សហគមន៍ព្រៃឡង់ខេត្តស្ទឹងត្រែងទាមទារដកអាជ្ញាប័ណ្ណក្រុមហ៊ុន ស៊ីបាយអូថេក និងក្រុមហ៊ុនអង្គរប្លាយវូដ
2019.07.31
ពលរដ្ឋរស់នៅជាប់តំបន់ព្រៃឡង់ក្នុងខេត្តស្ទឹងត្រែង និងសហគមន៍ព្រៃឡង់ទាមទារឲ្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ដកអាជ្ញាប័ណ្ណក្រុមហ៊ុន ស៊ីបាយអូថេក (Ci-Biotech Co., Ltd.) និងអនុវត្តច្បាប់លើក្រុមហ៊ុននេះ។ ពួកគេអះអាងថា មានភាពមិនប្រក្រតីជាច្រើន ដែលក្រុមហ៊ុននេះអនុវត្តផ្ទុយពីកិច្ចសន្យាវិនិយោគក្នុងនោះបានកាប់បំផ្លាញដើមច្បោះជ័រជាច្រើនពាន់ដើម លប់ទឹកអូរធម្មជាតិ និងកាប់ឈើក្នុងតំបន់ព្រៃការពារធម្មជាតិធ្វើអាជីវកម្មជាដើម។
សហគមន៍ការពារព្រៃឡង់ខេត្តស្ទឹងត្រែង និង ខេត្តក្រចេះ ប្រកាសជំហរជាថ្មីទៀតប្រឆាំងវត្តមានក្រុមហ៊ុន ស៊ីបាយអូថេក ដែលធ្វើសកម្មភាពប្រមូលឈើខ្នាតធំជាប់ដែនជម្រកសត្វព្រៃឡង់នៅចំណុចដំបូកស ក្នុងឃុំបឹងចារ ស្រុកសំបូរ ក្នុងបំណងកាប់ឈើធំៗ ចេញពីដែនជម្រកសត្វព្រៃឡង់ និងលួចកាប់ដើមច្បោះជ័រអ្នកស្រុកអស់ជាច្រើនពាន់ដើម។
កាលពីថ្ងៃទី២៨ កក្កដា តំណាងពលរដ្ឋរស់នៅជាប់តំបន់ព្រៃឡង់ខេត្តស្ទឹងត្រែងជាង ១០នាក់ បានលើកបដា ស្នើឲ្យរដ្ឋាភិបាល និងគណៈកម្មការជាតិ ស៊ើបអង្កេតពីភាពមិនប្រក្រតី អាជីវកម្មឈើក្រុមហ៊ុនស៊ីបាយអូថេក នៅគ្រាដែលពួកគេរកឃើញថា វត្តមានក្រុមហ៊ុននេះធ្វើឲ្យបាត់បង់ទំហំព្រៃឈើធំធេង ក្នុងតំបន់ព្រៃឡង់ ជាពិសេសដើមច្បោះជ័ររបស់អ្នកស្រុក។
ពួកគេព្រមានថា ប្រសិនបើគណៈកម្មការជំនាញ និងក្រសួងពាក់ព័ន្ធ នៅតែបណ្តោយឲ្យក្រុមហ៊ុននេះដំណើរការអាជីវកម្មឈើទៀត មានន័យថា ស្ថាប័នកំពូលថ្នាក់ជាតិរួមទាំងរដ្ឋាភិបាលផង បានរួមចំណែកបំផ្លាញទំហំព្រៃឡង់ធំធេង និងបំផ្លាញជីវភាពប្រជាជន ដោយសារបាត់បង់រណ្ដៅជ័រទឹក។
តំណាងសហគមន៍ការពារព្រៃឡង់ ខេត្តស្ទឹងត្រែង លោក យឹម សុភ័ក្រ្ត ឲ្យដឹងនៅថ្ងៃទី៣០ កក្កដា មានកំហុសជាច្រើនដែលក្រុមហ៊ុន អនុវត្តខុសច្បាប់រួមមាន ញុះញង់ឲ្យពលរដ្ឋលក់ដើមច្បោះ កៀរគរអ្នកភូមិឲ្យស៊ីឈ្នួលចូលព្រៃអភិរក្សកាប់ឈើលក់ឲ្យខ្លួន ឈូសឆាយព្រៃឈើ នៅតាមបណ្ដោយមាត់អូរដែលជាជម្រកសត្វព្រៃរស់នៅ និងលួចកាប់ដើមច្បោះអ្នកស្រុកអស់ជាច្រើនពាន់ដើម។ លោកថា វត្តមានក្រុមហ៊ុននេះបានបំផ្លាញធនធានធម្មជាតិធំសម្បើមជាច្រើនឆ្នាំមកហើយ បណ្ដាលឲ្យប៉ះពាល់ប្រព័ន្ធសេដ្ឋកិច្ច ប្រជាជនរាប់ពាន់គ្រួសារនៅតំបន់នោះ។ ហេតុនេះពួកគេស្នើឲ្យគណៈកម្មការជាតិ ត្រូវចាត់វិធានការច្បាប់លើក្រុមហ៊ុននេះ និងត្រូវផ្ដល់សំណងប៉ះប៉ូវ ការបាត់បង់មជ្ឈដ្ឋានព្រៃឈើទៀតផង៖ «ខ្ញុំសូមស្នើសុំឲ្យគណៈកម្មការបង្ក្រាបបទល្មើសព្រៃឈើថ្នាក់ជាតិហ្នឹង ដកអាជ្ញាប័ណ្ណ ជាពិសេសក្រុមហ៊ុនស៊ីបាយអូថេក ដែលបានរំលោភធ្ងន់ធ្ងរអំពីច្បាប់ស្តារ និងដាំដើមឈើឡើងវិញ។ ក្រុមហ៊ុនបែរជាញុះញង់ឲ្យពលរដ្ឋលក់ដើមច្បោះឲ្យពួកគាត់ ហើយពួកគាត់ចាប់ផ្តើមកាប់ដើមជ័រច្បោះប្រភេទដើមឈើទាល ជាប្រភេទឈើធំៗ ហើយឥឡូវកំពុងរងគ្រោះខ្លាំងមែនទែន ចំពោះការបាត់បង់ដើមជ័រច្បោះហ្នឹង»។
ពលរដ្ឋរស់នៅជាប់ព្រៃឡង់ នៃភូមិកាំងចាម ឃុំកាំងចាម ស្រុកថាបរិវ៉ាត់ ខេត្តស្ទឹងត្រែង លោក ខេង ខូ ថ្លែងថា នៅរយៈពេលប៉ុន្មានខែចុងក្រោយនេះ អ្នកភូមិជាង ៣០គ្រួសារ បានបាត់បង់ដើមច្បោះជ័រជិត ៩០០ដើម (៨៩៥) ហើយកន្លងទៅថ្មីៗ នេះ មានដើមច្បោះជ័រជាច្រើនដើមទៀត ត្រូវបានគេកាប់ផ្តួលយកឈើធ្វើអាជីវកម្ម។ លោកថា បើទោះបីជា អ្នកភូមិបានស្រែកតវ៉ាទាក់ទិនការបាត់បង់ដើមច្បោះជ័រ ជាច្រើនសារក្តី ក៏គ្មានស្ថាប័នណាមួយ ចុះស៊ើបអង្កេត និងរកយុត្តិធម៌តាមច្បាប់ដល់អ្នកភូមិដែរ។ រីឯក្រុមហ៊ុននៅតែប៉ុនប៉ងចង់កាប់បំផ្លាញព្រៃច្បោះរបស់ពួកគេធ្វើអាជីវកម្មទាំងស្រុង៖ «សំណូមពរដល់រដ្ឋាភិបាល ដកអាជ្ញាប័ណ្ណក្រុមហ៊ុន ស៊ី បាយអូថេក អត់ឲ្យកាប់ឈើបន្តទៀតទេ ព្រោះវាចូលតំបន់ការពាររបស់ក្រសួងបរិស្ថានដែរ។ ពលរដ្ឋរងផលប៉ះពាល់គាត់ភ័យខ្លាចមិនបានដងជ័រទៀត គាត់លក់ដើមច្បោះឲ្យជនល្មើសមួយចំនួនយោងតាមឃោសនា បោកប្រាស់របស់ ពលរដ្ឋដែលទិញច្បោះជ័រទឹកហ្នឹង។ នៅតែកាប់បន្តបន្ទាប់រហូត ៨៩៥ ដើម ប៉ុន្តែក្រោយមកទៀតមានការកាប់អស់ជាច្រើនមែនទែន »។
អាស៊ីសេរីបានទាក់ទងអ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី និង អ្នកនាំពាក្យក្រសួងកសិកម្ម លោក ស្រី វុឌ្ឍី ដើម្បីសុំការបំភ្លឺទាក់ទិនបញ្ហានេះ តែទូរស័ព្ទហៅចូលច្រើនដងគ្មានអ្នកទទួលនៅថ្ងៃទី៣០ កក្កដា។
តែយ៉ាងណា លោក អេង ហ៊ី ធ្លាប់អះអាងថា ប្រសិនបើរកឃើញថា មានក្រុមហ៊ុនសម្បទានសេដ្ឋកិច្ចណាមួយ ជាប់ពាក់ព័ន្ធកាប់ឈើខុសច្បាប់នឹងដកអាជ្ញាប័ណ្ណ។
កាលពីឆ្នាំ២០១៥ និងចុងឆ្នាំ២០១៦ សហគមន៍ព្រៃឡង់ បានដាក់ញត្តិជាលើកទី២ ទៅក្រសួងបរិស្ថាន ក្រសួងកសិកម្ម និងស្ថានទួតកូរ៉េខាងត្បូង បំណងឲ្យស្ថាប័នទាំងនេះ ស៊ើបអង្កេតពីភាពមិនប្រក្រតី អាជីវកម្មឈើរបស់ក្រុមហ៊ុន ស៊ី បាយអូថេក ក៏ប៉ុន្តែគ្មានលទ្ធផល។
កាលពីខែមិថុនា ឆ្នាំ២០១២ ក្រសួងកសិកម្ម បានផ្ដល់សិទ្ធិឲ្យ ក្រុមហ៊ុន ស៊ី បាយអូថេក វិនិយោគដំណាំឧស្សាហកម្ម អាកាស្យា ឬស្ថានីយស្ដារព្រៃឈើឡើងវិញលើផ្ទៃដីចំនួនជាង ៣ម៉ឺន ៤ពាន់ហិកតារ (៣៤.០០៧) ឋិតនៅក្នុងស្រុកសំបូរ ខេត្តក្រចេះ និងមួយផ្នែកចូលដីស្រុកសៀមបូក ខេត្តស្ទឹងត្រែង។ ទន្ទឹមនឹងនេះ ក្រុមហ៊ុន ស៊ីបាយអូថេក បានធ្វើការផ្ទេរសិទ្ធបើករោងចក្រអារឈើទៅឲ្យក្រុមហ៊ុន អង្គរប្លាយវូដ (Angkor Plywood) កាលពីចុងឆ្នាំ២០១៨។
សកម្មជនបរិស្ថានដែលចុះស៊ើបអង្កេតរឿងនេះ លោក ហេង ស្រស់ រកឃើញថា ឆ្មាំអភិរក្សរបស់ក្រសួងបរិស្ថាន និងមន្ត្រីរដ្ឋបាលព្រៃឈើរបស់ក្រសួងកសិកម្ម បានឃុបឃិតគ្នា ធ្វើអាជីវកម្មឈើខ្នាតធំជាប់តំបន់ព្រៃឡង់ជាច្រើនឆ្នាំមកហើយ។ លោកថា គម្រោងអភិវឌ្ឍន៍ព្រៃឈើរបស់ក្រុមហ៊ុននេះ មិនបានស្តារព្រៃឈើស្របតាមកិច្ចសន្យាវិនិយោគនោះទេ ផ្ទុយទៅវិញបានបំផ្លាញធនធានធម្មជាតិធំធេង និងប្រើល្បិចកាប់ដើមច្បោះជ័រ ដែលជាឆ្នាំងបាយរបស់អ្នកស្រុកអស់ជាច្រើនម៉ឺនដើម តាំងពីឆ្នាំ ២០១២ រហូតមក បង្កឲ្យប៉ះពាល់សេដ្ឋកិច្ចប្រជាជនរស់នៅតំបន់ព្រៃឡង់៖ «ប្រសិនជារាជរដ្ឋាភិបាលមិនបង្ក្រាបក្រុមហ៊ុន អង្គរផ្លាយវូតនេះទេ ខាងសកម្មជនព្រៃឈើ និងពលរដ្ឋមួយចំនួននឹងចេញរបាយការណ៍ជាផ្លូវការមួយ ដែលចោទថា រដ្ឋាភិបាលជាអ្នកនៅពីក្រោយខ្នងក្រុមហ៊ុនហ្នឹង»។
សហគមន៍ព្រៃឡង់សង្កេតឃើញថា ផ្ទៃដីដែលក្រសួងកសិកម្ម ផ្ដល់សិទ្ធិឲ្យក្រុមហ៊ុនវិនិយោគមួយផ្នែកចូលដីស្រុកសៀមបូក ខេត្តស្ទឹងត្រែង មានទំហំជាង ៤ពាន់ហិកតារ ហើយក្នុងរង្វង់ផ្ទៃដីជាង ៤ពាន់ហិកតារនោះ គឺ ៧០ភាគរយជាព្រៃស្រោងសំបូរ ដើមឈើផលិតជ័រទឹក ក៏មិនត្រូវបានក្រុមហ៊ុនកាត់ឆ្វៀលប៉ះពាល់ចេញដែរ។ ក្រៅពីនេះ ទំហំព្រៃជាង ៣ម៉ឺនហិកតារ ដែលរដ្ឋាភិបាលផ្ដល់សិទ្ធិឲ្យក្រុមហ៊ុនវិនិយោគភាគច្រើន សំបូរដោយព្រៃស្រោង និងជាជម្រកសត្វព្រៃកម្ររស់នៅ មិនគួរជាកម្មវត្ថុ អនុញ្ញាតឲ្យមានវត្តមានក្រុមហ៊ុនឯកជនវិនិយោគនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។