មន្ត្រី​ខេត្ត​ព្រះសីហនុ​រួម​គ្នា​ធ្វើ​យុទ្ធនាការ​​សំអាត​អនាម័យ​តាម​ទី​សាធារណៈ

ដោយ ដែន អយុធ្យា
2015-08-27
Share
បរិស្ថាន ព្រះសីហនុ ៦២០ មន្ត្រី​រាជការ​ក្នុង​ខេត្ត​ព្រះសីហនុ ចុះ​សម្អាត​អនាម័យ​នៅ​តាម​ផ្លូវ​ឯករាជ្យ នៅ​ថ្ងៃ​ទី​២៧ សីហា ឆ្នាំ​២០១៥។
RFA/Den Ayuthyea

មន្ត្រី​នៅ​តាម​ស្ថាប័ន​ពាក់ព័ន្ធ​ខេត្ត​ព្រះសីហនុ រួមគ្នា​បើក​យុទ្ធនាការ​ចុះ​សំអាត​អនាម័យ​នៅ​តាម​ផ្លូវ​សាធារណៈ ប្រយោជន៍​រក្សា​សោភណភាព​ក្រុង ដើម្បី​រួម​ចំណែក​ទាក់ទាញ​កំណើន​ភ្ញៀវទេសចរ​ឲ្យ​ចូល​មក​ទស្សនា​ខេត្ត​នេះ​ច្រើន​ថែម​ទៀត។

មន្ត្រី​សង្គម​ស៊ីវិល​ខេត្ត​ព្រះសីហនុ បាន​គាំទ្រ​យុទ្ធនាការ​នេះ និង​បាន​អំពាវនាវ​ឲ្យ​ប្រជាពលរដ្ឋ អាជីវករ និង​វិស័យ​ឯកជន​ចូលរួម​ឲ្យ​បាន​ទាំង​អស់​គ្នា ដើម្បី​ទីក្រុង​ស្អាត និង​មាន​អនាម័យ​ល្អ។

ចាប់​ពី​ព្រលឹម​ថ្ងៃ​ព្រហស្បតិ៍ ទី​២៧ ខែ​សីហា គេ​សង្កេត​ឃើញ​ថ្នាក់ដឹកនាំ​នៅ​តាម​មន្ទីរ​ស្ថាប័ន​ពាក់ព័ន្ធ​នា​នានា​ក្នុង​ខេត្ត​ព្រះសីហនុ បាន​ដឹកនាំ​មន្ត្រី​ក្រោម​ឱវាទ​រៀងៗ​ខ្លួន ចុះ​សំអាត​អនាម័យ ឬ​រើស​សំរាម​ដែល​គេ​បោះចោល​រាយប៉ាយ នៅ​តាម​ផ្លូវ​សាធារណៈ តាម​ទីប្រជុំជន និង​តាម​តំបន់​ឆ្នេរ​សមុទ្រ​មួយ​ចំនួន។

អភិបាលរង​ខេត្ត​ព្រះសីហនុ លោក ផៃ ប៊ុនវណ្ណៈ ដែល​បាន​ដឹកនាំ​មន្ត្រី​ចុះ​សំអាត​អនាម័យ​នៅ​តាម​ផ្លូវ​មុខ​សាលាខេត្ត​នេះ បាន​ផ្ដល់​បទសម្ភាសន៍​ដល់​វិទ្យុ​អាស៊ីសេរី​ថា យុទ្ធនាការ​នេះ មាន​បំណង​បំផុស​ដល់​ផ្នែក​ពាក់ព័ន្ធ មាន​ទាំង​ស្ថាប័នរដ្ឋ វិស័យ​ឯកជន ពិសេស​ប្រជាពលរដ្ឋ ឲ្យ​ចូលរួម​សំអាត​បរិស្ថាន​នៅ​តាម​លំនៅឋាន​រៀងៗ​ខ្លួន​ជាប្រចាំ។

លោក​បន្ត​ថា យុទ្ធនាការ​សំអាត​បរិស្ថាន​ឲ្យ​មាន​សោភណភាព​ល្អ​របស់​មន្ត្រី​នៅ​តាម​ស្ថាប័ន​ពាក់ព័ន្ធ​ខេត្ត​ព្រះសីហនុ ដើម្បី​ជា​ការ​ទាក់ទាញ​ភ្ញៀវ​ទេសចរ​ឲ្យ​ចូល​មក​ទស្សនា​ខេត្ត​នេះ​ច្រើន​ថែម​ទៀត៖ «ពលរដ្ឋ​ដែល​រស់​នៅ​ក្រុង​ព្រះសីហនុ ទាំង​មូល​មេត្តា​ជួយ​សម្អាត​គ្នា​ឲ្យ​បាន​ស្អាត ដើម្បី​ឲ្យ​ក្រុង​របស់​យើង​ប្រកប​ដោយ​សោភណភាព»

លោក ផៃ ប៊ុនវណ្ណៈ បន្ថែម​ថា ដើម្បី​ឲ្យ​យុទ្ធនាការ​សំអាត​បរិស្ថាន​នា​មូលដ្ឋាន​ក្រុង​ទេសចរណ៍​មួយ​នេះ មាន​លទ្ធផល​ល្អ លោក​ស្នើ​ដល់​ក្រុមហ៊ុន​ប្រមូល​សំរាម​ស៊ីនទ្រី ត្រូវ​ចុះ​អនុវត្ត​ការងារ​ប្រមូល​សំរាម​របស់​ខ្លួន​ឲ្យ​បាន​ទៀងទាត់ ហើយ​ស្នើ​ឲ្យ​ប្រជាពលរដ្ឋ ឬ​ក្រុម​អាជីវករ​ត្រូវ​វេច​ខ្ចប់​កាកសំណល់​ឲ្យ​បាន​ត្រឹមត្រូវ និង​ចូលរួម​ឲ្យ​បាន​ទាំង​អស់​គ្នា។

ចំណែក​លោក សាមុត សុធារិទ្ធ ប្រធាន​មន្ទីរ​បរិស្ថាន​ខេត្ត​ព្រះសីហនុ ដែល​បាន​នាំ​មន្ត្រី​ក្រោម​ឱវាទ​ស្ថាប័ន​ខ្លួន ចុះ​រើស​សំរាម​តាម​ឆ្នេរ​សមុទ្រ ឬ​នៅ​ម្តុំ​រង្វង់​មូល​តោពីរ បាន​ឲ្យ​ដឹង​ថា យុទ្ធនាការ​សំអាត​បរិស្ថាន​តាម​ទី​សាធារណៈ​ពេល​នេះ អនុវត្ត​ទៅ​តាម​ការ​ចង្អុល​បង្ហាញ​របស់​ថ្នាក់ដឹកនាំ​ខេត្ត​ព្រះសីហនុ។ លោក​មាន​ជំនឿ​ថា តាម​រយៈ​យុទ្ធនាការ​នេះ ប្រជាពលរដ្ឋ ឬ​ភ្ញៀវ​ទេសចរ នឹង​មាន​ការ​យល់​ដឹង​ពី​សារសំខាន់​នៃ​ការ​ទុកដាក់​កាកសំណល់​សំរាម​បាន​ប្រសើរ​ជាង​ពេល​មុន៖ «ដើម្បី​បំផុស​ប្រជាពលរដ្ឋ​ឲ្យ​គាត់​ចូល​រួម​ទាំង​អស់​គ្នា ដើម្បី​ឲ្យ​ទីក្រុង​យើង​សមស្រប​ជា​ទីក្រុង​ទេសចរណ៍»

ស្រដៀង​គ្នា​ដែរ លោក ស៊ុន ថូង ប្រធាន​មន្ទីរ​សេដ្ឋកិច្ច និង​ហិរញ្ញវត្ថុ ខេត្ត​ព្រះសីហនុ ដែល​ដឹកនាំ​មន្ត្រី​ប្រមាណ ១០​នាក់ ចុះ​រើស​សំរាម​តាម​ផ្លូវ​ឯករាជ្យ ជាប់​ទីតាំង​ស្ថាប័ន​ខ្លួន បាន​ចាត់​ទុក​សំរាម ឬ​បញ្ហា​រក្សា​អនាម័យ​ជា​បញ្ហា​ចម្បង ដែល​ផ្នែក​ពាក់ព័ន្ធ​ត្រូវ​រួមគ្នា​ដោះស្រាយ​ឲ្យ​បានជា​ប្រចាំ ជាពិសេស​ប្រជាពលរដ្ឋ និង​ក្រុម​អាជីវករ​ត្រូវ​ចូលរួម​ទាំង​អស់​គ្នា៖ «កិច្ច​ការងារ​នេះ​ខ្ញុំ​សូម​អំពាវនាវ​ដល់​ប្រជាពលរដ្ឋ​ឲ្យ​ជួយ បើ​ប្រជាពលរដ្ឋ​មិន​ជួយ​ទេ ទីក្រុង​យើង​មិន​បាន​ស្អាត​ទេ»

