ក្រសួងធនធានទឹក និងឧតុនិយម អំពាវនាវឲ្យប្រយ័ត្ន ចំពោះគ្រោះថ្នាក់រន្ទះបាញ់ ខ្យល់កន្ត្រាក់ ពីថ្ងៃទី៦ ដល់ថ្ងៃទី១២ ឧសភា
2019.05.06
លំនៅឋានពលរដ្ឋរស់នៅឃុំត្រពាំងក្រហម ស្រុកកូនមុំ ខេត្តរតនគិរី ដួលរលំដោយសារខ្យល់កន្ទ្រាក់ កាលពីល្ងាចថ្ងៃទី២៣ ខែមីនា ឆ្នាំ២០១៩។
រូបភាព៖ ហ្វេសបុក ក្រសួងធនធានទឹក និងឧតុនិយម
ក្រសួងធនធានទឹក និងឧតុនិយម អំពាវនាវឲ្យបង្កើនការប្រុងប្រយ័ត្ន ចំពោះបាតុភូតគ្រោះថ្នាក់រន្ទះបាញ់ ខ្យល់កន្ត្រាក់ នៅចន្លោះថ្ងៃទី៦ ដល់ថ្ងៃទី១២ ឧសភា ព្រោះចន្លោះថ្ងៃទាំងនេះ គឺជាដំណាក់កាលឆ្លងរដូវប្រាំង ចូលរដូវវស្សា។
ក្រសួងធនធានទឹក ជូនដំណឹងថា ដំណាក់កាលឆ្លងរដូវឆ្នាំនេះ ភ្លៀងនឹងធ្លាក់បន្តបន្ទាប់ ក្នុងកម្រិតពីខ្សោយទៅបង្គួរ។ តែអាចកន្លែងខ្លះ មានភ្លៀងធ្លាក់ច្រើន។ កន្លែងដែលមានភ្លៀងធ្លាក់មិនទាន់ប្រសើរនឹងមានបាតុភូតផ្គរ រន្ទះ និងខ្យល់កន្ត្រាក់ នៅតែបន្តកើតមានដដែល។
សីតុណ្ហភាពអតិបរមា សម្រាប់រយៈពេល ១សប្ដាហ៍ នៃដំណាក់ឆ្លងរដូវ គឺ ៣៤អង្សាសេ ទៅ ៣៧អង្សាសេ។ ក្រសួងធនធានទឹក ព្យាករថា ស្ថានភាពអាកាសធាតុមកដល់ពេលនេះ កាន់តែបង្ហាញឲ្យឃើញថា រដូវវស្សានឹងឈានចូលមកដល់នៅសប្ដាហ៍ទី៣ នៃខែឧសភា។
របាយការណ៍របស់គណៈកម្មការជាតិគ្រប់គ្រងគ្រោះមហន្តរាយបង្ហាញថា រយៈពេល ៤ខែ គឺចន្លោះពីថ្ងៃទី១ ខែមករា ដល់ថ្ងៃទី២២ ខែមេសា មនុស្សម្នាក់ស្លាប់ និង ៨នាក់រងរបួស ដោយសារខ្យល់កន្ត្រាក់ បាក់រលំផ្ទះសង្កត់ពីលើ។ ចំនួនផ្ទះរលំ និងខូចខាតធ្ងន់ធ្ងរ មាន ៣៨៩ខ្នង។ ខ្យល់កន្ត្រាក់វាយប៉ើងដំបូល និងខូចខាតផ្នែកខ្លះនៃផ្ទះ មានចំនួន ១.៩០០ខ្នង។ ក្រៅពីផ្ទះពលរដ្ឋ ក៏មានសំណង់ផ្សេងទៀត រងការខូចខាត ដោយសារខ្យល់កន្ត្រាក់ដែរ ដូចជា តូបលក់ដូរតាមឆ្នេរ កសិដ្ឋាន រោងម៉ាស៊ីនកិនស្រូវ សាលាឆទាន សាលាស្រុក និងសាខាគណបក្សនយោបាយជាដើម។
របាយការណ៍ដដែលបង្ហាញថា ចម្ការចេកប្រហែល ៦០ហិកតារ ដើមទុរេនជាង ៤០០ដើម និងដើមមៀនជិត ៣ពាន់ដើម នៅទូទាំងប្រទេស រងការខូចខាតដោយសារខ្យល់កន្ត្រាក់ដែរ។ មនុស្ស ១២នាក់ស្លាប់ និង ១៧នាក់រងរបួស ដោយសាររន្ទះបាញ់ និងផ្ទះ ៤ខ្នង រងការខូចខាតដោយសាររន្ទះបាញ់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- តំណាងរាស្ត្រសភាអឺរ៉ុប ព្រមានថា នឹងមិនមានការផ្លាស់ប្ដូរឡើយ បើអឺរ៉ុបមិនដាក់សម្ពាធលើរដ្ឋាភិបាលកម្ពុជា
- ដំណើររឿងចាប់ឃុំខ្លួន និងដោះលែងលោក យឹម ស៊ីណន