ពលរដ្ឋ​អះអាង​ថា​ដើម​ឈើ​ធំៗ​នៅ​ពោធិ៍សាត់​ត្រូវ​គេ​កាប់​រំលំ​យក​ផ្កា​ប៉ប្រក​ទៅ​លក់​នៅ​ថៃ

ដោយ ជិន ជេដ្ឋា
2015-02-25
អ៊ីម៉ែល
មតិ
Share
បោះពុម្ព

ប្រជាពលរដ្ឋ​រស់នៅ​ស្រុក​វាលវែង ខេត្ត​ពោធិ៍សាត់ អះអាង​ថា សកម្មភាព​កាប់​រំលំ​ដើម​ឈើ​ធំៗ​ដើម្បី​យក​ផ្កា​ប៉ប្រក​ទៅ​លក់​នៅ​ប្រទេស​ថៃ កាន់​តែ​កើន​ឡើង​នៅ​ទូទាំង​ឃុំ​ថ្មដា ដោយ​គ្មាន​ការ​ទប់ស្កាត់។

ប្រជាពលរដ្ឋ​ដែល​ថ្លែង​ក្នុង​លក្ខខណ្ឌ​សុំ​មិន​បញ្ចេញ​ឈ្មោះ ឲ្យ​ដឹង​នៅ​ថ្ងៃ​ទី​២៥ ខែ​កុម្ភៈ ថា ដើម​ឈើ​មុខ​កាត់​ចាប់​ពី ២០ ទៅ ៥០​សង់ទីម៉ែត្រ នៅ​តាម​បណ្ដោយ​ស្ទឹង​ម្កាក់ និង​ស្ទឹង​កាច់ ឋិត​នៅ​ជាប់​ជើង​ភ្នំ​នៃ​ឃុំ​ថ្មដា ត្រូវ​បាន​ពលរដ្ឋ​ប្រើ​រណារ​ង៉ោង កាត់​រំលំ​រាល់​ថ្ងៃ។ អ្នកស្រី​ថា រាល់​ចុង​សប្ដាហ៍​មាន​ម៉ូតូ​ដឹក​ដើម​ផ្កា​ប៉ប្រក​យ៉ាង​តិច ១០​គ្រឿង ចេញ​តាម​ច្រក​ថ្មដា ទៅ​លក់​នៅ​ខេត្ត​ត្រាត ប្រទេស​ថៃ៖ «គេ​កាប់​យក​ដើម​ផ្កា​តាម​ព្រៃ​ធំ​នៅ​ក្នុង​ឃុំ​ថ្មដា។ ខ្ញុំ​ចង់​ឲ្យ​ប្រធាន​ច្រក​ថ្មដា លោក គឹម ញ៉ ជួយ​ទប់ស្កាត់​កុំ​បើក​ផ្កា​ទៅ​លក់​នៅ​ប្រទេស​ថៃ ពីព្រោះ​បើ​អ៊ីចឹង ប្រជាជន​នាំ​គ្នា​កាប់​ដើម​ឈើ​ធំៗ​ហិនហោច​អស់​ហើយ»

ទាក់ទង​បញ្ហា​នេះ អភិបាល​ស្រុក​វាលវែង លោក ហេង សុភាណា ថ្លែង​ទទួល​ស្គាល់​ថា នៅ​ឃុំ​ថ្មដា ពិត​ជា​មាន​សកម្មភាព​កាប់​រំលំ​ដើម​ឈើ​យក​រុក្ខជាតិ​ផ្កា​ទៅ​លក់​នៅ​ប្រទេស​ថៃ មែន ប៉ុន្តែ​ពុំ​មាន​ទ្រង់ទ្រាយ​ធំ​នោះ​ទេ។ កន្លង​ទៅ ក្រុម​ការងារ​លោក​បាន​ចុះ​ស្រាវជ្រាវ ហើយ​ដឹង​ថា ពួក​គាត់​ប្ដូរ​ទម្លាប់​មក​ឡើង​បេះ ដោយ​មិន​កាប់​រំលំ​ដើម​ឈើ​ឡើយ។ យ៉ាង​ណា​លោក​ថា នឹង​ចុះ​អង្កេត​ករណី​នេះ​ទៀត។

ដើម​ផ្កា​ប៉ប្រក គឺ​ជា​រុក្ខជាតិ​ម្យ៉ាង​ដុះ​ផ្ញើ​ខ្លួន​លើ​ដើម​ឈើ​ធំៗ ហើយ​គេ​និយម​យក​ទៅ​ដាក់​តាំង​លំអ​ផ្ទះ ឬ​សណ្ឋាគារ។ បច្ចុប្បន្ន រុក្ខជាតិ​នេះ​មាន​ហាងឆេង​ខ្លាំង​នៅ​លើ​ទីផ្សារ ហើយ​បើ​គេ​នាំ​យក​ទៅ​លក់​នៅ​ថៃ បាន​តម្លៃ​ពី ១០០​បាត ទៅ ៣០០​បាត ស្មើ​នឹង​ប្រហែល ១​ម៉ឺន ទៅ ៣​ម៉ឺន​រៀល​ក្នុង​១​ដើម ទៅ​តាម​ដើម​ផ្កា​ប៉ប្រក​នោះ​ស្រស់​ល្អ និង​មាន​ទំហំ​តូច ឬ​ធំ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល