន្លងមក​ក្រសួង​ធ្លាប់ធ្វើ​ការ​ជាមួយ​បណ្ដាញ​សហគមន៍​ព្រៃ​ឡង់​ ​ប៉ុន្តែ​ពេល​ចេញពី​ព្រៃ​មកវិញ​បណ្ដាញ​នេះ​បាន​ចេញ​របាយការណ៍​ខុស​ពី​ក្រសួង​ ​ហើយ​ពួកគេ​បាន​ប្រើប្រាស់​ទិន្នន័យ​គ្មាន​មូលដ្ឋាន​ច្បាស់លាស់​យកមក​វាយប្រហារ​និង​រិះគន់​កិច្ចប្រឹងប្រែង​របស់​​​ក្រសួង​បរិស្ថាន​៖ «ពេលខ្លះ​យើង​ផ្ដល់​កិច្ច​សហការ​ណ៍ ​ប៉ុន្តែ​កិច្ច​សហការ​ណ៍​របស់​គាត់​ចាប់ដៃ​ជាន់​ជើង​វិញ​ ឬក៏​បង្ហាញ​ភាព​មិន​ស្មោះត្រង់​»។

activists-prey-lang.jpg
បណ្តាញសហគមន៍ព្រៃឡង់ធ្វើយុទ្ធនាការដើរស្វែងរកឱ្យមានការអនុញ្ញាតឱ្យពួកគេបានចូលដើរល្បាតនៅក្នុងព្រៃឡង់ឡើងវិញ។

ទោះជាយ៉ាងណា​ ​សមាជិក​បណ្តាញ​សហគមន៍​ព្រៃ​ឡង់​ម្នាក់ទៀត​ ​គឺ​លោក​ ​ខេង​ ខូ ​ស្នើ​ទៅ​លោក​ ​ហ៊ុន​ ​សែន​ ​ដែល​កំពុង​ដឹកនាំ​​ប្រទេស​សព្វថ្ងៃ ​ឱ្យ​មានការ​យល់​ដឹង​ពី​សារៈ​សំខាន់​​នៃ​ធនធានធម្មជាតិ ​និង​យោគយល់​ដល់​បណ្ដាញ​សហគមន៍​អាច​ចូលរួម​ការងារ​ការពារ​ព្រៃ​បាន​ងាយស្រួល ​ដោយ​មិន​ចាំបាច់​មានការ​ស្នើសុំ​ ​ឬ​ទាល់តែ​មានការ​យល់ព្រម​ពី​ក្រសួង​បរិស្ថាន​នោះ​ទេ​។​ ​សមាជិក​សហគមន៍​ព្រៃ​ឡង់​រូប​នេះ​រិះគន់​ថា​ ​អ្នកនាំពាក្យ​ក្រសួង​បរិស្ថាន​លោក​ នេ​ត្រ​ ​ភ​ក្ត្រា ​យក​អំណាច​ ​និង​តួនាទី​ចោទប្រកាន់​ ​និង​លាប​ព​ណ៌​មក​លើ​​បណ្ដាញ​សហគមន៍​ព្រៃ​ឡង់​ដោយ​គ្មាន​ការពិត​៖ «សូម​ឱ្យ​សម្តេច​យល់​យោគ​ដល់​បណ្ដាញ​សហគមន៍​ព្រៃ​ឡង់​ដែល​កំពុង​ចូលរួម​ការងារ​ស្រលាញ់​ធម្មជាតិ​ពិត​ មិនមែន​ដូច​លោក​ នេ​ត្រ ​ភក្ត្រា ​បាន​ចោទប្រកាន់​លើ​ក្រុម​បណ្ដាញ​សុទ្ធតែ​មាន​និន្នាការនយោបាយ​ ​មិនមែនទេ ​គឺ​ប្រជាពលរដ្ឋ​ស្រ​លាញ​ព្រៃឈើ​ពិតៗ​ ​ស្រលាញ់​ធម្មជាតិ​ពិតៗ ​មិន​ចង់​ឱ្យ​បាត់បង់​»។

មកដល់ពេលនេះ​ មានរយៈ​ ២​ឆ្នាំ​​ហើយ ដែល​អាជ្ញាធរ ​និង​ក្រសួង​បរិស្ថាន​មិន​អនុញ្ញាត​ឱ្យ​ប្រជា​សហគមន៍ ​និង​ក្រុម​យុវជន​ចុះ​ល្បាត​ព្រៃ​នោះ​ទេ​ ​ដោយ​លើក​ហេតុផល​ថា ​ប្រ​ជា​សហគមន៍​មិនបាន​សុំច្បាប់​អនុញ្ញាត​។​ ​បម្រាម​នេះ​ផ្ទុយ​ទៅ​នឹង​ច្បាប់ ​ស្តីពី​ តំបន់​ការពារ​ធម្មជាតិ​ដែល​ផ្ដល់​សិទ្ធិ​ឱ្យ​ពលរដ្ឋ​អាច​ចូលរួម​ស្តារ​ការពារ​ ​និង​អភិ​រក្ស​ធន​ធាន​ធម្មជាតិ​។​ ​ចំណែក​អង្គការ​ជាតិ​និង​អន្តរជាតិ​បាន​រក​ឃើញ​ថា​ ​ក្នុងរយៈពេល​ ២​០​ឆ្នាំ​​ចុងក្រោយ​នេះ ទំហំ​ព្រៃ​ឡង់​ជាង ​១​សែន​ហិកតារ​ (​១​០​២​.​៤​៣​៦​) ​ឬ​ស្មើនឹង​ ​២​៤​% ​ត្រូវ​បាន​បាត់បង់​ក្លាយ​ជា​វាលរហោឋាន​។​

ខណៈ​មានការ​រក​ឃើញ​ពី​ការបំផ្លាញព្រៃឈើ​បន្ត​កើន​ឡើង​បែប​នេះ​ ​បណ្ដាញ​សហគមន៍​ព្រៃ​ឡង់​លើក​ជា​សំណើ​រ​សំខាន់​ៗ ​មួយ​ចំនួន ​រួម​មាន​ ​ស្នើ​រដ្ឋាភិបាល​​ឱ្យ​ដក​មន្ត្រី​ឧ​ទ្យានុ​រក្ស​រូប​ណា​អសកម្ម​ និង​ពាក់ព័ន្ធ​បទល្មើស​ព្រៃឈើ​ចេញពី​តួនាទី​។​ ​បញ្ឈប់​កា​អនុញ្ញាត​ឱ្យ​មានការ​​​ដឹកជញ្ជូន​ឈើ​ ​ម៉ាស៊ីន​រណា​យន្ត​ ​និង​ស​ម្ភារៈ​ផ្សេងទៀត​ដែល​បម្រើ​ឱ្យ​ការកាប់​បំផ្លាញ​ព្រៃឈើ​ចូល​តំបន់​ការពារ​ ​ឬ​កាត់មុខ​ប៉ុស្តិ៍​យាម​មន្ត្រី​ឧ​ទ្យានុ​រក្ស​។​ ​ពួកគេ​ក៏​ស្នើ​ទៅ​ក្រសួង​បរិស្ថាន​រៀបចំផែនការ​ជាក់លាក់​ក្នុង​ការ​ ​ប្រយុទ្ធ​ប្រឆាំង​ការបំផ្លាញព្រៃឈើ​ ​ការ​កាប់​រាន​ដី​ព្រៃ​សម្រាប់​កសិកម្ម​ ​កាំភ្លើង​កែច្នៃ​ ​ការ​បរបាញ់​ ​និង​ស​ម្ភារៈ​សម្រាប់​ការប្រព្រឹត្ត​បទល្មើស​ផ្សេងៗ ​ទៀត​។​ ​លើស​ពី​នេះ​ ​ពួកគេ​ជំរុញ​ឲ្យ​រដ្ឋាភិបាល​ត្រូវតែ​អនុវត្តន៍​បទបញ្ញត្តិ​និង​ច្បាប់​នានា ​ក្នុង​កិច្ចការពារ​ព្រៃឈើ​ ​ព្រមទាំង​អំពាវនាវ​និង​លើកទឹកចិត្ត​ដល់​ប្រជាជន​កម្ពុជា​និង​សកលលោក​ចូលរួម​យ៉ាងសកម្ម​ ​និង​ធ្វើការ​ទាំងអស់គ្នា​ ទាំង​ផ្ទាល់​ ​និង​ប្រយោល​ ដើម្បី​បុព្វហេតុ​ការ​ការពារ​ធនធានធម្មជាតិ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល