យុវជនអង្គការមាតាធម្មជាតិនឹងស្លៀកពាក់សំលៀកបំពាក់ពណ៌សក្នុងយុទ្ធនាការបំបួសដើមឈើនៅខេត្តព្រះសីហនុ នៅថ្ងៃទី១៥ ធ្នូស្អែកនេះ។ តាមគម្រោង ក្រុមយុវជនចលនាមាតាធម្មជាតិ នឹងចាប់ផ្ដើមពីម៉ោង ៩ព្រឹក ដោយដង្ហែក្បួនពីរង្វង់មូលវិមានឯករាជ្យ ជាកន្លែងត្រូវបំបួសដើមឈើចំនួន ៩ដើម ដែលដើមឈើទាំងនោះបានបន្សល់ទុកតាំងសម័យ សម្តេច សីហនុ។
យុវជនអង្គការមាតាធម្មជាតិលើកឡើងថា អ្វីដែលជំរុញឲ្យពួកគេនាំគ្នាទៅបំបួសដើមឈើទាំងនោះ គឺក្រោយពីក្រុមយុវជនទទួលបានព័ត៌មានថា អាជ្ញាធរគ្រោងនឹងកាប់ដើមឈើទាំងនោះចោល ដើម្បីពង្រីកផ្លូវ។
យុទ្ធនាការនេះធ្វើឡើងក្នុងគោលបំណង ផ្សព្វផ្សាយដល់ប្រជាពលរដ្ឋទូទៅ ជាពិសេស ប្រជាពលរដ្ឋក្នុងខេត្តព្រះសីហនុ ឲ្យចេះស្រឡាញ់ និងការពារដើមឈើ ដែលនៅសេសសល់ ដាស់ស្មារតីប្រជាពលរដ្ឋខ្មែរទាំងមូលឲ្យភ្ញាក់រលឹក ចំពោះបញ្ហាបាត់បង់ព្រៃឈើនៅប្រទេសកម្ពុជា។
ពិធីបំបួសដើមឈើនេះ ក៏មានព្រះសង្ឃនិមន្តចូលរួមផងដែរ ដើម្បីធ្វើពិធីសាសនាផងដែរ។ យុវជនអង្គការ មាតាធម្មជាតិ រំពឹងថា អភិបាលខេត្តព្រះសីហនុ លោក គួច ចំរើន នឹងរិះរកមធ្យោបាយថែរក្សាដើមឈើទាំងនេះឲ្យបានគង់វង្ស បើទោះជាត្រូវពង្រីកផ្លូវក្នុងខេត្តនេះយ៉ាងណាក្តី៕
(ក្រុមយុវជនចលនាមាតាធម្មជាតិ និងព្រះសង្ឃប្រជុំពិភាក្សាគ្នា មុននឹងចាប់ផ្ដើមបំបួសដើមឈើនៅថ្ងៃទី១៥ ខែធ្នូ ឆ្នាំ២០១៩។ រូប៖ អង្គការមាតាធម្មជាតិ)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។