ក្រសួង​ព្រមាន​ពី​​ការ​ប៉ះពាល់​សុខភាព​ និង​អាយុជីវិត​ដោយសារ​អាកាសធាតុ​ក្ដៅ​ខ្លាំង ខណៈ​ខេត្ត​មួយ​ចំនួន​កំពុង​ជួប​គ្រោះ​រាំង​ស្ងួត​បណ្ដើរៗ

ដោយ សុ ជីវី
2019-02-16
អ៊ីម៉ែល
មតិ
Share
បោះពុម្ព
កសិករ​នៅ​ឃុំ​ព្រះបាទជាន់ជុំ ស្រុក​គិរីវង់ ដើរ​ពិនិត្យ​វាល​ស្រែ​ប្រាំង​​កំពុង​ក្រៀម​ស្វិត​ថ្ងៃ​ទី​១៣ កុម្ភៈ ឆ្នាំ​២០១៥។
កសិករ​នៅ​ឃុំ​ព្រះបាទជាន់ជុំ ស្រុក​គិរីវង់ ដើរ​ពិនិត្យ​វាល​ស្រែ​ប្រាំង​​កំពុង​ក្រៀម​ស្វិត​ថ្ងៃ​ទី​១៣ កុម្ភៈ ឆ្នាំ​២០១៥។
RFA

ក្រសួងសុខាភិបាល អំពាវនាវ​ឱ្យ​ប្រជាពលរដ្ឋ​ប្រុងប្រយ័ត្ន​ចំពោះ​សុខភាព និង​បង្ការ​ជំងឺ​ផ្សេងៗ ដែល​បណ្ដាល​មក​ពី​អាកាសធាតុ​ក្ដៅ​ខ្លាំង ខណៈ​ខេត្ត​មួយ​ចំនួន កំពុង​ជួប​គ្រោះ​រាំងស្ងួត​បណ្ដើរៗ ហើយ​ធ្វើ​ឱ្យ​ប៉ះពាល់​មនុស្ស សត្វ និង​ដំណាំ​កសិកម្ម។ សង្គម​ស៊ីវិល​យល់ថា របប​ក្រុងភ្នំពេញ គួរតែ​ចាប់ផ្ដើម​ពិនិត្យ និង​ជួយ​ផ្គត់ផ្គង់​ទឹក ដោយ​ផ្ដល់​អណ្ដូង​ទឹក និង​ស្ដារ​ប្រព័ន្ធ​ធារាសាស្ត្រ ដល់​ពលរដ្ឋ​ជាពិសេស​នៅ​តាម​តំបន់​ដាច់ស្រយាល។

ក្រសួងសុខាភិបាល​ឱ្យ​ដឹង​ថា អាកាសធាតុ​ក្តៅ​ខ្លាំង​ដែល​កំពុង​កើតមាន អាច​បណ្ដាល​ឱ្យ​ប៉ះពាល់​ដល់​សុខភាព និង​អាយុ​ជីវិត​ដោយសារ​ជំងឺ​បេះដូង សួត និង​ជំងឺ​ផ្សេងៗ​ ដូចជា​ជំងឺ​រាក និង​ខ្វះ​ចំណី​អាហារ ព្រោះ​ភាព​រាំងស្ងួត​មិន​អាច​ដាំ​ដុះ​បាន។

ក្រសួង​សុខាភិបាល​ប្រកាស​នៅ​ថ្ងៃ​ទី​១៦ ខែ​កុម្ភៈ​​ថា អាកាសធាតុ​ក្ដៅ​ខ្លាំង​នេះ ក៏​អាច​បណ្ដាល​ឱ្យ​មាន​បញ្ហា​សុខភាព​ផ្លូវចិត្ត ជាពិសេស​ជំងឺ​តានតឹង​ក្នុង​ផ្លូវ​អារម្មណ៍ ឬ​ហៅថា ​ស្ត្រេស តប់ប្រមល់ និង​រលាក​​ស្បែក​​ឡើង​​ក្រហមៗ​ ជា​ដើម។

រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង បញ្ជាក់​ក្នុង​សេចក្ដី​ជូនដំណឹង​ថា គ្រប់ៗ​គ្នា​ត្រូវតែ​មាន​ការ​ប្រុងប្រយ័ត្ន​ខ្ពស់​លើ​បញ្ហា​សុខភាព នៅ​ពេល​ដែល​អាកាសធាតុ​ឡើង​ក្ដៅ​ខ្លាំង ជាពិសេស​កុមារ និង​ជន​ចាស់ជរា សំខាន់​ត្រូវ​ប្រយ័ត្ន​ពី​បញ្ហា​ប៉ះពាល់​ដល់​សរសៃឈាម​ក្នុង​ខួរក្បាល ដែល​អាច​ឱ្យ​ពិការ ឬ​បាត់​បង់ជីវិត។ លោក​ណែនាំ​ឱ្យ​ប្រជាពលរដ្ឋ​អនុវត្ត​វិធី​ការពារ ជាពិសេស​ត្រូវ​ពិសា​ទឹក ឬ​ទឹក​ដែល​មាន​ជាតិ​រ៉ែ​ឱ្យ​បាន​ញឹកញាប់ ស្ថិត​នៅ​ក្រោម​ម្លប់ ឬ​ទីកន្លែង​ត្រជាក់ ជៀសវាង​នៅ​ក្រោម​កម្ដៅ​​​ថ្ងៃ​​យូរ​​ពេក​។ បន្ថែម​ពីលើ​នេះ​ទៀត ប្រជាពលរដ្ឋ​ត្រូវ​មាន​ការប្រុងប្រយ័ត្ន​លើ​បញ្ហា​ជំងឺ​រាករូស និង​ជំងឺឆ្លង​ ដែល​អាច​បណ្ដាល​មក​ពី​ការ​បរិភោគ​ទឹក ឬ​អាហារ​មិន​មាន​អនាម័យ​ល្អ។ ដូច្នេះ​សូម​ពិសា​និង​ប្រើប្រាស់​ទឹក ស្អាត ឬ​ទឹក​ឆ្អិន និង​អនុវត្ត​នូវ​អនាម័យ​​​ចំណី​អាហារ និង​​អាហារ​​មាន​​សុវត្ថិភាព។ ម្យ៉ាងទៀត ប្រសិន​បើ​​មាន​អាការៈ​ដូចជា​រាក ក្អួត ក្ដៅខ្លួន និង​សន្លប់ ត្រូវ​ស្វែងរក​ការ​ព្យាបាល​នៅ​មណ្ឌល​សុខភាព ឬ​មន្ទីរពេទ្យ​ដែល​នៅ​ជិត​បំផុត។

សេចក្ដី​ជូន​ព័ត៌មាន​នេះ ធ្វើឡើង​បន្ទាប់ពី​ក្រសួង​ធនធាន​ទឹក និង​ឧតុនិយម​បង្ហាញ​ថា ក្នុង​រដូវប្រាំង​នៅ​ឆ្នាំ​២០១៩​នេះ កម្ពុជា​នឹង​ជួប​គ្រោះ​រាំងស្ងួត​ហួតហែង​ខ្លាំង ជាពិសេស​ក្នុង​អំឡុង​ខែ​មេសា និង​ខែ​ឧសភា​ខាងមុខ​នេះ​ហើយ កម្ដៅ​អាច​នឹង​ឡើង​ដល់​ទៅជា​ង ៤០​អង្សា ដោយសារតែ​កម្ពុជា​រង​ដោយ​ប្រយោល ពី​ឥទ្ធិពល​បាតុភូត​អែលនីណូ (El Nino)។ ឥទ្ធិពល​នៃ​បាតុភូត​នេះ​នឹង​បង្ក​ឱ្យ​មាន​ភ្លៀង​កក់ខែ​តិច មាន​បាតុភូត​ផ្គរ​រន្ទះ និង​ខ្យល់​កន្ត្រាក់​កើតឡើង​ច្រើន ហើយ​រដូវវស្សា​នឹង​ចូល​មកដល់​យឺត​ជាង​បណ្ដា​ឆ្នាំ​កន្លងទៅ។

មេភូមិ​ពុទ្ទ្រា លោក យឹម សេន ឱ្យ​ដឹង​ថា នៅ​ឃុំ​ត្រពាំងជោរ ស្រុក​ឱរ៉ាល់ ខេត្ត​កំពង់ស្ពឺ កំពុង​ជួប​គ្រោះ​រាំងស្ងួត​បណ្ដើរៗ​ ហើយ ដោយ​​បណ្ដាល​ឱ្យ​​សត្វ​ពាហនៈ​ឈឺ​ងាប់​ជា​បន្តបន្ទាប់ ហើយ​ក្មេង​តូចៗ ក៏​ធ្លាក់​ខ្លួន​ឈឺ​ជាច្រើន​នាក់​ដែរ។ លោក​អំពាវនាវ​ឱ្យ​រដ្ឋាភិបាល​ជួយ​បុក​អណ្ដូង ​និង​ស្តារ​ស្រះ​ទឹក​ឱ្យ​បាន​ជ្រៅ​បន្ថែម​ទៀត ដើម្បី​ទប់ទល់​ជាមួយ​គ្រោះ​រាំងស្ងួត ដែល​អាច​កើតឡើង​កាន់តែ​ធ្ងន់ធ្ងរ​នៅ​ពេល​មុខ ប្រសិនបើ​នៅតែ​គ្មាន​ភ្លៀង​កក់ខែ៖ «បាទ! ឥឡូវ​នេះ សត្វ​គោ សត្វ​ពាហនៈ​ វា​ចាប់​ផ្តើម​ងាប់​មួយៗ ដោយសារ​អត់​ទឹក​គ្រប់គ្រាន់ ហើយ​មនុស្ស​ក៏​អ៊ីចឹង​ដែរ ជា​ពិសេស​ក្មេងៗ ឈឺ​ច្រើន​ដែរ។ ទឹក​នេះ វា​ខ្វះ​ខាត ហើយ​ទឹក​នេះ យើង​ទិញ​គេ មិន​ដឹង​គេ​ដង​យក​មក​ពី​ត្រពាំង​ណា ថ្លុក​ណា ដើម្បី​យក​មក​លក់​ឲ្យ​យើង»

លោក​បញ្ជាក់​ថា គិត​ចាប់​តាំង​ពី​ខែ​មករា មក មាន​គោក្របី​ប្រមាណ ១០​ក្បាល​ហើយ​បាន​ឈឺ​ងាប់។

អភិបាលខេត្ត​កំពង់ស្ពឺ លោក វ៉ី សំណាង សម្ដែង​ការ​សោកស្ដាយ​ដែល​អាជ្ញាធរ​មូលដ្ឋាន មិនបាន​រាយការណ៍​ឱ្យ​លោក​បាន​ដឹង​ជាមុន។ លោក​ស្នើសុំ​ឱ្យ​អាជ្ញាធរ​មូលដ្ឋាន និង​ប្រជាពលរដ្ឋ​ក្នុង​ខេត្ត​កំពង់ស្ពឺ ត្រូវ​រាយការណ៍​ជូន​លោក​ដោយ​ផ្ទាល់ ដើម្បី​​ឱ្យ​​លោក​ចាត់វិធានការ ជួយសង្គ្រោះ​ទាន់​ពេល​វេលា៖ «យើង​ខ្ញុំ​នេះ​ប្រឹងប្រែង​ណាស់ រឿង​ស្រាវជ្រាវ​រក​ព័ត៌មាន ដើម្បី​ធ្វើ​ម៉េច​ជួយ​គាត់ កុំ​ឲ្យ​មាន​បញ្ហា។ យើង​មាន​មធ្យោបាយ​សម្រាប់​ជួយ​គាត់ យើង​មាន​ទំនប់ ប្រឡាយ និង​មាន​ឡាន​សម្រាប់​ដឹក​ទឹក​ជូន​គាត់។ ឡាន​ពន្លត់​អគ្គីភ័យ​យើង​នេះ នៅ​ពេល​មិន​ទាន់​មាន​បញ្ហា យើង​យក​ឡាន​នេះ​ដឹក​ទឹក​ចែក​ជូន​គាត់។ យើង​ធ្លាប់​ធ្វើ​បាន កាល​ពី​ឆ្នាំ២០១៦។ វា​អត់​សូវ​ស្មុគស្មាញ សំខាន់​រឿង​នេះ យើង​អត់​បាន​ទទួល​បាន​ព័ត៌មាន»

រីឯ​ពលរដ្ឋ​នៅ​ស្រុក​ស្នួល ខេត្ត​ក្រចេះ ក៏​អះអាង​ថា តំបន់​ពួកគាត់ កំពុង​ខ្វះ​ទឹក​បណ្ដើរៗ​ដែរ ដែល​ធ្វើ​ឱ្យ​ក្មេងៗ ធ្លាក់ខ្លួន​ឈឺ និង​ដំណាំ​កសិកម្ម​កំពុង​ក្រៀម​ស្វិត៖ «អណ្ដូង​ឥឡូវ​រីង​ទឹក ហើយ​ជួល​គេ​ស្ដារ​ថែម​ទៀត។ ក្មេងៗ គ្រុន​រហូត ព្រោះ​ពួក​យើង​អត់​​មាន​​ផ្ទះ​ធំ​ទេ គឺ​មាន​តែ​ផ្ទះ​តៀម​ស័ង្កសី ហើយ​ថ្ងៃ​ឡើង​ក្ដី​ខ្លាំង​ណាស់ មិន​អាច​ដេក​បាន​ទេ»

ចំណែក​ស្រូវប្រាំង​ជាច្រើន​របស់​កសិករ នៅ​ក្នុង​សង្កាត់​ស្រងែ ក្រុង​សៀមរាប កំពុង​ប្រឈម​នឹង​ខ្វះ​ទឹក​ស្រោចស្រព​ដែរ។ ស្រូវ​ទាំងនោះ ចាប់ផ្ដើម​ប្រែ​ពណ៌​ក្រហម នៅ​លើ​ដី​ប្រេះ​បែក​ក្រហែង។

អាស៊ីសេរី មិន​អាច​សុំ​ការ​អត្ថាធិប្បាយ​ពី​អ្នកនាំពាក្យ​ក្រសួង​ធនធាន​ទឹក និង​ឧតុនិយម លោក ចាន់ យុត្ថា និង លោក អ៊ុំ រីណា បានទេ ដោយ​ទូរស័ព្ទ​របស់​លោក​ទាំង​ពីរ មិន​អាច​ទាក់ទង​បា​។

មន្ត្រី​​សម្របសម្រួល​សមាគម​អាដហុក (Adhoc) ប្រចាំ​ខេត្ត​កំពង់ធំ លោក សុខ រដ្ឋា មាន​ប្រសាសន៍​ថា នៅ​តំបន់​ដាច់ស្រយាល នៃ​ខេត្ត​កំពង់ធំ​ក៏​កំពុង​រងគ្រោះ​ដោយ​អាកាសធាតុ​ក្ដៅ​ខ្លាំង​ដែរ​។ លោក​សង្កេត​ឃើញ​ថា មាន​កុមារ​តូចៗ​និង​មាន​ចាស់​ជរា​​ជា​ច្រើន ចាប់ផ្ដើម​ឈឺ​ច្រើន និង​ស្វែងរក​ការ​ព្យាបាល នៅ​តាម​មណ្ឌល​សុខភាព។ លោក​បន្ត​ថា ដំណោះស្រាយ​បន្ទាន់​នោះ គឺ​រដ្ឋាភិបាល គួរតែ​យកចិត្ត​ទុកដាក់​ចំពោះ​ស្ថានភាព​រស់នៅ​របស់​ប្រជាពលរដ្ឋ​តាម​តំបន់​ដាច់ស្រយាល​ដែល​ប្រឈម ទាំង​​សុខភាព និង​​ទឹក​​ប្រើប្រាស់៖ «រដ្ឋាភិបាល ត្រូវ​តែ​មាន​វិធានការ​ចាប់​អារម្មណ៍​ទៅ​ដល់​តំបន់​ដាច់​ស្រយាល​ឆ្ងាយៗ ជា​ពិសេស តំបន់​ខ្វះ​ខាត​ទឹក ដូច​ជា កំពង់ធំ កំពង់ស្ពឺ​ជា​ដើម។ ម្យ៉ាង​វិញ​ទៀត រដ្ឋាភិបាល ត្រូវ​មាន​វិធានការ​តាម​ដាន និង​អប់រំ​នៅ​តាម​មណ្ឌល​សុខភាព​ឲ្យ​បាន​ល្អ ដូច​ជា មាន​គ្រូពេទ្យ​គ្រប់គ្រាន់ មាន​ថ្នាំ​ពេទ្យ​គ្រប់គ្រាន់ និង​ព្យាបាល​ដោយ​មិន​រើសអើង​ជា​ដើម»

លោក សុខ រដ្ឋា បន្ថែម​ទៀត​ថា សម្រាប់​ផែនការ​រយៈពេល​វែង​នោះ គឺ​រដ្ឋាភិបាល ត្រូវ​ទប់ស្កាត់​ការ កាប់​បំផ្លាញ​ព្រៃឈើ​ធនធានធម្មជាតិ និង​ត្រូវ​ពន្លឿន​រៀបចំ​ប្រពន្ធ​ធារាសាស្ត្រ​ឱ្យ​ត្រឹម​ត្រូវ និង​មាន​ប្រសិទ្ធភាព កុំ​រង់ចាំ​តែ​ទឹកភ្លៀង៖ «ក្រសួង​អភិវឌ្ឍ​ជនបទ ត្រូវ​តែ​មាន​វិធានការ​ចុះ​ស្រាវជ្រាវ​តាម​ដាន​តំបន់​ដាច់​ស្រយាល ដែល​មាន​ប្រជាពលរដ្ឋ​រស់​នៅ ហើយ​មាន​ផែនការ​ធ្វើ​ការ​អភិវឌ្ឍ ទី​ជនបទ​ឲ្យ​បាន​ប្រសើរ​នៅ​ក្នុង​ការ​ផ្តល់​នូវ​ផាសុកភាព​ចំពោះ​ការ​រស់​នៅ​របស់​ប្រជាពលរដ្ឋ ដូច​ជា មាន​ទឹក​ប្រើប្រាស់​គ្រប់គ្រាន់ មាន​ភ្លើង និង​ផ្លូវ​ជា​ដើម»

អ្នកនាំពាក្យ​រដ្ឋាភិបាល លោក ផៃ ស៊ីផាន មានប្រសាសន៍ថា រដ្ឋាភិបាល បាន​ត្រៀម​រួចរាល់​ហើយ ក្នុង​ការ​ជួយ​ប្រពល​រដ្ឋ​ដែល​រងគ្រោះ​ដោយ​គ្រោះធម្មជាតិ ក្នុង​នោះ​មាន​ដូចជា​គណៈកម្មការ​គ្រប់គ្រង គ្រោះ​មហន្តរាយ និង​កាកបាទ​ក្រហម​កម្ពុជា​ជាដើម៖ «បើ​តាម​ខ្ញុំ​ដឹង រដ្ឋាភិបាល​បាន​ត្រៀម​រួច​ស្រេច​ទៅ​ហើយ ហើយ​ក្រសួង​ធនធាន​ទឹក មាន​តាំង​ពី​ឡាន មាន​តាំង​ពី​អា​ត្រាក់ទ័រ និង​គ្រឿងចក្រ​ធំៗ សម្រាប់​ជីក​ស្រះ​ជួយ​ដោះ​ស្រាយ»

អាស៊ីសេរី បាន​ព្យាយាម​ទាក់ទង​អនុប្រធាន​ទី​១ នៃ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ លោក ញឹម វណ្ណដា ជាច្រើនលើក​ប៉ុន្តែ​លោក​មិន​ទទួល​ទូរស័ព្ទ។

មេដឹកនាំ​របប​ក្រុងភ្នំពេញ​លោក ហ៊ុន សែន បាន​ចេញ​សារាចរ​មួយ​កាលពី​ថ្ងៃ​ទី​១៧ ខែ​មករា កន្លង​ទៅ ដោយ​អនុញ្ញាត​ឱ្យ​កសិករ​ធ្វើ​ស្រូវប្រាំង​បានតែ ១​ដង​ប៉ុណ្ណោះ និង​ត្រូវ​ដាំ​ដំណាំ​រួមផ្សំ​ផ្សេងទៀត​ដើម្បី​ទុក​ផ្គត់ផ្គង់​សម្រាប់​តែ​ការប្រើប្រាស់​ប្រចាំថ្ងៃ និង​អំពាវនាវ​ដល់​អាជ្ញាធរ និង​ប្រជាពលរដ្ឋ​ត្រូវ​ចាត់​វិធានការ​ថែរក្សា​ទឹក​ទុក​សម្រាប់​ប្រើប្រាស់​នៅ​ពេល​ចាំបាច់។

របាយការណ៍​ហានិភ័យ​ឆ្នាំ​២០១៥ របស់​អង្គការសហប្រជាជាតិ ឱ្យ​ដឹង​ថា ប្រទេស​កម្ពុជា គឺជា​ប្រទេស​ទី​៩ ដែល​ងាយ​រងគ្រោះ​ជាងគេ ​ដោយសារ​គ្រោះ​មហន្តរាយ​នៅ​លើ​ពិភពលោក ដែល​ជា​ឧបសគ្គ​ដល់​ដំណើរការ​អភិវឌ្ឍ​សម្រាប់​ប្រទេស​នេះ។ ករណី​នេះ បាន​ធ្វើ​ឱ្យ​ខូចខាត​ដល់​វិស័យ​សំខាន់ៗ ​មួយ​ចំនួន ដូចជា កសិកម្ម សេដ្ឋកិច្ច សុខភាព និង​អប់រំ​ជាដើម​។ ជាង​នេះ​ទៀត បើ​តាម​តួលេខ​ព្យាករណ៍​របស់​អង្គការ​សុខភាព​ពិភពលោក នៅ​រវាង​ពី​ឆ្នាំ​២០៣០ ដល់​ឆ្នាំ​២០៥០ ការប្រែប្រួល​អាកាសធាតុ នឹង​អាច​បង្ក​ឱ្យ​មាន​មនុស្ស​ស្លាប់​បន្ថែម​ប្រមាណ ២៥​ម៉ឺន​នាក់ (២៥០.០០០​នាក់​) ក្នុង​មួយឆ្នាំៗ ក្នុង​នោះ​ជិត ៤​ម៉ឺន​នាក់ (៣៨.០០០​នាក់​) ស្លាប់​ដោយសារ​កម្ដៅ​ខ្លាំង ជិត ៥​ម៉ឺន​នាក់ (៤៨.០០០​នាក់​) ដោយ​ការ​រាករូស ៦​ម៉ឺន​នាក់​ដោយ​រោគ​គ្រុនចាញ់ និង​ជិត ១០​ម៉ឺន​នាក់ (៩៥.០០០​នាក់​) ជា​កុមារ​ដោយសារ​កង្វះ​ចំណីអាហារ។

ប្រជាពលរដ្ឋ​ក្នុង​ខេត្ត​មួយ​ចំនួន​អះអាង​ថា ក្នុង​ដំណាក់​កំពុង​ជួប​គ្រោះ​រាំងស្ងួត​នេះ ពួកគេ​មិនទាន់​ឃើញ​របប​ក្រុងភ្នំពេញ អាច​ជួយ​អ្វី​ដល់​ប្រជាពលរដ្ឋ​ឱ្យ​ឃើញ​ជាក់ស្ដែង​​ទេ​។ ប្រជាពលរដ្ឋ​ និង​សង្គម​ស៊ីវិល ក៏​រិះគន់​ថា របប​ក្រុងភ្នំពេញ​ខ្វះ​សមត្ថភាព គ្មាន​ចំណាត់​ការ​ច្បាស់លាស់​ក្នុង​ការ​ប្រើប្រាស់​ទឹក​ឱ្យ​មាន​ប្រសិទ្ធភាព ដូចជា ប្រព័ន្ធ​ធារាសាស្ត្រ ការរៀបចំ​ប្រព័ន្ធ​ទឹក​បង្ហូរ​ចូល​ស្រែ ឬ​ទាញ​ដើម្បី​ប្រយោជន៍​ដល់​វិស័យ​កសិកម្ម និង​ការប្រើប្រាស់​ប្រចាំថ្ងៃ​របស់​កសិករ​កម្ពុជា ខណៈ​ដែល មាន​​ក្រសួង​​ជាច្រើន​ដូចជា​ក្រសួង​ធនធាន​ទឹក ក្រសួងកសិកម្ម ក្រសួងបរិស្ថាន និង​ក្រសួង​អភិវឌ្ឍន៍​ជនបទ​​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

look like kingdom of African sahara desert sand...karma leader cursing Khmer pple...

omg...where's this place in Cambodia,or in Africa Sahara desert sand?it's more likely in Africa continent rather than Cambodia...if this aerial view as be present of Cambodia....sorry am not be proud as be Km pple at all"shame on leader".

Feb 17, 2019 11:16 AM

គេហទំព័រ​ទាំងមូល