សហគមន៍ព្រៃមេត្តាធម្មជាតិ ស្នើសុំអភិបាលខេត្តកំពង់ស្ពឺឱ្យចាត់វិធានការអ្នកកាប់ឈើ ធ្វើឱ្យខូចព្រះពុទ្ធបដិមា
2022.09.26
ព្រះពុទ្ធបដិមា ១អង្គ ក្នុងចំណោម ៣អង្គ ដែលបាក់ខូចខាតដោយសារជនល្មើសកាប់ឈើដួលលើ កាលពីថ្ងៃទី២៤ ខែកញ្ញា ឆ្នាំ២០២២។
រូប៖ ហ្វេសប៊ុក Metta Nature 2022-09-24
ប្រជាសហគមន៍ព្រៃមេត្តាធម្មជាតិ ស្នើសុំដល់អភិបាលខេត្តកំពង់ស្ពឺ ឱ្យចាត់វិធានការទៅលើជនល្មើស ដែលបានលួចកាប់ឈើក្នុងព្រៃសហគមន៍ បណ្ដាលឱ្យដួលលើព្រះពុទ្ធបដិមាខូចចំនួន ៣អង្គ។ មន្ត្រីសង្គមស៊ីវិល ចាត់ទុកទង្វើរបស់ក្រុមជនល្មើសនេះថា ជាអំពើអសីលធម៌ គ្មានសាសនា ហើយស្នើសុំឱ្យថ្នាក់ដឹកនាំរដ្ឋាភិបាលបញ្ឈប់ការផ្ដល់ដីសម្បទានលើព្រៃសហគមន៍បន្តទៀត។បទល្មើសព្រៃឈើក្នុងព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិ នៅតែបន្តកើតមាន ទោះបីជាក្នុងពិធីបុណ្យភ្ជុំបិណ្ឌយ៉ាងណាក្ដី នៅក្នុងនោះ ព្រះពុទ្ធបដិមា ៣អង្គខូចខាតដោយសារជនល្មើសកាប់ឈើដួលលើ កាលពីថ្ងៃទី២៤ ខែកញ្ញា។
សមាជិកសហគមន៍ព្រៃមេត្តាធម្មជាតិ លោក ឡោក សុខលី ប្រាប់វិទ្យុអាស៊ីសេរីថា លោកសោកស្ដាយ និងសង្វេគនៅពេលឃើញព្រះពុទ្ធបដិមា ត្រូវបានបំផ្លាញដោយសារការកាប់ព្រៃឈើ។ លោក ឡោក សុខលី ចាត់ទុកសកម្មភាពបែបនេះថា ជាការប្រមាថមើលងាយដល់សាសនាជាតិរបស់ខ្លួន ហើយលោកស្នើសុំឱ្យអាជ្ញាធរពាក់ព័ន្ធមានវិធានការបន្ទាន់ និងដាក់ទោសដល់ជនល្មើសទាំងនេះឱ្យបានធ្ងន់ធ្ងរតាមច្បាប់។ ជាមួយគ្នានេះ លោក ឡោក សុខលី ស្នើសុំឱ្យអភិបាលខេត្តកំពង់ស្ពឺ ជួយអន្តរាគមន៍ការពារព្រៃសហគមន៍មេត្តាធម្មជាតិ ដោយកំណត់ព្រំប្រទល់ព្រៃសហគមន៍ឱ្យបានលឿន ដើម្បីរក្សាព្រៃនេះជាជម្រកដល់សត្វព្រៃ និងប្រជាសហគមន៍មូលដ្ឋានទាញយកអនុផលព្រៃឈើ៖ «ខ្ញុំចង់សំណូមពរទៅដល់អាជ្ញាធរ ស្ថាប័នពាក់ព័ន្ធទាំងអស់ ជួយអន្តរាគមន៍ ទៅលើការកាប់បំផ្លាញព្រៃសហគមន៍ហ្នឹង ព្រោះក្នុងសហគមន៍ គាត់ចង់ការពារឱ្យនៅគង់វង្ស ចង់ឱ្យបានសត្វព្រៃរស់នៅ នឹងប្រជាពលរដ្ឋមូលដ្ឋានគាត់បានអាស្រ័យផល បានមើលគោ មើលក្របី បានដកផ្សិត ដកបន្លែ»។
ជុំវិញរឿងនេះដែរ មន្ត្រីជាន់ខ្ពស់ប្រព័ន្ធផ្សព្វផ្សាយនៃសមាគមបណ្ដាញយុវជនកម្ពុជា លោក ម៉ា ចិត្រា ប្រាប់វិទ្យុអាស៊ីសេរីថា លោកតក់ស្លុតនៅពេលឃើញក្រុមជនល្មើសកាប់ព្រៃឈើ ដោយមានចេតនាបំផ្លាញព្រះពុទ្ធបដិមាដូច្នេះ។ លោក ម៉ា ចិត្រា ចាត់ទុកអ្នកដែលប្រព្រឹត្តិអំពើនេះ គឺជាក្រុមមនុស្សឥតសាសនា ដែលអាជ្ញាធរមូលដ្ឋានត្រូវមានចំណាត់ការបន្ទាន់។ លោក ម៉ា ចិត្រា បន្ថែមថា មូលហេតុដែលបណ្ដាលឱ្យបទល្មើសព្រៃឈើនៅក្នុងសហគមន៍មេត្តាធម្មជាតិនៅតែបន្តកើតមាន គឺបណ្ដាលមកពីខេត្តអនុវត្តច្បាប់ធូររលុង។ លោក ម៉ា ចិត្រា ស្នើសុំឱ្យថ្នាក់ដឹកនាំរដ្ឋាភិបាលឈប់ផ្ដល់ដីសម្បទានទៅដល់កងកម្លាំងប្រដាប់អាវុធ ទៅលើដីព្រៃសហគមន៍នេះ ព្រោះសកម្មភាពដូចនេះ មិនត្រឹមតែបណ្ដាលឱ្យប៉ះពាល់ដល់សិទ្ធិប្រជាពលរដ្ឋមូលដ្ឋានប៉ុណ្ណោះទេ ក៏ជាកត្តាជំរុញឱ្យមានបម្រែបម្រួលអាកាសធាតុផងដែរ៖ «ហើយបើយើងប្រៀបធៀបមើល ដូចពួកអ្នកធំមួយចំនួន ដីគាត់ច្រើនរាប់ពាន់ សិបហិកតារអីអ៊ីចឹងទៅ គួរណាតែយើងគិតគូរអាដីហ្នឹងមកឱ្យទាហានវិញ កុំទៅយកដីព្រៃ ដែលជាសម្បត្តិរបស់ជាតិទាំងអស់គ្នា យកទៅបំផ្លិចបំផ្លាញបែបហ្នឹង វាជារឿងមួយអត់សមរម្យ ហើយវាប៉ះពាល់ដល់បរិស្ថានប្រទេសយើងទាំងមូល ដូចយើងឃើញហើយ បម្រែបម្រួលអាកាសធាតុនេះ វាជាការចូលរួមយ៉ាងខ្លាំងណាស់ ទាក់ទងនឹងការកាប់ព្រៃឈើហ្នឹង»។
វិទ្យុអាស៊ីសេរីនៅពុំទាន់អាចទាក់ទងអភិបាលខេត្តកំពង់ស្ពឺ លោក វ៉ី សំណាង ដើម្បីសុំអត្ថាធិប្បាយជុំវិញរឿងនេះបានទេនៅថ្ងៃទី២៦ ខែកញ្ញា។ ទោះជាយ៉ាងណា លោក វ៉ី សំណាង បានឆ្លើយតបសារព័ត៌មាន វីអូឌី កាលពីថ្ងៃទី២៥ ខែកញ្ញា ថា លោកបានដឹងពីការលួចកាប់ឈើរហូតនាំឱ្យខូចបដិមាករព្រះពុទ្ធនេះហើយ ហើយលោកថា អាជ្ញាធរនឹងចាត់វិធានការលើក្រុមជនល្មើសក្រោយពីពិធីបុណ្យភ្ជុំបិណ្ឌ។
កាលពីខែសីហា ឆ្នាំ២០២១ កន្លងទៅ រដ្ឋាភិបាលបានចេញអនុក្រឹត្យ ឆ្វៀលដីព្រៃសហគមន៍ឧត្ដមស្រែពស់ ឬមេត្តាធម្មជាតិ ២៦២,២៤ហិកតារ ពីដែនជម្រកសត្វព្រៃភ្នំឱរ៉ាល់ ក្នុងភូមិពោធិ៍មាស ឃុំត្រពាំងជោរស្រុកឱរ៉ាល់ខេត្តកំពង់ស្ពឺ ដើម្បីបែងចែកជូនគ្រួសារយោធិន “ង-៧០" កងរថក្រោះ ៤១គ្រួសារ និង ពលរដ្ឋក្រីក្រជាច្រើនគ្រួសារទៀត សម្រាប់សង់លំនៅឋាន និងបង្កបង្កើនផល។
តែយ៉ាងណា មន្ត្រីសង្គមស៊ីវិលស៊ើបដឹងថា គម្រោងកាត់ឆ្វៀលដីព្រៃអភិរក្សនេះដើម្បីបែងចែកឱ្យគ្រួសារកងទ័ព គឺជាល្បិចអាក្រក់ បំណងច្បាមយកដីព្រៃលក់ប៉ុណ្ណោះ មិនមែនបែងចែកជូនពលរដ្ឋក្រីក្រ និងគ្រួសារយោធិនក្រីក្រពិតប្រាកដនោះទេ។ លើសពីនេះ ក្រុមអ្នកមានអំណាច បានយកឈ្មោះមន្ត្រីយោធា និង ពលរដ្ឋក្រីក្រ ជាខែល ដើម្បីស្នើសុំឱ្យរដ្ឋាភិបាលកាត់ឆ្វៀលដីព្រៃតំបន់នោះ ដើម្បីផលប្រយោជន៍ផ្ទាល់ខ្លួនតែប៉ុណ្ណោះ។
ព្រៃសហគមន៍មេត្តាធម្មជាតិមានផ្ទៃដី ៨៨៧ហិកតារ មានសត្វព្រៃកម្រជាច្រើនប្រភេទរស់នៅ ក្នុងនោះរួមមាន ទោច ស្វា ក្ងោក មាន់ព្រៃ និងឈ្លូសជាដើម។ បើទោះបីជាមានការសន្យាពីអភិបាលខេត្ត លោក វ៉ី សំណាង ថា នឹងការពារព្រៃសហគមន៍នេះ កាលដើមខែសីហា ឆ្នាំ២០២២ យ៉ាងណាក្ដី មកដល់ថ្ងៃនេះ ក្រុមអ្នកមានអំណាច មន្ត្រីយោធា និងឈ្មួញខិលខូច នៅតែបន្តសកម្មភាពកាប់ព្រៃឈើ និងទន្ទ្រានយកដីព្រៃនេះមិនឈប់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- ប្ដីស្ត្រីរងគ្រោះដោយគ្រូពេទ្យវះកាត់ដាច់ពោះវៀនសម្រេចប្ដឹងមន្ទីរសំរាកព្យាបាលបង្កបញ្ហានោះ
- កម្ពុជាផលិតដុំមាសបានជិត ៥តោន ចាប់តាំងពីអាជីវកម្មរុករករ៉ែ កាលពីពាក់កណ្តាលឆ្នាំ២០២១
- អ្នកវិភាគនិងយុវជនយល់ថា បណ្ឌិត យ៉ង សាំងកុមារ ចុះចូលគណបក្សកាន់អំណាចទំនងរឿងនយោបាយច្រើនជាងដើម្បីជួយវិស័យកសិកម្ម
- បណ្ឌិត យ៉ង សាំងកុមារ ចុះចូលជាមួយគណបក្សកាន់អំណាចដោយអះអាងថា ដើម្បីជួយវិស័យកសិកម្ម
- លោក សុន ឆ័យ ថា តុលាការរឹបអូសទ្រព្យសម្បត្តិរបស់លោកដោយបំពាននីតិវិធី
រឿងដែលគេអានច្រើនបំផុត
បរិស្ថាន
- រឿងមន្ត្រីក្រសួងកសិកម្មពាក់ព័ន្ធការជួញដូរស្វាក្ដាមដោយខុសច្បាប់ ទូតកម្ពុជាធ្វើអន្តរាគមន៍សុំឱ្យនៅក្រៅឃុំបណ្ដោះអាសន្ន
- ប្រជាសហគមន៍ខេត្តមណ្ឌលគិរីប្ដឹងអាជ្ញាធរមូលដ្ឋាន និងអ្នកពាក់ព័ន្ធទៅតុលាការ ករណី មិនអើពើការពារព្រៃសហគមន៍
- អាជ្ញាធរព្រះវិហារចាប់ខ្លួនអ្នកកាសែត៣នាក់ តែមិនអនុវត្តច្បាប់ចំពោះឈ្មួញទិញឈើខុសច្បាប់