ក្រុម​គ្រួសារ​លោក ឈុត វុទ្ធី និង​សង្គម​ស៊ីវិល​ធ្វើ​ពិធី​រំលឹក​ខួប​លើក​ទី៧ នៃ​ឃាតកម្ម​លោក ឈុត វុទ្ធី

ដោយ មួង ណារ៉េត
2019-04-26
អ៊ីម៉ែល
មតិ
Share
បោះពុម្ព
លោក ឆឺយ ឧត្តមរស្មី ប្រធាន​អង្គការ​ការពារ​ធនធាន​ធម្មជាតិ ធ្វើ​ពិធី​រំលឹក​ខួប​លើក​ទី៧ នៃ​ឃាតកម្ម​លោក ឈុត វុទ្ធី ជា​ឪពុក​របស់​លោក នៅ​ថ្ងៃ​ទី២៦ ខែ​មេសា ឆ្នាំ២០១៩។
លោក ឆឺយ ឧត្តមរស្មី ប្រធាន​អង្គការ​ការពារ​ធនធាន​ធម្មជាតិ ធ្វើ​ពិធី​រំលឹក​ខួប​លើក​ទី៧ នៃ​ឃាតកម្ម​លោក ឈុត វុទ្ធី ជា​ឪពុក​របស់​លោក នៅ​ថ្ងៃ​ទី២៦ ខែ​មេសា ឆ្នាំ២០១៩។
រូប៖ ផ្ដល់​ដោយ​លោក ឆឺយ ឧត្តមរស្មី

ក្រុម​គ្រួសារ​លោក ឈុត វុទ្ធី សកម្មជន​បរិស្ថាន និង​មន្ត្រី​សង្គម​ស៊ីវិល​ប្រមាណ ៤០នាក់​នាំ​គ្នា​ប្រារព្ធ​ធ្វើ​ខួប​លើក​ទី៧ នៃ​ឃាតកម្ម​លោក ឈុត វុទ្ធី នៅ​ថ្ងៃ​ទី២៦ ខែ​មេសា​នេះ។ ការ​ធ្វើ​ពិធី​សាសនា​នេះ ក៏​មាន​ការ​ឃ្លាំមើល​ពី​សមត្ថកិច្ច​មូលដ្ឋាន​នៅ​កន្លែង​ប្រារព្ធ​ពិធី​នោះ​ដែរ។ ​

ក្នុង​ឱកាស​គម្រប់ ៧ឆ្នាំ នៃ​ឃាតកម្ម​បាញ់​សម្លាប់​សកម្មជន​បរិស្ថាន​ដ៏​ល្បី​ឈ្មោះ លោក ឈុត វុទ្ធី ក្រុម​គ្រួសារ​លោក ឈុត វុទ្ធី សកម្មជន​បរិស្ថាន និង​មន្ត្រី​សង្គម​ស៊ីវិល​នាំ​គ្នា​ទាមទារ​រក​យុត្តិធម៌​ជូន លោក ឈុត វុទ្ធី។ មន្ត្រី​សិទ្ធិ​មនុស្ស​ស្នើសុំ​ទៅ​សមត្ថកិច្ច​នៃ​របប​ក្រុង​ភ្នំពេញ​ឱ្យ​ធ្វើ​ការ​ស៊ើប​អង្កេត​យ៉ាង​ពិត​ប្រាកដ ដើម្បី​ផ្ដល់​យុត្តិធម៌​ដល់​ជន​រងគ្រោះ។

កូនប្រុស លោក ឈុត វុទ្ធី គឺ​លោក ឆឺយ ឧត្តមរស្មី ប្រាប់​អាស៊ី​សេរី​ថា លោក​សប្បាយ​ចិត្ត​ដែល​មាន​សកម្មជន​បរិស្ថាន មន្ត្រី​សង្គម​ស៊ីវិល​បាន​ចូលរួម​បុណ្យ​គោរព​វិញ្ញាណក្ខន្ធ​គម្រប់ ៧ឆ្នាំ​នៃ​ការ​ស្លាប់​របស់​ឪពុក​លោក។ ជុំវិញ​ការ​ទាមទារ​យុត្តិធម៌​ដល់​ឪពុក កូន​ប្រុស​ច្បង​របស់​លោក ឈុត វុទ្ធី រូប​នេះ និយាយ​ថា លោក​គ្មាន​សង្ឃឹមថា រដ្ឋាភិបាល​លោក ហ៊ុន សែន មាន​ចេតនា​ក្នុង​ការ​ស្វែង​រក​ឃាតក​ពិត​មក​ទទួល​ទោស​នោះ​ទេ៖ «អរគុណ​បង​ប្អូន​សង្គម​ស៊ីវិល និង​សកម្មជន​បរិស្ថាន​ទាំង​អស់ ដែល​បាន​ចូលរួម​ពិធី​ថ្ងៃ​នេះ ទោះ​តិច​ក្ដី​ច្រើន​ក្ដី​ខ្ញុំ​សប្បាយ ខ្ញុំ​ក៏​មាន​សារ​លើក​ទឹក​ដល់​អ្នក​សកម្មជន​បរិស្ថាន ដើម្បី​សង្គម​ជាតិ​ទាំង​អស់​ឲ្យ​បន្ត​ឆន្ទៈ​ទៅ​មុខ​ទៀត»

ពិធី​បុណ្យ​គម្រប់ ៧ឆ្នាំ​នៃ​ការ​បាញ់​សម្លាប់​ប្រធាន​អង្គការ​ការពារ​ធន​ធាន​ធម្មជាតិ លោក ឈុត វុទ្ធី ដែល​ប្រារព្ធ​ធ្វើ​នៅ​ថ្ងៃ​សុក្រ ទី២៦ ខែ​មេសា ឆ្នាំ២០១៩ នេះ គឺ​បាន​រៀបចំ​នៅ​ភូមិ​ស្វាយ​មាស ឃុំ​វិហារសួគ៌ ស្រុក​ខ្សាច់​កណ្ដាល ខេត្ត​កណ្ដាល​ ជា​ទី​កន្លែង​បញ្ចុះ​សព​លោក ឈុត វុទ្ធី។

ប្រធាន​គ្រប់គ្រង​ការិយាល័យ​ឃ្លាំមើល​សិទ្ធិមនុស្ស​នៃ​អង្គការ លីកាដូ (Licadho) លោក អំ សំអាត សង្កេត​ឃើញ​ថា រយៈ​ពេល ៧ឆ្នាំ​មក​នេះ សំណុំរឿង​ឃាតកម្ម​លើ​លោក ឈុត វុទ្ធី គ្មាន​ការ​វិវឌ្ឍ​អ្វី​គួរ​ឲ្យ​កត់​សម្គាល់​នោះ​ទេ។ មន្ត្រី​សង្គម​ស៊ីវិល​រូប​នេះ ស្នើ​ទៅ​សមត្ថកិច្ច​ពន្លឿន​ការ​ស៊ើប​អង្កេត​របស់​ខ្លួន៖ «មើល​ទៅ​រយៈ​ពេល ៧ឆ្នាំ​ហើយ ដែល​ភាព​ជឿនលឿន​នៃ​ការ​ស៊ើប​អង្កេត​លើ​លោក ឈុត វុទ្ធី នៅ​មិន​ទាន់​ឃើញ​ទេ ក្រៅ​ពី​តែ​ការ​កាត់​ទោស​យុវជន​ម្នាក់ ដែល​ជាប់​ទោស​តែ​ប៉ុន្មាន​ខែ​ហ្នឹង»

លោក ឈុត វុទ្ធី ត្រូវ​បាន​ឃាតក​បាញ់​សម្លាប់​នៅ​ក្នុង​រថយន្ត​របស់​លោក​កាល​ពី​ថ្ងៃ​ទី២៦ ខែ​មេសា ឆ្នាំ២០១២ នៅ​ចំណុច​វាល​បី ឃុំ​បាក់ខ្លង ស្រុក​មណ្ឌលសីមា ខេត្ត​កោះកុង បន្ទាប់ពី លោក និង​អ្នក​កាសែត​ពីរ​រូប​ទៀត បាន​ចូល​ទៅ​ថត​រូបភាព​គំនរ​ឈើ​របស់​ក្រុមហ៊ុន​កាប់​ឈើ ដែល​គេ​ស្គាល់​ឈ្មោះ​ថា ក្រុមហ៊ុន ធីមប៊ើរ ហ្គ្រីន (Timber Green)នៅ​ក្នុង​ស្រុក​ថ្ម​បាំង ខេត្ត​កោះកុង។

របាយការណ៍​របស់​សមត្ថកិច្ច​បង្ហាញ​ថា ឃាតក​បាញ់​សម្លាប់​លោក ឈុត វុទ្ធី គឺ​ជា​មន្ត្រី​កង​រាជ​អាវុធហត្ថ​ម្នាក់​ឈ្មោះ អ៊ិន រតនា។ របាយការណ៍​នោះ​បញ្ជាក់​ថា ក្រោយ​បាញ់​សម្លាប់ លោក ឈុត វុទ្ធី រួចហើយ អ៊ិន រតនា ក៏​បាន​បាញ់​សម្លាប់​ខ្លួន​ឯង​ចំនួន២គ្រាប់។ ប៉ុន្តែ​ក្រុម​គ្រួសារ​លោក ឈុត វុទ្ធី និង​មន្ត្រី​សង្គម​ស៊ីវិល​មិន​ជឿ​លើ​ការ​អះអាង​នេះ​ទេ និង​ទាមទារ​ឲ្យ​របប​ក្រុង​ភ្នំពេញ បង្កើត​ក្រុម​ស៊ើប​អង្កេត​ករណី​ឃាតកម្ម​លើ​លោក ឈុត វុទ្ធី ដើម្បី​រក​ឃាតក​ពិត និង​អ្នក​នៅ​ពី ក្រោយ​រឿង​នេះ។

អ្នក​នាំ​ពាក្យ​អគ្គ​ស្នងការដ្ឋាន​នគរបាល​ជាតិ លោក ឆាយ គឹមខឿន អះអាង​ប្រាប់​អាស៊ី​សេរី​ដឹង​កាល​ពី​ថ្ងៃ​ទី២៣ ខែ​មេសា​ថា សំណុំរឿង​លោក ឈុត វុទ្ធី នៅ​តែ​ស្ថិត​ក្នុង​ការ​ស៊ើប​អង្កេត។ ប៉ុន្តែ​មិន​លោក​​អាច​បញ្ជាក់​ថា ត្រូវ​ការ​ពេល​វេលា​ប៉ុន្មាន​ទៀត​នោះ​ទេ។ លោក​បន្ត​ថា  សមត្ថកិច្ច​តែងតែ​ខិតខំ​ស្រាវជ្រាវ ដើម្បី​រក​ការ​ពិត​នៃ​រឿង​នេះ៖ «ចង់​ជម្រាប​អ៊ីចេះ​ប្អូន ពាក់ព័ន្ធ​ករណី​ឃាតកម្ម ខ្ញុំ​មិន​និយាយ​ថា អ្នក​ណាៗ ទេ ឲ្យ​តែ​ប្រជា​ពលរដ្ឋ​ឲ្យ​តែ​ជន​គ្រប់​រូប​រស់​នៅ​ក្នុង​ប្រទេស​កម្ពុជា យើង​សុទ្ធ​តែ​ដុត​ដៃ​ដុត​ជើង​រក។ ប៉ុន្តែ​យើង​ខ្ញុំ​ទទួល​ស្គាល់​ថា ក្នុង​មួយ​រយ​ករណី យើង​ខ្ញុំ​មិន​ទាន់​មាន​សមត្ថភាព​បង្ក្រាប​បាន​ទាំង​មួយ​រយ​ករណី​ទេ»

ផ្ទុយ​ពី​ការ​អះអាង​របស់​អ្នក​នាំ​ពាក្យ​អគ្គ​ស្នងការដ្ឋាន​នគរបាល​ជាតិ​រូប​នេះ កូន​ប្រុស​លោក ឈុត វុទ្ធី គឺ​លោក ឆឺយ ឧត្តមរស្មី ប្រាប់​ថា លោក​មិន​ជឿ​លើ​ការ​លើក​ឡើង​នេះ​ឡើយ។ លោក​បន្ត​ថា រយៈ​ពេល ៧ឆ្នាំ​កន្លង​មក​នេះ តុលាការ​មិន​ដែល​កោះ​ហៅ​លោក ឬ​ម្ដាយ​របស់​លោក​ម្ដង​ឡើយ​ណា​ជុំ​វិញ​សំណុំ​រឿង​ឪពុក​របស់​លោក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល