មនុស្ស​២​នាក់​របួស​និង​ផ្ទះ​ជាង​១៦០​ខ្នង​ខូចខាត​ដោយសារ​ខ្យល់​កន្ត្រាក់​នៅ​សៀមរាប

ដោយ ហង្ស សាវយុត
2015-04-23
Share
ខ្យល់​ព្យុះ សៀមរាប ៦២០ ផ្ទះ​ប្រជាពលរដ្ឋ​នៅ​ភូមិ​បឹងដូនប៉ា សង្កាត់​ស្លក្រាម ក្រុង​សៀមរាប ដែល​ខូចខាត​ដំបូល​ដោយសារ​ខ្យល់​កន្ត្រាក់​កាល​ពី​ល្ងាច​ថ្ងៃ​ទី​២២ ខែ​មេសា ឆ្នាំ​២០១៥។ រូបថត​ថ្ងៃ​ទី​២៣ ខែ​មេសា ឆ្នាំ​២០១៥
RFA/Hang Savyouth

ខ្យល់​កន្ត្រាក់​បាន​បោកបក់​ខ្លាំង​នៅ​ក្នុង​ទីក្រុង​សៀមរាប នៅ​ស្រុក​ក្រឡាញ់ នា​ភាគ​ខាង​លិច និង​ស្រុក​ជីក្រែង នា​ភាគ​ខាង​កើត​នៃ​ទី​រួម​ខេត្ត​សៀមរាប កាល​ពី​វេលា​ល្ងាច​ថ្ងៃ​ពុធ ទី​២២ ខែ​មេសា កន្លង​ទៅ។ ខ្យល់​កន្ត្រាក់​នោះ បាន​កើត​ឡើង​បន្ទាប់​ពី​មាន​ភ្លៀង​កក់​ខែ​ដើម​ឆ្នាំ​ធ្លាក់​សន្ធាប់​យ៉ាង​ខ្លាំង ហើយ​លាយឡំ​ជាមួយ​នឹង​កម្ទេច​ព្រិល​តូចៗ​ផង។

អាជ្ញាធរ​ខេត្ត​សៀមរាប អះអាង​ថា ខ្យល់​កន្ត្រាក់​ដែល​បក់​បោក​ខ្លាំង​ទៅ​លើ​ក្រុង​សៀមរាប ស្រុក​ក្រឡាញ់ និង​ស្រុក​ជីក្រែង កាល​ពី​ល្ងាច​ថ្ងៃ​ទី​២២ ខែ​មេសា កន្លង​ទៅ បាន​ធ្វើ​ឲ្យ​ខូចខាត​ទ្រព្យ​សម្បត្តិ​ប្រជាពលរដ្ឋ​ជាច្រើន។

របាយការណ៍​បឋម​បាន​បង្ហាញ​ថា គ្រោះ​ធម្មជាតិ​បំផ្លាញ​ផ្ទះ​សម្បែង​ជាង ១៦០​ខ្នង ធ្វើ​ឲ្យ​ប្រជាពលរដ្ឋ ២​នាក់​រង​របួស រថយន្ត​ចំនួន ៣​គ្រឿង​បាន​ខូចខាត និង​បង្គោល​អគ្គិសនី​ចំនួន ១៦​ដើម​ដែល​បន្ត​មក​ពី​ខេត្ត​បន្ទាយមានជ័យ បាន​រលំ​ដួល។

អភិបាល​រង​ខេត្ត​សៀមរាប ទទួល​បន្ទុក​គ្រប់គ្រង​គ្រោះ​មហន្តរាយ គឺ​លោក ប៊ុន ថាឬទ្ធិ។ លោក​មាន​ប្រសាសន៍​ថា នៅ​ឃុំ​ជីក្រែង និង​ឃុំ​កំពង់ក្ដី ខ្យល់​បាន​បោក​បក់​ខ្លាំង​បំផ្លាញ​ផ្ទះ​សម្បែង​របស់​ប្រជាពលរដ្ឋ​ជិត ១០០​ខ្នង។ អភិបាល​រង​ដដែល​បញ្ជាក់​ថា ក្រៅ​ពី​នោះ ខ្យល់​កន្ត្រាក់​បាន​បោក​បក់​បំផ្លាញ​ផ្ទះ​សម្បែង​ជាច្រើន​ខ្នង​ទៀត​នៅ​ក្នុង​ទីក្រុង​សៀមរាប និង​ស្រុក​ក្រឡាញ់៖ «នៅ​ឃុំ​ជីក្រែង មាន​របើក​ដំបូល​ផ្ទះ​ប្រហែល​ជិត ១០០​ខ្នង រលំ​តិចតួច​ទេ ប៉ុន្តែ​ប៉ើង​ដំបូល​ច្រើន​ជាង។ នៅ​ឃុំ​កំពង់ក្ដី ខ្លះ ហើយ​ព្រឹក​មិញ​នេះ​ស្នងការ​បាន​ចាត់​កម្លាំង​ប៉ូលិស​ក្រុង​ប្រហែល​ជា ៤០​នាក់ ទៅ​ចូលរួម​ជួយ​រើ​ផ្ទះ​ខូចខាត​ទីនោះ»