​​ត្រង់​ចំណុច​នេះ លោក ឱ សារឿន ប្រធាន​មន្ទីរ​ព័ត៌មាន​ខេត្ត​ព្រះសីហនុ ឲ្យ​ដឹង​ថា យុទ្ធនា​ការ​ចុះ​សំអាត​អនាម័យ​នៅ​តាម​ទី​សាធារណៈ​ពេល​នេះ គឺ​មន្ត្រី​នៅ​តាម​ស្ថាប័ន ឬ​មន្ទីរ​ជំនាញ​ពាក់ព័ន្ធ​ក្រោម​ឱវាទ​ខេត្ត​នេះ បាន​ចុះ​អនុវត្ត​ទាំង​អស់​គ្នា។ លោក​បន្ត​ថា មិន​ថា តែ​ស្ថាប័ន​ស៊ីវិល​ទេ សូម្បី​ស្ថាប័ន​ប្រដាប់​អាវុធ​មាន​នគរបាល កងរាជអាវុធហត្ថ និង​កងទ័ព​ជាដើម ក៏​បាន​សហការ​ធ្វើ​ការងារ​សំអាត​អនាម័យ​តាម​ផ្លូវ​សាធារណៈ​នេះ​ដែរ។ លោក​ថា យុទ្ធនាការ​សំអាត​បរិស្ថាន​នេះ អាច​នឹង​ត្រូវ​អនុវត្ត​យ៉ាង​តិច ១​ខែ​ម្តង​នៅ​តាម​ស្ថាប័ន​នីមួយៗ។

មន្ត្រី​សម្របសម្រួល​អង្គការ​លីកាដូ ខេត្ត​ព្រះសីហនុ លោក ប៊ួន ណារិទ្ធ បាន​គាំទ្រ​យុទ្ធនាការ​សំអាត​បរិស្ថាន ផ្ដើម​ដោយ​មន្ត្រី​នៅ​តាម​ស្ថាប័ន ឬ​មន្ទីរ​នានា ខេត្ត​ជាប់​មាត់​សមុទ្រ​មួយ​នេះ ប៉ុន្តែ​ស្នើ​ឲ្យ​ការ​ចុះ​អនុវត្ត​នេះ​ឲ្យ​បានជា​ប្រចាំ​ខែ និង​បំផុស​ឲ្យ​ប្រជាពលរដ្ឋ​ចូលរួម​ទើប​ទទួល​បាន​ជោគជ័យ។

ទាក់ទង​បញ្ហា​នេះ​ដែរ លោក ឈិត សុខុន អភិបាល​ខេត្ត​ព្រះសីហនុ ធ្លាប់​ព្រមាន​ផាក​ពិន័យ​ទៅ​លើ​ប្រជាពលរដ្ឋ ឬ​ក្រុម​អាជីវករ​ទាំង​ឡាយ​ណា ដែល​បោះចោល​សំរាម​គ្មាន​សណ្ដាប់ធ្នាប់​នៅ​តាម​ទី​សាធារណៈ​នាំ​ឲ្យ​ប៉ះពាល់​ដល់​បរិស្ថាន និង​សោភណភាព​មូលដ្ឋាន​នេះ។ ទន្ទឹម​សារ​ព្រមាន​នេះ ក៏​បាន​បញ្ជូន​មន្ត្រី​ជំនាញ​ចុះ​អប់រំ​ពី​សារសំខាន់​នៃ​ការ​ទុកដាក់​កាក​សំណល់​រឹង​រាវ​ជូន​ប្រជាពលរដ្ឋ និង​ក្រុម​អាជីវករ​ជា​បន្តបន្ទាប់ ហើយ​ជំរុញ​ឲ្យ​មន្ត្រី​នៅ​តាម​មន្ទីរ ឬ​ស្ថាប័ន​ជំនាញ​នានា ចុះ​អនុវត្ត​ការងារ​ថែរក្សា​អនាម័យ​នេះ​ធ្វើ​ជា​គំរូ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល