មន្ត្រីសង្គមស៊ីវិល និងប្រជាសហគមន៍ខេត្តកោះកុងអំពាវនាវឱ្យរដ្ឋាភិបាលទប់ស្កាត់បទល្មើសព្រៃកោងកាងឱ្យគ្រប់ជ្រុងជ្រោយ ដូចគ្នាទៅការបង្ក្រាបដីព្រៃលិចទឹក នៅតំបន់បឹងទន្លេសាបដូច្នេះដែរ។ ការលើកឡើងធ្វើឡើង ក្រោយពីដីព្រៃកោងកាងជាច្រើនតំបន់ នៅតែទទួលរងការកាប់បំផ្លាញទ្រង់ទ្រាយធំ ដោយគ្មានការអនុវត្តច្បាប់។
ប្រជាសហគមន៍ខេត្តកោះកុង និង មន្ត្រីសង្គមស៊ីវិលព្រួយបារម្ភ ពីជោគវាសនាព្រៃកោងកាងដែលជាប្រភពសេដ្ឋកិច្ចសំបូរបែបរបស់ពលរដ្ឋជាច្រើនពាន់គ្រួសារ កំពុងទទួលរងការកាប់ផ្ដួល ដើម្បីយកដីធ្វើជាកម្មសិទ្ធិជាបន្តបន្ទាប់ ដោយគ្មានការទប់ស្កាត់ និងអនុវត្តច្បាប់ឱ្យតឹងរ៉ឹងនៅឡើយទេ។
ប្រជាសហគមន៍អន់ចិត្ត ពីភាពព្រងើយកន្តើយ មិនបង្ក្រាបបទល្មើសព្រៃកោងកាងរបស់អាជ្ញាធរខេត្តកោះកុង បើទោះបីជាពួកគាត់ បង្ហាញភស្តុតាងបទល្មើសរាប់មិនអស់ក្ដី។
តំណាងពលរដ្ឋ រស់នៅឃុំជ្រោយស្វាយ ស្រុកស្រែអំបិល លោកស្រី ហៀប ឪ ប្រាប់វិទ្យុអាស៊ីសេរី នៅថ្ងៃទី២៥ កុម្ភៈថា ព្រៃកោងកាងទំហំជិត ១០០ហិកតារ ឋិតនៅភូមិជ្រោយស្វាយខាងលិច ត្រូវបានគេលបកាប់បំផ្លាញឱ្យក្លាយជាវាល នៅរយៈពេល ៨ខែចុងក្រោយនេះ ដើម្បីគ្រប់គ្រងជាកម្មសិទ្ធិ ដោយក្រុមអ្នកមានលុយមានអំណាចនៅពីក្រោយខ្នង។
លោកស្រីថា កន្លងទៅអ្នកភូមិរកឃើញភស្តុតាង និងកំណត់អត្តសញ្ញាណជនល្មើស ៧នាក់ បញ្ជូនឈ្មោះពួកគេ ទៅមន្ត្រីជំនាញតែរហូតមកទល់ពេលនេះ នៅតែគ្មានចំណាត់ការ។ រីឯសកម្មភាពកាប់ផ្ដួលព្រៃកោងកាង នៅតែបន្តកើតមានឥតស្រាកស្រាន្ត។ លោកស្រីគ្មានភាពកក់ក្ដៅ ចំពោះអាជ្ញាធរខេត្តនេះថា នឹងអាចការពារធនធានធម្មជាតិឱ្យគង់វង្សទាល់តែសោះ ដោយសារមន្ត្រីពាក់ព័ន្ធគ្មានភាពច្បាស់លាស់អនុវត្តច្បាប់៖ «ទទួលផលប្រយោជន៍ច្រើនណាស់ ណាមួយងាវ ក៏បានក្រាមថ្មពងទាំងអស់ ដល់ពេលកាប់បំផ្លាញព្រៃលិចទឹកហ្នឹងទៅ ហិនហោចទាំងអស់ បង្ការក្ដាមអី បំផ្លាញគ្រប់មុខនិយាយរួម។ បើថា យើងអត់ រកងាវអាចយកលក់បាន មួយម៉ឺន ២ម៉ឺន គ្រាន់ដោះទាល់។ ពិសេសក្ដាមថ្ម ដូចគ្នា»។
ប្រជាសហគមន៍ម្នាក់ទៀតរស់នៅស្រុកស្រែអំបិល លោក អុយ សារុន រៀបរាប់ថា ក្រុមជនល្មើសដែលធ្វើសកម្មភាពស៊ីឈ្នួលកាប់ព្រៃកោងកាងឱ្យអ្នកមានលុយ មានអំណាចមិនខ្លាចក្រែងច្បាប់នោះទេ ដែលជាហេតុធ្វើឱ្យសកម្មភាពកាប់ទន្ទ្រានកាន់តែរីកធំឡើងជារៀងរាល់ថ្ងៃ។ រីឯពាក្យបណ្ដឹងរបស់ពលរដ្ឋ ដែលពឹងឱ្យអាជ្ញាធរទប់ស្កាត់បទល្មើសព្រៃកោងកាង ពុំឃើញមានការដោះស្រាយនៅឡើយទេ ជាច្រើនខែមកហើយ៖ «ពិបាកដែលមិនដឹងថា និយាយម៉េចៗ ពលរដ្ឋសង្ឃឹមលើអាជ្ញាធរមូលដ្ឋាន ដល់ពេលអាជ្ញាធរស្រុក / ខែត្រគាត់មិនអើពើ ដល់ពេលនេះគាត់អស់សង្ឃឹម អត់មានដំណោះស្រាយជូនគាត់។ ពលរដ្ឋបានផល រកបានត្រីសាច់មួយគីឡូពីគីឡូ ដោះដូរនៅទីផ្សារ គាត់សង្ឃឹមដីហ្នឹង»។
វិទ្យុអាស៊ីសេរី មិនទាន់អាចទាក់ទងសុំការបំភ្លឺរឿងនេះ ពីអភិបាលរងខេត្ត និងជាអ្នកនាំពាក្យសាលាខេត្តកោះកុង លោក សុខ សុទ្ធី បាននៅឡើយទេ នៅថ្ងៃទី២៥ កុម្ភៈ ដោយទូរស័ព្ទហៅចូលច្រើនដងតែគ្មានអ្នកលើក។
ប៉ុន្តែអភិបាលរងខេត្តរូបនេះបានថ្លែងនៅចំពោះមុខពលរដ្ឋកាលពីចុងឆ្នាំ២០២១ ថា ពលរដ្ឋដណ្ដើមផលប្រយោជន៍គ្នាមិនស្មើ ទើបកើតមានរឿងរ៉ាវទាំងនេះ។ លោកបញ្ជាក់ថា ដីព្រៃកោងកាង ជាទ្រព្យសាធារណៈរបស់រដ្ឋនៅតែជាដីរដ្ឋដដែល បើទោះបីមានការកាប់រានក្ដី។
វិទ្យុអាស៊ីសេរី មិនទាន់អាចទាក់ទងសុំការបំភ្លឺរឿងនេះ ពីប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី និងអភិបាលខេត្ត កោះកុង អ្នកស្រី មិថុនា ភូថង បាននៅឡើយទេនៅថ្ងៃដដែលនេះ។
រីឯប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បដិសេធមិនបំភ្លឺរឿងនេះទេ ដោយលោករុញឱ្យអាស៊ីសេរីសួរទៅអាជ្ញាធរខេត្តកោះកុងវិញ។ តែយ៉ាងណាលោកផ្កាំឱ្យពលរដ្ឋមូលដ្ឋានអាចសរសេរញត្តិ បង្ហាញក្ដីកង្វល់របស់ខ្លួនផ្ញើចូលទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ប្រសិនបើមន្ត្រីមូលដ្ឋានមិនដោះស្រាយ៖ «សរសេរសំបុត្រចូលផេក របស់សម្ដេច តេជោទៅ អាចឆ្លើយ លោកនឹងចាត់ចែងក្រុមអ្នកឆ្លើយ»។
ប្រជាសហគមន៍រកឃើញថា ដីព្រៃកោងកាង ឋិតនៅចំណុច ភ្នំពយអគ្គីនេត្រ ទល់នឹងចំណុចព្រែករូងក្នុងឃុំព្រែកខ្សាច់ ស្រុកគិរីសាគរ ត្រូវក្រុមឈ្មួញ និងអាជ្ញាធរខ្លះឃុបឃិតគ្នាឈូសឆាយ ចាក់ដីលុប និងកាប់ទន្ទ្រានធ្វើអាជីវកម្មអស់ជាង ២រយហិកតារ នៅរយៈពេលជាង ២ឆ្នាំចុងក្រោយនេះ។ រីឯសហគមន៍តំបន់ការពារធម្មជាតិជ្រោយស្វាយ ក៏កំពុងប្រឈមការកាប់ទន្ទ្រានដីព្រៃកោងកាង អស់ ១០០ហិកតារ ដែលនៅរយៈពេលជាង ៥ខែចុងក្រោយនេះ។
ជុំវិញរឿងនេះមន្ត្រីសម្របសម្រួលសមាគមអាដហុក ខេត្តកោះកុងលោក ថោង ច័ន្ទតារា គិតថា បើគ្មានបទបញ្ជាផ្ទាល់ពីលោកនាយករដ្ឋមន្ត្រី ហ៊ុន សែន នោះទេ លោកគ្មានសង្ឃឹមថា នឹងអាចទប់ស្កាត់បទល្មើសព្រៃកោងកាងមានប្រសិទ្ធភាពយូរអង្វែង។ លោកអំពាវនាវឱ្យលោក ហ៊ុន សែន គួរតែចេញបញ្ជាផ្ទាល់ ដើម្បីដោះស្រាយបញ្ហានេះឱ្យមានប្រសិទ្ធភាព៖ «ជំនាញអាជ្ញាធរធ្វើការភ្នែកចាំងាកមើលតែលើទេ បើអាលើមិនមាត់ទេ អាក្រោមហ្នឹង ក៏ចេះតែ បើពលរដ្ឋធម្មតា មានចំណាត់ការ បើមើលឃើញ ខ្នងធំខ្សែធំចេះតែស្ងៀមៗ ឬមួយគេដោះស្រាយស្ងាត់ៗ របៀបសម្របសម្រួលផ្អាក បើចំណាត់ការផ្លូវច្បាប់ ជាមួយអ្នកមានខ្សែ មានខ្នង ដូចមិនដែលធ្វើចេះជាដុំកំភួនទេ»។
ពលរដ្ឋខេត្តកោះកុងរាប់ពាន់គ្រួសារចាត់ទុកព្រៃកោងកាងគឺជាឆ្នាំងបាយ និងជាប្រភពម្ហូបអាហារត្រីសាច់ និងក្ដាមខ្យងសំបូរបែបធ្វើឱ្យពួកគាត់មានជីវភាពធូរធារ មិនធ្វើចំណាកស្រុក។ អ្នកភូមិថា សម្រស់ព្រៃកោងកាង បង្កើតសោភ័ណភាពស្រស់បំព្រងគួរតែអាជ្ញាធរថែទាំឱ្យបានល្អ ដើម្បីទាញប្រយោជន៍ពីទេសភាពមកបម្រើវិស័យទេសចរណ៍ រក្សាការពារតម្លៃនៃធនធានធម្មជាតិឲ្យមាននិរន្តរភាព និងបង្កើតឱកាសការងារដល់ប្រជាសហគមន៍តាមរយៈភ្ញៀវទេសចរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។