ចំណែក​អភិបាល​ស្រុក​ក្រឡាញ់ លោក ជឿន ជាន ឲ្យ​ដឹង​ថា ខ្យល់​កន្ត្រាក់​បាន​បក់​បោក​ខ្លាំង​ទៅ​លើ​ឃុំ​ចំនួន​៣ នៅ​ក្នុង​ស្រុក​របស់​លោក។ ឃុំ​ទាំង​នោះ​មាន ឃុំ​កំពង់ថ្កូវ ឃុំ​ក្រឡាញ់ និង​ឃុំ​ជន្លាស់ដៃ ព្រម​ទាំង​បណ្ដាល​ឲ្យ​បង្គោល​ភ្លើង​ដែល​ត​ពី​ខេត្ត​បន្ទាយមានជ័យ ទៅ​ខេត្ត​សៀមរាប ចំនួន ១៦​ដើម បាន​ដួល​រំលំ​ដាច់​ចរន្ត​អគ្គិសនី​ផង៖ «ទ្រព្យ​សម្បត្តិ​របស់​ប្រជាពលរដ្ឋ​ទាំង ៣​ឃុំ​នេះ ប៉ះពាល់​ផ្ទះ​សម្បែង​រហូត​ដល់ ៣៩​ខ្នង ក្នុង​នោះ​ប៉ើង​ដំបូល ៣៤​ខ្នង ហើយ​រលំ​អស់​ផ្ទះ ៥​ខ្នង។ របួស​មនុស្ស ២​នាក់ រថយន្ត​ត្រូវ​ផ្ទះ​រលំ​សង្កត់​ខូច​អស់ ៣​គ្រឿង»

ផ្ទះ​ប្រជាពលរដ្ឋ​នៅ​ភូមិ​បឹងដូនប៉ា សង្កាត់​ស្លក្រាម ក្រុង​សៀមរាប ដែល​ខូចខាត​ដំបូល​ដោយសារ​ខ្យល់​កន្ត្រាក់​កាល​ពី​ល្ងាច​ថ្ងៃ​ទី​២២ ខែ​មេសា ឆ្នាំ​២០១៥។ រូបថត​ថ្ងៃ​ទី​២៣ ខែ​មេសា ឆ្នាំ​២០១៥
ផ្ទះ​ប្រជាពលរដ្ឋ​នៅ​ភូមិ​បឹងដូនប៉ា សង្កាត់​ស្លក្រាម ក្រុង​សៀមរាប ដែល​ខូចខាត​ដំបូល​ដោយសារ​ខ្យល់​កន្ត្រាក់​កាល​ពី​ល្ងាច​ថ្ងៃ​ទី​២២ ខែ​មេសា ឆ្នាំ​២០១៥។ រូបថត​ថ្ងៃ​ទី​២៣ ខែ​មេសា ឆ្នាំ​២០១៥
RFA/Hang Savyouth

នៅ​ភូមិ​បឹងដូនប៉ា សង្កាត់​ស្លក្រាម ក្រុង​សៀមរាប ខ្យល់​កន្ត្រាក់​បាន​បោក​បក់​ខ្លាំង​បណ្ដាល​ឲ្យ​ផ្ទះ​ខ្លះ​ត្រូវ​ប៉ើង​ដំបូល ផ្ទះ​ខ្លះ​ទៀត​ទ្រេត​ខូចខាត និង​ដើម​ឈើ​ជាច្រើន​ដើម​ដួល​រលំ។

បុរស​ចំណាស់​ម្នាក់​នៅ​ភូមិ​បឹងដូនប៉ា ក្នុង​ចំណោម​អ្នក​ភូមិ​ជាច្រើន​ទៀត​ដែល​ផ្ទះ​ខូចខាត​ដោយសារ​ខ្យល់ គឺ​លោក ស៊ឹម អាត់ មាន​ប្រសាសន៍​ថា ខ្យល់​បាន​បក់​បោក​ខ្លាំង​មក​លើ​តំបន់​ពួក​គាត់​រស់នៅ កាល​ពី​វេលា​ម៉ោង​ជាង ៣​រសៀល​ថ្ងៃ​ទី​២២ ខែ​មេសា។ គាត់​បញ្ជាក់​ថា នេះ​ជា​លើក​ដំបូង​ក្នុង​ជីវិត​របស់​គាត់​ដែល​ជួប​ហេតុការណ៍​គួរ​ឲ្យ​ភ័យ​រន្ធត់៖ «ភ្លៀង​ធ្លាក់​ព្រិល​ខ្យល់​កួច​ខ្លាំង​មែន​ទែន! មើល​ទៅ​ស័ង្កសី​ក៏​ហើរ​ព្រោង​ទៅ​លើ​ទៅ​ទាំង​ផ្ទាំង ទាំង​ផ្លាន​ទាំង​អី​មើល​សណ្ដក​ផ្លាន​អស់​ហើយ។ ដើម​ត្នោត​បាក់​មក​គ្រឹម កូន​ចេះ​តែ​ហៅ​ពុក​រត់ៗ»

ប្រធាន​សាខា​កាកបាទ​ក្រហម​កម្ពុជា ខេត្ត​សៀមរាប លោក ស៊ុំ សំអន ឲ្យ​ដឹង​ថា ខ្យល់​កន្ត្រាក់​បាន​បំផ្លាញ​ផ្ទះ​សម្បែង​ប្រជាពលរដ្ឋ​ក្នុង​ទីក្រុង​សៀមរាប ទាំង​រលំ​ទាំង​របើក​ដំបូល គឺ​ចំនួន ៣០​ខ្នង។ ប្រធាន​សាខា​កាកបាទ​ក្រហម​រូប​នេះ បាន​ចាត់​ទុក​ថា វា​ជា​គ្រោះ​មហន្តរាយ​ធម្មជាតិ​ដែល​មនុស្ស​នៅ​ទូទាំង​ពិភពលោក​កំពុង​ប្រឈម​មុខ​នា​ពេល​បច្ចុប្បន្ន។

ខ្យល់​កន្ត្រាក់​នេះ ក្រៅ​តែ​ពី​ធ្វើ​ឲ្យ​ផ្ទះ​សម្បែង​ជាច្រើន​រង​ការ​ខូចខាត ក៏​កំពុង​ធ្វើ​ឲ្យ​ប្រជាពលរដ្ឋ​ជាច្រើន​ក្នុង​ខេត្ត​សៀមរាប គ្មាន​ភ្លើង​អគ្គិសនី​ប្រើប្រាស់​ទេ។ តំបន់​ខ្លះ​ក្នុង​ទីក្រុង​បាន​ដាច់​ចរន្ត​អគ្គិសនី​រយៈពេល ២២​ម៉ោង​ហើយ គិត​ចាប់​ពី​ម៉ោង ៥ និង ៣០​នាទី​ល្ងាច​ថ្ងៃ​ទី​២២ រហូត​មក​ដល់​ម៉ោង ៤​រសៀល​ថ្ងៃ​ទី​២៣ ខែ​មេសា។

នេះ​ជា​លើក​ទី​ពីរ​ហើយ​ដែល​ខ្យល់​កន្ត្រាក់ បាន​បក់​បោក​បំផ្លាញ​ផ្ទះ​សម្បែង​ប្រជាពលរដ្ឋ​ក្នុង​ខេត្ត​សៀមរាប ធ្វើ​ឲ្យ​ខូចខាត​យ៉ាង​ច្រើន។

កាល​ពី​ដើម​ខែ​មេសា កន្លង​ទៅ ខ្យល់​កន្ត្រាក់​បាន​បោកបក់​បំផ្លាញ​ផ្ទះ​សម្បែង​ប្រជាពលរដ្ឋ​នៅ​ស្រុក​វ៉ារិន ចម្ងាយ​ជាង ១០០​គីឡូម៉ែត្រ​ភាគ​ខាង​ជើង​ឆៀង​ខាង​លិច​ពី​ទី​រួម​ខេត្ត​សៀមរាប បណ្ដាល​ឲ្យ​ខូចខាត​ផ្ទះ​ចំនួន ៣៦​ខ្នង​ម្ដង​មក​ហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល