សហគមន៍​ព្រៃ​ឡង់​ដុត​បំផ្លាញ​ឈើ​ប្រណីត​និង​សត្វ​ព្រៃ​ដែល​រឹប​អូស​បាន​ពី​ឈ្មួញ

ដោយ ម៉ែន សុធីរ
2016-12-29
អ៊ីម៉ែល
មតិ
Share
បោះពុម្ព
ក្រុម​ល្បាត​ដុត​បំផ្លាញ​គំនរ​ឈើ​ដែល​រឹប​អូស​បាន​ពី​ជន​ល្មើស​នៅ​ក្នុង​តំបន់​ព្រៃ​ឡង់ ខេត្ត​ក្រចេះ កាល​ពី​ថ្ងៃ​ទី​២២ ខែ​ធ្នូ ឆ្នាំ​២០១៦។ RFA/Men Sothyr
ក្រុម​ល្បាត​ដុត​បំផ្លាញ​គំនរ​ឈើ​ដែល​រឹប​អូស​បាន​ពី​ជន​ល្មើស​នៅ​ក្នុង​តំបន់​ព្រៃ​ឡង់ ខេត្ត​ក្រចេះ កាល​ពី​ថ្ងៃ​ទី​២២ ខែ​ធ្នូ ឆ្នាំ​២០១៦។ RFA/Men Sothyr
RFA/Men Sothyr

សហគមន៍​ការពារ​ព្រៃ​ឈើ​ទាំង​បួន​ខែត្រ បណ្ដាញ​ព្រះសង្ឃ​ឯករាជ្យ យុវជន និង​មន្ត្រី​បរិស្ថាន បាន​រួម​គ្នា​ធ្វើ​យុទ្ធនាការ​ចុះ​ល្បាត​ព្រៃ​ទ្រង់ទ្រាយ​ធំ​រយៈពេល ៤​យប់ ៥​ថ្ងៃ ដើម្បី​តាមដាន​ពី​ទិដ្ឋភាព​ព្រៃ​ឈើ​ក្នុង​តំបន់​ព្រៃ​ឡង់ និង​ទប់ស្កាត់​បទល្មើស​គ្រប់​ប្រភេទ រួម​ទាំង​ការ​បរបាញ់​សត្វ​ព្រៃ​ដោយ​ខុស​ច្បាប់​ផង។

យុទ្ធនាការ​នោះ សហគមន៍​ការពារ​ព្រៃ​ឡង់​ខែត្រ​ក្រចេះ បាន​ប្រើប្រាស់​ម៉ូតូ​ជា​មធ្យោបាយ​ធ្វើ​ដំណើរ ដោយ​ផ្ដើម​ពី​ចំណុច​ឃុំ​កំពង់ចាម ស្រុក​សំបូរ ខែត្រ​ក្រចេះ និង​កំណត់​ទិសដៅ​ជួប​គ្នា​ជាមួយ​សហគមន៍​ការពារ​ព្រៃ​ឡង់​ទាំង ៣​ខែត្រ​ផ្សេង​ទៀត នៅ​ចំណុច​វាលលិញ ខែត្រ​ព្រះវិហារ ជាប់​ព្រំប្រទល់​ខែត្រ​កំពង់ធំ។

តើ​សហគមន៍​ការពារ​ព្រៃ​ឡង់ ប្រទះ​ឃើញ​អ្វី​ខ្លះ​ក្នុង​យុទ្ធនាការ​នោះ?

សហគមន៍ ពលរដ្ឋ និង​បណ្ដាញ​ព្រះសង្ឃ​ឯករាជ្យ ទទួល​ស្គាល់​ថា បទល្មើស​ព្រៃ​ឈើ​ឋិត​ក្នុង​តំបន់​ព្រៃ​ឡង់ នៅ​តែ​បន្ត​កើត​មាន​ទាំង​ការ​បរបាញ់​សត្វ​ព្រៃ ការ​ដឹក​ជញ្ជូន​ឈើ​មាន​តម្លៃ និង​ការ​កាប់​ឈើ​រាន​យក​ដី​ជា​សម្បត្តិ​ឯកជន ជាដើម។ បញ្ហា​ទាំងនេះ ពួក​គេ​កំពុង​ខ្វល់ខ្វាយ​យ៉ាង​ខ្លាំង និង​អំពាវនាវ​ឲ្យ​រដ្ឋាភិបាល​ប្រញាប់​រក​មធ្យោបាយ​បញ្ឈប់​ជា​បន្ទាន់ ដើម្បី​ស្រោចស្រង់​ធនធាន​ធម្មជាតិ និង​ប្រព័ន្ធ​ជីវចម្រុះ​ដែល​នៅ​សេសសល់​ចុង​ក្រោយ។

ពួក​គេ​បាន​សហការ​គ្នា​ចុះ​ល្បាត​ព្រៃ​ឡង់​ទ្រង់ទ្រាយ​ធំ​កាល​ពី​ថ្ងៃ​ទី​២១ ដល់​ថ្ងៃ​ទី​២៥ ធ្នូ ដោយ​ប្រើប្រាស់​ម៉ូតូ ៣២​គ្រឿង ធ្វើ​ដំណើរ​រាប់​រយ​គីឡូម៉ែត្រ និង​បាន​បោះ​ជំរំ​ស្នាក់នៅ​ក្នុង​ព្រៃ។ យុទ្ធនាការ​នោះ​មាន​ព្រះសង្ឃ​ចូលរួម ៧​អង្គ បាន​សូត្រ​មន្ត​តាម​បែប​ព្រះពុទ្ធសាសនា​ចំពោះ​ដើម​ឈើ​ធំៗ​មាន​អាយុ​រាប់​រយ​ឆ្នាំ និង​បួងសួង​ឲ្យ​ដើម​ឈើ​នោះ​គង់វង្ស ព្រម​ទាំង​ឧទ្ទិស​ឋាន​ដល់​ដើម​ឈើ​ណា​ដែល​ត្រូវ​បាន​គេ​កាប់​បំផ្លាញ។

សមាជិក​បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម ព្រះតេជព្រះគុណ ណាំ ចាន់ថេន សង្កេត​ឃើញ​ថា សកម្មភាព​កាប់​បំផ្លាញ​ព្រៃ​ឈើ​នៅ​តំបន់​ព្រៃ​ឡង់​នៅ​ខែត្រ​ក្រចេះ ហាក់​ដូចជា​ស្ងប់ស្ងាត់​បន្តិច​មែន​ក្តី ក៏ប៉ុន្តែ​ចលនា​កាប់​បំផ្លាញ​ព្រៃ​ឡង់​នៅ​ខែត្រ​កំពង់ធំ ខែត្រ​ព្រះវិហារ នៅ​តែ​កើត​មាន​ដដែល ដូចជា​ការ​កាប់​ឈើ​រាន​យក​ដី​អស់​រាប់​ពាន់​ហិកតារ ឋិត​នៅ​ស្រុក​សណ្ដាន់ ខែត្រ​កំពង់ធំ។

បញ្ហា​នេះ​មាន​ន័យ​ថា ការ​អនុវត្ត​គោល​នយោបាយ​របស់​រាជ​រដ្ឋាភិបាល​ក្នុង​ការ​ការពារ​តំបន់​ព្រៃ​ឡង់ ហាក់​មាន​កម្រិត​ទន់​ជ្រាយ​នៅ​ឡើយ៖ «សូម​សម្ដេច​ត្រូវ​ដាក់​វិធានការ​ចំពោះ​មន្ត្រី​ខាង​ក្រសួង​ពាក់ព័ន្ធ ក្រសួង​រុក្ខាប្រមាញ់ និង​នេសាទ សុំ​ឲ្យ​សម្ដេច​មើល​ចំពោះ​មន្ត្រី​ហ្នឹង​ផង។ ពួក​មន្ត្រី​ទាំងនេះ​ហាក់​ដូចជា​មិន​បាន​អនុវត្ត​គោល​នយោបាយ​មិន​បាន​ពេញលេញ​ទេ»

ប្រធាន​សហគមន៍​ការពារ​ព្រៃ​ឡង់​ខែត្រ​ក្រចេះ លោក ថៃ ប៊ុនលៀង ឲ្យ​ដឹង​ថា យុទ្ធនាការ​ចុះ​ល្បាត​ព្រៃ​ឡង់​នេះ សហគមន៍​បាន​រឹប​អូស​ឈើ​ប្រភេទ​សុក្រំ​ពី​ឈ្មួញ​បាន​ជិត ១​ម៉ែត្រ​គូប និង​ដុត​បំផ្លាញ​សត្វ​ព្រៃ ដូចជា មាន់​ព្រៃ មាន់​ទោល ខ្លា​ត្រី និង​សត្វ​ត្រង ដែល​ឈ្មួញ​លួច​បរបាញ់​ខុស​ច្បាប់ និង​បាន​ឃាត់​ខ្លួន​ជន​ល្មើស​ម្នាក់​ឲ្យ​ធ្វើ​កិច្ចសន្យា​បញ្ឈប់។ លោក​បារម្ភ​ថា ជន​ល្មើស​នឹង​នៅ​តែ​បន្ត​លួច​ឆ្មក់​ចូល​កាប់​ឈើ​ដដែល ខណៈ​វិសាលភាព​ព្រៃ​ឈើ​ធំធេង ហើយ​ក្រុម​ល្បាត​របស់​សហគមន៍​មាន​គ្នា​តិចតួច មិន​អាច​បង្ក្រាប​បទល្មើស​បាន​គ្រប់​ជ្រុងជ្រោយ​នោះ​ទេ។

លោក ប៊ុនលៀង ស្នើ​ឲ្យ​រដ្ឋាភិបាល​បញ្ឈប់​ការ​ធ្វើ​អាជីវកម្ម​ម៉ាស៊ីន​អារ​ឈើ​ស្វ័យ​ប្រវត្តិ ឬ​ត្រង់ស៊ឺន័រ ដែល​កំពុង​ចរាចរណ៍​លក់​យ៉ាង​គគ្រឹកគគ្រេង​នៅ​លើ​ទីផ្សារ និង​បញ្ឈប់​ការ​នាំ​ចូល​គ្រឿង​បន្លាស់​ម៉ាស៊ីន​ទាំងនោះ។ លោក​ចាត់​ទុក​ម៉ាស៊ីន​អារ​ឈើ​ទាំងនោះ​ជា​ប្រភព​នៃ​វិនាសកម្ម​ព្រៃ​ឈើ​នៅ​កម្ពុជា ដែល​ទាមទារ​ឲ្យ​រដ្ឋាភិបាល​បង្កើត​ច្បាប់​ឲ្យ​តឹងរ៉ឹង ក្នុង​ការ​ប្រើប្រាស់​ម៉ាស៊ីន​ត្រង់ស៊ឺន័រ​អារ​ឈើ​គ្រប់​ប្រភេទ។ លោក​ថា មក​ទល់​ពេល​នេះ សហគមន៍​ពុំ​ទាន់​មាន​ជំនួយ​គាំទ្រ​ថវិកា​ជា​ដុំ​កំភួន​ក្នុង​ការ​ចុះ​ល្បាត​ព្រៃ​ឡង់​នោះ​ទេ មាន​តែ​ដើរ​កៀងគរ​ថវិកា​ពី​សប្បុរសជន និង​អង្គការ​មិន​មែន​រដ្ឋាភិបាល នៅ​គ្រា​ចុះ​ល្បាត​ព្រៃ​ម្តងៗ៖ «ចង់​ការពារ​ព្រៃ​ឲ្យ​បាន គឺ​មាន​តែ​បិទ​ត្រង់ស៊ឺន័រ​ចោល បើ​បិទ​មិន​បាន​ទេ គឺ​បិទ​គ្រឿង​បន្លាស់​នាំ​ចូល។ ចឹង​កាលណា​វា​ប្រើ​អស់ វា​អត់​មាន​ច្នៃ​អី​កើត​ទៀត​ទេ»

សកម្មជន​ការពារ​ព្រៃ​ឡង់​ម្នាក់​ទៀត​រស់នៅ​ភូមិ​អាចេន ឃុំ​កំពង់ចាម ស្រុក​សំបូរ ខែត្រ​ក្រចេះ គឺ​លោក សំ ណូ សង្កេត​ឃើញ​ថា រដ្ឋាភិបាល​បាន​ផ្តល់​ដី​សម្បទាន​សេដ្ឋកិច្ច​ដល់​ក្រុមហ៊ុន​ចំនួន​២ គឺ​ក្រុមហ៊ុន ឈុន ហុង និង​ក្រុមហ៊ុន​ស្ថានីយ​ស្ដារ​ព្រៃ​ឈើ​ឡើង​វិញ ដែល​មាន​ផ្ទៃដី​ជាង ៣​ម៉ឺន ៤​ពាន់​ហិកតារ (៣៤.០០៧​ហិកតារ) កំពុង​គំរាម​កំហែង​ធ្ងន់ធ្ងរ​ដល់​ព្រៃ​ឈើ​នៅ​តំបន់​ព្រៃ​ឡង់​ខែត្រ​ក្រចេះ និង​ខែត្រ​ស្ទឹងត្រែង ជាពិសេស​ដើម​ឈើ​ផលិត​ជ័រ​ទឹក​របស់​ជនជាតិ​ដើម​ភាគតិច​អស់​រាប់​ពាន់​ដើម។

លោក​បារម្ភ​ថា ប្រសិន​បើ​រដ្ឋាភិបាល​មិន​បញ្ឈប់​អាជ្ញាប័ណ្ណ​ក្រុមហ៊ុន​ទាំងនោះ​ទេ ព្រៃ​ឈើ​ក្នុង​តំបន់​ព្រៃ​ឡង់ អាច​នឹង​វិនាស​នៅ​ពេល​ខ្លី​ខាង​មុខ៖ «ខ្ញុំ​ចង់​ទទូច​ឲ្យ​រដ្ឋាភិបាល​សហការ​ជាមួយ​សហគមន៍​ព្រៃ​ឡង់ អនាគត​ទៅ​មុខ ព្រៃ​ឡង់​អាច​នៅ​ឋិតថេរ បើ​សិន​ជា​រដ្ឋាភិបាល​ធ្វើ​ដោយ​ប្រយោល សហគមន៍​ព្រៃ​ឡង់​ខ្ញុំ​មិន​អាច​ការពារ​បាន​ទេ ព្រោះ​សហគមន៍​ព្រៃ​ឡង់​ខ្ញុំ​គ្រាន់​តែ​មាន​កាតព្វកិច្ច​ការពារ​សម្បត្តិ​របស់​រដ្ឋ​ទេ»

យុទ្ធនាការ​ចុះ​ល្បាត​ព្រៃ​ឡង់​ដែល​ដឹកនាំ​ដោយ​ក្រុម​ព្រះសង្ឃ​ឯករាជ្យ​ដើម្បី​យុត្តិធម៌​សង្គម ចំនួន ៧​អង្គ អម​ដោយ​មន្ត្រី​បរិស្ថាន​ពីរ​រូប​ប្រដាប់​ដោយ​អាវុធ​ការពារ​សុវត្ថិភាព និង​បង្ក្រាប​បទល្មើស​ផ្សេង ដែល​ពួក​គេ​ជួប​ប្រទះ។

សមាជិក​បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម ព្រះតេជព្រះគុណ ណាំ ចាន់ថេន សម្លឹង​ឃើញ​ថា សហគមន៍​មាន​ការ​លំបាក​ច្រើន​ក្នុង​ការ​ចុះ​ល្បាត​ព្រៃ​ឡង់​នៅ​ឆ្ងាយ​ពី​លំនៅឋាន​ចាប់​ពី​ជាង ១០​គីឡូម៉ែត្រ រហូត​ដល់​រាប់​រយ​គីឡូម៉ែត្រ ដូចជា​ខូចខាត​ម៉ូតូ​ត្រូវ​ចំណាយ​ប្រាក់​ច្រើន​ក្នុង​ការ​ជួសជុល និង​ខ្វះខាត​ម្ហូប​អាហារ សម្ភារ​ចុះ​ល្បាត ជាដើម។ បញ្ហា​ទាំងនេះ ពួក​គេ​ចង់​ឲ្យ​រដ្ឋាភិបាល​រក​មធ្យោបាយ​សម្រួល​ការ​លំបាក​របស់​ពួក​គេ និង​ជា​ការ​លើក​ទឹក​ចិត្ត​ដល់​បេសកកម្ម​ការពារ​សម្បត្តិ​ធម្មជាតិ​របស់​ពលរដ្ឋ៖ «ចុះ​ល្បាត​ព្រៃ​ឈើ​មាន​ភាព​លំបាក​ខ្លាំង​ណាស់ រុក​ព្រៃ​ឆ្លង​អូរ​ឆ្លង​ស្ទឹង តាម​រយៈ​ម៉ូតូ ឬ​ដើរ​ដោយ​ថ្មើរ​ជើង។ សុំ​ឲ្យ​សម្ដេច​យល់​អាណិត​ពួក​គាត់​ផង។ ទី​១ សុំ​ឲ្យ​មន្ត្រី​បរិស្ថាន​សហការ​ឲ្យ​ខ្ជាប់។ ផល​វិបាក​របស់​គាត់​នៅ​ពេល​ដែល​គាត់​ចុះ​ល្បាត​នោះ ខ្លាច​បំផុត​រឿង​ក្រុម​ប្រព្រឹត្ត​បទល្មើស​វាយ​តប​មក​វិញ»

ព្រៃ​ឡង់​ឋិត​ក្នុង​ចន្លោះ​ខែត្រ​ចំនួន​បួន ដូចជា​ខែត្រ​ក្រចេះ ស្ទឹងត្រែង ព្រះវិហារ និង​ខែត្រ​កំពង់ធំ ត្រូវ​រដ្ឋាភិបាល​ប្រកាស​បង្កើត​ជា​ដែន​ជម្រក​សត្វ​ព្រៃ​កាល​ពី​ថ្ងៃ​ទី​៩ ខែ​ឧសភា ឆ្នាំ​២០១៦ មាន​ផ្ទៃដី​ជាង ៤៣​ម៉ឺន​ហិកតារ (៤៣១.៦៨៣​ហិកតារ) ដែល​ឋិត​ក្រោម​ការ​គ្រប់គ្រង​របស់​ក្រសួង​បរិស្ថាន។ ខ្លឹមសារ​អនុក្រឹត្យ​នោះ​បញ្ជាក់​ថា ក្រសួង​បរិស្ថាន មាន​កាតព្វកិច្ច​ធានា​កិច្ច​គាំពារ​បរិស្ថាន ការ​អភិរក្ស​ជីវចម្រុះ និង​កិច្ច​ការពារ​ធម្មជាតិ​ក្នុង​តំបន់​ព្រៃ​ឡង់ និង​ត្រូវ​សហការ​ជាមួយ​ក្រសួង​រៀបចំ​ដែនដី និង​ស្ថាប័ន​ពាក់ព័ន្ធ។

មន្ត្រី​បរិស្ថាន​នៅ​ខែត្រ​ក្រចេះ ដែល​ចូលរួម​យុទ្ធនាការ​នោះ​ដែរ គឺ​លោក ថន សំណាង ឲ្យ​ដឹង​ថា មន្ត្រី​បរិស្ថាន​ខែត្រ​ក្រចេះ កំពុង​ប្រឹងប្រែង​សហការ​ជាមួយ​សហគមន៍​ចុះ​ល្បាត និង​បង្ក្រាប​បទល្មើស​ឋិត​ក្នុង​ដែន​សមត្ថកិច្ច​របស់​ខ្លួន​ជា​ហូរហែ។ លោក​ប្ដេជ្ញា​ថា នឹង​ព្យាយាម​ការពារ​សម្បត្តិ​ធម្មជាតិ​ក្នុង​តំបន់​ព្រៃ​ឡង់​ដែល​ត្រូវ​បាន​ការពារ​ដោយ​ច្បាប់ និង​អនុក្រឹត្យ ដោយ​សហការ​ជាមួយ​សហគមន៍ និង​ស្ថាប័ន​ពាក់ព័ន្ធ រួម​គ្នា​ទប់ស្កាត់​បទល្មើស​គ្រប់​ប្រភេទ​នៅ​តំបន់​នោះ។ លោក​អះអាង​ថា បទល្មើស​ភាគច្រើន គឺ​ឈ្មួញ​មក​ពី​ខែត្រ​កំពង់ធំ លួច​ចូល​កាប់​ឈើ​ក្នុង​តំបន់​ព្រៃ​ឡង់​នៅ​ខែត្រ​ក្រចេះ។

ពលរដ្ឋ​រស់នៅ​ភូមិ​ទន្សោងធ្លាក់ ឃុំ​កំពង់ចាម លោក យ៉ា ស្ម័គ្រ កត់​សម្គាល់​ថា ដើម​ឈើ​ដែល​មាន​មុខ​កាត់​ធំៗ ពុំ​សូវ​មាន​វត្តមាន​ក្នុង​តំបន់​ព្រៃ​ឡង់​ទេ ព្រោះ​ត្រូវ​ឈ្មួញ និង​ក្រុមហ៊ុន​លួច​កាប់​ជា​បន្តបន្ទាប់ ហើយ​នៅ​សេសសល់​ដើម​ឈើ​ប្រភេទ​លេខ​១ មាន​តិចតួច។ លោក​បារម្ភ​ថា ដើម​ឈើ​ផលិត​ជ័រ​ទឹក​របស់​អ្នក​ភូមិ​ដែល​ធ្លាប់​ប្រមូល​ផល​ចាប់​ពី ២០​ដើម​ដល់ ៤០០​ដើម ក៏​កំពុង​រង​ការ​គំរាម​កំហែង​ដែរ ខណៈ​ក្រុម​ឈ្មួញ និង​ក្រុមហ៊ុន បាន​លួច​កាប់​ជា​បន្តបន្ទាប់៖ «ព្រួយ​បារម្ភ​ថា ប្រសិន​បើ​សហគមន៍​ការពារ​ព្រៃ​ឡង់​ទាំង​បួន​ខែត្រ​នេះ​ធ្វើ​ដោយ​ឯងៗ ដោយ​រដ្ឋាភិបាល​ធ្វើ​ប្រយោល ហើយ​រដ្ឋាភិបាល​គិត​ខ្លួន​ឯង​ថា មតិ​របស់​គាត់​ត្រឹមត្រូវ​ហើយ តែ​ខាង​ក្រោម​គេ​មិន​អនុវត្ត​តាម​ទេ»

សហគមន៍​ការពារ​ព្រៃ​ឡង់​ខែត្រ​ក្រចេះ សង្កេត​ឃើញ​ថា សត្វ​ដំរី​មាន​វត្តមាន​ក្នុង​តំបន់​ព្រៃ​ឡង់​ប្រហែល ៣០​ក្បាល សត្វ​ខ្ទីង​ចាប់​ពី ៥០ ទៅ ៦០​ក្បាល សត្វ​ទន្សោង​ចាប់​ពី ២០ ទៅ ៣០​ក្បាល និង​សត្វ​ខ្លា​ដំបង​មាន​ប្រហែល ២ ទៅ ៤​ក្បាល ហើយ​សត្វ​មាន​ចំនួន​ច្រើន​ជាង​គេ គឺ​សត្វ​ជ្រូក​ព្រៃ និង​សត្វ​ឈ្លូស។ ក្រៅ​ពី​នេះ មាន​សត្វ​ជាច្រើន​ប្រភេទ​ដែល​សហគមន៍​ពុំ​បាន​ជួប​ប្រទះ ហើយ​សង្ស័យ​ថា​អាច​នឹង​ដាច់​ពូជ ដូចជា​សត្វ​គោ​ព្រៃ សត្វ​ខ្លា​រខិន ខ្លា​ឃ្មុំ និង​សត្វ​រមាស ជាដើម។

សហគមន៍​ការពារ​ព្រៃ​ឡង់​ខែត្រ​ក្រចេះ អះអាង​ថា ព្រៃ​ឡង់​ឋិត​ក្នុង​ស្រុក​ព្រែកប្រសព្វ មាន​ផ្ទៃដី​ជាង ៣​ពាន់​ហិកតារ ក៏​រង​ការ​កាប់​ទន្ទ្រាន​យក​ដី​ធ្វើ​អាជីវកម្ម ដោយ​អ្នក​មាន​ឥទ្ធិពល​អស់​ជាង ១​ពាន់​ហិកតារ​នៅ​ប៉ុន្មាន​ឆ្នាំ​ចុង​ក្រោយ​នេះ។ សហគមន៍​ការពារ​ព្រៃ​ឡង់​ទាំង​បួន​ខែត្រ ទទូច​ឲ្យ​រដ្ឋាភិបាល​ប្រញាប់​បោះ​បង្គោល​កំណត់​ព្រំប្រទល់​ព្រៃ​ឡង់​ជា​ព្រៃ​អភិរក្ស​ទាំង​បួន​ខែត្រ​ឲ្យ​ច្បាស់លាស់ ប្រយោជន៍​បង្ក​លក្ខណៈ​ងាយ​ស្រួល​អភិរក្ស។

រដ្ឋាភិបាល​គ្រោង​បញ្ជូន​មន្ត្រី​បរិស្ថាន ១៥​នាក់​បន្ថែម​ទៀត​ទៅ​ការពារ​ព្រៃ​ឡង់​នៅ​ខែត្រ​ក្រចេះ ២០​នាក់​ទៅ​ខែត្រ​ស្ទឹងត្រែង ២០​នាក់​ទៅ​ខែត្រ​កំពង់ធំ និង ២០​នាក់​ទៀត​ទៅ​ខែត្រ​ព្រះវិហារ អំឡុង​ឆ្នាំ​២០១៧។ ទោះ​ជា​យ៉ាង​ណា ប្រជា​សហគមន៍​ការពារ​ព្រៃ​ឈើ​ព្រួយ​បារម្ភ​ថា ចំនួន​មន្ត្រី​បរិស្ថាន​ទាំងនោះ មិន​អាច​បំពេញ​តម្រូវ​ការ​គ្រប់គ្រាន់​ក្នុង​ការ​បង្ក្រាប​បទល្មើស​ក្នុង​តំបន់​ព្រៃ​ឡង់​គ្រប់​ជ្រុងជ្រោយ​នោះ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Kem Ley

ពី California, USA

Don’t burn the wood, give to the poor people or build the home for people those don’t have the home or give to the temples.

Dec 29, 2016 07:23 PM

គេហទំព័រ​ទាំងមូល