មន្ត្រីបរិស្ថានរបស់រដ្ឋាភិបាលកម្ពុជា អះអាងថា កម្ពុជាប្ដេជ្ញាក្នុងការរក្សាព្រៃឈើឲ្យនៅគង់វង្ស។ ប៉ុន្តែក្នុងពេលជាមួយគ្នានេះ កម្ពុជាមិនព្រមចុះហត្ថលេខាប្តេជ្ញាចិត្តក្នុងរឿងនេះ ជាមួយប្រទេសដទៃទៀតនៅក្នុងពិភពលោកនៅឡើយទេ។
អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់វិទ្យុសំឡេងសហរដ្ឋអាមេរិក (VOA) កាលពីថ្ងៃទី៣ ខែ វិច្ឆិកា ថា ក្រសួងបរិស្ថានកម្ពុជា គាំទ្រសេចក្តីថ្លែងការណ៍រួមរបស់ប្រទេសជាង ១០០ នៅលើពិភពលោក ក្នុងការការពារ និងអភិរក្សធនធានធម្មជាតិព្រៃឈើ និងដាំកូនឈើឡើងវិញ ដើម្បីរក្សាគម្របព្រៃឈើ។
ប៉ុន្តែ ក្នុងចំណោមប្រទេស ១២៨ ដែលបានចុះហត្ថលេខាគាំទ្រលើសេចក្តីប្រកាសរួម កាលពីថ្ងៃទី២ ខែវិច្ឆិកា នៅទីក្រុង ក្លាស្កូ (Glasgow) ប្រទេសអង់គ្លេស (UK) ស្តីពីការប្តេជ្ញាចិត្តបញ្ឈប់ការកាប់បំផ្លាញព្រៃឈើត្រឹមឆ្នាំ២០៣០នោះ មិនឃើញមានឈ្មោះប្រទេសកម្ពុជា ជាប្រទេសហត្ថលេខីនឹងគេនោះទេ។
មេដឹកនាំពី១៩៧ ប្រទេស បានចូលរួមសន្និសីទអង្គការសហប្រជាជាតិ ស្ដីពីការប្រែប្រួលអាកាសធាតុ លើកទី ២៦(COP26) ចាប់ពីថ្ងៃទី៣១ ខែតុលា ដល់ថ្ងៃទី១២ ខែវិច្ឆិកា។ កាលពីថ្ងៃទី២ ខែវិច្ឆិកា សន្និសីទនេះ បានចេញសេចក្តីថ្លែងការណ៍រួម ដោយប្ដេជ្ញាចិត្ត ដើម្បីបញ្ឈប់ និងកែប្រែឡើងវិញនូវការធ្វើឲ្យបាត់បង់ព្រៃឈើ និងការរេចរឹលដី ត្រឹមឆ្នាំ២០៣០។
ទោះជាយ៉ាងនេះក្ដី ប្រទេសនៅតំបន់អាស៊ាន ដែលមិនបានចុះហត្ថលេខាគាំទ្រសេចក្តីប្រកាសរួមនេះ មានរហូតដល់ ៦ ប្រទេសឯណោះ រួមទាំង ឡាវ (Laos) ថៃ (Thailand) មីយ៉ានម៉ា ឬភូមា (Myanmar) ម៉ាឡេស៊ី (Malaysia) និងសិង្ហបុរី (Singapore)។ ដោយឡែកប្រទេស វៀតណាម (Vietnam) ឥណ្ឌូណេស៊ី (Indonesia) ហ្វីលីពីន (the Philippines) និងប្រ៊ុយណេ (Brunei) សុទ្ធតែបានចុះហត្ថលេខារួចហើយ។
ចំនួនប្រទេសដែលចុះហត្ថលេខាគាំទ្រ អាចនឹងកើនឡើងជាបន្តបន្ទាប់ ព្រោះនៅ ៨ថ្ងៃទៀត ទើបចប់សន្និសីទនេះ។
លោក នេត្រ ភត្ត្រា ប្រាប់ប្រភពដដែល ថា គណៈប្រតិភូតំណាងឲ្យកម្ពុជា មានលោក សាយ សំអាល់ ដែលជារដ្ឋមន្ត្រីក្រសួងបរិស្ថាន ក៏ទៅចូលរួមក្នុងកិច្ចប្រជុំនេះដែរ។ ប៉ុន្តែ លោក នេត្រ ភក្ត្រា មិនពន្យល់ប្រាប់ពីមូលហេតុនៃការមិនព្រមចុះហត្ថលេខារបស់តំណាងកម្ពុជានេះទេ។
កម្ពុជា គឺជាប្រទេសទី១០ ក្នុងពិភពលោកដែលរងការបាត់បង់ព្រៃឈើខ្លាំងជាងគេបំផុតក្នុងឆ្នាំ២០១៩ គឺរហូតដល់ទៅជាង ៦ម៉ឺន ៣ពាន់ហិកតារ។ ទិន្នន័យពីផ្កាយរណបរបស់អឺរ៉ុប និងអាមេរិក រកឃើញថា មានការកើនឡើងមិនធ្លាប់មានពីមុនមក នូវការបាត់បង់ព្រៃឈើប្រចាំឆ្នាំនៅកម្ពុជា។ គិតចាប់ពីឆ្នាំ២០០០មក កម្ពុជាបានបាត់បង់គម្របព្រៃឈើរហូតដល់ទៅ ២៦% ស្មើនឹង ២លាន៣សែនហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។