អាមេរិក​បន្ត​អំពាវនាវ​ឲ្យ​មាន​ចំណាត់​ការ ដើម្បី​បញ្ឈប់​ការ​កាប់​ឈើ​ខុស​ច្បាប់

ដោយ សេក បណ្ឌិត
2021-03-09
Share
អាមេរិក​បន្ត​អំពាវនាវ​ឲ្យ​មាន​ចំណាត់​ការ ដើម្បី​បញ្ឈប់​ការ​កាប់​ឈើ​ខុស​ច្បាប់ រូបថតពីលើ​អាកាស បង្ហាញ​តំបន់ ដែល​គេ​កាប់​ព្រៃឈើ នៅ​ព្រៃឡង់។
រូប៖ ហ្វេសប៊ុក

សហរដ្ឋអាមេរិក​បង្ហាញ​ក្ដី​កង្វល់ ចំពោះ​ការ​បំផ្លាញ​ព្រៃ​ឈើ ដែល​ចេះ​តែ​បន្ត​កើត​មាន នៅ​តំបន់​ការពារ​នៃ​ប្រទេស​កម្ពុជា។

ក្តី​កង្វល់​នេះ​បាន​បង្ហាញ​តាម​រយៈ​សេចក្ដីថ្លែងការណ៍​របស់​ស្ថានទូត​សហរដ្ឋ​អាមេរិក នៅ​ភ្នំពេញ ស្ដីពី​ដែន​ជម្រក​សត្វ​ព្រៃ​ព្រៃ​ឡង់ កាល​ពី​ថ្ងៃ​ទី៨ មីនា ។

ស្ថានទូត​សហរដ្ឋអាមេរិក កត់​សម្គាល់​ឃើញ​ថា ការ​បាត់​បង់​ព្រៃ​ឈើ​នៅ​ក្នុង​តំបន់​ព្រៃ​ឡង់ និង​នៅ​ទូទាំង​ប្រទេស​កម្ពុជា មាន​ការ​ទាក់ទង​នឹង​កត្តា​មួយ​ចំនួន ដែល​រួម​មាន​ការ​ពង្រឹង​ការ​អនុវត្ត​ច្បាប់​នៅ​ខ្សោយ និង​ប្រព័ន្ធ​អភិបាលកិច្ច​គ្មាន​ភាព​ច្បាស់លាស់។

ទីភ្នាក់ងារ​ផ្តល់​ជំនួយ​សហរដ្ឋ​អាមេរិក USAID តែងតែ​ធ្វើ​ការ ដើម្បី​ដោះ​ស្រាយ​បញ្ហា​ប្រឈម​ទាំង​នេះ ដោយ​លើក​កម្ពស់​សមត្ថភាព​បច្ចេកទេស​នៅ​គ្រប់​លំដាប់ថ្នាក់ ជំរុញ​ឱ្យ​មាន​តម្លាភាព និង​គណនេយ្យភាព គាំទ្រ​ការ​ចូល​រួម​យ៉ាង​សកម្ម​របស់​សហគមន៍ ហើយ​ផ្តល់​ជម្រើស​ផ្សេង​ក្នុង​ការ​ប្រកប​ជីវភាពរស់នៅ តាម​រយៈ​គម្រោង​ព្រៃ​ឡង់​បៃតង (GPL)។ ជាមួយ​គ្នា​នោះ USAID ក៏​បាន​ជួយ​សហគមន៍​មូលដ្ឋាន ដូច​ជា​សមាជិក​នៃ​បណ្ដាញ​សហគមន៍​ព្រៃ​ឡង់ (PLCN) នៅ​ក្នុង​ការងារ​ល្បាត​រួម​គ្នា​នៅ​ព្រៃ​ឡង់ ជាមួយ​ក្រសួង​បរិស្ថាន​កន្លង​មក។

សេចក្ដីថ្លែងការណ៍​ដដែល​ឲ្យ​ដឹង​ទៀត​ថា ឯក​អគ្គ​រដ្ឋទូត​សហរដ្ឋ​អាមេរិក ព្រម​ទាំង​ប្រធាន​នៃ​ទីភ្នាក់ងារ​ផ្តល់​ជំនួយ USAID របស់​ស្ថានទូត​សហរដ្ឋ​អាមេរិក បាន​ជួប​ជាមួយ​លោក​រដ្ឋមន្ត្រី​ក្រសួងបរិស្ថាន និង​មន្ត្រី​ជាន់​ខ្ពស់​របស់​លោក ដើម្បី​ពិភាក្សា​ពី​ការ​បាត់​បង់​ព្រៃ​ឈើ និង​ការ​រឹតត្បិត​មិន​ឲ្យ​ប្រជាជន​កម្ពុជា​ចូល​ក្នុង​តំបន់​ការពារ ដើម្បី​តាម​ដាន​សកម្មភាព​ទាក់ទង​នឹង​ព្រៃ​ឈើ។ ទីភ្នាក់ងារ USAID បាន​ផ្តល់​ដល់​ក្រសួង​បរិស្ថាន​នូវ​ព័ត៌មាន ជា​ច្រើន​លើក​មក​ហើយ ទាក់ទង​នឹង​សកម្មភាព​កាប់​ឈើ​ខុស​ច្បាប់ នៅ​ដែន​ជម្រក​សត្វ​ព្រៃ​ឡង់ ដែល​បាន​នាំ​ឲ្យ​អាជ្ញាធរ​ពាក់ព័ន្ធ​ធ្វើ​ការ​ស៊ើប​អង្កេត។ 

រដ្ឋាភិបាល​សហរដ្ឋអាមេរិក​នឹង​បន្ត​អំពាវនាវ​ឲ្យ​មាន​ចំណាត់​ការ ដើម្បី​បញ្ឈប់​ការ​កាប់​ឈើ​ខុស​ច្បាប់ ហើយ​អភិរក្ស​ជីវៈ​ចម្រុះ​ដ៏​ល្អ​នៅ​ព្រៃ​ឡង់ និង​នៅ​ដែន​ជម្រក​ដទៃ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល