គណៈកម្មការទន្លេមេគង្គ (MRC) កំពុងទាមទារឱ្យរដ្ឋាភិបាលកម្ពុជាផ្តល់ព័ត៌មានលម្អិតពាក់ព័ន្ធនឹងគម្រោងសាងសង់ព្រែកជីកហ្វូណន។ ក៏ប៉ុន្តែ ភាគីកម្ពុជានៅពុំទាន់បានផ្តល់ឱ្យនៅឡើយទេ។
ក្នុងអត្ថបទសម្ភាសន៍មួយផ្សាយជាភាសាអង់គ្លេសក្នុងកាសែត ឌឹ ភ្នំពេញ ប៉ុស្តិ៍ (The Phnom Penh Post) កាលពីថ្ងៃទី៤ ខែឧសភា គណៈកម្មការទន្លេមេគង្គ (MRC) ឱ្យដឹងថា ខ្លួនបានដាក់លិខិតជាច្រើនច្បាប់ទៅរដ្ឋាភិបាលកម្ពុជា ទាមទារឱ្យផ្តល់ព័ត៌មានបច្ចេកទេសលម្អិតអំពីគម្រោងសាងសង់ព្រែកជីកនេះ។ ក្នុងនោះ ក៏មានការស្នើសុំឱ្យកម្ពុជាផ្តល់ឯកសារសិក្សាពីការវាយតម្លៃលើផលប៉ះពាល់នានា និងរបាយការណ៍ដទៃទៀតពាក់ព័ន្ធនឹងគម្រោងនេះ។
ទោះជាយ៉ាងណា គណៈកម្មការទន្លេមេគង្គថា គិតមកទល់ពេលនេះ ខ្លួននៅមិនទាន់ទទួលបានការឆ្លើយតបពីភាគីកម្ពុជាវិញនៅឡើយទេ។ គណៈកម្មការទន្លេមេគង្គ គ្រោងនឹងចែកចាយព័ត៌មានទាំងនេះបន្តទៅឱ្យប្រទេសសមាជិកនៅពេលដែលខ្លួនទទួលបានឯកសារពីភាគីកម្ពុជា។
គណៈកម្មការទន្លេមេគង្គ ឱ្យដឹងបន្ថែមថា ភាគីវៀតណាម តាមរយៈលេខាធិការដ្ឋាននៃគណៈកម្មាធិការជាតិទន្លេមេគង្គវៀតណាម បានលើកឡើងពីកង្វល់នានារបស់ភាគីពាក់ព័ន្ធ តាមរយៈលិខិតផ្លូវការកាលពីខែកញ្ញា ឆ្នាំ២០២៣ និងខែមីនា ឆ្នាំ២០២៤។ ក្នុងនោះ គណៈកម្មាធិការជាតិទន្លេមេគង្គវៀតណាម បានលើកឡើងពីកង្វល់ជាច្រើនអំពីលទ្ធភាពនៃផលប៉ះពាល់ឆ្លងដែនកើតចេញពីគម្រោងនេះមកលើខ្សែទឹកខាងក្រោម គឺតំបន់ដីសណ្ដនៅប្រទេសវៀតណាម។ លេខាធិការដ្ឋាននៃគណៈកម្មាធិការជាតិទន្លេមេគង្គវៀតណាមបានស្នើឱ្យលេខាធិការដ្ឋាននៃគណៈកម្មការទន្លេមេគង្គ ធ្វើការឱ្យបានដិតដល់ជាមួយគណៈកម្មាធិការជាតិទន្លេមេគង្គកម្ពុជា ដើម្បីទទួលបានព័ត៌មានបច្ចេកទេសលម្អិតអំពីគម្រោងនេះ និងឯកសារពាក់ព័ន្ធ។
កន្លងទៅ គណៈកម្មាធិការជាតិទន្លេមេគង្គកម្ពុជា កាលពីដើមខែសីហា ឆ្នាំ២០២៣ ធ្លាប់បានជូនដំណឹងជាផ្លូវការទៅគណៈកម្មការទន្លេមេគង្គអំពីគម្រោងសាងសង់ព្រែកជីកហ្វូណនតេជោនេះ។ ក៏ប៉ុន្តែ គណៈកម្មការទន្លេមេគង្គ ថា ព័ត៌មានដែលកម្ពុជាផ្តល់ឱ្យនេះមិនទាន់គ្រប់គ្រាន់អាចទទួលយកបាននៅឡើយទេ។
គណៈកម្មការទន្លេមេគង្គ (MRC) គឺជាអង្គការប្រចាំអនុតំបន់ទន្លេមេគង្គខ្សែទឹកខាងក្រោម ហើយមានប្រទេស៤ជាសមាជិក គឺកម្ពុជា ឡាវ ថៃ និងវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។